Epafras—“Un Minister Fiel di e Cristo”

Ken a funda e congregacionnan cristian na Corinto, Efeso i Filípos? Tal bes lo bo contestá unbes: ‘Pablo, e “apostel dje nacionnan.”’ (Romanonan 11:13) Lo tin rason.

Sin embargo, ken a establecé e congregacionnan na Colósas, Hierápolis i Laodicea? Aunke nos no por ta sigur, e por tabata un homber yamá Epafras. Di tur manera, tal bes lo bo kier sa algu mas tocante e evangelisadó aki, siendo cu e ta ser yamá “un minister fiel di e Cirsto.”—Colosensenan 1:7.

Evangelisadó dje Vaye di Lico

E nomber Epafras ta un abreviacion di Epafrodito. Pero nos no mester confundí Epafras cu e Epafrodito di Filípos. Epafras tabata di Colósas, un dje tres centronan di congregacionnan cristian den e vaye di Riu Lico, na Asia Menor. Colósas tabata situá apénas 18 kilometer for di Laodicea i 19 kilometer for di Hierápolis, den e region antiguo di Frigia.

Bijbel no ta bisa explícitamente con e bon nobo dje Reino di Dios a alcansá Frigia. Sin embargo, e frigionan tabata presente den Jerusalem riba e dia di Pentecoste na 33 E.C., tal bes algun di nan tabata di Colósas. (Echonan 2:1, 5, 10) Durante Pablo su ministerio na Efeso (rond di 52-55 E.C.), e testimonio cu a ser duná den e área ei tabata asina vigoroso i eficas cu no solamente e efesionan sino tambe “tur esnan bibando den e distrito di Asia a tende e palabra di Señor, tanto hudiu como griego.” (Echonan 19:10) Ta parce cu Pablo no a predicá e bon nobo atrabes di e Vaye di Lico, siendo cu mayoria di esnan cu a bira cristian den e region ei nunca a mir’é.—Colosensenan 2:1.

Segun Pablo, esun cu a siña e colosensenan tocante “e bondad inmerecí di Dios en berdad” tabata Epafras. E echo cu Pablo ta yama e colaboradó aki “un minister fiel di e Cristo na fabor di nos” ta mustra cu Epafras tabata un evangelisadó activo den e área.—Colosensenan 1:6, 7.

Tantu apostel Pablo como e evangelisadó Epafras tabatin un gran preocupacion p’e bienestar spiritual di nan compañeronan creyente den e Vaye di Lico. Como e “apostel dje nacionnan,” Pablo mester a alegrá ora el a ricibí noticia di nan progreso. En berdad, tabata for di Epafras cu Pablo a tende tocante e condicion spiritual dje colosensenan.—Colosensenan 1:4, 8.

E Informe di Epafras

E colosensenan a enfrentá suficiente problema serio pa persuadí Epafras pa haci e biahe largu pa Roma cu e propósito specífico pa considerá e asuntunan aki cu Pablo. E informe detayá cu Epafras a duna tabata evidentemente loke a impulsá Pablo pa skirbi dos carta n’e rumannan ei cu di otro manera lo tabata desconocí p’e. Unu tabata e carta n’e colosensenan. E otro carta, cu aparentemente no a ser preservá, a ser mandá pa e laodicensenan. (Colosensenan 4:16) Ta razonabel pa pensa cu e intencion dje contenido dje cartanan ei tabata pa respondé n’e necesidadnan dje cristiananan ei manera Epafras a percibí nan. Ki necesidadnan el a mira? I kico esaki ta revelá tocante su personalidad?

E carta n’e colosensenan ta parce di indicá cu Epafras tabata preocupá cu cristiannan na Colósas tabata den peliger di filosofianan pagano cu a enbolbé asetismo, spiritismo i supersticion idólatra. Ademas, e siñansa hudiu di abstinencia for di cuminda i e wardamentu di cierto dianan kisas a influenciá algun miembro dje congregacion.—Colosensenan 2:4, 8, 16, 20-23.

E echo cu Pablo ta skirbi tocante e temanan aki ta mustra nos ki alerto i sensitivo Epafras tabata pa cu e necesidadnan di su compañeronan cristian. El a mustia interes amoroso den nan bienestar spiritual, siendo conciente dje peligernan dje ambiente den cua nan tabata biba. Epafras a busca conseho di Pablo, i esaki ta revelá cu e tabata humilde. Por ta el a sinti e necesidad pa ricibí conseho for di un hende cu mas experencia. Sea cual sea e caso, Epafras a actua sabiamente.—Proverbionan 15:22.

Un Homber Cu A Duna Balor na Oracion

Na conclusion dje carta cu el a manda p’e cristiannan colosense, Pablo ta bisa: “Epafras, cu ta di entre boso, un esclabo di Cristo Jesus, ta manda su cumindamentu pa boso, semper haciendo su esfuerso na fabor di boso den su oracionnan, pa boso finalmente por para completo i cu conviccion firme den tur e boluntad di Dios. Ami berdaderamente ta duna testimonio di dje cu e ta haci esfuerso grandi na fabor di boso i di esnan na Laodicea i di esnan na Hierápolis.”—Colosensenan 4:12, 13.

Sí, asta ora e tabata Pablo su “compañero den cautiverio” na Roma, Epafras tabata pensando riba su rumannan stimá na Colósas, Laodicea i Hierápolis i tabata haci oracion pa nan. (Filemon 23) Literalmente, ‘el a lucha’ pa nan den oracion. Segun erudito D. Edmond Hiebert, e término griego usá aki ta denotá “un actividad intenso i exigente,” algu similar na e “agonia” mental cu Jesucristo a experenciá ora el a haci oracion den e hofi di Getsémani. (Lucas 22:44) Epafras a deseá sinceramente pa su rumannan spiritual alcansá stabilidad i pleno madures cristian. Ki un bendicion p’e congregacionnan un ruman spiritualmente incliná asina mester tabata!

Siendo cu Epafras a ser yamá un “co-esclabo stimá,” no por tin duda cu su compañeronan Cristian tabatin hopi cariño p’e. (Colosensenan 1:7) Ora circunstancianan ta permití, tur miembro dje congregacion mester duna libremente di nan mes cu calor i amor. Por ehempel, por duna atencion na yuda esnan enfermo, esnan di edad avansá of otronan cu tin necesidad special. Por tin diferente responsabilidadnan pa percurá p’e den e congregacion, of kisas ta posibel pa contribuí pa proyectonan teocrático di construccion.

Haciendo oracion pa otronan, manera Epafras a haci, ta un forma di sirbishi sagrado cu nos tur por efectuá. Oracionnan asina por incluí expresionnan di preocupacion pa adoradónan di Jehova cu tin cu enfrentá vários peliger of dificultad di un caracter spiritual of físico. Dor di haci esfuerso vigoroso den e manera aki, nos por ta manera Epafras. Cada un di nos por tin e privilegio i goso di proba di ta un “co-esclabo stimá” den e famia di Jehova su sirbidónan fiel.