Informe di Proclamadonan di Reino
Venciendo Desafionan den “e Tera di Cosnan Inesperá”
APOSTEL Pablo a puntra e cristiannan di promé siglo na Corinto: “Si e trompet ta toca un zonido indistinto, ken lo prepará pa bataya? Di igual manera tambe, a ménos cu boso expresá abla fácil pa comprendé cu e lenga, con hende por sa loke ta ser papiá?”—1 Corintionan 14:8, 9.
Na Papua Nueva Guinea, algun biaha yamá e Tera di Cosnan Inesperá, Testigonan di Jehova ta topa obstáculonan formidabel ora di predicá e mensahe claro di Bijbel. Nan ta predicá na hende cu ta papia mas cu 700 diferente idioma i cu tin un variedad amplio di custumber. Tambe e Testigonan ta lucha cu terenonan yen di ceru, falta di caminda i crímen aumentante. Ademas di tur e dificultadnan aki, tin oposicion di parti di cierto gruponan religioso i, tin biaha, asta di parti di funcionarionan escolar.
No obstante, bon instruccion spiritual i un biblioteca creciente di yudansanan pa studia Bijbel den idiomanan local ta ekipando e Testigonan pa transmití e bon nobo manera un zonido cla di trompet. Hopi biaha e reaccion ta positivo, manera e siguiente informenan ta mustra:
• Na comienso di un aña escolar nobo, un maestro tabata kier sa pakico e yunan di Testigonan di Jehova no ta saludá bandera ni canta himno nacional. El a dirigí su pregunta na Maiola, un alumna di 13 aña cu ta un Testigo bautisá. Maiola a duna un splicacion cla, basá riba Bijbel. E maestro a aceptá su razonamentu ya cu Maiola a sak’é for di Bijbel. E resto dje personal dje scol tambe a ricibí su splicacion.
Mas despues, ora e alumnonan a ser asigná pa skirbi opstel, Maiola a scoge e tema di Trinidad. Su opstel a ricibí e mihó punto den klas, i e maestro a puntr’é unda el a haña e informacion. Maiola a mustr’é e buki Bo por biba pa semper den Paradijs riba tera na ingles. E maestro a pasa na presentá e buki na henter e klas, i hopi mucha tabata kier un ehemplar pa nan mes. E siguiente dia, Maiola a laga 14 buki i 7 revista cu su coleganan di scol, i el a cuminsá studio di Bijbel cu tres di nan. Maiola su meta ta p’e bira un minister di tempu completo.
• Desde cuminsamentu di añanan ’70 un grupo isolá di Testigonan di Jehova den un pueblo costeño cerca di Port Moresby a enfrentá oposicion. Sin embargo, recientemente nan a ricibí yudansa di un fuente inesperá. E obispu di Iglesia Uní einan, un nativo di Papua Nueva Guinea cu a ricibí su educacion den estranheria, un dia a invitá e auditorio den misa pa haci pregunta. Un homber a puntra: “Tin dos religion den nos pueblo—Iglesia Uní i Testigonan di Jehova. Kico nos mester haci ora e Testigonan bini na nos porta?” Despues di un pausa largu, e obispu a contestá: “Bo sa, mi’n sa realmente kico pa bisá bo. Recientemente, dos Testigo yong a bini na mi porta. Nan a hací mi un pregunta, i cu tur mi entrenamentu universitario, mi no tabata sa e contesta. Pero fácilmente nan a duná mi e contesta for di Bijbel. P’esei mi no ta bisá bo kico pa haci—mi ta lagu’é na bo mes. Si bo no kier bo no mester scucha, pero no sea violento cu nan.”
Un representante biahero di Sociedad Watch Tower cu despues a bishitá e grupo di Testigo aki a informá: “Casi tur hende den e pueblo tabata scucha e Testigonan ora nan tabata predicá. Algun asta tabata invitá nan den nan cas. Awor e ta un paradijs pa predicá.”