Eunice i Loida—Educadónan Ehemplar

Como sirbidó di Jehova, nos sa cu nos tin un responsabilidad serio pa duna nos yunan un bon educacion religioso. Asta den e ambiente di mas faborabel, e tarea aki por ta cargá cu tur tipo di obstáculo i dificultad. Esaki ta asta mas difícil ora un mayor cristian ta enfrentá e desafio ei den un famia cu ta dividí pa motibu di religion. Un situacion asina no ta nobo. E Scritura ta conta nos di un mayor cu a haña su mes den un posicion similar den e promé siglo E.C.

E famia di un señora cu yama Eunice tabata biba na Listra, un stad den e region di Licaonia den e parti sur-central di Asia Menor. Listra tabata un stad chikitu den campo di no masha importancia. E tabata un colonia romano yamá Julia Felix Gemina Lustra, fundá dor di César Augusto pa contrarestá e actividadnan di bandidu den e áreanan cercano. Eunice tabata un cristian hudiu cu a biba den un famia dividí pa motibu di religion cu su esposo griego, su yu Timoteo, i su mama Loida.—Echonan 16:1-3.

Probablemente, tabatin poco hudiu na Listra, ya cu Bijbel no ta haci mencion di un snoa ei, aunke tabatin un poblacion hudiu na Iconio, rond di 30 kilometer leu. (Echonan 14:19) P’esei sigur no tabata fácil pa Eunice practicá su fe. E echo cu Timoteo no a ser circuncidá despues cu el a nace a pone algun erudito suponé cu e casá di Eunice a bai contra e idea ei.

Sin embargo, Eunice no tabata so den su creencianan. Ta parce cu Timoteo a ricibí su instruccion den “e scrituranan santu” for di tantu su mama como su wela parti di mama, Loida.a Apostel Pablo a exhortá Timoteo: “Sigui den e cosnan cu bo a siña i a keda persuadí pa kere, sabiendo for di ki personanan bo a siña nan i cu for di infancia bo a conocé e scrituranan santu, cu por hací bo sabí pa salbacion mediante e fe en relacion cu Cristo Jesus.”—2 Timoteo 3:14, 15.

Educacion “for di Infancia”

Ora Pablo a bisa cu Timoteo su educacion den “e scrituranan santu” a ser impartí “for di infancia,” esaki evidentemente a nificá for di tempu e tabata baby. Esaki ta na armonia cu e echo cu Pablo a usa un palabra griego (bré·fos) cu generalmente ta referí na un baby recien nací. (Compará cu Lucas 2:12, 16.) Pues Eunice a tuma mashá na serio e obligacion cu Dios a dun’é, sin perde tempu pa cuminsá duna Timoteo entrenamentu cu lo a yud’é crece bira un sirbidó dedicá di Dios.—Deuteronomio 6:6-9; Proverbionan 1:8.

Timoteo a ser “persuadí pa kere” berdadnan bíblico. Segun un diccionario griego, e palabra cu Pablo a usa aki ta nificá “ser persuadí firmemente di; ser sigurá di” algu. Sin duda, bastante tempu i esfuerso tabata necesario pa establecé un conviccion firme asina den Timoteo su curason, yudand’e pa razoná riba e Palabra di Dios i ehercé fe den dje. Aparentemente anto, tantu Eunice como Loida a traha duru pa siña Timoteo for dje Scritura. I ki un recompensa e muhernan piadoso aki a cosechá! Pablo por a skirbi di Timoteo: “Mi ta corda e fe cu ta den bo sin ningun hipocresia, i cu a biba promé den bo wela Loida i den bo mama Eunice, pero cu mi tin sigur ta den bo tambe.”—2 Timoteo 1:5.

Ki un papel vital Eunice i Loida a hunga den Timoteo su bida! Relacioná cu esaki, escritor David Read ta declará: “Si e apostel a kere cu nada tabata mas importante cu Timoteo su mes experencia personal di combertí, lo el a record’é di dje mesora. Pero e promé cos cu e tin di bisa tocante Timoteo su fe tabata cu e tabata ‘bibu caba den Loida . . . i Eunice.’” Pablo su declaracion relacioná cu e fe di Loida, Eunice i Timoteo ta mustra cu hopi biaha e educacion bíblico trempan cu mayornan i asta welonan ta duna na cas, ta fundamental den determiná un hóben su futuro prospectonan spiritual. Esei no mester pone miembronan di famia pensa seriamente tocante loke nan ta haciendo pa cumpli cu e responsabilidad aki pa cu Dios i tambe nan yunan?

Tal bes Pablo tabata pensa tambe tocante e clase di ambiente di cas cu Loida i Eunice a crea. Kisas e apostel a bishitá nan cas durante su promé estadia na Listra, rond di 47/48 E.C. E dos muhernan probablemente a combertí na cristianismo n’e tempu ei. (Echonan 14:8-20) Tal bes e trato caluroso i alegre cu Pablo a disfrutá di dje den e cas di famia ei a influenciá e palabranan cu el a scoge ora el a referí na Loida como Timoteo su “wela.” Segun erudito Ceslas Spicq, e término griego cu el a usa (mám·me, na contraste cu e té·the clásico i respetuoso) ta “un mucha su palabra di cariño” pa su wela, cu den e contexto aki ta transmití un “matis di familiaridad i cariño.”

Timoteo Ta Sali for di Cas

No ta claro kico exactamente tabata Eunice su estado civil ora Pablo a bishitá Listra pa di dos biaha (rond di 50 E.C.). Hopi erudito ta asumí cu e tabata un biuda. Sea cual sea e caso, bou dje guia di su mama i wela, Timoteo a crece bira un bon mucha homber, tal bes rond di 20 aña p’e tempu ei. “E rumannan na Listra i Iconio a duna bon informe di dje.” (Echonan 16:2) Evidentemente, un deseo pa plama e bon nobo dje Reino a ser plantá den Timoteo su curason, pasobra el a aceptá Pablo su invitacion pa bai huntu cuné i Sílas riba nan biahe di misionero.

Imaginá con Eunice i Loida a sinti ora Timoteo tabata cla pa bai! Nan tabata sa cu durante Pablo su promé bishita na nan stad, e hendenan a piedra e apostel i a kere cu el a muri. (Echonan 14:19) Pues, sigur no tabata fácil pa nan laga e hóben Timoteo bai. Probablemente, nan a puntra pa cuantu tempu lo el a bai i si lo el a regresá cas sano i salbo. Apesar dje posibel ansiedadnan ei, no tin duda cu su mama i wela a anim’é p’e aceptá e privilegio special aki cu lo a permitié sirbi Jehova mas cabalmente.

Lesnan Balioso

Nos por siña hopi for di un consideracion cuidadoso di Eunice i Loida. Fe a motivá nan pa duna Timoteo un criansa spiritualmente saludabel. E ehempel maduro i stabil di debocion piadoso cu welonan ta pone pa nan nietunan i otronan siguramente por ta beneficioso pa henter e congregacion cristian. (Tito 2:3-5) Eunice su ehempel tambe ta recordá mamanan cu tin esposo no-creyente dje responsabilidad i recompensanan di impartí instruccion spiritual na nan yunan. Tin biaha esaki por exigí hopi curashi, specialmente si e tata no tin un bon disposicion pa cu e creencianan religioso di su casá. Tambe e ta exigí tacto, ya cu e esposa cristian tin cu respetá e hefatura di su casá.

E fe, esfuerso i abnegacion di Loida i Eunice a ser recompensá ora nan a mira Timoteo haci progreso spiritual te n’e punto di bira un excelente misionero i superintendente. (Filipensenan 2:19-22) Di igual manera awe, tempu, pacenshi i determinacion ta necesario pa siña nos yunan berdadnan bíblico, pero un resultado excelente ta haci cu tur e esfuerso ta ègt bale la pena. Hopi hóben cristian ehemplar cu a ser siñá ‘e scrituranan santu for di infancia’ den un famia dividí pa motibu di religion ta trece hopi goso na nan mayor piadoso. I ki cierto e proverbio aki ta: ‘Esun cu ta duna lus na un persona sabí lo ta gososo’!—Proverbionan 23:23-25.

Apostel Juan a bisa di su yunan spiritual: “Mi no tin un motibu mas grandi pa duna gradicimentu cu e cosnan aki, pa mi tende cu mi yunan ta sigui cana den e berdad.” (3 Juan 4) Sigur, hopi cu a resultá di ta manera Eunice i Loida, dos educadó ehemplar, ta compartí e sintimentu cu e palabranan ei ta expresá.

[Nota]