Con pa Haña Speransa Meimei di Desesperacion

IMAGINÁ cu bo mester a pasa den e siguiente experencianan: Tur bo posesionnan material a ser destruí, lagando bo desampará. Bo yunan—e goso di bo bida—ta morto. Bo esposa no ta dunando bo sosten moral. Bo salú a bai atras completamente. Cada dia ta un prueba agonisante.

Si esei tabata bo situacion, lo bo por a haña un motibu pa sigui biba? Of lo bo a sucumbí na desesperacion?

E situacion tristu cu nos a caba di describí tabata e experencia di bida real di Job, un homber cu a biba den tempunan bíblico. (Job, capítulo 1, 2) Na un momento cu Job tabata hopi kibrá, el a lamenta: “Mi alma siguramente ta sinti asco pa cu mi bida.” El a anhelá morto como un alivio. (Job 10:1; 14:13) Sin embargo, apesar di su tremendo sufrimentu, Job a mantené su integridad na Dios. P’esei Jehova “a bendicioná e fin di Job despues mas cu su cuminsamentu.” Asina el a muri den pas, “bieu i satisfecho di dianan.”—Job 42:12, 17.

Job a pone un ehempel den awante cu te n’e dia djawe ta ser aclamá. Su pruebanan a refiná su personalidad i a motivá otronan na bon obra. (Santiago 5:10, 11) Mas importante cu tur, Job su integridad intachabel a haci Jehova su curason alegrá. (Proverbionan 27:11) Pues un pesadia di agonia cu tempu a bira un tremendo triunfo di debocion piadoso, fe i integridad cu a trece bendicion pa Job i pa tur esnan cu a ser conmové dor di su ehempel.

Speransa Apesar di Varios Prueba

Bo por sufri pruebanan similar na esnan cu Job a experenciá. E pérdida di un ser kerí kisas a lagá bo emocionalmente aplastá. Enfermedad severo kisas a haci bo bida un prueba doloroso. Henter bo moda di bida por parce di a desintegrá pa motibu di un divorcio penoso. Contratempunan económico kisas a lagá bo desampará. Tal bes bo ta obheto di persecucion malicioso di parti di hende cu yen di odio ta oponé adoracion berdadero. E lucha pa enfrentá bo pruebanan kisas a lago bo sinti cu bo futuro ta sin speransa.—1 Pedro 1:6.

En bes di sucumbí na desesperacion, puntra bo mes, ‘Pakico mi ta sufriendo?’ Bo ta sufriendo pa motibu cu bo ta biba den un mundu cu ta “d rumí den poder dje malbado,” Satanas e Diabel. (1 Juan 5:19) Como resultado, tur hende ta sufri. Den un manera of otro nos tur ta ser afectá p’e odio cu e Diabel ta inspirá contra e mensahe di Reino, p’e palabranan desagradabel di otronan, of p’e actonan horibel di conducta malbado cu ta asina comun den e “tempo crítico” aki.—2 Timoteo 3:1-5.

Si algo trágico a sosodé den bo bida, por ta bo tabata un víctima di “tempu i suceso imprevisto.” (Eclesiástes 9:11) Di otro banda, tin biaha cosnan ta bai robes den bida debí na nos propio picá heredá. (Romanonan 5:12) Asta si bo a faya seriamente, pero a repentí i a busca yudansa spiritual, no pensa cu Dios a bandoná bo. (Salmo 103:10-14; Santiago 5:13-15) Mas cu cualkier otro persona, e ta interesá den nos. (1 Pedro 5:6, 7) Bo por ta sigur cu “Jehova ta cerca di esnan kibrá di curason, i esnan cu tin un spiritu aplastá e ta salba.” (Salmo 34:18) Sin importá ki trágico of severo bo prueba por ta, Jehova por duna bo e sabiduria pa trata cuné. (Santiago 1:5-8) Corda semper cu Jehova por cura tur herida. Ora bo tin su fabor, nada por prevení bo di gana e premio di bida.—Romanonan 8:38, 39.

Prueba Por Trece Algu Beneficioso?

Tin un dicho bieu ta bisa, “Tur nubia scur tin un rand di plata.” Esei ta un manera simpel pa bisa cu sin importa con malu cos bira, semper bo por haña un motibu pa speransa. E propósito tras di tur cos skirbí den e Palabra di Dios ta pa “nos por tin speransa.” (Romanonan 15:4) Sin importá con severo bo condicion por ta, e promesanan i principionan den Bijbel por duná bo goso i speransa di nobo.

E Scritura ta mustra cu “tribulacion ta pa un momento i ta liviano” ora compar’é cu e bendicionnan eterno poní dilanti esnan cu ta stima Dios. (2 Corintionan 4:16-18) Tambe Bijbel ta indicá cu e cualidadnan piadoso cu ta ser desaroyá meimei di prueba ta di muchu mas balor cu fama of rikesa material. (1 Juan 2:15-17) Pues, asta sufrimentu por sirbi un bon propósito. (Hebreonan 5:8) Realmente, aplicando loke bo a siña durante prueba por trece bendicionnan inesperá pa bo.

Un prueba difícil por haci bo un persona mas saksenu. Kisas bo ta admití cu den pasado bo tabatin un rasgo di personalidad cu a causa iritacion na otronan i asta a stroba bo progreso spiritual. Tal bes esei tabata demasiado confiansa. Despues cu un of otro calamidad a dal bo, bo por realisá di ripiente ki débil bo ta i cuantu bo mester di otronan. Si bo prueba a siñá bo e les ei i bo a haci cambionan necesario, el a beneficiá bo.

Kico si, den pasado, otronan a haña ta difícil pa trata cu bo debí cu bo tabatin dificultad pa controlá bo temperamentu? Esaki asta por a causá bo algun angustia en coneccion cu bo salú. (Proverbionan 14:29, 30) Sin embargo, awor, e situacion por ta muchu mas mihó debí cu bo ta dependé riba e spiritu di Dios p’e yudá bo ehercé dominio propio.—Galationan 5:22, 23.

Mescos cu otronan, abo probablemente na un tempu a falta e compasion pa ta misericordioso pa cu esnan cu ta faya. Pero si bo mes a cai den un situacion caminda bo a sinti un gran necesidad pa misericordia, probablemente awor bo ta mas incliná pa ta misericordioso pa cu otronan. E simpatia caluroso, interes i misericordia cu otronan a mustra na bo a hací bo realisá cu bo mester desplegá cualidadnan similar pa cu malechornan repentí. Si bo pena a mové bo pa corigí e debilidadnan aki den bo personalidad, esaki ta un beneficio cu bo a saca for di bo experencia. Bo a siña cu “misericordia ta hubilá triunfalmente riba huicio.”—Santiago 2:13; Mateo 5:7.

Kico si disiplina dor dje congregacion cristian a costá bo privilegionan precioso i e respet di otronan? No sucumbí na desesperacion. Accion disiplinario ta yuda tene e congregacion limpi, pero su obhetivonan ta incluí e restoracion spiritual dje malechor. Ta cierto cu “ningun disiplina ta parce gososo ora di hañ’é, sino penoso; sin embargo, despues pa esnan cu a ser entrená p’e, e ta duna fruta di pas, esta, husticia.” (Hebreonan 12:11) Aunke disiplina por ta un golpi devastador, e no ta laga e persona humildemente repentí sin speransa. Rey David di Israel di antigwedad a ser disipliná severamente pa malecho, pero el a repentí i cu tempu a ricibí encomendacion special como un homber di fe sobresaliente.—2 Samuel 12:7-12; Salmo 32:5; Hebreonan 11:32-34.

Un prueba por tin un efecto profundo riba bo actitud den bida. Den pasado, kisas bo atencion tabata enfocá riba meta i logronan materialista cu a duná bo reconocimentu i un bon posicion social den e mundo aki. Tal bes un prueba relacioná cu un contratempu financiero of pérdida material a enfocá bo pensamentunan riba cosnan mas importante. (Compará cu Filipensenan 1:10.) Awor bo ta realisá cu balornan i metananan spiritual den sirbishi sagrado ta e único cosnan cu ta trece berdadero goso i satisfaccion duradero.

Confia den Jehova

Rindiendo sirbishi sagrado na Jehova por resultá den persecucion i sufrimentu na man di esnan cu ta oponé bo creencianan cristian. Bo por sintí bo desanimá debí n’e prueba aki, pero e por trece beneficio. E prueba aki por fortalecé bo fe. Ademas, otronan cu ta sufri persecucion por ser animá i fortalecí dor di observá bo perseverancia. Testigonan ocular di bo conducta excelente por ser motivá pa glorificá Dios. Asta bo opositornan por haña bergwensa i reconocé bo bon obranan!—1 Pedro 2:12; 3:16.

Pa evitá desesperacion ora bo ta ser persiguí, bo tin cu confia den Jehova. Su Palabra ta mustra cu alivio for di un prueba lo bini sigur, pero kisas e no ta yega mes lihé cu bo ta deseá. Miéntras tantu, “no bandoná hacimentu di loke ta bon.” (2 Tesalonicensenan 3:13) Sigui busca maneranan pa enfrentá prueba cu éxito i pa wanta. Asta ora cosnan ta mustra sin speransa, “tira bo carga riba Jehova mes, i e mes lo sostené bo. Nunca lo e permití e hustu tambaleá.” (Salmo 55:22) En bes di keda tene duele di bo mes, pensa riba ki bendicioná bo ta di por conocé Jehova, di por tin un lugá meimei di su pueblo, i di por poseé e speransa di un bida sin fin.—Juan 3:16, 36.

Tene bo mente enfocá riba e cosnan esencial. Acudí na Jehova tur dia den oracion, pidiendo fortalesa pa wanta. (Filipensenan 4:6, 7, 13) Deshací di cualkier pensamentu di venga esnan cu ta causa bo sufrimentu. Laga asuntunan den man di Jehova. (Romanonan 12:19) Sigui busca maneranan pa refiná bo personalidad, cultivando cualidadnan cristian. (2 Pedro 1:5-8) Apreciá tur loke otronan ta haci pa bo, incluyendo e ancianonan cu ta percurá amorosamente pa bo necesidadnan spiritual. (Hebreonan 13:7, 17) Sea fiel na Dios, i mantené bo bista riba e premio di bida, sigur di cu ni morto por hortá bo di dje.—Juan 5:28, 29; 17:3.

Si awor bo ta experenciando gran tristesa of pruebanan severo, “confia den Jehova cu tur bo curason,” i goso abundante cu tempu lo reemplasá bo pena i dificultad. (Proverbionan 3:5, 6; Juan 16:20) Miseria lo traha lugá pa felicidad ora Dios bendicioná bo mescos cu el a haci cu Job. Sufrimentunan actual no ta nada na comparacion cu bo recompensa. (Compará cu Romanonan 8:18.) Bo fiel awante por animá otronan i yudá bo cultivá e bunita cualidadnan cristian cu ta bini cu “e personalidad nobo.” (Efesionan 4:23, 24; Colosensenan 3:10, 12-14) P’esei, anto, cobra ánimo for dje conseho sabí di apostel Pedro: “Laga esnan cu ta sufri na armonia cu e boluntad di Dios sigui encomendá nan alma na un fiel Creador miéntras cu nan ta haci bon.”—1 Pedro 4:19.

[Plachi na página 23]

Sea manera Job. Nunca perde speransa

[Plachi na página 24]

Confia den Jehova cu tur bo curason