Salbá den un Tempu di Calamidad — BIBLIOTEKA ONLINE Watchtower

Salbá den un Tempu di Calamidad

E CENTRO di compra di cincu piso na Seúl, Korea, a basha den

otro di ripiente, atrapando cientos di hende paden! Trahadónan di rescate a traha dia i anochi pa salba mas tantu bida posibel. Segun cu dianan tabata pasa, e chensnan pa haña mas sobrebibiente derá den e monton di beton i heru a bira mas chikitu.

Net ora cu a bandoná tur speransa pa haña mas sobrebibiente, algu asombroso a tuma lugá. For di bou dje monton ei a sali un gritu débil i yorá. Trahadónan di rescate a coba desesperadamente cu man bashí pa por a libra un mucha muher di 19 aña di edad cu a keda derá bibu pa 16 dia largu. Un koker di lift cu a basha den otro a forma un buracu di proteccion riba dje i a spar e for di tonelada di beton cu a bini abou. Aunke e tabata severamente deshidratá i tur na cortá, el a scapa un morto sigur!

Awendia, casi tur luna tin informenan di un of otro desaster, sea ta un temblor, un tempestad violento, un erupcion volcánico, un accidente of un temporada di hamber. I relatonan espectacular di rescate i sobrebibencia ta intrigá i fasiná miyones di hende cu ta sigui noticia. Sin embargo, por lo general hende a ignorá e spiertamentu di un binidero calamidad—esun mas grandi cu cualkier otro den historia humano. (Mateo 24:21) Bijbel ta describí e binidero suceso aki cu e palabranan aki: “Mira! Un calamidad ta sali di nacion pa nacion, i un gran tormenta mes lo ser lantá for dje partinan mas remoto dje tera. I esnan matá dor di Jehova siguramente lo ta den e dia ei for di un punta dje tera te n’e otro punta dje tera. Nan lo no ser yorá, ni nan lo no ser recogé ni ser derá. Nan lo keda mescos cu mest riba cara dje suela.”—Jeremías 25:32, 33.

Palabranan spantoso! Pero distinto for di desaster natural i accidente, e calamidad aki lo no ta un matansa pa loco. Eigenlijk, ta posibel pa sobrebibí—pa abo sobrebibí!

Un Tempu di Urgencia

Pa capta completamente con ta posibel pa bo sobrebibí, bo tin cu comprendé promé pakico e calamidad mundial aki lo tuma lugá. En realidad, e ta e único berdadero solucion pa problemanan di humanidad. Poco hende awe ta sinti nan protehá i sigur. Maske cuantu esfuerso ciencia haci, malesanan contagioso ta sigui ruiná e poblacion dje tera. Gueranan causá pa diferencianan religioso, político i di tribu ta exigí miles i miles di bida humano. Tempu di hamber ta aumentá e pena i sufrimentu di homber, muher i mucha inocente. Decadencia moral ta caba cu e fundeshi mes di sociedad; asta muchanan a ser corumpí.

Cu exactitud remarcabel, un profecia di Bijbel skirbí mas cu 1.900 aña pasá ta describí nos situacion. E ta bisa: “Bo tin cu realisá cu den e último dianan tempu lo ta yen di peliger.”—2 Timoteo 3:1, The New Testament in Modern English, di J. B. Phillips; compará cu Mateo 24:3-22.

Ta parcé bo razonabel cu un Dios amoroso lo ta indiferente pa cu nos mal condicionnan? Bijbel ta bisa: “E, e Dios berdadero, e Formador dje tera i e Hacidor di dje, . . . no a cre’é simplemente por nada, [el] a form’é asta p’e ser habitá.” (Isaías 45:18) Sí, en bes di permití e planeta bunita aki ser ruiná i tur su habitantenan yega na un fin, Dios lo intervení. E pregunta ta: Con lo e haci esei?

Scoge Bida!

Bijbel ta contestá na Salmo 92:7: “Ora e malbadonan ta spruit manera vegetacion i tur e practicantenan di loke ta perhudicial ta florecé, esei ta pa nan por ser anikilá pa semper.” E solucion di Dios p’e problemanan dje tera ta eliminá maldad por completo. Afortunadamente, esaki no ta nificá cu ta tur hende mester ser eliminá. Salmo 37:34 ta sigurá nos: “Spera den Jehova i warda su caminda, i lo e halsá bo pa bo tuma posesion dje tera. Ora e malbadonan ta ser cortá, lo bo mir’é.”

E palabranan aki ta indicá cu tin un oportunidad pa ser salbá atrabes dje calamidad di mas grandi cu lo bini riba humanidad. Dios a duna nos un chens di scoge. E palabranan cu cua Moises a exhortá e israelitanan ora nan tabata preparando pa drenta e Tera Primintí ta mes aplicabel pa nos awe: “Mi a pone bida i morto bo dilanti, e bendicion i e maldicion; i bo tin cu scoge bida pa bo por keda na bida, abo i bo desendencia.” (Deuteronomio 30:19) Pero con exactamente un hende ta “scoge bida” i ser salbá? Kico berdadero salbacion ta nificá realmente?

[Rekonosementu pa Potrèt na página 2]

[[Rekonosementu pa Potrèt na página 3]

Yunhap News Agency/Sipa Press