Fortaleciendo Nos Fe den e Palabra di Dios

COMPARA cu cualkier otro buki, Bijbel ta esun cu mas hende a lesa. Pero cuantu a manifestá fe den su mensahe? Bijbel mes ta splica cu “no ta tur hende tin fe.” (2 Tesalonicensenan 3:2) Ta obvio cu nos no ta nace cu fe. Mester desaroy’é. Asta esnan cu tin un midí di fe no mester tum’é como algu di mes. Fe por bai atras i muri. P’esei, esfuerso ta necesario pa keda “saludabel den fe.”—Tito 2:2.

Cu bon motibu anto, e Cuerpo Gobernante di Testigonan di Jehova a scoge e tema “Fe den e Palabra di Dios” pa nan seri di congreso di distrito 1997/98. Asina, miyones di Testigo i otronan a haña e privilegio di reuní huntu pa fortalecé nan fe den e Palabra di Dios.

E Palabra di Dios Ta e Berdad—E Base di Nos Fe

Esaki tabata e tema dje promé dia di congreso. El a cuminsá cu palabranan di encomendacion na tur presente. Presencia n’e congreso tabata evidencia di respet pa Bijbel. Sin embargo, e orador a haci preguntanan relacioná cu e calidad di nos fe cu a pone nos pensa: ‘Nos por defendé nos creencianan, usando e Palabra di Dios como autoridad? Nos ta mustra aprecio p’e alimento spiritual, i nunca ta balotá e Bijbel, reunionnan di congregacion i publicacionnan bíblico? Nos ta creciendo den amor, conocimentu exacto i dicernimentu?’ E orador a animá tur presente pa scucha cu atencion, i a mencioná cu “e Congreso di Distrito aki, ‘Fe den e Palabra di Dios,’ a ser prepará pa yuda nos scudriñá nos mes i examiná cuantu fe nos personalmente tin i e calidad di nos fe.”

E discurso clave tabata titulá “Cana pa Fe, No pa Bista.” (2 Corintionan 5:7) “E fe di esnan cu bira Testigo di Jehova no ta credulidad,” e orador a bisa. Ki cierto esaki ta! Berdadero fe no ta ciegu. E ta basá riba realidadnan. Hebreonan 11:1 ta bisa: “Fe ta e expectativa sigur di cosnan sperá, e demostracion evidente di realidadnan aunke nan no ta ser contemplá.” E orador a remarcá: “Si nos berdaderamente ta bai cana pa fe, nos tin mester di fe cu ta bon fundá.” Debí cu nos ta cana pa fe, no pa bista, nos no tin mester di detayenan tocante con i na ki tempu Jehova lo efectuá tur aspecto di su propósito. Loke nos sa caba di dje ta duna nos confiansa absoluto den su poder di cumpli cu su promesanan cu amor i husticia.

E discurso “Hóbennan Cristian—Un Parti Vital dje Congregacion” a recordá hóbennan con precioso nan ta pa Jehova. A animá nan pa crece spiritualmente dor di purba alcansá metanan manera lesa e Bijbel completo i yena e rekisitonan pa dedicacion i bautismo. Siguimentu di educacion adicional ta un asuntu personal cu e hóben mester dicidí huntu cu su mayornan, pero si ta bai hacié, e meta semper mester ta p’e educacion adicional ekipá e hóben pa sirbi Dios mas eficasmente. Educacion seglar por sirbi un bon propósito ora nos “haci sigur dje cosnan mas importante” cu ta relacioná cu nos fe.—Filipensenan 1:9, 10.

Despues a bini un simposio di tres discurso riba e tema “Na Ken Su Normanan Bo Ta Tené Bo?” Fe den e Palabra di Dios ta motivá nos pa pega na normanan di Bijbel. Cristiannan ta obedecé Jehova su ley i principionan. Por ehempel, e Scritura ta amonestá nos pa no usa abla obseno ni ofensivo. (Efesionan 4:31, 32) E orador a puntra: “Ora bo ta molestiá of iritá, bo ta grita palabranan di abusu na bo casá of yunan?” Naturalmente, esei lo no ta cristian. Tambe Dios tin normanan en cuanto nos aparencia personal. Cristiannan mester bisti nan mes “cu bistí bon areglá, cu modestia.” (1 Timoteo 2:9, 10) E palabra “modestia” ta expresá e pensamentu di respet propio, un sentido di onor, sobriedad i moderacion. Amor pa otro hende ta motivá nos i nos ta laga principionan di Bijbel i un sentido di loke ta apropiado guia nos.

E dos discursonan cu a sigui e simposio tabata un consideracion versículo-pa-versículo di Hebreonan 3:7-15 i 4:1-16. E pasashinan aki di Bijbel ta spierta nos contra e peliger di bira “duru mediante e poder engañoso di picá.” (Hebreonan 3:13) Con nos por tin éxito den nos lucha contra picá? Jehova ta yuda nos mediante su Palabra. En berdad, “e palabra di Dios ta bibu i ta ehercé poder i . . . por dicerní pensamentunan i intencionnan dje curason.”—Hebreonan 4:12.

E discurso final riba e promé dia di congreso tabata “Un Buki pa Tur Hende.” El a resaltá e autenticidad, exactitud i balor práctico di Bijbel. Ki emocionante pa tende e orador anunciá e publicacion di un foyeto nobo di 32 página titulá Un Buki pa Tur Hende! A prepará e publicacion nobo aki foral pa hende cu, aunke nan ta bon educá, sa poco di Bijbel. E discurso a concluí cu e palabranan: “Hende tin cu examiná e Palabra di Dios pa nan mes. Nos tin sigur cu si nan haci un examinacion personal, nan lo realisá cu e buki único aki, Bijbel, ta en berdad un buki pa tur hende!”

Imitá e “Perfeccionador di Nos Fe”

E tema aki dje di dos dia di congreso a hala atencion na Jesucristo, e “Perfeccionador di nos fe.” Nos tin cu “sigui su pasonan cu sumo cuidou i atencion.” (Hebreonan 12:2; 1 Pedro 2:21) Nan ta bisa hopi hende den cristiandad: ‘Kere den Señor Jesus, i lo bo ta salbá!’ Pero esei ta tur loke fe ta encerá? Bijbel ta declará cu “fe sin obra ta morto.” (Santiago 2:26) P’esei, ademas di kere den Jesus, nos tin cu haci e obranan cu el a haci, specialmente dor di predicá e bon nobo dje Reino di Dios.

E programa di mainta a concentrá riba e trabou di evangelisá. Mescos cu Pablo, nos mester ta ansioso pa declará e bon nobo di salbacion. (Romanonan 1:14-16) Jesus a predicá na hende tur caminda. Maske nos ministerio regular di cas-pa-cas ta producí resultado, mas i mas hende no ta na cas ora nos pasa. (Echonan 20:20) Hopi di nan ta na scol, na trabou, di compra of biahando. Pues, nos tin cu predicá tambe den lugánan público i na cualkier otro caminda cu nos por haña hende.

E discurso “Saca Rais i Bira Stabilisá den e Berdad” a recordá nos dje cantidad grandi di disipel nobo cu ta ser bautisá—un promedio di 1.000 pa dia! Ta vital pa e rumannan nobo aki saca bon rais i bira stabilisá den e fe. (Colosensenan 2:6, 7) E orador a splica cu rais literal ta absorbá awa i nutricion, i na mes momento tambe ta ancra of sostené e mata. Di igual manera, mediante bon custumbernan di studio i asociacion saludabel, disipelnan nobo por bira stabilisá den e berdad.

E conseho aki tabata specialmente apropiado pa candidatonan di bautismo. Sí, riba e di dos dia di congreso, gruponan grandi di disipel a bautisá, siguiendo e ehempel di Jesus. E discurso “Fe den e Palabra di Dios Ta Hiba na Bautismo” a recordá e candidatonan cu bai completo bou di awa ta un símbolo apropiado di muri en cuanto nan curso di bida anterior di busca nan propio interes. Lanta for di awa ta representá cu nan ta haña bida di nobo pa haci Dios su boluntad.

E discurso “Hiba un Lucha Duru p’e Fe” tabata basá riba e buki di Hudas. Nos a haña e animacion pa protehá nos fe dor di resistí influencianan perhudicial, manera inmoralidad, rebeldia i apostasia. Siguientemente, mayornan—specialmente tatanan—a ricibí atencion special den e discurso “Haci Percuracion pa Bo Famia di Cas.” Percurá pa e famia su necesidadnan spiritual, físico i emocional ta un obligacion bíblico. (1 Timoteo 5:8) Esaki ta rekerí tempu, comunicacion i intimidad. Jehova Dios sigur ta contentu cu tur e trabou duru cu mayornan cristian ta haci pa lanta nan yunan den e berdad.

E siguiente simposio, “Ban n’e Cas di Jehova,” a aumentá nos aprecio pa reunionnan cristian. Nan ta percurá descanso for di ansiedadnan dje mundu aki. N’e reunionnan nos tin oportunidad di haña un intercambio di estímulo, i nos por demostrá nos amor pa nos compañeronan creyente. (Hebreonan 10:24, 25) Tambe reunionnan ta yuda nos mehorá nos abilidadnan como maestro, i nan ta profundisá nos comprendimentu di Dios su propósito. (Proverbionan 27:17) Laga nos nunca isolá nos mes for dje congregacion, i laga nos corda e palabranan di Jesus: “Unda cu tin dos of tres reuní den mi nomber, ei mi ta meimei di nan.”—Mateo 18:20.

E último discurso dje dia tabata “E Calidad di Bo Fe—Probá Awor.” Fe cu no ta di test no tin balor probá, i su calidad ta keda desconocí. Ta mescos cu un chek cu no a ser cobrá ainda. Realmente e ta bal e montante di placa skirbí riba dje? Di manera similar, mester test nos fe pa proba cu e tin substancia i berdadero calidad. (1 Pedro 1:6, 7) E orador a bisa: “Tin biaha, e medionan di prensa i tambe autoridadnan ta ser engañá dor di miembronan di clero i apóstatanan pa acusá nos falsamente, dunando un malrepresentacion di nos creencianan cristian i moda di biba. . . . Nos lo permití esnan ciegá dor di Satanas intimidá nos i descurashá nos i laga nos sinti bergwensa dje bon nobo? Nos lo permití mentiranan tocante e berdad afectá nos asistencia regular na reunion i nos actividad di predicá? Of nos lo para firme i tene curashi i ser mas dicididu cu nunca pa sigui declará e berdad tocante Jehova i su Reino?”

Biba pa Motibu di Fe

E tema dje di tres dia di congreso tabata basá riba e palabranan di Pablo: “Ta evidente cu pa medio di ley ningun hende ta ser declará hustu pa cu Dios, pasobra ‘hende hustu lo biba pa motibu di fe.’” (Galationan 3:11) E simposio, “Joël Su Palabranan Profético pa Nos Dia,” tabata un dje puntonan sobresaliente dje mainta. E buki di Joël ta señalá na nos tempu i ta bisa cu un sentido di urgencia: “Ai dje dia; pasobra e dia di Jehova ta cerca, i lo e bini manera un plundermentu violento for dje Todopoderoso!” (Joël 1:15) Mescos cu dalakochinan implacabel, cristiannan ungí no a laga nada stroba e proclamacion di Reino den e tempu aki di fin.

E buki di Joël ta duna speransa tambe, bisando: “Tur cu inbocá e nomber di Jehova lo scapa a salbo.” (Joël 2:32) Esaki ta nificá mas cu djis usa nomber di Jehova. Repentimentu sincero ta necesario, i esaki ta encerá renunciá malecho. (Joël 2:12, 13) No tin tempu pa tardansa, pasobra pronto Jehova lo ehecutá huicio riba e nacionnan, mescos cu el a haci riba Moab, Amon, i e region montañoso di Seir den e dianan di Rey Jehósafat di Huda.—2 Crónicanan 20:1-30; Joël 3:2, 12.

E discurso “Mustra Fe dor di Spera Riba Jehova” a animá tur presente. Awor leu den e tempu di fin, nos por mira bek riba hopi promesa di Jehova cu a cumpli, i nos ta profundamente interesá den cosnan cu ainda tin cu tuma lugá. E pueblo di Jehova mester sigui tene pacenshi, cordando cu tur loke Dios a primintí lo sosodé.—Tito 2:13; 2 Pedro 3:9, 10.

E programa di mainta a concluí cu e drama “Mantené Bo Wowo Simpel.” E dramatisacion realístico aki a animá nos pa examiná nos actitud pa cu metanan materialista. No ta importá unda nos ta biba, si nos kier pa nos bida ta liber di ansiedad, nos tin cu sigui e conseho di Jesus di mantené nos wowo simpel, claramente enfocá riba e Reino di Dios.—Mateo 6:22.

E discurso público tabatin e tema intrigante “Fe i Bo Futuro.” El a presentá prueba dje inabilidad di lidernan humano pa solucioná e problemanan di mundu. (Jeremías 10:23) Hende su historia ta sigui ripití su mes—riba un escala mas grandi i mas perhudicial. Kico Testigonan di Jehova ta pensa di futuro? Nos ta kere cu humanidad fiel tin un futuro briyante bou dje Reino di Dios. (Mateo 5:5) Dios lo cumpli cu su promesanan na beneficio di tur cu tin fe den su Palabra, cu ta urgi nos: “Busca Jehova, miéntras cu e por ser hañá. Yama na dje miéntras cu e ta resultá di ta cerca.”—Isaías 55:6.

Cu nos tempu na bista Jesus a plantia un pregunta vital: “Ora e Yu di hende yega, lo e realmente haña fe riba tera?” (Lucas 18:8) E discurso final a repasá e programa di congreso i a mustra con e programa a percurá evidencia resonante cu fe den e Palabra di Dios ta existí, maske nos ta biba den un mundu sin fe i concentrá riba cos seglar.

Tog, individualmente nos por puntra nos mes: ‘Mi ta entre esnan cu tin fe inkebrantabel den Dios i den su Palabra?’ E Congreso di Distrito “Fe den e Palabra di Dios” mester yuda nos contestá e pregunta ei cu sí. I ki gradicidu nos ta na Jehova di a fortalecé nos fe den dje i den su Palabra inspirá, Bijbel!

[Plachinan na página 24]

Hopi boluntario a traha cu smak pa acomodá miles di delegado

[Plachi na página 25]

A usa stadionnan grandi manera esaki rond mundu

[Plachinan na página 25]

L. A. Swingle, miembro dje Cuerpo Gobernante ta presentá e foyeto nobo

[Plachi na página 26]

Hopi hende a bautisá como símbolo di nan dedicacion na Jehova

[Plachinan na página 27]

Delegadonan di congreso cu goso a canta canticanan di Reino. Potret chikitu: e drama “Mantené Bo Wowo Simpel”