Pregunta di Lector
Nos por bisa cu e comprendimentu recien actualisá dje palabra “generacion” na Mateo 24:34 ta duna idea cu e fin dje sistema di cosnan por ser aplasá pa leu den futuro?
Esei siguramente no ta e caso. Al contrario, e comprendimentu recien mehorá dje asuntu aki mester yuda nos keda den expectativa constante dje fin. Con asina?
Wel, manera E Toren di Vigilancia di 1 di november, 1995, a splica, Jesus a aplicá e frase “e generacion aki” n’e hendenan malbado di su tempu. (Mateo 11:7, 16-19; 12:39, 45; 17:14-17; Echonan 2:5, 6, 14, 40) Como tal, e no tabata un descripcion di un periodo fiho di tempu cu a cuminsá cu un fecha specífico.
De facto, “Pregunta di Lector” den e mésun edicion ei di E Toren di Vigilancia a concentrá riba dos punto clave: “Un generacion di hende no por ser mirá como un periodo di tempu cu tin un cantidad fiho di aña” i, “E hendenan di un generacion ta biba pa un periodo relativamente corticu.”
Hopi biaha nos ta usa “generacion” den e manera aki. Por ehempel, nos lo por bisa, ‘E soldatnan dje generacion di Napoleon no tabata sa nada di avion ni bom atómico.’ Nos lo ta refiriendo djis na soldatnan cu a nace den e mésun aña cu Napoleon? Nos lo ta refiriendo meramente na e soldatnan frances cu a muri promé cu Napoleon a muri? Claro cu no; ni nos lo no usa “generacion” pa establecé un cantidad fiho di aña. Pero sí, nos lo ta refiriendo na un periodo relativamente corticu, no cientos di aña for dje tempu di Napoleon padilanti.
Ta mescos cu nos comprendimentu di loke Jesus a bisa den su profecia cu el a duna riba e Ceru di Olijfi. E cumplimentu dje diferente rasgonan dje profecia ei ta proba cu e fin dje sistema aki ta cerca. (Mateo 24:32, 33) Corda cu segun Revelacion 12:9, 10, ora e Reino celestial di Dios a ser establecé na 1914, Satanas a ser tirá abou den becindario dje tera. Revelacion ta agregá cu Satanas tin gran rabia awor. Pakico? Pasobra e sa “cu e tin un periodo di tempu corticu.”—Revelacion 12:12.
Pues tabata apropiado cu E Toren di Vigilancia di 1 di november tabatin e subtema: “Sigui Vigilá!” E siguiente paragraf a bisa apropiadamente: “Nos no tin nodi sa e tempu exacto di cumplimentu di sucesonan. Mas bien, nos enfoke mester ta riba mantené vigilancia, cultivá fe fuerte i keda ocupá den Jehova su sirbishi—no riba calculacion di un fecha.” Despues el a cita Jesus su palabranan: “Sigui mira, keda lantá, pasobra boso no sa ki ora e tempu señalá ta. Pero loke mi ta bisa boso, mi ta bisa tur, Sigui vigilá.”—Marco 13:33, 37.