Pakico Nan Ta Recurí na Violencia

UN BABY, un criatura di 27 siman a nace prematuro na Denver, Colorado, Merca. E baby a sobrebibí, i despues di tres luna den hospital, nan a mand’é cas cerca su mayornan. Tres siman despues, e mucha tabata bek den hospital. Pakico? El a sufri un lesion grave na su celebro dor cu su tata a sagudié violentamente. E tata no por a wanta e baby su yoramentu. E chikitin a keda ciegu i deshabilitá. Medicina moderno a salb’é dje trauma di su nacementu, pero no por a salb’é dje violencia di su tata.

Un cantidad grandi di mucha ta ser maltratá, batí of matá den un dje lugánan mas violento riba tera—nan hogar! Algun hende ta calculá cu na Merca so, pa aña, rond di 5.000 mucha ta muri na man di nan mayornan! I mucha no ta e único víctimanan. Segun e revista World Health, na Merca “maltrato di esposa ta e causa principal di lesion cerca hende muher cu tin edad di haña yu.” Kico di otro paisnan? “Un tercer parti te mas cu mitar dje hende muhernan encuestá [den paisnan den desaroyo] ta informá cu nan partner ta bati nan.” Sí, violencia ta exigiendo su víctimanan, foral den e hogar.

Hopi esposo i esposa ta purba resolvé nan desacuerdonan cu violencia. Den algun pais, mayor i maestronan ta usa violencia pa baha nan rabia riba mucha. Abusadónan ta mik riba esnan mas débil djis pa pret, i ta someté nan na violencia. Di con hende ta bira asina violento?

Di con Hende Ta Bira Violento

Algun persona ta bisa cu hende ta violento di naturalesa. Aunke en general crímen violento a baha na Merca, el a aumentá entre hóbennan. I interes den violencia a aumentá. E tres cadenanan principal di television a duplicá e cantidad di reportahenan di crímen i a triplicá nan cobertura di asesinato. Sí, crímen ta bende bon! E sikiatra Karl Menninger a bisa: “No solamente nos ta tolerá violencia, e ta e titular di nos korantnan. Un tercer of un cuarta parti di nos programanan di television ta us’é pa nos yunan dibertí cuné. No solamente nos ta lagu’é pasa! Mi kerido amigunan, nos stim’é.”

Estudionan científico recien ta indicá cu tantu biologia di celebro como e ambiente tin hopi relacion cu agresion humano. “Loke nos tur ta cuminsá concluí ta cu e ambientenan perhudicial na cua mas i mas mucha ta exponé, en berdad ta creando un epidemia di violencia,” segun Dr. Markus J. Kruesi dje Instituto pa Investigacion Hubenil di Universidad di Illinois. “Sucesonan ambiental di berdad ta causando cambionan molecular den e celebro cu ta haci hende mas impulsivo.” Factornan manera “e colapso dje structura di famia, e aumento di famianan di un solo mayor, pobresa persistente i uso crónico di droga, en realidad por incliná e balansa di kímica di celebro na un comportacion agresivo—un efecto cu un tempu hende a considerá imposibel,” segun e buki Inside the Brain (Den e Celebro).

Nan ta bisa cu un dje cambionan den e celebro ta bahamentu dje nivel di serotonin, un kímico celebral cu supuestamente ta dominá agresion. Estudionan ta revelá cu alcohol por baha e nivel di serotonin den e celebro, dunando asina un base científico p’e coneccion conocí pa hopi tempu entre violencia i uso di alcohol.

Tin un otro factor mas cu ta enbolbí den e aumento di violencia awe. Bijbel, un buki confiabel di profecia, ta alertá nos: “Corda, lo tin tempunan difícil den e último dianan. Hende lo ta egoista, golos, bromadó i arogante; . . . nan lo ta sin bondad, sin misericordia, calumniadó, violento i feros; nan lo odia loke ta bon; nan lo ta traicionero, descabeyá i hinchá cu orguyo . . . Keda leu for di hende asina.” (2 Timoteo 3:1-5, Today’s English Version) Sí, e violencia cu nos ta mira awe ta un cumplimentu di profecia di Bijbel tocante “e último dianan.”

Algu mas ta haci esaki un tempu specialmente violento. “Ai dje tera i di laman,” Bijbel ta bisa, “pasobra Diabel a baha cerca boso, teniendo gran rabia, sabiendo cu e tin un periodo di tempu corticu.” (Revelacion 12:12) Diabel i su trupa di demoñonan a ser sacá for di shelu i awor nan ta concentrando nan malicia riba humanidad. Como “e gobernante dje autoridad dje aire,” Diabel ta manipulá “e spiritu cu awor ta obra den e yunan di desobedencia,” haciendo e tera un lugá cada bes mas violento.—Efesionan 2:2.

Con, anto, nos por enfrentá e “aire” violento dje mundu djawe? I con nos por resolvé desacuerdonan sin violencia?

[Komentario na página 3]

Un cantidad grandi di mucha ta ser maltratá, batí of matá den un dje lugánan mas violento riba tera—nan hogar!