Unda Bo Por Haña Berdadero Felicidad?

HOPI hende ta pensa cu felicidad por ser hañá dor di adkerí posesionnan material. Kico abo ta pensa? Aunke cosnan material siguramente por contribuí na nos felicidad, nan no ta garantis’é; comodidadnan físico no ta edificá fe tampoco ni satisfacé necesidadnan spiritual.

Den su Sermon Riba Ceru, Jesucristo a bisa: “Felis ta esnan cu ta conciente di nan necesidad spiritual, ya cu e reino di shelu ta pertenecé na nan.” (Mateo 5:3) Jesus a bisa tambe: “Vigilá contra tur sorto di cudishi, pasobra asta ora un persona tin na abundancia, su bida no ta resultá dje cosnan cu e ta poseé.”—Lucas 12:15.

Hopi hende ta busca felicidad dor di enbolbé nan mes den sex ilegal i otro “obranan di carni.” (Galationan 5:19-21) Sin embargo, entregando na placernan sensual no ta trece felicidad berdadero i duradero. Realmente, esnan cu ta practicá cosnan asina lo no heredá e Reino di Dios.—1 Corintionan 6:9, 10.

Otronan ta kere cu felicidad ta dependé di loke nan ta di paden i p’esei ta purba aumentá nan mes balor propio. Biblioteca i librerianan ta yená cu buki di guia pa desaroyo i adelanto personal, pero publicacionnan asina no a duna hende felicidad duradero. Pues, anto, unda nos por haña berdadero felicidad?

Pa ta berdaderamente felis, nos tin cu reconocé nos necesidad spiritual inherente. Jesus a bisa: “Felis ta esnan cu ta conciente di nan necesidad spiritual.” Naturalmente, djis comprendé e necesidad aki anto keda sin haci nada tocante dje lo no yuda nos cu nada. Pa ilustrá: Kico lo sosodé cu un coredor di máraton kende despues dje careda ta keda sin respondé n’e curpa su deseo intenso pa awa? Lo e no sufri pronto di deshidratacion i otro consecuencianan serio? Di igual manera, si nos keda sin respondé na nos necesidad pa alimento spiritual, cu tempu nos lo marchitá spiritualmente. Esaki lo pone nos perde goso i felicidad.

Jesus a reconocé su necesidad spiritual plenamente, studiando i meditando regularmente riba e Palabra di Dios. E por a localisá i lesa seccionnan dje Scritura Sagrado cu facilidad, i el a siña otronan pa haci mescos. (Lucas 4:16-21; compará cu Efesionan 4:20, 21.) Tambe Jesus a compará hacimentu dje boluntad di su Tata celestial cu cuminda. Hacimentu dje boluntad di Dios a dun’é hopi felicidad.—Juan 4:34.

Sí, bo no por obtené berdadero felicidad dor di adkerí cosnan material; felicidad no ta resultá tampoco dor di complacé e carni pecaminoso. Berdadero felicidad ta un condicion di curason, basá riba fe genuino i un bon relacion cu Jehova Dios. Apropiadamente, anto, e salmista David a canta: “Felis ta e pueblo kende su Dios ta Jehova.”—Salmo 144:15b.

[Plachi na página 23]

Fe i un bon relacion cu Dios lo duná bo berdadero felicidad