Tuma Curashi Segun Cu Liberacion Ta Yega Cerca

“‘Mi ta cu bo,’ ta e expresion di Jehova, ‘pa librá bo.’” —JEREMIAS 1:19.

1, 2. Pakico e famia humano tin mester di liberacion?

LIBERACION! Ki un palabra consolador! Ser librá ta nificá ser rescatá, librá for di un situacion desfaborabel i infelis. Esaki ta incluí e idea di ser trecí den un condicion muchu mas mihó i muchu mas felis.

² Ki desesperadamente e famia humano tin mester di un liberacion asina n’e tempu aki! Tur caminda hende ta oprimí i desanimá dor di problemanan difícil—problemanan económico, social, físico, mental i emocional. E gran mayoria ta disgustá i desapuntá cu e manera cu mundu ta bayendo i lo kier pa cos cambia bira mihó.—Isaías 60:2; Mateo 9:36.

“Tempu Crítico, Duru pa Trata Cuné”

3, 4. Pakico tin un necesidad mas grandi pa liberacion awor?

³ Ya cu e siglo 20 aki a experenciá mas sufrimentu cu ningun otro, tin un mayor necesidad pa liberacion awor mas cu nunca promé. Awe, mas cu mil miyon hende ta biba den pobresa extremo, i e cantidad ei ta aumentá cu rond di 25 miyon pa aña. Tur aña rond di 13 miyon mucha ta muri di malnutricion of otro causanan relacioná cu pobresa—mas cu 35.000 pa dia! I miyones di hende grandi ta muri prematuramente di vários enfermedad.—Lucas 21:11; Revelacion 6:8.

⁴ Guera i disturbionan civil a causa sufrimentu inmenso. E buki Death by Government (Morto Causá pa Gobiernu) ta bisa cu guera, conflicto étnico i religioso, i asesinato masal cu gobiernunan a causa na nan propio ciudadanonan a “mata mas cu 203 miyon hende den e siglo aki.” E ta sigui bisa: “E berdadero cantidad di esnan matá por ta casi 360 miyon hende. Ta como si fuera e rasa humano a ser ruiná dor di un Plaga Pretu moderno. I esei en berdad a sosodé, pero no dor di bacteria, sino dor di un plaga di Poder.” E escritor Richard Harwood a comentá: “E gueranan bárbaro di siglonan pasá tabata manera bringamentunan riba caya na comparacion.”—Mateo 24:6, 7; Revelacion 6:4.

5, 6. Kico ta haci nos tempu asina angustioso?

⁵ Ademas dje condicionnan angustioso di añanan recien tin e aumento spantoso den crímen violento, inmoralidad i kiebro di famia. Ex-secretario di Educacion di Merca, William Bennett, a remarcá cu den 30 aña e poblacion mericano a crece cu 41 porciento, pero crímen violento a crece cu 560 porciento, yu ilegítimo cu 400 porciento, divorcio cu 300 porciento i suicidio di tiener cu 200 porciento. Profesor John DiIulio, Jr., di Universidad di Princeton, a spierta dje cantidad creciente di “super-devoradornan” hóben cu ta “mata, asaltá, violá, horta, cometé ladronicia i causa disturbionan serio den comunidad. Nan no tin miedu dje stigma di aresto, dje dolor di encarcelacion, of dje remordimentu di concenshi.” Den e pais ei, homicidio awor ta e segundo causa principal di morto entre esnan di 15 pa 19 aña di edad. I mas mucha bou di cuater aña ta muri di maltrato cu di enfermedad.

⁶ Tal crímen i violencia no ta limitá na un solo nacion. Mayoria pais ta informá di tendencianan similar. Loke ta contribuí na esaki ta e ola grandi di uso di droga ilegal cu ta corumpí miyones di hende. E corant Sydney Morning Herald di Australia a bisa: “Traficacion internacional di droga a bira e segundo negoshi mas lucrativo di mundu despues di comercio di arma.” Un otro factor ta e violencia i inmoralidad cu awor ta saturá television. Den hopi pais, pa e tempu cu un mucha alcansá e edad di 18, el a mira dies di miles di actonan violento na television i incontabel actonan inmoral. Esaki ta un influencia coruptivo significativo, ya cu nos personalidad ta ser formá dor di loke nos ta alimentá nos mente regularmente cuné.—Romanonan 12:2; Efesionan 5:3, 4.

7. Con Bijbel a profetisá dje mal condicionnan actual?

⁷ Profecia di Bijbel a predicí cu exactitud e tendencia spantoso dje sucesonan aki den nos siglo. El a bisa cu lo tin guera mundial, epidemia di malesa, scarcedad di cuminda i aumento di maldad. (Mateo 24:7-12; Lucas 21:10, 11) I ora nos considerá e profecia registrá na 2 Timoteo 3:1-5, e ta manera ora bo ta scucha informenan diario di noticia. E ta identificá nos era como “e último dianan” i ta describí hende como ‘stimador di nan mes, stimador di placa, desobediente na mayornan, desleal, sin cariño natural, sin dominio propio, feros, hinchá cu orguyo, stimador di placer mas bien cu stimador di Dios.’ Esei ta exactamente loke e mundu ta awe. Manera William Bennett a admití: “Tin simplemente muchu hopi señal di . . . e decadencia di civilisacion.” Asta a ser bisá cu civilisacion a terminá cu e promé guera mundial.

8. Pakico Dios a trece e Diluvio den tempu di Noe, i con esaki ta relacioná cu nos tempu?

⁸ E situacion awor ta asta mas pió cu esun promé cu e Diluvio di tempu di Noe, ora “e tera a yena cu violencia.” E tempu ei, hende en general a nenga di repentí di nan mal camindanan. P’esei, Dios a bisa: “E tera ta yen di violencia como resultado di nan; i mira, mi ta bai ruiná nan.” E Diluvio a caba cu e mundu violento ei.—Génesis 6:11, 13; 7:17-24.

No Tin Liberacion dor di Hende

9, 10. Pakico nos no mester acudí na hende pa liberacion?

⁹ Esfuersonan di hende por libra nos for dje mal condicionnan aki? E Palabra di Dios ta contestá: “No pone bo confiansa den e noblenan, ni den e yu di hende terenal, na ken ningun salbacion ta pertenecé.” “No ta pertenecé na hende cu ta canando pa ni sikiera dirigí su paso.” (Salmo 146:3; Jeremías 10:23) Miles di aña di historia a verificá e berdadnan ei. Hende a purba tur sistema político, económico i social imaginabel, pero condicionnan ta empeorá. Si tabatin un solucion humano, pa awor esei lo mester a sali na cla caba. Na lugá di esei, e realidad ta cu “hende a dominá hende pa su perhuicio.”—Eclesiástes 8:9; Proverbionan 29:2; Jeremías 17:5, 6.

¹⁰ Un par di aña pasá, ex-consehero di siguridad nacional di Merca, Zbigniew Brzezinski, a bisa: “E conclusion inevitabel di cualkier análisis obhetivo di tendencianan mundial ta cu disturbio social, instabilidad político, crísis económico i friccion internacional probablemente lo bira mas extenso.” El a agregá: “E menasa cu ta confrontá humanidad [ta] anarkia mundial.” E evaluacion ei di condicionnan di mundu ta asta mas válido awe. Comentando riba e era aki di aumento den violencia, un editorial den e corant Register di New Haven, Connecticut, Merca, a declará: “E situacion ta demasiado fuera di nos control pa por pone un paro na dje.” No, lo no tin un paro n’e deterioro dje mundu aki, pasobra e profecia tocante e “último dianan” aki a bisa tambe: “Hende malbado i impostornan lo bai di malu pa pió, engañando i siendo engañá.”—2 Timoteo 3:13.

11. Pakico esfuersonan humano lo no cambia direccion dje condicionnan cu ta empeorando?

¹¹ Hende no por cambia e direccion dje tendencianan aki pasobra Satanas ta “e dios dje sistema di cosnan aki.” (2 Corintionan 4:4) Sí, “henter e mundu ta drumí den poder dje malbado.” (1 Juan 5:19; mira tambe Juan 14:30.) Cu bon motibu Bijbel ta bisa di nos tempu: “Ai dje tera i di laman, pasobra e Diabel a baha cerca boso, teniendo gran rabia, sabiendo cu e tin un periodo di tempu corticu.” (Revelacion 12:12) Satanas sa cu su mando i su mundu ta cerca di yega nan fin, p’esei e ta manera “un leon cu ta gruña, buscando un hende pa devorá.”—1 Pedro 5:8.

Liberacion Ta Cerca—Pa Ken?

12. Pa ken liberacion ta yegando cerca?

¹² E condicionnan mas i mas difícil riba tera ta evidencia notabel cu un cambio grandísimo—en berdad, un liberacion magnífico—ta cerca! Pa ken? Liberacion ta yegando cerca pa esnan cu ta presta atencion n’e señalnan di spiertamentu i cu ta tuma accion di acuerdo cu eseinan. Promé Juan 2:17 ta mustra loke nos tin cu haci: “Mundu [Satanas su sistema di cosnan] ta pasa bai i tambe su deseo, pero esun cu haci e boluntad di Dios ta permanecé pa semper.”—Mira tambe 2 Pedro 3:10-13.

13, 14. Con Jesus a enfatisá e necesidad pa keda lantá?

¹³ Jesus a profetisá cu e sociedad corupto djawe pronto lo ser barí den un tempu di dificultad “tal como no a sosodé desde principio di mundu te awor, no, ni lo no sosodé atrobe.” (Mateo 24:21) P’e motibu ei el a spierta: “Presta atencion na boso mes pa boso curason nunca bira cargá debí na comementu di mas i bebementu di mas i ansiedadnan di bida, i di ripiente e dia ei ta riba boso instantáneamente manera un las. Pasobra lo e bini riba tur esnan cu ta biba riba e cara di tur e tera. Keda lantá, anto, na tur tempu haciendo súplica pa boso por logra scapa di tur e cosnan aki cu ta destiná pa sosodé.”—Lucas 21:34-36.

¹⁴ Esnan cu ta “presta atencion” i ta “keda lantá” lo busca pa sa kico ta e boluntad di Dios anto ta hacié. (Proverbionan 2:1-5; Romanonan 12:2) Esakinan ta esnan cu lo “logra scapa” e destruccion cu lo bini pronto riba e sistema di Satanas. I nan por tin pleno confiansa cu nan lo ser librá.—Salmo 34:15; Proverbionan 10:28-30.

E Libertador Principal

15, 16. Ken ta e Libertador principal, i pakico nos ta sigur cu su huicionan lo ta hustu?

¹⁵ Pa Dios su sirbidornan ser librá, Satanas i henter su sistema mundial di cosnan mester ser eliminá. Esaki ta rekerí un fuente di liberacion muchu mas poderoso cu ser humano. E fuente ei ta Jehova Dios, e Soberano Supremo, e Creador todopoderoso dje universo asombroso. E ta e Libertador principal: “Ami—ami ta Jehova, i fuera di mi no tin salbador.”—Isaías 43:11; Proverbionan 18:10.

¹⁶ Den Jehova tin e máximo grado di poder, sabiduria, husticia i amor. (Salmo 147:5; Proverbionan 2:6; Isaías 61:8; 1 Juan 4:8) Pues ora e ta ehecutá su huicionan, nos por ta sigur cu su accionnan lo ta hustu. Abraham a puntra: “E Hues di tur e tera no ta bai haci loke ta recto?” (Génesis 18:24-33) Pablo a sclama: “Tin inhusticia cu Dios? Cu esei nunca yega di ta asina!” (Romanonan 9:14) Juan a skirbi: “Sí, Jehova Dios, e Todopoderoso, berdadero i hustu bo decisionnan hudicial ta.”—Revelacion 16:7.

17. Con Jehova su sirbidornan den pasado a expresá confiansa den su promesanan?

¹⁷ Ora Jehova ta primintí liberacion, sin faya lo e cumpli cuné. Hosué a bisa: “Ningun promesa a faya di tur e bon promesa cu Jehova a haci.” (Hosué 21:45) Sálomon a declará: “Ni un solo palabra di tur su bon promesa cu el a primintí a faya.” (1 Reynan 8:56) Apostel Pablo a mencioná cu Abraham “no a vacilá den un falta di fe, . . . plenamente convencí cu loke [Dios] a primintí e por a haci tambe.” Sara, di igual manera, a “considerá fiel esun [Dios] cu a primintí.”—Romanonan 4:20, 21; Hebreonan 11:11.

18. Pakico Jehova su sirbidornan awe por tin sigur cu nan lo ser librá?

¹⁸ Distinto for di hende, Jehova ta completamente digno di confiansa, fiel na su palabra. “Jehova di ehércitonan a hura bisando: ‘Siguramente net manera mi a calculá, asina mester sosodé; i net manera mi a consehá, esei ta loke lo ser realisá.’” (Isaías 14:24) Pues ora Bijbel ta bisa cu “Jehova sa con pa libra hende di debocion piadoso for di prueba, pero pa reservá hende inhustu p’e dia di huicio pa ser cortá,” nos por tin pleno confiansa cu esaki lo sosodé. (2 Pedro 2:9) Asta ora nan ser menasá cu destruccion dor di enemigunan poderoso, Jehova su sirbidornan ta tuma curashi debí na Jehova su actitud, reflehá den su promesa na un di su profetanan: “Nan siguramente lo bringa contra bo, pero nan lo no prevalecé contra bo, pasobra ‘Mi ta cu bo,’ ta e expresion di Jehova, ‘pa librá bo.’”—Jeremías 1:19; Salmo 33:18, 19; Tito 1:2.

Liberacionnan den Pasado

19. Con Jehova a libra Lot, cu ki paralelo pa nos tempu?

¹⁹ Un recuento di algun di Jehova su actonan di salbacion di pasado lo animá nos mashá. Por ehempel, Lot tabata “masha afligí” p’e maldad di Sódoma i Gomora. Pero Jehova a tuma nota di “e sclamacion di keho” contra e stadnan ei. N’e tempu apropiado, el a manda mensaheronan pa urgi Lot i su famia pa sali mesora for dje área ei. E resultado? Jehova “a libra hustu Lot,” “reduciendo e stadnan Sódoma i Gomora na shinishi.” (2 Pedro 2:6-8; Génesis 18:20, 21) Awe, tambe, Jehova ta tuma nota dje sclamacion di keho relacioná cu e maldad grave dje mundu aki. Ora su mensaheronan di tempu actual completá nan trabou urgente di testificacion n’e grado cu e ta deseá, lo e actua contra e mundu aki i libra su sirbidornan manera el a haci cu Lot.—Mateo 24:14.

20. Describí con Jehova a libra Israel di antigwedad for di Egipto.

²⁰ Den Egipto di antigwedad miyones dje pueblo di Dios tabata sclabisá. Jehova a bisa tocante nan: “Mi a tende nan sclamacion . . . Mi conocé bon e dolor cu nan ta sufri. I mi ta procedé di baha pa libra nan.” (Exodo 3:7, 8) Sin embargo, despues cu Fárao a laga e pueblo di Dios bai, el a cambia di idea i a sali nan tras cu su ehército poderoso. E israelitanan a parce di ta atrapá na Laman Corá. Sin embargo, Moises a bisa: “No tene miedu. Para firme i mira e salbacion di Jehova, cu lo e obra pa boso awe.” (Exodo 14:8-14) Jehova a parti Laman Corá, i e israelitanan a scapa. E ehércitonan di Fárao a baha bai tras di nan, pero Jehova a usa su poder di manera cu “e laman a cubri nan; nan a sink manera chumbu den e awanan mahestuoso.” Despues di esei, Moises a alegrá den cantica na Jehova: “Ken ta manera abo, cu ta resultá di ta poderoso den santidad? Esun cu mester ser temé cu cantica di alabansa, Esun cu ta haciendo maraviya.”—Exodo 15:4-12, 19.

21. Con e pueblo di Jehova a ser salbá for di Amon, Moab i Seir?

²¹ Na un otro ocasion, e nacionnan enemigu, Amon, Moab i Seir (Edom) a menasá Jehova su pueblo cu destruccion. Jehova a bisa: “No tene miedu ni ser terorisá pa motibu dje multitud grandi aki [di enemigu]; pasobra e bataya no ta di boso, sino di Dios. . . . Boso lo no tin nodi bringa . . . Para ketu i mira e salbacion di Jehova na fabor di boso.” Jehova a libra su pueblo dor di pasa na hinca confusion den e filanan dje enemigu di manera cu nan a caba cu otro.—2 Crónicanan 20:15-23.

22. Con Jehova a libra Israel milagrosamente for di man di Asiria?

²² Ora e Poder Mundial asirio a bini contra Jerusalem, Rey Senákerib a haci mofa di Jehova bisando e hendenan riba e muraya: “Ken tin entre tur e diosnan di e paisnan aki [cu mi a derotá] cu a libra nan pais for di mi man di manera cu Jehova mester libra Jerusalem for di mi man?” El a bisa e sirbidornan di Dios: “No laga Ezekías pone boso confia den Jehova, bisando: ‘Sin falta Jehova lo libra nos.’” E ora ei Ezekías a haci oracion fervientemente pa liberacion, “pa tur e reinonan dje tera por sa cu abo, O Jehova, so ta Dios.” Jehova a mata 185.000 soldat asirio, i e sirbidornan di Dios a ser librá. Mas despues, ora Senákerib tabata adorando su diosnan falsu, su yunan a asesin’é.—Isaías, capítulo 36 i 37.

23. Ki preguntanan tocante liberacion awe mester ser contestá?

²³ Nos siguramente por tuma curashi ora nos mira con Jehova den pasado a libra su pueblo milagrosamente. Kico di awe? Den ki situacion peligroso su fiel sirbidornan lo drenta pronto cu lo rekerí su liberacion milagroso? Pakico el a warda te awor pa trece nan liberacion? Ki cumplimentu lo tin di Jesus su palabranan: “Ora e cosnan aki cuminsá sosodé, lanta stret boso mes i hisa boso cabes, pasobra boso liberacion ta yegando cerca”? (Lucas 21:28) I con liberacion lo bini p’e sirbidornan di Dios cu a muri caba? E siguiente artículo lo examiná e preguntanan aki.

Preguntanan di Repaso

◻ Pakico tin un gran necesidad pa liberacion?

◻ Pakico nos no mester acudí na hende pa liberacion?

◻ Pa ken liberacion ta cerca?

◻ Pakico nos por tin confiansa den liberacion di Jehova?

◻ Ki ehempelnan di liberacionnan di pasado ta un animacion pa nos?

[Plachi na página 10]

Abraham tabata entre esnan cu tabatin pleno confiansa den Jehova