Cuidou cu Atribuí Mal Motibunan na Otronan

UN TELE-EVANGELISTA prominente a denunciá un compañero predicadó fuertemente pa motibu cu el a cometé adulterio. Sin embargo, den ménos cu un aña, e evangelista acusadó a ser gará cu un prostituta.

Den un otro caso, un poder mundial principal a manda representantenan pa trece faccionnan den guera na mesa di pas. Miéntras tantu, e mésun nacion a manda su comerciantenan di arma na nacionnan stranhero pa bende arma na balor di miles di miyones di dollar.

Siendo cu hipocresia abierto a bira asina comun, ta algu straño cu skepticismo pa un gran parti a reemplasá confiansa? Pa hopi, cuestioná e motibunan di otronan a bira un custumber.

Como cristiananan, nos mester tene cuidou pa no permití actitudnan asina afectá nos relacion cu fiel compañeronan creyente. Aunke Jesucristo a urgi nos pa ta “cauteloso manera colebra” ora nos ta meimei di nos enemigunan, e no a bisa cu nos mester carga sospecho contra su berdadero siguidónan. (Mateo 10:16) Pues, anto, kico ta e peligernan di atribuí mal motibunan na otronan? Den ki áreanan nos mester ta specialmente cauteloso pa evitá un inclinacion asina? I con nos por protehá nos relacion precioso cu nos compañeronan cristian?

Un Les for di Pasado

Atribuyendo mal motibunan na otronan sin cu esei ta basá riba echo ta mescos cu husga nan. Ta como si fuera nos ta saca e conclusion prematuro cu nan palabra of accionnan ta djis un engaño pa sconde algu mañoso i malicioso. Hopi biaba e problema real ta sinta den un punto di bista ekibocá di asuntunan, manera nos por mira for dje relato bíblico den Hosué capítulo 22.

E israelitanan a completá nan conkista dje Tera Primintí i a caba di ricibí nan teritorionan segun tribu. E tribunan di Ruben i Gad i e mitar tribu di Manases a construí un altar “hopi riparabel” banda di Riu Jordan. E otro tribunan a asumí incorectamente cu esaki tabata un acto di apostasia. Nan a suponé cu e tres tribunan tabata bai usa e structura grand aki pa sacrificio en bes di bai n’e tent di reunion na Shiloh, e lugá apuntá pa adoracion. Mesora, e tribunan acusador a haci preparacionnan pa accion militar.—Hosué 22:10-12.

Tabata encomendabel cu nan a comunicá cu nan rumannan israelita dor di manda un delegacion oficial encabesá pa Finehas. Ora nan a tende e acusacionnan di infieldad, rebelion i apostasia contra Jehova, e tribunan cu supuestamente a faya a splica nan motibu p’e altar inmenso aki. En bes di ta un altar pa sacrificio, e mester tabata “un testigo” dje unidad dje tribunan di Israel den adoracion na Jehova. (Hosué 22:26, 27) E delegacion a regresá cas satisfecho cu no tabatin nada malu cu nan rumannan. Asina un guera civil i teribel dramamentu di sanger a ser prevení.

Ki un les pa nos nunca sea lihé pa atribuí mal motibunan na otronan! Hopi biaha loke ta parce cierto for di un simpel observacion superficial ta resultá henteramente diferente ora examiná un asuntu mas djacerca. Esaki ta cierto den hopi aspecto dje bida di un cristian.

Nos Punto di Bista dje Ancianonan

Cumpliendo cu nan responsabilidad “pa pastoreá e congregacion di Dios,” tin biaha ancianonan ta haña ta necesario pa consehá vários individuo den e congregacion. (Echonan 20:28) Por ehempel, con nos ta reaccioná si un anciano papia cu nos tocante nos yunan riba asuntunan manera mal asociacion of conducta inapropiado cu un persona dje sexo opuesto? Nos ta asumí cu e anciano tin un motibu scondí i ta bisa den nos mes, ‘Nunca el a gusta nos famia’? Si nos permití sintimentunan asina influenciá nos, nos por yora malai despues. E bienestar spiritual di nos yunan por ta na peliger, i nos mester apreciá conseho bíblico probechoso.—Proverbionan 12:15.

Ora un anciano di congregacion ta consehá nos, laga nos no busca un motibu scondí. Mas bien, laga nos puntra nos mes si tin algun manera cu nos por beneficiá for di su conseho basá riba Bijbel. Apostel Pablo a skirbi: “Ta cierto cu ningun disiplina ta parce gososo ora di hañ’é, sino penoso; sin embargo, despues pa esnan cu a ser entrená p’e, e ta duna fruta di pas, esta, husticia.” (Hebreonan 12:11) Pues laga nos sea gradicidu i pensa riba e conseho di un manera obhetivo. Corda cu hopi biaha ta mes difícil p’e ancianonan duna nos conseho cu e ta pa nos ricibié.

Sintimentu pa cu Mayornan

Ora algun hóben haña nan cu cierto restriccion for di nan mayornan, nan ta cuestioná e motibunan di nan mayornan. Algun hóben por bisa: ‘Pakico mi mayornan ta traha asina tantu regla? Nan lo no kier pa mi gosa di bida.’ Sin embargo, en bes di saca un conclusion asina, esnan mas hóben tin cu analisá e situacion di un manera obhetivo.

Mayornan a dedicá añanan largu percurando pa nan yunan. Nan a haci esaki cu hopi sacrificio material i di otro maneranan. Tin cualkier motibu pa conclui cu awor nan ta determiná pa haci e bida di nan yunan tiener miserabel? No ta mas razonabel pa pensa cu amor ta motivá e mayornan aki pa protehá nan yunan i percurá pa nan? No ta e mésun amor lo ta motivando nan pa pone cierto restriccionnan riba nan yunan, cu awor ta enfrentá desafionan nobo den bida? Ki poco amabel i malagradecidu lo ta pa atribuí mal motibunan na mayornan amoroso!—Efesionan 6:1-3.

Nos Actitud pa cu Compañeronan Cristian

Hopi hende tin tendencia di prehusgá otronan i tipificá nan. Kico si nos mes tabatin un actitud asina i a carga un poco sospecho contra cierto hende? Nos por a ser influenciá dor dje mundu relacioná cu esaki?

Por ehempel, suponé cu un di nos rumannan spiritual tin un bunita cas i un auto caro. Nos mester concluí automáticamente cu e ta un materialista cu no ta poniendo interesnan di Reino na promé lugá den bida? Algun cristian por permití nan mes cosnan bunita, pero esei no ta nificá cu nan tin mal motibunan of cu nan no ta ‘buscando promé e reino.’ Kisas nan ta hopi ocupá den actividadnan spiritual, usando nan posesionnan material generosamente pa promové interesnan di Reino, tal bes den un manera discreto.—Mateo 6:1-4, 33.

E congregacion cristian di promé siglo tabata consistí di tur tipo di hende—ricu i pober. (Echonan 17:34; 1 Timoteo 2:3, 4; 6:17; Santiago 2:5) Dios no ta evaluá hende a base di nan posicion financiero, i nos tampoco no mester hacié. Nos mester stima nos compañeronan creyente probá i fiel, “no haci nada segun un inclinacion parcial.”—1 Timoteo 5:21.

Den e mundo aki cu ta drumí den poder di Satanas, tipificá hende i carga sospecho ta ser manifestá den vários manera. Por ehempel, un persona por ser mirá como violento of materialista simplemente pa motibu di su antecedente. Sin embargo, como cristian, nos no mester bira víctima di actitudnan asina. Jehova su organisacion no tin lugá pa intolerancia i cargamentu di sospecho. Tur cristian berdadero tin cu imitá Jehova Dios, cu ken “no tin inhusticia ni parcialidad.”—2 Crónicanan 19:7; Echonan 10:34, 35.

Ser Motivá pa Amor

E Scritura ta bisa claramente cu “tur a peca i no ta alcansá e gloria di Dios.” (Romanonan 3:23) P’esei nos tin cu mira nos co-adoradónan como esnan uní cu nos den haci esfuerso pa rindi sirbishi aceptabel na Jehova. Si nos a permití sospecho of otro sintimentunan negativo afectá nos relacion cu un ruman homber of muher spiritual, laga nos pidi Dios su yudansa pa combatí un actitud asina pa nos no bira víctima di Satanas. (Mateo 6:13) El a convencé Eva cu Jehova tabatin mal motibunan, no tabata interesá den su bienestar, i tabata reteniendo libertadnan cu lo a hacié berdaderamente felis. (Génesis 3:1-5) Atribuyendo mal motibunan na nos rumannan ta sirbi Satanas su obhetivo.—2 Corintionan 2:11; 1 Pedro 5:8.

Si nos haña cu nos tin un tendencia di atribuí mal motibunan na otronan, considerá e ehempel di Jesucristo. Maske e tabata e Yu perfecto di Dios, e no a busca mal motibunan den su disipelnan. En bes di esei, Jesus a busca e bon den nan. Ora su disipelnan tabatin un disputa pa un posicion di prominencia, e no a asumí cu nan tabatin motibunan corupto i reemplasá nan cu 12 apostel nobo. (Marco 9:34, 35) Siendo imperfecto, nan por a ser influenciá den algun manera dor dje cultura di hudaismo apóstata, cu su énfasis riba orguyo i distincion di clase. Jesus tabata sa cu e motivacion básico di su siguidónan tabata amor pa Jehova. Dor cu nan a desplegá un amor asina i a pega na Jesus, nan a ser ricamente recompensá.—Lucas 22:28-30.

Si nos mester wak nos fiel compañeronan creyente cu sospecho, esaki lo ta manera wak cosnan dor di un lens deformá. Nada lo parce manera e ta realmente. P’esei, laga nos wak dor di e lens di amor. Tin bastante evidencia cu compañeronan cristian leal ta stima nos i ta merecé nos consideracion bondadoso. (1 Corintionan 13:4-8) P’esei laga nos mustra amor na nan i tene cuidou cu atribuí mal motibunan.

[Plachi na página 26]

Con bo ta mira otronan cu ta adorá Dios fielmente?

[Plachi na página 27]

Confiansa i respet ta haci Testigonan di Jehova un famia felis