Mi A Siña Berdad di Bijbel na Rumania

MANERA GOLDIE ROMOCEAN A RELAT’E

Na 1970, mi a bishitá mi famianan na Rumania pa promé biaha den casi 50 aña. Hende tabata biba bou di un régimen comunista opresivo, i continuamente mi a ser spiertá pa tene cuidou kico mi tabata bisa. Anto, pará den e oficina di gobiernu na mi pueblito natal, e funcionario a instá mi pa bandoná e pais inmediatamente. Promé cu mi splica pakico, lagá mi conta con mi a siña berdad di Bijbel na Rumania.

MI A nace dia 3 di mart, 1903, den e pueblito di Ortelec parti nortwest di Rumania cerca dje pueblo di Zalău. Nos tabata biba den un parti masha bunita. E awa i aire tabata limpi. Nos tabata planta nos mes cuminda i no tabata falta nada materialmente. Den mi promé añanan di hubentud, e pais tabata na pas.

Hende tabata masha religioso. De echo, nos famia a pertenecé na tres diferente religion. Un di mi welanan tabata católico ortodox, e otro adventista, i mi mayornan tabata bautista. Debí cu mi no tabata di acuerdo cu ningun di nan religionnan, mi famia a bisa cu lo mi a bira ateista. ‘Si tin un solo Dios,’ mi a pensa, ‘lo mester tin solamente un religion—no tres den un famia.’

Cosnan cu mi a mira den religion a perturbá mi. Por ehempel, e pastor tabata bishitá casnan pa colectá placa pa misa. Ora hende no tabatin placa pa duna, e tabata coge nan mihó dekennan di lana bai cuné. Den e iglesia católico, mi a mira mi wela hinca rudia pa resa dilanti un plachi di Maria. ‘Pakico resa na un plachi?’ mi tabata pensa.

Tempunan Difícil

Tata a bai Merca na 1912 pa gana placa pa paga un debe. No hopi tempu despues guera a cuminsá, i e hombernan di nos pueblito a bai pa bringa como soldat—solamente hende muher, mucha i hombernan bieu a keda tras. Nos pueblito a bin bou di mando húngaro pa un tempu, pero despues soldatnan rumano a regresá i a tuma e pueblito bek. Nan a manda nos sali mesora. Sin embargo, den e ansha i confusion di pone pertenencianan i yunan chikitu den un garoshi di bue, nan a lagá mi atras. Bo mester comprendé cu mi tabata e mayó di cincu yu.

Mi a core bai na un bisiña, un homber bieu cu a keda tras, i e di: “Bai cas. Lok bo portanan, i no laga ningun hende drenta.” Mi a obedecé un bes. Despues di a come poco sopi di galiña i colo yená cu a keda tras den e ansha pa bai, mi a hinca rudia na mi cama i a haci oracion. Pronto mi a bai un soño profundo.

Ora mi a habri mi wowonan, tabata di dia, i mi di: “O, danki, Dios! Mi ta bibu!” E murayanan tabata yen di buracu di bala, como cu henter anochi tabatin tiramentu. Ora Mama a realisá cu mi no tabata huntu cu nan den e siguiente pueblito, el a manda e hóben George Romocean, kende a hañá mi i a hibá mi cerca nan. No a tarda hopi cu nos por a bolbe bek na nos pueblito natal i sigui biba ei.

Mi Deseo pa Berdad di Bijbel

Mi mama tabata kier pa mi bautisá como bautista, pero ami no kier a haci esei pasobra mi no por a kere cu un Dios amoroso ta kima hende pa semper den fiernu. Tratando na splica esei, Mama di: “Wel, si nan ta mal hende.” Pero mi a contestá: “Si nan ta mal hende, mata nan, pero no torturá nan. Ami lo no torturá ni un cachó of pushi.”

Mi ta corda cu riba un bunita dia di primavera, ora mi tabatin 14 aña di edad, Mama a mandá mi hiba algun baca den sabana pa come yerba. Drumí riba e yerba cantu di un riu, cu un selva den fondo, mi a wak na shelu i a bisa: “Dios, mi sa cu bo t’ei; pero mi no ta gusta ningun dje religionnan aki. Bo mester tin un religion bon.”

Realmente mi ta kere cu Dios a tende mi oracion pasobra e mésun zomer ei di 1917, dos Studiante di Bijbel (manera Testigonan di Jehova tabata yama e tempu ei) a bini na nos pueblito. Nan tabata colporteur, of ministernan di tempu completo, anto nan a bini n’e iglesia bautista net ora misa tabata den.

Berdad di Bijbel Ta Plama na Rumania

Un par di aña promé, na 1911, Carol Szabo i Josif Kiss, kendenan a bira Studiantenan di Bijbel na Merca, a regresá Rumania pa introducí berdad di Bijbel einan. Nan a establecé na Tîrgu-Mureş, ménos cu 160 kilometer zuidoost di nos pueblito. Dentro di un par di aña, literalmente cientos di hende a reaccioná faborablemente n’e mensahe di Reino i a aceptá e ministerio cristian.—Mateo 24:14.

Wel, ora e dos hóben Studiantenan di Bijbel a bini n’e iglesia bautista den nos pueblito di Ortelec, George Romocean, aunke solamente 18 aña bieu, tabata dirigiendo e servicio religioso i tabata tratando na splica e nificacion di Romanonan 12:1. Finalmente, un dje hóben colporteurnan a lanta para i a bisa: “Rumannan, amigunan, kico apostel Pablo ta tratando di bisa nos den e texto aki?”

Ora mi a tend’é papia, mi tabata asina excitá! Mi a pensa, ‘E hombernan aki mester sa con pa splica e Bijbel.’ Pero mayoria di esnan presente a grita: “Profetanan falsu! Nos sa ken boso ta!” Despues a surgi un bochincha. Pero e ora ei George su tata a lanta para i a bisa: “Boso tur cera boso boca! Ki clase di spiritu esaki ta—e clase cu ta bini for di un botter di bebida? Si e hombernan aki tin algu di bisa nos i boso no kier tende, ami ta invitá nan pa bin mi cas. Ken cu kier bin ta bon biní.”

Excitá, mi a core bai cas i a conta mi Mama loke a pasa. Ami tabata un di esnan cu a aceptá e invitacion pa bai n’e cas di famia Romocean. Ki emocioná mi tabata e anochi ei pa siña for di Bijbel cu no tin ningun fiernu di candela i pa mira den mi propio Bijbel rumano e nomber di Dios, Jehova! E colporteurnan a haci areglo pa un Studiante di Bijbel bishitá e cas di famia Romocean tur diadomingo pa siña nos. E siguiente zomer, na edad di 15 aña mi a bautisá como símbolo di mi dedicacion na Jehova.

Cu tempu, prácticamente henter e famia Prodan i e famia Romocean a aceptá e berdad di Bijbel i a dedicá nan bida na Jehova. Hopi otro hende for di nos pueblito tambe a haci esei, incluyendo e pareha hóben kende nan cas anteriormente a sirbi como e iglesia bautista. Despues nan a combirtié den un lugá p’e Studiantenan di Bijbel reuní pa studio. Berdad bíblico a plama rápidamente den pueblitonan cercano, i pa 1920 tabatin rond di 1.800 publicador di Reino na Rumania!

Pa Merca

Nos tabata ansioso pa compartí loke nos a siña cu mi tata, Peter Prodan. Pero, asombrosamente, promé cu nos tabatin chens di skirbi, nos a ricibí un carta di dje bisando nos cu el a bira un sirbidor bautisá di Jehova. El a studia cu e Studiantenan di Bijbel na Akron, Ohio, i e tabata kier pa nos tur djoin e na Merca. Sin embargo, Mama a nenga di bandoná Rumania. Asina, na 1921, usando e placa cu Tata a mandá mi, mi a djoin e na Akron. George Romocean i su ruman homber ya caba a imigrá pa Merca e aña anterior.

Ora mi a yega cu barcu na Ellis Island, New York, e funcionario di imigracion no tabata sa un ekivalente na ingles pa mi nomber, Aurelia, pues e di: “Bo yama Goldie.” I esei a bira mi nomber desde e dia ei. Poco despues, dia 1 di mei, 1921, ami cu George Romocean a casa. Un aña i picu despues, Tata a regresá Rumania i na 1925 a trece bek na Akron mi ruman muher chikitu, Mary. Despues Tata a regresá Rumania pa ta huntu cu Mama i e resto dje famia.

Nos Ministerio den Cuminsamentu na Merca

George tabata un sirbidor di Jehova masha leal i dedicá. Entre 1922 i 1932, nos a ser bendicioná cu cuater bunita yu muher —Esther, Anne, Goldie Elizabeth i Irene. Un congregacion rumano a cuminsá na Akron, i na principio e reunionnan a ser tené den nos cas. Cu tempu, cada seis luna un representante for dje sede mundial di Studiantenan di Bijbel na Brooklyn, New York, a bishitá nos congregacion i a hospedá cerca nos.

Hopi diadomingo nos a dedicá henter dia na e trabou di predicá. Nos tabata paketá nos tas i un almuerso, hinca e muchanan den nos Ford Model T, i tabata pasa henter dia predicando den teritorio den cunucu. Anto anochi, nos tabata asistí n’e Studio di Toren di Vigilancia. Nos yu muhernan a bin stima e trabou di predicá. Na 1931, mi tabata presente na Columbus, Ohio, ora e Studiantenan di Bijbel a adoptá nan nomber distintivo, Testigonan di Jehova.

Coreccion cu Mi Tabatin Mester

Un par di aña despues, mi a bira rabiá riba Joseph F. Rutherford, e tempu ei presidente di Watch Tower Bible and Tract Society. Un Testigo recien bautisá a sinti cu Ruman Rutherford a trat’é inhustamente, dor di no a para tende su problema. Mi a sinti cu Ruman Rutherford tabata robes. Wel, un diadomingo, mi ruman muher Mary cu su casá, Dan Pestrui, a bin bishitá nos. Despues di cena Dan a bisa: “Laga nos cuminsá prepará pa bai reunion.”

“Nos no ta bai reunion mas,” mi a bisa. “Nos ta rabiá cu Ruman Rutherford.”

Dan a crusa su mannan tras di su lomba i a cana bai bini, anto e di: “Bo tabata conocé Ruman Rutherford tempu bo a bautisá?”

“Claro cu no,” mi a contestá. “Bo sa cu mi a bautisá na Rumania.”

“Pakico bo a bautisá?” el a puntra.

“Pasobra mi a siña cu Jehova ta e Dios berdadero, i mi kier a dedicá mi bida na sirbié,” mi a contestá.

“Nunca lubidá esei!” El a contestá. “Kico si Ruman Rutherford bandoná e berdad, bo tambe lo bandoná e berdad?”

“Hamas, hamas!” mi a bisa. Esei a trecé mi na mi sano huicio, i mi di: “Tur hende prepará pa reunion.” I nos no a stop desde e dia ei. Ki gradicidu mi tabata na Jehova pa e coreccion amoroso di mi sua!

Sobrebibiendo Durante e Depresion

Durante e Depresion di añanan ’30, tempu tabata trabahoso. Un dia George a yega cas for di trabou tur abatí, informando mi cu nan a mand’é cas for di su trabou n’e fábrica di rubber. “No wori,” mi di, “nos tin un Tata ricu den shelu, i lo e no bandoná nos.”

E mésun dia ei George a topa un amigu cu un macutu grandi di mushroom. Ora George a haña sa unda su amigu a piki nan, el a bini cas cu un cantidad di mushroom. Anto el a gasta nos último tres dollar riba macutunan chikitu. “Con bo por a haci un cos asina,” mi a puntr’é, “si nos tin yunan chikitu cu mester di lechi?”

“No wori,” el a contestá, “djis haci manera mi bisa.” Pa e siguiente par di simannan, nos tabatin un fábrica chikitu na nos cas, limpiando i paketando mushroom. Nos a bende nan cu e restaurantnan mas fini i tabatin un ganashi di 30 pa 40 dollar pa dia, un fortuna pa nos e tempu ei. E cunukero cu a duna nos permiso pa piki e mushroomnan for di su sabana a bisa cu el a biba ei pa 25 aña i nunca el a mira asina tantu mushroom. No a tarda hopi cu e fábrica di rubber a yama George bek na trabou.

Manteniendo Nos Fe

Na 1943 nos a muda pa Los Angeles, California, i cuater aña despues nos a establecé na Elsinore. Nos a habri un toko ei, i henter nos famia tabata tuma turno pa traha den dje. N’e tempu ei, Elsinore tabata djis un pueblo chikitu di rond di 2.000 hende, i nos tabatin cu biaha 30 kilometer bai un otro pueblo pa nos reunionnan cristian. Ki felis mi tabata di mira un congregacion chikitu forma den Elsinore na 1950! Awor aki tin 13 congregacion den e mésun área.

Na 1950 nos yu muher Goldie Elizabeth (cariñosamente yamá Beth) a gradua for dje Scol Bíblico di Galad di Watchtower na South Lansing, New York, i a ser asigná na Venezuela como misionero. Na 1955 nos yu muher mas chikitu, Irene, a keda contentu ora e cu su casá a ser invitá pa sirbi como minister biahero den e trabou di circuito. Anto na 1961, despues cu nan a asistí n’e Scol di Ministerio di Reino na South Lansing, New York, nan a ser mandá Tailandia. Tin biaha mi tabata sinti asina tantu falta di mi yu muhernan cu mi tabata yora, pero despues mi tabata pensa, ‘Esei ta loke mi tabata kier pa nan haci.’ Di manera cu mi tabata pasa man coge mi tas i sali bai predicá. Semper mi tabata bolbe cas bek felis.

Na 1966 mi kerido esposo, George, a haña un atake celebral. Beth, kende a regresá di Venezuela debí na problemanan di salú, a yuda cuid’é. George e muri e siguiente aña, i mi a ser consolá dor dje echo cu el a keda fiel na Jehova i a ricibí su recompensa celestial. Despues Beth a bai Spaña pa sirbi caminda tabatin mayor necesidad di predicadornan di Reino. Mi yu muher mayó, Esther, a bira malu cu cancer i a muri na 1977, i na 1984, Anne a muri di leukemia. Cada un tabata un fiel sirbidor di Jehova henter nan bida.

Na tempu di Anne su morto, Beth i Irene a regresá for di nan asignacionnan di predicá den estranheria. Nan a yuda cuida nan ruman muhernan, i nos tur a pena profundamente. Despues di un tempu mi a bisa mi yu muhernan: “OK, awor ta basta! Nos a consolá otronan cu promesanan precioso di Bijbel. Awor nos mester laga nos mes ser consolá. Satanas kier horta nos di nos goso den sirbi Jehova, pero nos no por lagu’e haci esei.”

Nos Famia Fiel na Rumania

Ami cu mi ruman muher Mary a haci e biahe memorabel ei pa bishitá nos famia na Rumania na 1970. Un di nos ruman muhernan a muri, pero nos por a bishitá nos ruman homber John i nos ruman muher Lodovica, kendenan ainda tabata biba den e pueblito di Ortelec. Pa tempu di nos bishita, Tata i Mama a muri, despues di a keda fiel na Jehova. Hopi hende a bisa nos cu Tata tabata un pilar den e congregacion. Asta algun di su bisanietunan na Rumania awor ta Testigo. Tambe nos a bishitá hopi famia di banda di mi casá kendenan a keda firme den e berdad di Bijbel.

Na 1970, Rumania tabata bou dje régimen comunista cruel di Nicolae Ceauşescu, i Testigonan di Jehova a ser persiguí cruelmente. Mi ruman John su yu homber, Flore, i tambe otro famianan di mi, a pasa hopi aña den camponan di concentracion debí na nan fe cristian, i asina tambe mi casá su primu, Gábor Romocean. Nada straño cu ora nos a ser encargá pa entregá corespondencia p’e sede di Testigonan di Jehova na New York, nos rumannan Testigo di Rumania a bisa cu nan lo no a keda trankil te ora nan tende cu nos tabata a salbo pafó dje pais!

Ora nos a realisá cu nos visanan a caducá, nos a bai n’e oficina di gobiernu na Ortelec. Tabata diabierne atardi, i tabatin solamente un funcionario na warda. Ora el a haña sa ken nos a bishitá i cu nos subrino a yega di ta den un campo di concentracion, e di: “Señoranan, boso mester sali for di aki inmediatamente!”

“Pero no tin ningun trein ta sali awe,” mi ruman muher a contestá.

“No ta importá,” el a bisa cu urgencia. “Coge bus. Coge trein. Coge taxi. Cana. Djis bai for di aki mas lihé cu boso por!”

Ora cu nos a bira pa bai, el a yama nos bek i informá nos cu un trein militar no-programá lo a pasa 6:00 p.m. Ki providencial esei a resultá di ta! Riba un trein regular, nos papelnan lo a ser controlá repetidamente, pero ya cu e trein aki a carga personal militar i nos tabata e único dos civilnan na bordo, ningun hende no a pidi pa mira nos pasportnan. Tal bes nan a asumí cu nos tabata wela di algun dje oficialnan.

Nos a yega na Timisoara e siguiente mainta, i cu yudansa di un amigu di un famia, nos por a haña nos visanan. E siguiente dia nos tabata pafó dje pais. Nos a bai cas cu hopi recuerdo agradabel i inolvidabel di nos rumannan cristian leal na Rumania.

Den e añanan despues di nos bishita na Rumania, nos a tende masha poco detaye tocante e actividad di predicá tras dje Cortina di Heru. Sin embargo, nos tabatin confiansa cu nos rumannan cristian lo a permanecé leal na nos Dios—sin importá kico pasa. I asina mes nan a haci! Ki un goso tabata pa haña sa cu Testigonan di Jehova a ser reconocé legalmente na Rumania como un organisacion religioso na april 1990! E siguiente zomer nos a keda encantá cu e informenan tocante e congresonan tené na Rumania. Ata, mas cu 34.000 a asistí den ocho stad i 2.260 a bautisá! Awor tin mas cu 35.000 participando den e trabou di predicá na Rumania, i aña pasá 86.034 a asistí n’e Memorial di Cristo su morto.

E Berdad Ainda Ta Precioso pa Mi

Durante un par di aña, mi a stop di tuma dje emblemanan na Memorial. Mi a ripará cu tabatin rumannan homber masha cualificá cu no tabata tuma di nan, i mi a razoná: ‘Pakico Jehova lo otorgá ami e privilegio di ser un coheredero cu su Yu den shelu miéntras cu otro rumannan ta asina bon orador?’ Pero ora mi no a tuma dje emblemanan, mi a sintí mi perturbá. Tabata como si fuera mi tabata rechasando algu. Despues di hopi studio i súplica den oracion, mi a cuminsá tuma di nan atrobe. Mi pas i goso a bolbe bek, i nunca nan a bandoná mi.

Aunke mi no por mira mas pa lesa, mi ta scucha tur dia na e casetnan di Bijbel i na esnan dje revistanan Toren di Vigilancia i Spierta! Tambe mi ta participá ainda den e trabou di predicá. Generalmente mi ta laga entre 60 pa 100 revista tur luna, pero tempu nos tabatin e campaña special cu e revista Spierta! na april aña pasá, mi a laga 323 revista. Cu yudansa di mi yu muhernan, mi por duna parti tambe den e Scol di Ministerio Teocrático. Mi ta felis di por sigui animá otronan. Casi tur hende na Salon di Reino ta yamá mi Mai.

Mirando bek riba casi 79 aña di sirbishi dedicá na Jehova, mi ta gradicié tur dia cu el a permití mi conocé su berdad precioso i usa mi bida den su sirbishi. Mi ta asina gradicidu di a biba pa mira e cumplimentu dje maraviyoso profecianan di Bijbel tocante e recogementu di esnan semehante di carné den e último dianan aki.—Isaías 60:22; Zacarías 8:23.

[Plachi na página 23]

Mi ruman muher Mary i Tata pará, i ami cu George, i nos yu muhernan Esther i Anne

[Plachi na página 24]

Cu mi yu muhernan Beth i Irene i Irene su casá i nan dos yu hombernan, tur sirbiendo Jehova fielmente