Pregunta di Lector

Kico un cristian mester haci ora e ser yamá pa sirbi como miembro di hurado den corte?

Den algun pais, e sistema hudicial ta usa huradonan selectá for di ciudadanonan. Caminda esaki ta existí, un cristian mester dicidí con pa respondé ora mand’é meldu pa sirbi den hurado. Hopi cristian cu un concenshi limpi a concluí cu principionan di Bijbel no ta prohibí pa presentá, mescos cu Sadrac, Mesac i Abednego a cumpli cu e mandato dje gobiernu di Babilonia pa presentá n’e yanura di Dura i mescos cu José i Maria a bai Betlehem bou di mandato di autoridadnan romano. (Daniel 3:1-12; Lucas 2:1-4) Sin embargo, tin factornan cu cristiannan sincero por considerá.

E uso di hurado no ta universal. Den algun pais, un hues profesional of un panel di hues ta dicidí casonan civil i criminal. Na otro partinan, ta existí loke ta conocí como ley comun, i huradonan ta parti dje proceso hudicial. Tog, mayoria hende tin masha poco idea dje manera cu huradonan ta ser selectá i kico nan ta haci. Pues hañando un bista general lo ta útil sea cu bo tin cu sirbi den hurado of no.

E pueblo di Dios ta reconocé Jehova como e Hues Supremo. (Isaías 33:22) Den Israel di antigwedad, hombernan experenciá cu tabata recto i imparcial a sirbi como hues pa resolvé disputanan i pa dicidí cuestionnan di ley. (Exodo 18:13-22; Levítico 19:15; Deuteronomio 21:18-21) Pa tempu cu Jesus tabata riba tera, e funcion hudicial tabata den man dje Sanedrin, e corte superior hudiu. (Marco 15:1; Echonan 5:27-34) No tabatin percuracion p’e hudiu comun sirbi den un hurado civil.

Otro paisnan a usa huradonan cu a consistí di ciudadanonan. Sócrates a ser husgá dor di un hurado di 501 miembro. Casonan di corte cu hurado a existí tambe den e República Romano, aunke esaki a ser abolí bou dje emperadornan. Despues, Rey Henry III di Inglatera a percurá pa acusadonan ser husgá dor di nan bisiñanan. A haña cu ya cu e bisiñanan tabata conocé e acusado, nan huicio lo ta mas hustu cu proceduranan den cua e acusado mester a proba su inocencia dor di combate of dor di sobrebibí un of otro prueba rigoroso. Segun tempu a pasa, e sistema di hurado a cambia bira un areglo caminda un grupo di ciudadano mester a tende un caso i yega na un veredicto basá riba evidencia. Un hues profesional a guia nan riba puntonan di evidencia.

Tin variedad den e tipo di hurado, e cantidad di miembro di hurado, i loke ta enbolbí den yega na un veredicto. Por ehempel, na Merca, un hurado di acusacion di 12 pa 23 miembro ta dicidí si tin suficiente evidencia pa un persona ser procesá pa un ofensa criminal; e hurado no ta determiná culpa of inocencia. Di manera similar, den un hurado investigador, e miembronan di hurado ta evaluá e evidencia pa dicidí si un crímen a ser cometé of no.

Ora mayoria hende ta pensa riba un hurado, nan tin na mente un panel di 12 ciudadano na un huicio—sea un disputa civil of un caso criminal—kendenan ta tende testimonio pa dicidí culpa of inocencia. Esaki ta un hurado di huicio, na contraste cu un hurado di acusacion. Generalmente, e corte ta manda notificacion pa presentá pa sirbi den hurado na individuonan selectá for di listanan di votador, shofernan cu reibeweis of cosnan por estilo. Algun hende ta ser descualificá automáticamente, manera criminalnan convicto i esnan mentalmente incompetente. Dependiendo di ley local, otronan—manera dokter, miembro di clero, abogado of doñonan di empresa chikitu—por pidi dispensacion. (Tin persona por ser dispensá debí cu nan tin obhecionnan personal i di concenshi fuerte pa sirbi den hurado.) Sin embargo, mas i mas autoridadnan ta eliminando dispensacionnan di manera cu tur hende ta obligá di meldu pa sirbi den hurado, kisas vários bes atrabes di añanan.

No ta tur cu meldu pa sirbi den hurado necesariamente ta participá como miembro di hurado den un huicio. For di un grupo di personanan yamá pa sirbi den e hurado, algun ta ser selectá aki-aya como potencial miembro di hurado pa un caso en particular. Despues e hues ta identificá e demandante i e acusado i nan abogadonan i ta describí e naturalesa dje caso. E hues i e abogadonan ta examiná cada miembro potencial di hurado. Esaki ta e momento pa un persona cu pa motibu di concenshi no kier sirbi den e hurado debí n’e naturalesa dje caso, mester bisa esei.

Mester reducí e grupo te n’e cantidad cu realmente lo sinta atrabes di henter e huicio dje caso ei. E hues lo despachá cualkier un kende su imparcialidad por ser cuestioná debí na posibel interes den e caso. Tambe, e abogadonan di cada banda tin e prerogativa di despachá un par di miembro di hurado. Cualkier un cu ser despachá for dje panel di hurado lo bolbe n’e grupo di hurado pa spera di ser selectá aki-aya pa otro casonan. Algun cristian den e situacion aki a usa nan tempu pa duna testificacion informal. Despues di un cantidad di dia, un persona a cumpli cu su asignacion di sirbi den hurado, sea cu e realmente a sinta como miembro di hurado of no.

Cristiannan ta haci esfuerso pa ‘atendé na nan mes asuntu,’ i pa no enbolbé nan mes den “asuntu di otro” hende. (1 Tesalonicensenan 4:11; 1 Pedro 4:15) Ora un hudiu a pidi Jesus pa husga un asuntu di herencia, el a contestá: “Homber, ken a nombrá mi hues of repartidor riba boso?” (Lucas 12:13, 14) Jesus a bin pa declará e bon nobo di Reino, no pa intermediá den asuntunan legal. (Lucas 4:18, 43) Jesus su contesta tal bes a impulsá e homber pa usa e método pa resolvé disputa cu a ser describí den e Ley di Dios. (Deuteronomio 1:16, 17) Aunke puntonan asina ta válido, respondiendo na un mandato pa meldu pa sirbi den hurado ta distinto for di enbolbé bo mes den asuntu di otro hende. E ta parce mas e situacion di Daniel su tres compañeronan. E gobiernu di Babilonia a manda nan meldu na e yanura di Dura, i haciendo esei nan no a violá e Ley di Dios. Loke nan a haci despues di esei tabata un otro asuntu, manera Bijbel ta mustra.—Daniel 3:16-18.

Despues cu e sirbidornan di Dios no tabata bou dje Ley di Moises mas, nan tabatin cu trata cu cortenan seglar den vários pais. Apostel Pablo a urgi “e santunan” na Corinto pa resolvé nan pleitunan den e congregacion. Aunke Pablo a referí n’e huesnan di cortenan seglar como “hombernan inhustu,” Pablo no a nenga cu e cortenan ei tabatin un lugá den manehá asuntunan seglar. (1 Corintionan 6:1) Pablo a defendé su mes den e sistema hudicial romano, asta apelando su caso na César. No ta asina cu cortenan seglar ta fundamentalmente malu.—Echonan 24:10; 25:10, 11.

Cortenan seglar ta un funcion dje “autoridadnan superior.” Tal autoridad “Dios a pone den nan posicion relativo,” i nan ta traha leynan i ta imponé nan. Pablo a skirbi: “E ta minister di Dios pa bo, pa bo bon. Pero si bo ta haciendo loke ta malu, teme: pasobra no ta sin propósito cu e ta carga e spada; pasobra e ta minister di Dios, un vengador pa expresá rabia riba hende cu ta practicá loke ta malu.” Cristiannan no ta “oponé autoridad” ora cu e ta cumpli cu funcionnan legal asina, pasobra nan no kier ‘pone nan mes contra dje’ i ricibí huicio.—Romanonan 13:1-4; Tito 3:1.

Ora di balansá factornan, cristiannan mester considerá si nan por someté nan na cierto demandanan cu César ta haci. Pablo a consehá: “Rindi na tur [e autoridadnan superior] loke ta debí na nan, na esun cu ta exigí belasting, belasting; na esun cu ta exigí tributo, tributo; na esun cu ta exigí temor, tal temor.” (Romanonan 13:7) Esei ta informacion franco en cuanto belasting monetario. (Mateo 22:17-21) Si César ta bisa cu ciudadanonan mester duna di nan tempu i esfuerso pa limpia caminda of efectuá otro trabou cu ta entre e funcionnan di César, cada cristian mester dicidí si e ta someté na esei of no.—Mateo 5:41.

Algun cristian a considerá sirbi den hurado como rindiendo na César loke ta pertenecé na César. (Lucas 20:25) Ora di sirbi den hurado e tarea ta pa tende evidencia i ofrecé un opinion onrado riba puntonan di echo of ley. Por ehempel, den un hurado di acusacion, e miembronan di hurado ta dicidí si e evidencia ta hustificá pa trece un hende na huicio of no; nan no ta determiná si e ta culpabel. Kico di un huicio comun? Den un caso civil, e hurado lo por otorgá daño i perhuicio of compensacion. Den un caso criminal, nan tin cu determiná si e evidencia ta apoyá un veredicto di ta culpabel. Tin biaha nan ta recomendá cua sentencia stipulá den ley mester ser aplicá. Anto e gobiernu ta usa su autoridad “pa expresá rabia riba hende cu ta practicá loke ta malu,” of “pa duna castigu na malechornan.”—1 Pedro 2:14.

Kico si un cristian ta sinti cu su concenshi no ta permitié sirbi den un hurado en particular? Bijbel no ta haci mencion di sirbi den hurado, pues e cristian no por bisa, ‘Ta contra mi religion pa sirbi den cualkier hurado.’ Dependiendo dje caso, lo e por declará cu sirbi den e hurado pa un caso en particular ta contra su concenshi personal. Esei lo por ta asina si un caso ta enbolbé inmoralidad sexual, aborto, homicidio, of cualkier otro cuestion riba cua su pensamentu ta formá dor di conocimentu di Bijbel, no dor di simpel ley seglar. Sin embargo, en realidad, tin hopi chens cu e huicio pa cua e ta ser selectá no ta enbolbé cuestionnan asina.

Un cristian maduro tambe lo refleccioná riba si lo e carga parti di cualkier responsabilidad pa e sentencia cu huesnan dicta. (Compará cu Génesis 39:17-20; 1 Timoteo 5:22.) Si un veredicto di culpabel ta robes i e castigu di morto ser imponé, un cristian den e hurado lo carga parti dje culpa di sanger? (Exodo 22:2; Deuteronomio 21:8; 22:8; Jeremías 2:34; Mateo 23:35; Echonan 18:6) Na e huicio di Jesus Pilato kier tabata “inocente dje sanger dje homber aki.” E hudiunan a bisa unbes: “Laga su sanger bini riba nos i riba nos yunan.”—Mateo 27:24, 25.

Si un cristian a meldu pa sirbi den hurado, manera gobiernu ta manda, pero debí na su concenshi personal el a nenga di sirbi den un caso particular apesar dje insistencia dje hues, e cristian mester ta prepará pa enfrentá e consecuencianan—sea esei ta boet of encarcelacion.—1 Pedro 2:19.

Den e análisis final, cada cristian cu hañ’é confrontá pa sirbi den hurado mester determiná ki curso pa sigui, basá riba su comprendimentu di Bijbel i su propio concenshi. Algun cristian a meldu pa sirbi den hurado i a sirbi den cierto huradonan. Otronan a sinti nan obligá di nenga maske nan por a haña castigu. Cada cristian tin cu dicidí pa su mes loke lo e haci, i otronan no mester criticá su decision.—Galationan 6:5.