Bo Por Kere den Bijbel?

AINDA tin hopi hende cu ta kere den Bijbel, asta den e mundu moderno aki. Por ehempel, den un encuesta recien di Gallup na Merca, 80 porciento a bisa cu nan ta kere cu Bijbel ta e Palabra inspirá di Dios. Sea cu e porcentahe ta mes haltu den bo área of no, bo por comprendé cu e creyentenan ei ta spera di siña Bijbel den misa. Pero hopi biaha esei no ta e caso. Tuma, por ehempel, e doctrina di castigu di alma despues di morto.

Acaso Bijbel ta siña cu tin un purgatorio of fiernu di candela? Awe, hopi erudito den cristiandad lo bisa cu no. New Catholic Encyclopedia ta declará: “Den e análisis final, e doctrina católico di purgatorio ta basá riba tradicion, no riba e Scritura Sagrado.” Relacioná cu fiernu, A Dictionary of Christian Theology ta comentá: “Nos no ta haña fiernu di candela den e T[estament] N[obo] como parti dje predicacion dje promé cristiannan.”

De facto, ora e comision di Iglesia di Inglatera cu ta studia doctrina, recientemente a recomendá pa rechasá completamente e siñansa di fiernu di candela, esei a alcansá titularnan di korant. Dr. Tom Wright, decano di Catedral Litchfield, ta declará cu imágennan di pasado di fiernu a “combertí Dios den un monster i a laga sicatris sicológico doloroso riba hopi hende.” E raport dje comision ta describí fiernu como “no-existencia total.”a Di igual manera, New Catholic Encyclopedia ta comentá relacioná cu e punto di bista católico: “Awe teologia ta mira e asuntu di fiernu como separacion for di Dios.”

Realmente, loke Bijbel ta siña tocante alma ta na conflicto cu e siñansanan di purgatorio i di fiernu di candela. Hopi biaha Bijbel ta papia di morto dje alma. “E alma cu ta peca—e mes lo muri.” (Ezekiel 18:4; compará cu e King James i Douay católico.) Segun Bijbel, e mortonan ta inconciente i no por sinti dolor. “E bibunan ta conciente cu nan lo muri; pero en cuanto e mortonan, nan no ta conciente di nada en absoluto.” (Eclesiástes 9:5) E speransa cu Bijbel ta ofrecé pa e mortonan ta un futuro resureccion. Ora Lázaro, amigu di Jesus, a muri, Jesus a compará morto cu soño. Marta, ruman muher di Lázaro, a expresá e speransa cu Bijbel ta siña ora el a declará: “Mi sa cu lo e lanta den e resureccion riba e último dia.” Dor di lanta Lázaro for di morto, Jesus a confirmá e speransa ei pa humanidad.—Juan 5:28, 29; 11:11-14, 24, 44.

Historiadónan ta mustra cu e siñansa cu hende tin un alma inmortal separá, no a originá cu Bijbel, sino cu filosofia griego. New Catholic Encyclopedia ta remarcá cu e hebreonan antiguo no tabata kere cu hende ta consistí di un curpa material i un alma inmaterial. E ta declará tocante e creencia hebreo: “Ora e rosea di bida a drenta e promé homber cu Dios a forma for di tera, el a bira un ‘ser bibiente’ (G[énesis] 2.7). Nan no a mira morto como un separacion di dos elemento distinto den hende, manera den filosofia griego; e rosea di bida ta sali i hende ta bira un ‘ser morto’ (L[evítico] 21.11; N[úmeronan] 6.6; 19.13). Den cada caso e palabra ‘ser’ lo ta [néfesh] na hebreo, hopi bes traducí como ‘alma’ pero, de facto, prácticamente hací igual cu e persona.”

E mésun enciclopedia ei ta mencioná cu recientemente eruditonan católico “a declará cu e T[estament] N[obo] no ta siña inmortalidad di alma den e sentido helenístico [griego].” E ta concluí: “Bo no ta haña e solucion básico p’e problema [di bida despues di morto] asina tantu den speculacion filosófico manera bo ta hañ’é den e don sobrenatural di Resureccion.”

Bijbel of Tradicion?

Pero, con ideanan no-bíblico a bira parti di siñansa di iglesia? Hopi iglesia ta declará cu Bijbel ta nan máximo autoridad. Por ehempel, no hopi tempu pasá Papa Juan Pablo II a papia dje necesidad ‘pa fielnan aceptá Bijbel den e pleno profundidad di su berdad i como e norma supremo di nos fe.’ Sin embargo, ta algu generalmente aceptá cu e siñansanan di cristiandad djawe no ta idéntico cu esnan dje cristiannan di promé siglo. Mayoria iglesia ta mira e cambionan como parti dje desaroyo gradual di doctrina di iglesia. Ademas, Iglesia Católico ta adoptá e punto di bista cu tradicion di iglesia tin mésun autoridad cu e Scritura. New Catholic Encyclopedia ta bisa cu iglesia “no ta pega na ningun berdad a base di Scritura so, los for di tradicion, ni a base di tradicion so, los for di Scritura.”

Atrabes di historia, iglesianan a reemplasá siñansanan bíblico cu esnan basá riba tradicion so. Echo ta cu awor hopi iglesia ta di opinion cu e siñansanan di Bijbel ta incorecto. Por ehempel, New Catholic Encyclopedia ta declará cu ta “obvio cu hopi declaracion bíblico simplemente no ta berdad ora husga nan segun conocimentu moderno di ciencia i historia.” Papiando dje siñansa bíblico cu e mortonan ta inconciente, e ta añadí: “Asta den asuntunan religioso, e T[estament] B[ieu] ta duna evidencia di un conocimentu incompleto di . . . bida despues di morto.” E enciclopedia ta cita Salmo 6:5 (versículo 6 den algun Bijbel) como un ehempel di esaki: “Den morto no tin mencion di bo; den Sheol [of, Hádes], ken lo elogiá bo?” Algun seminario i colegio protestant no ta siña mas cu Bijbel ta infalibel. Di otro banda, Iglesia Católico ta kere cu e tin e magisterio, of autoridad di siñansa, cu cua e ta interpretá loke Bijbel ta siña. Pero, kisas bo ta puntra: ‘Kico si interpretacionnan asina ta parce di contradicí e Scritura?’

E Importancia dje Scritura

Bes tras bes Jesus a cita e Scritura como su autoridad, hopi biaha bisando promé cu e trece su puntonan dilanti: “Ta pará skirbí.” (Mateo 4:4, 7, 10; Lucas 19:46) En berdad, ora Jesus a papia tocante matrimonio, e no a usa speculacion filosófico griego como su fuente, sino el a usa e relato di creacion den Génesis. (Génesis 1:27; 2:24; Mateo 19:3-9) Claramente, Jesus a considerá e Scritura como inspirá pa Dios i basá riba echo. Den oracion na Dios, el a bisa: “Bo palabra ta e berdad.”—Juan 17:17.b

Bijbel ta registrá cu Jesus a reprendé e lidernan religioso di su tempu: “Abilmente boso ta hala un banda e mandamentu di Dios pa boso retené boso tradicion. . . . Asina boso ta haci e palabra di Dios inválido cu boso tradicion.” (Marco 7:6-13) Di manera similar, apostel Pablo a resistí e presion pa absorbá sea filosofia griego of tradicion eróneo den su siñansa. El a spierta: “Tene cuidou: Kisas por tin un hende cu lo hiba boso como su víctima mediante e filosofia i engaño bano segun e tradicion di hende.” (Colosensenan 2:8; 1 Corintionan 1:22, 23; 2:1-13) Tabatin algun tradicion, of siñansa, cu Pablo a urgi cristiannan pa mantené, pero esakinan tabata basá riba e Scritura i tabata totalmente na armonia cuné. (2 Tesalonicensenan 2:13-15) Pablo a skirbi: “Tur Scritura ta inspirá di Dios i ta probechoso . . . p’e homber di Dios por ta plenamente competente, completamente ekipá pa tur bon obra.”—2 Timoteo 3:16, 17.

Pablo a premirá un alehamentu for dje Scritura. El a spierta Timoteo: “Lo tin un periodo di tempu ora nan lo no soportá siñansa saludabel, . . . i nan lo apartá nan oido for dje berdad.” El a urgi Timoteo: “Pero, abo mantené bo sano huicio den tur cos.” (2 Timoteo 4:3-5) Pero con? Un manera ta pa ser di ‘disposicion noble.’ Un diccionario griego ta definí e palabra bíblico aki como “dispuesto pa siña i evaluá algu di un manera imparcial.” Lucas a usa e expresion aki pa describí Pablo su oyentenan na Berea di promé siglo. Pablo su siñansanan tabata nobo pa nan, i nan no tabata kier a ser engañá. Lucas a encomendá nan i a skirbi: “E [bereanonan] tabata di un disposicion mas noble cu esnan den Tesalónica, pasobra nan a ricibí e palabra cu mayor anhelo mental, examinando cuidadosamente e Scritura diariamente en cuanto si e cosnan aki tabata asina.” E echo cu e bereanonan tabatin un disposicion noble no a haci nan sképtico, no dispuesto pa kere den nada. Mas bien, e resultado di nan investigacion onesto tabata cu “hopi di nan a bira creyente.”—Echonan 17:11, 12.

Beneficionan di Biba Segun Bijbel

E cristiannan di ántes tabata conocí tantu pa nan apego na Bijbel como pa nan amor di sacrificio propio. Sin embargo, awe hopi hende tin “un forma di debocion piadoso pero [ta] resultando falsu na su poder.” (2 Timoteo 3:5) Cualkier forma di cristianismo awe cu no ta na armonia cu esun original no por tin berdadero poder pa haci bon den bida di hende. Esaki por yuda splica pakico, den e mayor parti di cristiandad, nos ta mira aumento di violencia, inmoralidad, decadencia di famia i materialismo? Den algun pais “cristian,” asta miembronan dje mésun religion ta bringa gueranan étnico feros.

E spiritu di disposicion noble dje bereanonan a caba na nada? Tin un grupo di hende awe cu ta kere den Bijbel i cu ta biba na armonia cuné?

Encyclopedia Canadiana ta comentá: “E obra di Testigonan di Jehova ta e rebibamentu i reestablecimentu dje cristianismo antiguo cu Jesus i su disipelnan a practicá durante e promé i di dos siglo di nos era.” Refiriendo n’e Testigonan, New Catholic Encyclopedia ta bisa: “Nan ta mira Bijbel como nan único fuente di creencia i di regla di conducta.”

Sin duda, esaki ta un motibu principal pakico Testigonan di Jehova rond mundu ta conocí pa nan prosperidad spiritual, pas i felicidad. P’esei nos ta animá nos lectornan pa siña mas tocante e siñansanan spiritualmente saludabel di Bijbel. Mas conocimentu por hiba na asta mas confiansa den Bijbel i un fe mas fuerte den Dios. E beneficionan eterno di un fe asina ta bal e esfuerso.

[Nota]

[Plachi na página 6]

Apostel Pablo i otronan a predicá den plasa

[Plachi na página 7]

Testigonan di Jehova ta “mira Bijbel como nan único fuente di creencia i di regla di conducta”