Bo Ta Corda?

Bo a haña cu e edicionnan recien di E Toren di Vigilancia tabata di balor práctico pa bo? Wel pakico no test bo memoria cu e siguiente preguntanan?

◻ Con Armagedon lo ta? (Revelacion 16:14, 16)

Lo e no ta un apocalípsis nuclear ni un desaster cu hende ta provocá. No, e ta e guera di Dios pa caba cu tur guera humano, pa anikilá tur esnan cu ta promové e gueranan ei, i pa trece berdadero pas pa esnan cu ta stima pas. Lo e no tarda. (Habacuc 2:3)—15/4, página 17.

◻ Ki clase di casamentu ta onra Jehova?

Un casamentu cu berdaderamente lo onra Jehova ta unu caminda e aspectonan spiritual ta prevalecé, mas bien cu e maneranan dje mundu. Cristiannan lo disfrutá dje ocasion si nan ta evitá custumbernan mundano degradá, supersticionnan i cosnan exagerá; si nan no ta laga e casamentu interferí cu actividadnan regular teocrático; i si nan ta manifestá modestia en bes di exhibicion grandioso.—15/4, página 26.

◻ Kico ta caracterisá un hende di integridad?

Un hende di integridad por ser confiá, no solamente dor di su semehante sino, mas importante, dor di Dios. Bo ta mira e puresa di curason di un persona asina den su accionnan. E ta liber di hipocresia. E no ta mañoso ni corupto. (2 Corintionan 4:2)—1/5, página 6.

◻ Pakico Jeremías a bisa: “Ta bon pa un hende físicamente capacitá carga e yugo durante su hubentud”? (Lamentacionnan 3:27)

Ora un hóben siña trata cu pruebanan ora e ta yong, e ta ser prepará pa enfrentá e problemanan difícil ora e ta adulto. (2 Timoteo 3:12) E beneficionan di fieldad tin muchu mas balor cu cualkier alivio temporal cu comprometé por trece cuné.—1/5, página 32.

◻ Kico e aparicion di Moises i Elías den e vision di transfiguracion a prefigurá?

Den e contexto dje transfiguracion, Moises i Elías tabata símbolonan apropiado di Jesus su rumannan ungí. E echo cu nan, mescos cu Jesus, “a aparecé cu gloria” a simbolisá cu fiel cristiannan ungí lo ser “glorificá huntu” cu Jesus den e areglo dje Reino celestial. (Lucas 9:30, 31; Romanonan 8:17; 2 Tesalonicensenan 1:10)—15/5, página 12, 14.

◻ Kico ta e “secreto sagrado” di Dios? (1 Corintionan 2:7)

E “secreto sagrado” di Dios ta enfocá riba Jesucristo. (Efesionan 1:9, 10) Sin embargo, e no ta simplemente e identificacion di Jesus como e Mesías primintí. E ta encerá un gobiernu celestial, e Reino Mesiánico di Dios, i ta incluí e papel cu Jesus ta asigná pa hunga den e propósito di Dios.—1/6, página 13.

◻ Con un cristian mester mira behes of malesa?

En bes di mira pruebanan asina como algu cu ta limitá su sirbishi na Jehova, e mester considerá nan como un oportunidad pa aumentá su dependencia riba Jehova. Tambe e mester corda cu e balor di un cristian ta ser midí no solamente na e nivel di su actividad, sino tambe na su fe i e profundidad di su amor. (Marco 12:41-44)—1/6, página 26.

◻ Con e echo cu Jehova a usa hende en bes di angel pa skirbi Bijbel ta mustra su gran sabiduria?

Si e elemento humano tabata completamente ausente, nos lo por tabatin dificultad pa capta e mensahe di Bijbel. Tambe, Bijbel tin e calor, variedad i atraccion cu e elemento humano ta dun’é.—15/6, página 8.

◻ Kico ta e secreto pa felicidad den famia?

E secreto ta ser hañá den e páginanan dje Palabra di Dios, Bijbel, i den aplicá su principionan, manera dominio propio, reconocimentu di hefatura, bon comunicacion i amor.—15/6, página 23, 24.

◻ Con sanacion cu Jesus a efectuá tabata hopi diferente for di loke generalmente esnan cu ta pretendé di tin poder di sana awe ta efectuá?

No tabatin un despliegue emocional fuerte di parti dje multitudnan ni ningun excitacion dramático di parti di Jesus. Ademas, Jesus nunca a keda sin sana hende enfermo cu e pretexto cu nan ofrenda monetario no tabata suficiente of cu nan a falta fe.—1/7, página 5.

◻ Con Jehova a yuda su pueblo haña un lugá den su propósito divino relacioná cu su nomber i Reino?

Di promé, Jehova a confia su pueblo cu e berdad. Di dos, el a duna nan su spiritu santu. I di tres, nos tin nos hermandad mundial i Jehova su areglo organisacional pa adoracion.—1/7, página 19, 20.

◻ Kico ta birtud?

Birtud ta excelencia moral, bondad, accion i pensamentu corecto. E no ta un cualidad pasivo sino unu activo i positivo. Birtud ta enbolbé mas cu evitá picá; e ta nificá sigui un curso di loke ta bon. (1 Timoteo 6:11)—15/7, página 14.

◻ Kico ta e herencia di mas balioso cu mayornan por duna nan yunan?

E herencia di mas balioso ta nan mes ehempel di mustra amor na otronan. Yunan tin cu mira i tende nan mayornan den un manera sobresaliente expresá i mustra amor genuino pa Dios den tur loke nan ta haci.—15/7, página 21.

◻ Kico ta algun punto esencial pa un studio di famia eficas?

Un studio di famia mester ta regular. Bo tin cu ‘cumpra tempu’ p’e studio. (Efesionan 5:15-17) Haci periodonan di studio bibu p’e yunan dor di duna e Bijbel bida. Pa yunan disfrutá di dje, nan tin cu sinti nan enbolbí den dje.—1/8, página 26, 28.