Tera—Pakico E Ta Aki?

Tin un pregunta cu bo tin cu para ketu na dje: Nos bunita planeta ta producto di un Creador inteligente cu tin un propósito pa e tera i pa hende riba dje? Resolviendo e cuestion ei na bo satisfaccion por yudá bo mira kico tin den futuro pa nos planeta.

HOPI científico cu a haci un estudio profundo dje universo i nos tera a mira evidencia cu ta señalá n’e existencia di un Creador, cu Dios ta tras di dje. Considerá e comentarionan di un so:

Profesor Paul Davies ta skirbi den e buki The Mind of God (E Mente di Dios): “E existencia di un universo ordená i coherente cu ta contené structuranan stabil, organisá i complicá ta rekerí ley i condicionnan di un clase masha special.”

Despues di trata un cantidad di “coincidencia” cu astrofísiconan i otro científiconan a mencioná, profesor Davies ta agregá: “Ora bo pone nan tur huntu, nan ta duna evidencia impresionante cu bida manera nos conoc’é, ta dependé di un manera masha sensitivo riba e forma dje leynan di física, i riba algun aparente casualidad afortuná den e balornan real cu naturalesa a scoge pa vários masa di partícula, forsa, intensidad, i cosnan por estilo. . . . Ta suficiente pa bisa cu si nos por a hunga e rol di Dios i selectá balornan pa e cantidadnan aki na nos antoho dor di drei un set di konopi, nos lo a ripará cu casi con cu nos drei e konopinan, e universo lo bira inhabitabel. Den algun caso ta parce como si fuera mester ahustá e diferente konopinan cu un enorme precision p’e universo por ta den un condicion den cua bida por florecé. . . . E echo cu asta cambionan chikitu den e manera cu cosnan ta por causa cu hende no por mira e universo mas, sigur ta un echo di nificacion profundo.”

Loke esei ta nificá pa hopi hende ta cu nos tera, huntu cu e resto dje universo, ta producto di un Creador cu propósito. Si esei ta e caso, nos tin cu haña sa ta pakico el a forma e tera. Tambe nos tin cu averiguá, si por, kico ta su propósito pa e tera. Relacioná cu esaki tin un iregularidad straño. Apesar dje popularidad extenso di ateismo, un cantidad sorprendente di hende ainda ta kere den un Creador inteligente. Mayoria iglesia di cristiandad ta papia di un Dios Todopoderoso i Creador di nos universo. Tog, masha poco biaha e religionnan aki ta papia cu confiansa i conviccion tocante e futuro dje tera den e propósito di Dios.

Kico Bijbel Ta Bisa?

Ta lógico pa acudí na un fuente di informacion cu mayoria hende ta aceptá cu e ta bini dje Creador. E fuente ei ta Bijbel. Un dje declaracionnan mas simpel i cla den dje tocante futuro di nos tera, nos ta haña na Eclesiástes 1:4. Nos ta lesa: “Un generashon ta bai i un generashon ta bin, ma tera ta permanesé pa semper.” (Editorial Evangélica) Bijbel ta splica masha franco pakico Jehova Dios a crea tera. Tambe e ta mustra cu el a pon’é precis den e posicion corecto den universo i den relacion cu nos solo pa sostené bida riba dje. Dios Todopoderoso a inspirá e antiguo profeta Isaías pa skirbi: “Esaki ta loke Jehova a bisa, e Creador di shelu, E, e Dios berdadero, e Formador dje tera i e Hacidor di dje, Esun cu a establec’é firmemente, cu no a cre’é simplemente pornada, cu a form’é asta pa ser habitá: ‘Ami ta Jehova, i no tin ningun otro.’”—Isaías 45:18.

Pero kico dje echo cu hende ta desaroyando e medionan pa destruí tur bida riba tera? Den su sabiduria sin igual, Dios ta declará cu lo e intervení promé cu humanidad por destruí tur bida riba nos planeta. Tuma nota dje promesa trankilisante aki den e último buki di Bijbel, Revelacion: “E nacionnan a rabia, i bo propio rabia a bini, i e tempu señalá p’e mortonan ser husgá, i pa duna nan recompensa na bo esclabonan, e profetanan i na e santunan i na esnan cu tin temor di bo nomber, chikitu i grandi, i pa causa e ruina di esnan cu ta ruinando e tera.”—Revelacion 11:18.

Jehova ta revelá na nos loke tabata su propósito original ora el a crea e tera, e hoya aki den espacio, manera un astronauta cu a dal buelta rond dje tera a describié. Dios su propósito tabata pa el a bira un paradijs mundial, poblá cómodamente cu hende homber i muher, tur bibando na pas i armonia. El a haci areglo pa pobla e planeta gradualmente dor di permití e promé pareha humano producí yu. P’e placer i deleite dje promé pareha humano, Jehova a combertí un seccion chikitu dje tera den un condicion paradísico. Segun cu e procreacion di famianan humano lo a sigui pa añanan i siglonan, e hofi di Eden lo a extendé gradualmente te ora Génesis 1:28 lo a cumpli: “Dios a bisa nan: ‘Sea fructífero i bira hopi i yena e tera i domin’é.’”

Ora nos mira awor e condicion tristu dje tera i su habitantenan, esei ta nificá cu e propósito original di Dios p’e tera a fracasá? Of el a cambia su propósito i a dicidí cu pa motibu di hende su desobedencia lo e laga e planeta ser ruiná completamente i, den un sentido, cuminsá di nobo? No, nos por ta sigur cu ningun di esakinan ta e caso. Bijbel ta bisa nos cu kico cu Jehova proponé, cu tempu tin cu tuma lugá, i cu ningun persona, ni sikiera un desaroyo inesperá, por stroba loke e dicidí. E ta sigurá nos: “Asina mi palabra cu ta sali for di mi boca lo resultá di ta. Lo e no bolbe na mi sin resultado, sino cu siguramente lo e haci loke mi tin deleite aden, i lo e tin éxito sigur den loke mi a mand’é.”—Isaías 55:11.

E Propósito di Dios A Ser Interumpí, No Cambiá

Ya cu Adam cu Eva a desviá i a ser expulsá for dje hofi di Eden, tabata bisto cu e propósito di Dios pa un tera paradísico lo a cumpli sin nan. Sin embargo, Jehova a indicá n’e momento ei mes cu algun di nan desendientenan lo a cumpli cu su mandato original. Ta cierto cu esaki lo a tuma tempu, asta hopi siglo, pero no tin ningun indicacion cuantu tempu lo tabata enbolbí den cumplimentu cu e mandato original asta si tantu Adam como Eva a sigui biba den perfeccion. Echo ta cu pa fin dje Reinado di Mil Aña di Cristo Jesus—un poco mas cu mil aña for di awor—e condicionnan paradísico di Eden lo a extendé rond e tera i planeta Tera lo a ser poblá cu desendientenan pacífico i felis dje promé pareha humano. Sí, Jehova su abilidad como un Dios di Propósito infalibel lo a ser vindicá pa semper!

E ora ei e profecianan excitante cu Dios a inspirá asina tantu tempu pasá lo cumpli. Textonan manera Isaías 11:6-9 lo cumpli gloriosamente: “E lobo realmente lo biba pa un tempu cerca e lamchi machu, i e leopardo mes lo drumi cerca e lamchi di cabritu, i e bisé i yu di leon machu cu klina i e animal bon alimentá tur huntu; i simplemente un mucha homber chikitu lo ta lider riba nan. I e baca i e oso mes lo come yerba; nan yunan lo drumi huntu. I asta leon lo come yerba mescos cu toro. I mucha chikitu di pechu siguramente lo hunga cerca cueba di cobra; i mucha kitá for di pechu realmente lo pone su mes man riba entrada di colebra venenoso. Nan lo no haci ningun daño ni causa ningun ruina den tur mi ceru santu; pasobra e tera siguramente lo ta yená cu e conocimentu di Jehova mescos cu e awanan ta cubri laman mes.”

Mal estado di salú i malesa fatal lo ta cosnan di pasado, i morto mes tambe. Kico por ta mas cla cu e palabranan simpel aki cu nos ta haña den e último buki di Bijbel? “E tent di Dios ta cu humanidad, i lo e biba cu nan, i nan lo ta su pueblo. I Dios mes lo ta cu nan. I lo e seca tur lágrima di nan wowo, i lo no tin morto mas, ni lo tin lamento ni sclamacion ni dolor mas. E cosnan anterior a pasa bai.”—Revelacion 21:3, 4.

Sí, nos por cobra ánimo—nos bunita planeta Tera t’ei pa keda. Ohalá bo tin e privilegio di sobrebibí e fin dje mal sistema di cosnan aki, cu tur su prácticanan cu ta ruiná e tera. E mundu nobo limpi cu Dios lo forma, awor ta tras di porta. I hopi ser kerí lo lanta for di morto pa medio dje milager di resureccion. (Juan 5:28, 29) Sí, nos tera t’ei pa keda, i nos por keda riba dje i disfrutá di dje.