Pregunta di Lector

Nos a keda emocioná ora nos a studia Jesus su comparacion di carné i cabritu. En bista dje comprendimentu nobo presentá den “E Toren di Vigilancia” di 15 di october, 1995, nos por bisa ainda cu Testigonan di Jehova awe ta participando den un trabou di separacion?

Sí. Ta di comprendé cu hopi ruman a puntra nan mes esaki pasobra Mateo 25:31, 32 ta bisa: “Ora e Yu di hende yega den su gloria, i tur e angelnan huntu cuné, e ora ei lo e sinta riba su trono glorioso. I tur e nacionnan lo ser reuní dilanti dje, i lo e separá hende un for di otro, mescos cu un wardadó ta separá carné for di cabritu.” E Toren di Vigilancia di 15 di october, 1995, a mustra pakico e versículonan aki ta aplicá despues cu e tribulacion grandi cuminsá. Jesus lo yega den su gloria cu su angelnan i lo sinta riba su trono di huicio. E ora ei, lo e separá hende. Den ki sentido? Lo e dicta fayo basá riba loke hende a haci of laga di haci promé cu e tempu ei.

Nos por compará esaki cu e desaroyo di un proceso legal cu ta hiba na un caso di corte. E evidencia ta acumulá durante un periodo extenso promé cu e corte tuma un decision i dicta sentencia. E evidencia si hende cu awor ta na bida lo resultá di ta carné of cabritu ta acumulando pa basta tempu. I te ainda e evidencia ta drentando. Pero ora Jesus sinta riba su trono, e caso lo ta completo. Lo e ta cla pa dicta fayo. Hende lo ser separá sea pa cortamentu eterno of pa bida eterno.

Sin embargo, e echo cu e separacion di hende pa bida of pa morto mencioná na Mateo 25:32 ta den futuro ainda, no kier men cu ningun separacion, of division, ta tuma lugá promé cu esei. Na Mateo capítulo 13, Bijbel ta mencioná un trabou di separacion cu ta tuma lugá mas promé. Interesantemente, e buki Uní den adoracion dje único Dios berdadero, página 179-80, ta trata esaki bou dje tema “Separacion di Pueblo”.a E buki ta bisa: “Tambe tin otro sosodementu significante cu Jesus a asociá prominentemente cu e conclusion dje sistema di cosnan. Un di nan ta e separacion dje ‘yunan di reino’ for di ‘yunan dje malbado.’ Jesus a mencioná esei den su comparacion tocante e cunucu di trigu unda e enemigu a sembra simia di mal yerba.”

E buki tabata referí na Jesus su ilustracion describí na Mateo 13:24-30 i splicá den versículo 36-43. Ripará den versículo 38 cu e simia di trigu excelente ta representá e yunan dje Reino, pero e mal yerba ta representá e yunan dje malbado. Versículo 39 i 40 ta mustra cu den e ‘conclusion dje sistema di cosnan’—durante e tempu den cua nos ta biba awor—e mal yerba ta ser recogé. Nan ta ser separá i finalmente kimá, destruí.

E ilustracion ta trata cu cristiannan ungí (cu den e comparacion di carné i cabritu ta ser yamá Jesus su rumannan). Sin embargo, e punto ta keda cla cu un separacion vital tá tuma lugá durante nos tempu, cu esnan ungí siendo distinguí for di esnan cu ta profesá di ta cristian pero cu ta resultá di ta “yunan dje malbado.”

Jesus a duna otro ehempelnan di hende cu ta ser dividí, of separá. Corda cu el a bisa relacioná cu e caminda hanchu cu ta hiba na destruccion: “Hopi ta esnan cu ta drenta dor di dje.” (Mateo 7:13) Esei no tabata un comentario djis tocante e resultado final. E tabata un comentario tocante un desaroyo cu ta andando, mescos cu ta e caso awor di e poconan cu ta haña e caminda pertá cu ta hiba na bida. Corda, tambe, cu ora Jesus a manda e apostelnan, el a bisa cu nan lo a haña algun cu lo ta merecedor. Otronan lo no ta merecedor, i e apostelnan mester a sagudí e stof for di nan pia “como un testimonio contra” hende asina. (Lucas 9:5) No ta cierto cu algu similar ta sosodé segun cu cristiannan ta efectuá nan ministerio público awe? Algun ta respondé bon, miéntras otronan ta rechasá e mensahe divino cu nos ta treciendo.

E artículonan den E Toren di Vigilancia cu a trata cu e carné i cabritunan a remarcá: “Miéntras cu e huicio describí den e comparacion ta den futuro cercano, asta awor aki algu vital ta tumando lugá. Nos como cristiannan ta enbolbí den un trabou salbador-di-bida di proclamá un mensahe cu ta causa division entre hende. (Mateo 10:32-39).” Den e pasashi ei di Mateo capítulo 10, nos ta lesa cu Jesus a bisa cu ora hende bira su siguidó, esei lo causa division—tata contra yu homber, yu muher contra mama.

Finalmente, Cristo su rumannan ungí cu spiritu a hiba delantera den e trabou mundial di predicá e mensahe di Reino. Segun cu hende ta tend’é i ta reaccioná faborablemente of desfaborablemente, nan ta identificando nan mes. Nos como hende no por, i no mag, bisa, ‘E persona aki ta un carné; esei ta un cabritu,’ den e sentido cu Mateo capítulo 25 ta transmití. Sin embargo, e echo cu nos ta exponé hende n’e bon nobo ta permití nan demostrá unda nan ta pará—ki clase di persona nan ta i con nan ta reaccioná pa cu Jesus su rumannan. P’esei, mescos cu evidencia cu ta acumulando pa un caso di corte, e division entre esnan cu ta apoyá Jesus su rumannan i esnan cu ta nenga di apoyá nan ta birando evidente. (Malakías 3:18) Manera E Toren di Vigilancia a mustra, pronto Jesus lo sinta riba su trono i lo dicta sentencia, hudicialmente separando hende den un sentido final pa bida of pa cortamentu.

[Nota]