Bo Ta Dios Su Amigu?—Loke Bo Oracionnan Ta Revelá

CASUALMENTE bo a yega di oria dos persona combersá? Sin duda no a tumá bo muchu tempu pa determiná ki clase di relacion nan tin cu otro—sea cu nan tabata amigunan íntimo of hende straño pa otro, simpel conocí of amigu cerá cu ta confia otro. Den un manera similar, nos oracionnan por revelá con nos relacion cu Dios ta.

Bijbel ta sigurá nos cu Dios “no ta leu for di cada un di nos.” (Echonan 17:27) Asina mes, e ta invitá nos pa conoc’é. Nos por ta asta su amigu. (Salmo 34:8; Santiago 2:23) Nos por disfrutá di berdadero intimidad cuné! (Salmo 25:14) Claramente, nos relacion cu Dios ta e cos di mas precioso cu nos como hende imperfecto hamas lo por poseé. I Jehova ta atesorá nos amistad. Esaki ta evidente pasobra nos amistad cuné ta basá riba nos fe den su Yu unigénito, kende a duna su bida na nos fabor.—Colosensenan 1:19, 20.

P’esei nos oracionnan mester reflehá amor i aprecio profundo pa Jehova. Sin embargo, bo a yega di sinti cu bo oracionnan, aunke nan ta reverente, falta un poco berdadero profundidad? Esaki no ta algu straño. Kico ta e clave pa mehorá cosnan? Sigui desaroyá bo relacion cu Jehova Dios.

Hañando Tempu pa Oracion

Na promé lugá, tempu ta necesario pa desaroyá i cultivá un amistad. Tal bes diariamente bo ta saludá of asta combersá cu hopi hende—bisiña, colega di trabou, shofer di bus i trahadó di pacus. Tog, esaki no kier men cu bo ta realmente amigu di e hendenan ei. Amistad ta crece segun cu bo ta papia di tur cos cu un persona, bayendo for di papia di esaki i esaya pa expresá bo sintimentu i pensamentunan interno.

Den un manera similar, oracion ta yuda nos hala cerca Jehova. Pero mester dedicá tempu adecuá na dje; mas cu un danki lihé na ora di come ta necesario. Mas bo papia cu Jehova, mihó bo por ordená bo mes sintimentunan, motibunan i accionnan. Solucion pa problemanan difícil ta cuminsá manifestá nan mes segun cu e spiritu di Dios ta poné bo corda principionan for di su Palabra. (Salmo 143:10; Juan 14:26) Ademas, segun cu bo ta haci oracion, Jehova ta bira mas real pa bo, i bo ta bira mas conciente di su interes amoroso den bo i preocupacion pa bo.

Esaki ta specialmente e caso ora bo experenciá un contesta pa bo oracionnan. En berdad, Jehova por “haci muchu mas cu sobreabundantemente tur loke nos pidi of imaginá”! (Efesionan 3:20) Esaki no ta nificá cu Dios ta haci milager na bo fabor. Sin embargo, mediante su Palabra skirbí, publicacionnan dje clase di esclabo fiel, of boca di rumannan amoroso, e por duná bo e conseho of guia necesario. Of e por duná bo e fortalesa necesario pa wanta of resistí un tentacion. (Mateo 24:45; 2 Timoteo 4:17) Experencianan asina ta yena nos curason cu aprecio pa nos Amigu celestial!

P’esei bo tin cu traha tempu pa haci oracion. Ta cierto cu tempu ta corticu den e dianan aki yen di tension. Pero ora realmente bo ta interesá den un persona, generalmente bo ta haña tempu pa dedicá n’e persona ei. Tuma nota dje manera cu e salmista a expresá su mes: “Manera e biná hembra cu ta anhelá pa coriente di awa, asina mi alma mes ta anhelá pa bo, O Dios. Mi alma en berdad tin sed di Dios, di e Dios bibu. Ki dia lo mi bini i presentá dilanti Dios?” (Salmo 42:1, 2) Bo tin un anhelo similar pa papia cu Dios? Anto cumpra e tempu pa haci esei!—Compará cu Efesionan 5:16.

Por ehempel, bo por purba lanta mainta trempan afin di haña poco tempu pa bo mes pa haci oracion. (Salmo 119:147) Bo sa experenciá tin biaha anochinan sin por drumi? E ora ei, mescos cu e salmista, bo por mira ocasionnan perturbador asina como un oportunidad pa expresá bo preocupacionnan na Dios. (Salmo 63:6) Of e por ta simplemente un asuntu di haci vários oracion breve durante dia. E salmista a bisa Dios: “Na bo mi ta sigui yama henter dia.”—Salmo 86:3.

Mehorando e Calidad di Nos Oracionnan

Tin biaha lo bo haña ta probechoso tambe pa aumentá e largura di bo oracionnan. Durante un oracion corticu, bo por tin tendencia di papia tocante esaki i esaya. Pero ora bo ta expresá oracionnan mas largu i mas profundo, bo ta expresá bo pensamentu i sintimentunan interno mas fácilmente. Por lo ménos na un ocasion Jesus a pasa henter anochi den oracion. (Lucas 6:12) Sin duda lo bo haña cu bo mes oracionnan ta bira mas íntimo i significativo si bo ta evitá di haci nan purá.

Esaki no ta nificá papia sin pia sin cabes ora bo no tin mashá di bisa; tampoco e ta nificá recurí na ripiticion sin nificacion. Jesus a spierta: “Ora di haci oracion, no bisa e mésun cosnan bes tras bes, mescos cu e hendenan dje nacionnan ta haci, pasobra nan ta imaginá cu dor di nan uso di hopi palabra nan lo ser tendé. P’esei, no haci boso mes manera nan, pasobra Dios boso Tata sa kico boso mester asta promé cu boso pidié.”—Mateo 6:7, 8.

Oracion ta mas significativo ora bo pensa delantá riba ki tópiconan bo kier combersá. E posibilidadnan ta interminabel—nos experencianan gososo den e ministerio, nos debilidad i imperfeccionnan, nos decepcionnan, nos preocupacionnan económico, e presionnan na trabou of na scol, e bienestar di nos famianan i e condicion spiritual di nos congregacion local, djis pa mencioná algun.

Bo mente tin tendencia di dual tin biaha ora bo ta haci oracion? E ora ei haci mas esfuerso pa concentrá. Al fin i al cabo, Jehova ta dispuesto pa ‘presta atencion na nos súplicanan.’ (Salmo 17:1) Nos no mester ta dispuesto pa haci esfuerso sincero pa presta atencion na nos mes oracionnan? Sí, ‘fiha bo mente riba e cosnan di spiritu,’ i nenga di lagu’e dual.—Romanonan 8:5.

E manera cu nos ta dirigí nos mes na Jehova tambe ta importante. Aunke e kier pa nos mir’é como un amigu, nos no mester lubidá nunca cu nos ta papiando cu e Soberano di universo. Lesa i meditá riba e esena cu ta inspirá reverencia describí na Revelacion capítulo 4 i 5. Ei Juan a mira den un vision e magnificencia di Esun cu nos ta acercá den oracion. Ki un privilegio nos tin di por acercá i haña acceso na “Esun sintá riba e trono”! Nunca nos lo kier pa nos lenguahe bira demasiado familiar of falta dignidad. Mas bien, nos mester haci tur nos esfuerso pa haci ‘e dichonan di nos boca i e meditacion di nos curason agradabel pa Jehova.’—Salmo 19:14.

Sin embargo, nos mester realisá cu nos no ta impresioná Jehova cu palabra grandi. E ta contentu cu nos expresionnan respetuoso i di curason, sin importá con simpel nan ta ser expresá.—Salmo 62:8.

Consuelo i Comprension den Tempu di Necesidad

Ora nos tin mester di yudansa i consuelo, hopi biaha nos ta acudí na un amigu íntimo pa sosten i comprension. Wel, ningun amigu ta mas fácilmente acercabel cu Jehova. E ta “un yudansa cu por ser hañá fácilmente durante angustia.” (Salmo 46:1) Como “e Dios di tur consuelo,” e ta comprendé loke nos ta pasando aden mihó cu cualkier otro persona. (2 Corintionan 1:3, 4; Salmo 5:1; 31:7) I e tin berdadero empatia i compasion pa esnan cu ta den un situacion di desesperacion. (Isaías 63:9; Lucas 1:77, 78) Dor di mira Jehova como un amigu comprensivo, nos ta sinti nos liber pa papia cuné fervientemente, intensamente. Nos ta ser conmoví pa expresá nos temornan i ansiedadnan di mas profundo. Asina nos ta experenciá personalmente con Jehova su ‘mes consolacionnan ta cuminsá cariciá nos alma.’—Salmo 94:18, 19.

Tin biaha nos por sinti nos indigno pa acercá Dios pa motibu di nos erornan. Pero kico si un amigu yegá di bo a faya cu bo i a roga pa pordon’é? Lo bo no ta impulsá pa consol’é i trankilis’é? Pakico, anto, bo mester spera ménos di Jehova? Generosamente e ta pordoná su amigunan cu ta peca como resultado di imperfeccion humano. (Salmo 86:5; 103:3, 8-11) Sabiendo esaki, nos no ta hala atras pa confesá libremente nos erornan na dje; nos por ta sigur di su amor i misericordia. (Salmo 51:17) Si nos ta deprimí pa motibu di nos limitacionnan, nos por saca consuelo den e palabranan di 1 Juan 3:19, 20: “Den esaki nos lo sa cu nos ta originá cu e berdad, i nos lo sigurá nos curason dilanti dje en cuanto cualkier cos den cua nos curason por condená nos, pasobra Dios ta mas grandi cu nos curason i sa tur cos.”

Sin embargo, nos no tin nodi ta den un condicion di desesperacion pa disfrutá di Dios su interes amoroso. Jehova ta interesá den cualkier cos cu por afectá nos bienestar spiritual i emocional. Sí, nos nunca tin nodi pensa cu nos sintimentunan, pensamentunan i preocupacionnan ta muchu insignificante pa mencioná den oracion. (Filipensenan 4:6) Ora bo ta huntu cu un amigu íntimo, bo ta combersá solamente tocante e sucesonan grandi den bo bida? Bo no ta compartí tambe preocupacionnan relativamente menor? Den un manera similar, bo por sintí bo liber pa papia tocante cualkier faceta di bo bida cu Jehova, sabiendo cu ‘e ta interesá den bo.’—1 Pedro 5:7.

Naturalmente, un amistad probablemente lo no dura largu si tur loke bo ta papia di dje ta bo mes. Di manera similar, nos oracionnan no mester drei rond di nos so. Nos mester expresá tambe nos amor i interes intenso den Jehova i su interesnan. (Mateo 6:9, 10) Oracion no ta solamente un oportunidad pa pidi yudansa for di Dios sino tambe un chens pa expresá gradicimentu i alabansa. (Salmo 34:1; 95:2) “Ganando conocimentu” mediante studio personal regular lo yuda nos den esaki, ya cu e ta yuda nos cera mihó conocí cu Jehova i su camindanan. (Juan 17:3) Bo por haña cu ta particularmente probechoso pa lesa e buki di Salmo i ripará con otro sirbidónan fiel a expresá nan mes na Jehova.

Jehova su amistad en berdad ta un don precioso. Laga nos mustra cu nos ta apreci’é dor di haci nos oracionnan asta mas íntimo, di curason i personal. E ora ei nos lo disfrutá dje felicidad cu e salmista a expresá, kende a declará: “Felis ta esun ken bo ta scoge i ta laga yega cerca.”—Salmo 65:4.

[Plachinan na página 28]

Nos por haci oracion na Dios henter dia segun cu e oportunidad presentá