Cristianismo den Accion​—Meimei di Turbulencia

TUR cos a cuminsá di ripiente un dia den april 1994. Un avion a cai matando e presidentenan di Burundi i Ruanda. Den un par di ora violencia di proporcionnan horibel a asotá Ruanda. Den poco mas cu tres luna, mas cu 500.000 habitante di Ruanda—homber, muher i mucha—tabata morto. Algun hende ta referí n’e periodo como “e genocidio.”

Mitar di Ruanda su 7,5 miyon habitantenan tabatin cu hui, incluyendo 2,4 miyon hende cu a busca refugio den paisnan bisiña. Esei tabata e éxodo mas grandi i mas rápido di refugiado den historia actual. Den purá nan a establecé camponan di refugiado den Zaire (awor República Democrático di Congo), Tanzania i Burundi. Algun dje camponan aki—esnan mas grandi na mundu—a duna refugio na 200.000 hende.

Entre e refugiadonan tabatin hopi Testigo di Jehova, un pueblo amante di pas cu ta aplicá principionan di Bijbel den nan bida. Den cualkier pais cu nan ta biba, nan ta mantené neutralidad estricto i ta aplicá e principio incorporá den e palabranan aki di Isaías 2:4: “Nan lo tin cu bati nan spada na ploeg i nan lansa na skèr di corta mata. Nacion lo no hisa spada contra nacion, ni nan lo no siña mas di guera.” Testigonan di Jehova ta ampliamente conocí como un grupo religioso cu no a participá den e genocidio na Ruanda.

Jesucristo a bisa cu su siguidónan “no ta parti dje mundu.” Sin embargo, debí cu nan ta “den e mundu,” no ta tur biaha nan por scapa dje turbulencia dje nacionnan. (Juan 17:11, 14) Durante e genocidio na Ruanda, un 400 Testigo a perde nan bida. Rond di 2.000 Testigo i persona interesá den e mensahe di Reino a bira refugiado.

No ser parti di mundu kier men cu Testigonan di Jehova no ta haci nada ora calamidad dal aden? No. E Palabra di Dios ta bisa: “Si un ruman homber of ruman muher ta den un estado di desnudes i ta falta cuminda suficiente p’e dia, i tog un cierto hende di boso ta bisa nan: ‘Bai na pas, tene bo curpa cayente i bon alimentá,’ pero boso no ta duna nan e cosnan necesario pa nan curpa, di ki probecho esei ta? Asina, tambe, fe, si e no tin obra, ta morto riba su mes.” (Santiago 2:15-17) Amor pa próhimo tambe ta motivá Testigonan pa yuda esnan cu no tin mésun punto di bista religioso cu nan.—Mateo 22:37-40.

Maske Testigonan di Jehova rond parti mundu a anhelá pa yuda nan compañeronan creyente cu tabata pasando den e situacion calamitoso na Ruanda, a asigná West Europa cu coordinacion dje yudansa di auxilio. Den zomer di 1994, un tim di boluntarionan Testigo for di Europa a pura bai yuda nan rumannan cristian na Africa. Nan a establecé campo i hospitalnan temporal bon organisá pa e refugiadonan di Ruanda. Cu avion of otro medio di transporte nan a manda cantidad inmenso di paña, deken, cuminda i literatura bíblico. Mas cu 7.000 persona afligí—casi tres biaha e cantidad di Testigo di Jehova na Ruanda e tempu ei—a beneficiá dje yudansa di auxilio. Pa december dje aña ei, miles di refugiado, incluso mayoria di esnan cu tabata Testigo di Jehova, a regresá Ruanda pa reconstruí nan bida.

Guera na Congo

Na 1996, guera a start den e region oost dje República Democrático di Congo. E área aki ta na frontera di Ruanda i Burundi. Atrobe tabatin violacion i matamentu. Meimei di bala cu tabata skeiru i pueblitonan na candela, hende a hui pa nan bida. Testigonan di Jehova a haña nan atrapá den e turbulencia, i rond di 50 a muri. Balanan cu a desviá a mata algun. Otronan a ser matá debí cu nan tabata pertenecé na un cierto grupo étnico of dor cu pa ekibocacion a mira nan pa enemigu. Candela a destruí un pueblito caminda 150 Testigo tabata biba. Den otro pueblitonan, nan a kima decenas di cas i algun Salon di Reino. Kitá di nan cas i posesionnan, Testigonan a hui bai otro áreanan i ei compañeronan di adoracion a yuda nan.

Un consecuencia di guera ta hamber, ya cu nan ta ruiná e cosecha, sakea depósitonan di cuminda i ta corta liñanan di suministro. Cuminda cu tin disponibel ta caru. Na Kisangani, na principio di mei 1997, 1 kilo di batata a costa rond di cincu florin, loke mayoria hende no por a aford. E mayoria por a permití nan mes solamente un cuminda pa dia. Naturalmente, malesa ta bini a consecuencia di scarcedad di cuminda. Malnutricion ta debilitá e curpa su abilidad di resistí malaria, diarea i problemanan di stoma. Foral mucha ta sufri i muri.

Evaluando e Necesidad

Atrobe Testigonan di Jehova na Europa a respondé rápidamente n’e necesidad. Pa april 1997 un tim di auxilio di Testigonan di Jehova, entre nan dos dokter, a bula bin cu remedi i placa. Na Goma, Testigonan local ya caba a organisá comiténan di auxilio pa evaluá e situacion di manera cu por a duna yudansa mesora. E tim a explorá e stad i e área den su alrededor. A manda mensaheronan bai busca informe for di lugánan mas leu. Tambe a ricibí informe for di Kisangani, situá mas di 1.000 kilometer west di Goma. Rumannan local a yuda coordiná yudansa di auxilio na Goma, caminda 700 Testigo ta biba.

Un dje ancianonan cristian na Goma a bisa: “Nos tabata profundamente conmoví pa mira nos rumannan cu a bini di asina leu pa yuda nos. Promé cu nan a bini, nos un a yuda otro. Rumannan tabatin cu hui for dje área di cunucu bini Goma. Algun a perde nan cas, i nan a bandoná nan cunucunan. Nos a tuma nan den nos cas i a compartí nos pañanan i e tiki cuminda cu nos tabatin. Loke nos por a haci localmente no tabata mashá. Algun di nos tabata sufri di malnutricion.

Sin embargo, e rumannan di Europa a trece placa cu a permití nos cumpra cuminda, cu tabata scars i hopi caru. E cuminda a bini na un momento crucial, ya cu hopi ruman no tabatin nada di come na cas. Nos a parti e cuminda tantu pa Testigonan como pa hende no-Testigo. Si e yudansa no a yega n’e momento cu el a yega, hopi ruman mas lo a muri, foral mucha. Jehova a salba su pueblo. Hendenan no-Testigo a keda masha impresioná. Hopi di nan a comentá riba nos unidad i amor. Algun a reconocé cu nos religion ta esun berdadero.”

Aunke a cumpra cuminda localmente i a duna remedi, tabatin mester di mas cos. Tabatin mester di paña i deken, i tambe mas cuminda i remedi. Tambe tabatin mester di yudansa pa reconstruí e casnan cu a ser destruí.

Hendenan Ta Duna Generosamente

Atrobe e rumannan na Europa tabata ansioso pa yuda. E sucursal di Testigonan di Jehova na Louviers, Francia, a informá e congregacionnan den e área dje Vaye di Rhône, i tambe di Normandia, i parti dje área di Paris, dje necesidadnan di auxilio. Aki un otro principio bíblico tabata aplicá: “Esun cu ta sembra miskiñamente lo cosechá miskiñamente tambe; i esun cu ta sembra abundantemente lo cosechá abundantemente tambe. Laga cada un haci net manera el a determiná den su curason, no di mala gana ni bou di obligacion, pasobra Dios ta stima un dunadó alegre.”—2 Corintionan 9:6, 7.

Miles di ruman gososamente a gara e oportunidad pa duna. Nan a yena Salonnan di Reino cu caha i sacunan di paña, sapatu i otro artículonan, i despues a transportá nan p’e sucursal di Testigonan di Jehova na Francia. Einan 400 boluntario tabata cla pa participá den e siguiente fase dje proyecto “Yuda Zaire.” Segun cu artículonan duná tabata basha drenta, e boluntarionan aki tabata surti, dobla i paketá e pañanan den cahanan cu nan a stapel 30 pa palet. Muchanan a pensa riba nan rumannan chikitu na Africa i a manda co’i hunga—bunita auto di hunga, trom, popchi i teddy beer. A paketá esakinan huntu cu artículonan necesario pa bida. Na tur a yena i manda pa Congo nuebe container di 12 meter.

Cuantu yudansa a manda pa Africa Central cu ayudo di miles di Testigo na Bélgica, Francia i Suisa? Pa juni 1997, e cantidad total tabata 500 kilo di remedi, 10 ton di buskuchi di alta-proteina, 20 ton di otro cuminda, 90 ton di paña, 18.500 par di sapatu i 1.000 deken. Literatura bíblico tambe a bai cu avion. E refugiadonan a apreciá tur esaki mashá, ya cu esei a consolá nan i a yuda nan wanta nan pruebanan. E costo total dje suministronan a yega casi 1.000.000 dollar. Contribucionnan asina tabata evidencia dje hermandad i amor entre esnan cu ta sirbi Jehova.

Distribucion na Congo

Segun cu e artículonan a cuminsá yega Congo, dos ruman homber i un ruman muher a bini for di Francia pa traha cu e comiténan local di auxilio. Relacioná cu e gratitud cu Testigonan di Congo a demostrá, Joseline, a bisa: “Nos a ricibí hopi carta di aprecio. Un ruman muher pober a duná mi un adorno di malakit. Otronan a duna nos potret di nan mes. Ora nos tabata bai, cu awa na wowo e ruman muhernan tabata sunchi mi i brasá mi. Ami tambe tabata yora. Hopi tabata bisa cosnan manera: ‘Jehova ta bon. Jehova ta corda riba nos.’ Pues nan a reconocé cu e crédito p’e dunamentu aki a bai na Dios. Ora nos tabata parti cuminda, e rumannan tabata alabá Jehova cu canticanan di Reino. Tabata masha conmovedor.”

Un dokter cu yama Loic tabata miembro dje tim. Hopi hende a perta den e Salon di Reino i cu pacenshi a spera nan turno p’e wak nan. Un ruman muher di Congo, cu tambe kier a haci algu, a traha i duna rond di 40 donut pa esnan cu tabata warda pa mira e dokter. Como cu tabatin 80 hende ta warda, cada un a ricibí mitar donut.

Yudansa na Hende No-Testigo

No a duna e yudansa humanitario aki exclusivamente na Testigonan di Jehova. Otro hende tambe a beneficiá, mescos cu hopi na 1994. Esaki ta na armonia cu Galationan 6:10, cu ta bisa: “Realmente, anto, miéntras cu nos tin tempu faborabel p’e, laga nos obra loke ta bon pa cu tur, pero specialmente pa cu esnan relacioná cu nos den e fe.”

E Testigonan a parti remedi i paña na vários scol básico i na un weeshuis cerca di Goma. E weeshuis tin 85 mucha. Durante un biahe anterior pa evaluá e situacion, e tim di auxilio a bishitá e weeshuis i a primintí di duna nan 50 caha di buskuchi di alta-proteina, cahanan di paña, 100 deken, remedi i co’i hunga. E muchanan a para den rij den e patio i a canta p’e bishitantenan. Despues nan a haci un peticion special: lo ta posibel pa nan haña un bala pa asina nan por hunga futbol?

Vários siman despues e tim di auxilio a cumpli cu nan promesa di trece e artículonan. E director dje weeshuis, impresioná cu e generosidad i dor di loke el a lesa den e literatura bíblico cu a dun’é, a bisa cu e tabata riba caminda pa bira un Testigo di Jehova. I e muchanan a haña un bala di futbol? “No,” Claude, e coordinadó dje tim di auxilio for di Francia, a contestá. “Nos a duna nan dos bala di futbol.”

Camponan di Refugiado

Yudansa no a keda limitá na Congo. Miles di refugiado a hui for dje zona di guera pa un pais bisiña caminda a establecé den purá tres campo di refugiado. Testigonan a biaha bai ei tambe, pa mira kico por a haci. Tempu a prepará e informe aki, e camponan tabata duna refugio na 211.000 refugiado, mayoria for di Congo. Rond di 800 tabata Testigo cu nan yunan i personanan interesá den e bon nobo di Reino. Un problema urgente den e camponan tabata falta di cuminda. Na un campo, tabatin suficiente cuminda pa solamente tres dia, i esei tabata incluí bonchi di tres aña bieu.

Tog e Testigonan tabatin bon ánimo. Maske nan tabatin poco literatura bíblico, regularmente nan a conducí reunionnan na aire liber pa edificá nan mes spiritualmente. Tambe nan tabata druk ta predicá e bon nobo dje Reino di Dios na otro hende den e camponan.—Mateo 24:14; Hebreonan 10:24, 25.

Den e tim di investigacion di Testigonan tabatin un dokter. Aunke e autoridadnan a permití nan pasa solamente un par di dia den cada campo, nan a tene consulta médico. Nan a laga remedi i placa cerca e ancianonan cristian. Asina e rumannan a logra sobrebibí. Tambe e tim ta spera cu pronto e Testigonan den e camponan lo por regresá nan pais natal.

Kico dje futuro? Jesucristo a predicí cu nos tempu lo ta unu di gran turbulencia, un tempu marcá pa guera i scarcedad di cuminda. (Mateo 24:7) Testigonan di Jehova sa cu e Reino di Dios so lo pone fin n’e sufrimentu cu ta existí awor riba tera. Bou di su gobernacion, nos cas terenal lo bira un paradijs di pas, abundancia i felicidad duradero pa humanidad obediente. (Salmo 72:1, 3, 16) Miéntras tantu, Testigonan lo proclamá e bon nobo dje Reino celestial ei i tambe lo sigui yuda compañeronan di adoracion i otro hende den tempu di necesidad.

[Komentario na página 4]

Desde 1994, Testigonan di Jehova di Europa so a manda mas cu 190 ton di cuminda, paña, remedi i otro artículonan di auxilio pa e region di Gran Lagonan na Africa

[Kuadro na página 6]

Amor Cristian Poné na Práctica

Ruth Danner tabata entre esnan cu a participá ansiosamente den e proyecto “Yuda Zaire” na Francia. Como mucha, el a ser encarcelá den camponan di concentracion nazi pa motibu di su fe cristian. El a comentá: “Nos tabata asina contentu di por haci algu pa nos rumannan na Africa! Pero tabatin un cos cu a hací mi dòbel felis. Na 1945, ora ami cu mi famia a bini cas bek for di Alemania, nos no tabatin nada nada. Asta e pañanan cu nos tabatin bistí tabata fiá. Sin embargo, pronto nos a ricibí yudansa material for di nos rumannan spiritual na Merca. P’esei e yudansa di auxilio aki pa Africa a permití mi paga bek e bondad mustrá na nos asina hopi tempu pasá. Ta ki un privilegio pa ta parti di un famia asina grandi di rumannan cu ta pone amor cristian na práctica!”—Juan 13:34, 35.

[Plachi na página 7]

Pronto—un paradijs terenal cu abundancia pa tur