Informe di Proclamadonan di Reino

El A Haña un “Perla di Balor Haltu”

“E REINO di shelu ta manera un comerciante biahero cu tabata buscando perlanan excelente. Ora cu el a haña un perla di balor haltu, el a bai i unbes a bende tur loke e tabatin i a cumpr’é.” Cu e palabranan aki, Jesus a ilustrá e balor haltísimo dje Reino di Dios. (Mateo 13:45, 46) Esnan cu ta reconocé e balor dje Reino hopi biaha ta haci gran sacrificio personal afin di haña gara firme di dje. Esaki ta ser ilustrá dor dje siguiente experencia for dje distrito di Pingtung, Taiwan.

Na 1991, Sr. i Sra. Lin a cuminsá studia Bijbel cu Testigonan di Jehova. Ora un pastor local a haña sa esei, el a trata na pone nan djoin su iglesia. Siendo cu famia Lin tabatin un negoshi di bende sanger di porco i di patu n’e marshe local, nan a dicidí di puntra e pastor su opinion riba e asuntu. “Tur loke Dios a traha por sirbi como cuminda pa hende,” el a contestá. E Testigonan, di otro banda, a animá nan pa considerá loke e Palabra di Dios ta bisa. Nan a haña sa cu Jehova Dios ta mira sanger como sagrado, pasobra “e bida di un criatura ta e sanger.” (Levítico 17:10, 11, The New English Bible) P’esei cristiannan berdadero mester “abstené . . . di sanger.” (Echonan 15:20) Como resultado di a examiná e Scritura riba e tópico aki, famia Lin a dicidí di stop di bende sanger, maske esei tabata e fuente principal di nan entrada. Sin embargo, den poco tempu, nan a enfrentá un prueba mas grandi ainda.

Promé cu famia Lin a siña e berdad, nan a planta 1.300 palma di betelnoot riba nan tereno. Aunke lo a tuma cincu aña pa nan saca ganashi for dje palunan, una bes cu nan a cuminsá producí, famia Lin por a spera di generá US$ 77.000 pa aña. Ya cu e promé tempu di cosecha tabata cerca, famia Lin tabatin cu tuma un decision importante. Nan a siña den nan studio di Bijbel cu cristiannan mester limpia nan mes “di tur contaminacion di carni i di spiritu” dor di evitá e uso di, of e promocion di, custumbernan impuru manera humamentu di tabaco, abusu di droga i koumentu riba betelnoot. (2 Corintionan 7:1) Kico nan lo a haci?

Bou di presion di un concenshi molestiá, Sr. Lin a dicidí di stop cu su studio. Miéntras tantu Sra. Lin tabata bende betelnoot di algun di nan palunan mas bieu i a haci un ganashi di mas cu US$ 3.000. Esaki tabata djis un muestra delantá di loke pronto lo a bini si nan a keda cu e palunan. Sin embargo, Sr. Lin su concenshi a sigui pui e.

El a lucha cu e cuestion te cu riba un bon dia el a pidi e Testigonan local kap su palmanan di betelnoot p’e. E Testigonan a splik’é cu ta e mester a tuma e decision ei; p’esei, lo e tabatin cu ‘carga su mes carga’ i kap e palunan e mes. (Galationan 6:4, 5) Nan a anim’é p’e corda e promesa na 1 Corintionan 10:13, cu ta bisa: “Ningun tentacion a bini riba boso fuera di loke ta comun pa hende. Pero Dios ta fiel, i lo e no laga boso ser tentá mas ayá di loke boso por soportá, sino cu huntu cu e tentacion lo e percurá tambe p’e salida pa boso por want’é.” Tambe e Testigonan a razoná cuné, bisando: “Si nos kap bo palunan pa bo, bo por lamentá esei i culpa nos pa e pérdida.” Un poco tempu despues, e zonido di un mashin di zag a lanta Sra. Lin un mainta for di soño. Su casá i yunan tabata cortando e palmanan di betelnoot!

Sr. Lin a mira cu Jehova ta fiel na Su promesa. El a haña un trabou cu a lagu’é cu un concenshi limpi, permitiend’e bira un alabadó di Jehova. El a ser bautisá na un asamblea di circuito di Testigonan di Jehova na april 1996.

Sí, den un sentido Sr. Lin “a bende tur loke e tabatin” i a cumpra un “perla di balor haltu.” Awor e tin e privilegio baliosísimo di tin un relacion personal cu Jehova Dios i di sirbi Su interesnan di Reino.