Informe di Proclamadonan di Reino

Probechando di Tur Oportunidad

TESTIGONAN DI JEHOVA ta conocí rond mundu pa nan trabou di educacion bíblico. Pero tambe nan ta conducí programanan cu ta trece otro beneficionan pa sociedad. E servicio público aki a haña bon acohida, manera e siguiente experencianan for di Ecuador ta mustra.

◻ Gerencia di un fábrica grandi di glas kier a organisá un curso riba balornan di famia pa su empleadonan. E director di recurso humano a invitá vários pastor católico pa participá pero e no a haña reaccion. Un pastor a bis’é cu tin asina poco pastor cualificá pa papia riba e tema, cu probablemente ningun lo ta disponibel. Ora un empleado Testigo a tende esaki, el a haci areglo pa un ruman homber cu hopi biaha sa traha teritorio di negoshi bishitá e fábrica.

E siguiente dia mes, e Testigo a acercá e director di recurso humano cu un proposicion pa un curso. El a presentá un lista di tema compilá for di vários publicacion di Sociedad Watch Tower. E director a keda impresioná. El a selectá tres tópico pa considerá: relacionnan humano, ética na trabou i ética den famia. Despues a haci areglo pa considerá e informacion cu henter e forsa laboral.

A parti e empleadonan den shete grupo di 30 cada un, despues di cua tres ruman homber cualificá a presentá e informacion na nan. Kico tabata e resultado? Bastante empleado a pidi pa bishitá nan na cas i 216 publicacion pa studia Bijbel a ser lagá. E gerencia a keda asina impresioná cu nan a puntra si e Testigonan por a prepará un otro seri di discurso.

◻ Recientemente, Ecuador a pasa un ley cu ta permití pa siña religion na scol. Un ruman muher misionero a bishitá cabes di un scol básico i a puntra con e ley nobo tabata funcionando. E cabes di scol a splica cu nan a haci un intento pa cuminsá un programa tocante adoracion di Maria pero el a caba na nada. Ora e ruman muher a remarcá cu e adoracion ei lo por a presentá problema pa muchanan no-católico, e cabes di scol tabata eens. E misionero a bisa: “Pero, nos tin un programa pa siña principionan moral for di Bijbel cu no ta obligá un persona aceptá un religion en particular.” E cabes di scol a contestá: “Ki dia bo por bini? Otromañan?” Despues cu e misionero a mustr’é e buki Scuchando e Gran Maestro, nan a dicidí pa considerá e capítulo “Felis Ta Hende Pacífico.”

Ora e misionero a bolbe, el a dedicá tres ora bishitando shete diferente klas huntu cu e cabes di scol tambe scuchando. Despues di un sesion cu un vijfde klas, un dje alumnonan a bisa: “Yufrou, por fabor, corda bishitá zesde klas. Semper nan ta purba dal nos i bringa cu nos!” Un maestra a remarcá: “Violencia ta un tópico masha importante. Nos tin mester di mas tempu pa considerá e asuntu aki.”

A haci areglo pa bolbe bishitá e scol pa trata temanan manera obedencia i gañamentu. Te asina leu, e resultadonan tabata masha positivo. Awor ora e ruman muher misionero ta cana riba caya, e muchanan ta core bin cumind’é i haci preguntanan tocante Bijbel. Cu orguyo otronan ta introducié na nan mayornan. Ademas, a cuminsá un studio di Bijbel cu dos dje muchanan di scol.