Pakico Ser Gradicidu?

PA MOTIBU di un operacion di lomba, Harley a hañ’é forsá ta cambia su carera di mashinista pa oficinista. Ora a puntra Harley con e ta haña e cambio aki, el a bisa: “Mi ta sinti falta di traha cu mashin. Pero, francamente bisá, mi ta mas contentu cu mi trabou actual cu mi tabata cu mi trabou anterior.”

Splicando di con e ta contentu, Harley ta conta: “Ta e actitud dje hendenan cu mi ta traha cuné. Distinto for di esnan na mi trabou anterior, mi actual supervisor i coleganan di trabou ta apreciá loke mi ta haci, i nan ta cla pa duna encomendacion. Esaki a haci un diferencia masha grandi.” Awor cu Harley ta sinti su mes útil i cu nan tin mester di dje, e ta un trahadó felis.

Palabranan di encomendacion of gratitud, ora nan ta merecí, ta berdaderamente conmovedor. Di otro banda, e efecto di ingratitud por ta desalentador, manera Shakespeare a comentá: “Supla, supla, bientu di winter, abo no ta mes desagradabel cu hende su ingratitud.” Lamentablemente, hopi hende a ricibí un trato desagradabel asina.

Cuidou cu Ingratitud

Den e mundu djawe expresionnan sincero di gratitud ta masha scars. Por ehempel, un escritor a haci un pregunta: “Si e bruid a haña tempu pa skirbi adres riba 200 karchi di invitacion pa casamentu, pakico e no por haña tempu pa skirbi un cartica di gradicimentu pa 163 regalo?” Hopi biaha ni e simpel palabra “danki” mayoria hende no ta bisa. Cu mas i mas frecuencia, gratitud ta ser reemplasá pa un actitud di ami promé. E situacion aki ta un dje marcanan pa identificá e último dianan. Apostel Pablo a spierta: “Bo tin cu realisá cu den e último dianan tempu lo ta yen di peliger. Hende lo bira totalmente egocéntrico . . . Nan lo bira totalmente malagradecí.”—2 Timoteo 3:1, 2, Phillips.

Den otro casonan, gratitud ta ser reemplasá pa labiamentu. Expresionnan di gratitud ta bini di curason sin pensa riba beneficio personal. Sin embargo, labiamentu cu generalmente ta insincero i exagerá, por originá for dje motivacion scondí pa haña promocion of saca cierto bentaha personal. (Hudas 16) Ademas di engañá esun cu ta ser labiá, tal labiamentu tin tendencia di ta e fruta di orguyo i arogancia. Pues, ken lo kier ta víctima di labiamentu insincero? Pero gratitud genuino ta berdaderamente refrescante.

Tin beneficio pa e persona cu ta expresá gratitud. E calor cu e ta experenciá dor cu e ta gradicidu di curason ta contribuí na su felicidad i pas. (Compará cu Proverbionan 15:13, 15.) I siendo cu gratitud ta un cualidad positivo, e ta protehá e persona for di sintimentunan negativo manera rabia, yalurs i rencor.

“Mustra cu Boso Ta Gradicidu”

Bijbel ta urgi nos pa cultivá un spiritu di gratitud. Pablo a skirbi: “Relacioná cu tur cos, duna gradicimentu. Pasobra esaki ta e boluntad di Dios den union cu Cristo Jesus en cuanto boso.” (1 Tesalonicensenan 5:18) I Pablo a consehá e colosensenan: “Laga e pas di Cristo controlá den boso curason . . . I mustra cu boso ta gradicidu.” (Colosensenan 3:15) Hopi dje salmonan ta contené expresionnan di gratitud, indicando cu gratitud sincero ta un birtud piadoso. (Salmo 27:4; 75:1) Claramente, nos ta agradá Jehova Dios ora nos ta manifestá gratitud den cosnan di bida di tur dia.

Pero ki factornan den e mundu malagradicí aki ta hacié difícil pa nos cultivá e spiritu di gratitud? Con nos por desplegá un actitud gradicidu den bida diario? E preguntanan aki lo ser considerá den e siguiente artículo.