Jehova Ta Goberná cu Compasion

ATRABES di historia hopi gobernante humano a ehercé nan poder na un manera sin heful, sin tin cunes cu e sufrimentu di nan súbditonan. Sin embargo, Jehova a soru pa un contraste dor di scoge un nacion—Israel—i gobern’é cu compasion.

Tempu e israelitanan tabata catibu ainda den antiguo Egipto, Jehova a tende nan gritunan pa yudansa. “Durante tur nan angustia tabata angustioso p’e. . . . Den su amor i den su compasion e mes a cumpra nan bek.” (Isaías 63:9) Jehova a salba Israel, a percurá pa nan haña cuminda milagroso i a hiba nan na un pais di nan mes.

Jehova su cualidad di compasion a ser manifestá mas ainda den e leynan cu el a duna e nacion aki. El a manda e israelitanan pa trata huérfano, biuda i residentenan stranhero cu compasion. Nan no tabatin mag di probechá di esnan incapacitá.

E Ley a rekerí pa mustra compasion na esnan den necesidad. Hende pober por a recogé loke a keda atras despues di cosecha. Debenan a ser cancelá den e aña di Sabat (cada shete aña). Den e aña di Hubileo (cada 50 aña) mester a debolbé tur tera di herencia cu a ser bendí. Ancient Israel—Its Life and Institutions ta informá: “Den Israel, nunca a ègt existí clasenan social manera nos conocé awe.” “Den e promé dianan dje colonia, tur israelita a disfrutá di mas o ménos e mésun nivel di bida.”—Levítico 25:10; Deuteronomio 15:12-14; 24:17-22; 27:18.

Imitando Jehova Su Compasion

E sirbidónan di Dios ta ser inspirá pa su compasion. Por ehempel, atrabes di historia, algun rey recien entronisá a mata miembronan dje dinastia real anterior cu a keda na bida. Sin embargo, Jehova su sirbidó David, no a haci esaki. Despues di morto di Rey Saul, David a protehá Mefíboset, Saul su nietu i heredero cu a keda na bida. “E rey tabatin compasion cu Mefíboset, yu homber di Jonatan, yu homber di Saul.”—2 Samuel 21:7.

Ningun otro hende a imitá Jehova su compasion manera Jesus a haci. Hopi di su milagernan tabata motivá pa compasion piadoso. Na un ocasion un leproso a suplik’é: “Si bo solamente kier, bo por hací mi limpi.” Jesus a haña duele di dje i a mishi cuné, bisando: “Mi kier. Sea limpi.” (Marco 1:40-42) Na un otro ocasion, un multitud grandi tabata sigui Jesus. Meimei di tur e conmocion, Jesus a presta atencion na dos homber ciegu cu a grita: “‘Señor, tene misericordia di nos, Yu di David!’ . . . Conmoví cu duele pa nan, Jesus a mishi cu nan wowo, i un bes nan a ricibí bista.”—Mateo 20:29-34.

Multitudnan grandi no a pone Jesus perde su heful pa cu otro hende. Debí cu nan no a come pa algun tempu, el a bisa na un ocasion: “Mi tin duele dje multitud.” Di manera cu el a alimentá nan milagrosamente. (Marco 8:1-8) Ora Jesus a haci su gira, no solamente el a siña multitudnan sino tambe e tabata atento na nan necesidadnan. (Mateo 9:35, 36) Despues di un gira asina, Jesus i su disipelnan no tabatin ni tempu pa come un cuminda. E relato bíblico ta conta nos: “Pues nan a bai den e boto pa un lugá solitario nan so. Pero hende a mira nan bai i hopi a haña sa di esei, i di tur stad nan a core bai ei huntu na pia i a yega promé cu nan. Wel, ora el a desembarcá, el a mira un multitud grandi, pero el a ser conmoví cu duele pa nan, pasobra nan tabata manera carné sin wardadó. I el a cuminsá siña nan hopi cos.”—Marco 6:31-34.

Loke a impulsá Jesus no tabata djis e malesanan i pobresa dje pueblo, sino nan condicion spiritual. Nan lidernan tabata probechá di nan, p’esei Jesus “a ser conmoví cu duele pa nan.” E palabra griego pa “a ser conmoví cu duele” ta nificá “sinti bo mondongo anhelá.” Jesus di berdad tabata un homber compasivo!

Compasion den un Mundu Cruel

Awor Jesucristo ta e Rey di Jehova su Reino celestial. Mescos cu el a haci den antiguo Israel, Dios ta goberná su pueblo awe cu compasion. “‘Siguramente nan lo bira di mi,’ Jehova di ehércitonan a bisa, ‘riba e dia cu mi producí un propiedad special. I lo mi mustra compasion pa nan.’”—Malakías 3:17.

Esnan cu kier ricibí Jehova su compasion tin cu imitá su manera di actua. Ta cierto cu nos ta biba den un mundu caminda hende ta mas interesá den mantené nan estilo di bida cu yuda esnan den necesidad. Hopi bes esnan na poder ta busca ganashi a costo di e siguridad di obrero i di consumidó. Na 2 Timoteo 3:1-4, Bijbel ta describí cu exactitud e clima moral di nos tempu cu a caba cu compasion den curason di asina hopi hende.

Tog, probablemente nos por haña oportunidadnan pa mustra compasion. Ora nos bisiñanan tin mester di yudansa, nos lo por ofrecé pa yuda? Nos lo por bishitá un persona cu ta malu? Ta posibel pa nos animá esnan cu ta deprimí, di acuerdo cu e conseho: “Papia di un manera consolador cu e almanan deprimí, apoyá e débilnan”?—1 Tesalonicensenan 5:14.

Tambe compasion lo yuda nos evitá di rabia ora otronan haci fout. Bijbel ta bisa nos: “Kita tur amargura malicioso i furia i rabia i griteria i abla ofensivo for di boso, huntu cu tur maldad. Mas bien, bira bondadoso un cu otro, tiernamente compasivo, pordonando otro libremente mescos cu Dios tambe mediante Cristo a pordoná boso libremente.”—Efesionan 4:31, 32.

Compasion lo yuda nos evitá e tendencia di abusá di poder. Bijbel ta bisa: “Bisti boso cu tierno cariño di compasion, bondad, humildad di mente, suavedad, i gran pacenshi.” (Colosensenan 3:12) Humildad di mente ta capacitá nos pa pone nos mes den sapatu di esnan cu ta bou di nos supervision. Ser compasivo ta encerá ser humilde i razonabel en bes di difícil pa agradá. Eficiencia no mester ta un excuus pa trata hende manera simplemente parti di un mashin. Den famia tambe, esposonan compasivo ta corda cu nan esposa ta un wea mas swak. (1 Pedro 3:7) Meditando riba Jesus su ehempel di compasion por yuda nos den tur esaki.

Ya cu Jesus tabatin asina un sintimentu profundo pa hende durante su ministerio terenal, nos por ta sigur cu awor e ta, i lo sigui ta, un Gobernante compasivo. Salmo 72 ta bisa di dje proféticamente: “Lagu’e husga esnan afligí dje pueblo, lagu’e salba e yu hombernan di esun pober, i lagu’e aplastá e estafadó. I lo e tin súbditonan di laman te laman i dje Riu te na cabamentu dje tera. Lo e sinti duele di esun di condicion humilde i esun pober, i e alma di esnan pober lo e salba.”—Salmo 72:4, 8, 13.

E Palabra di Dios ta predicí: “Cu husticia e tin cu husga esnan di condicion humilde, i cu rectitud e tin cu duna reprendimentu na fabor di esnan mansu dje tera. . . . Lo e mata e malbado.” Despues di describí con asta algun hende cruel, manera bestia lo cambia nan manera di anda, e profecia ta sigui: “Nan lo no haci ningun daño ni causa ningun ruina den tur mi ceru santu; pasobra e tera siguramente lo ta yená cu e conocimentu di Jehova mescos cu e awanan ta cubri laman mes.” (Isaías 11:4-9) E profecia aki ta primintí nada ménos cu un sociedad mundial di hende cu conocé Jehova i cu ta imitá su manera di actua compasivo!