Cana cu Dios—E Promé Pasonan

“Hala cerca Dios, i lo e hala cerca boso.”—SANTIAGO 4:8.

1, 2. Pakico lo bo bisa cu ta un gran privilegio pa sirbi Jehova?

E HOMBER a sufri den prizon pa hopi aña. Anto a orden’é p’e presentá dilanti e gobernante dje pais. Cosnan a cana lihé. Di ripiente, e prezu a haña su mes den servicio dje monarca mas poderoso na mundu dje tempu ei. El a pone e ex-prezu den un posicion di gran responsabilidad i onor extraordinario. Josef—e homber kende su pianan un tempu tabata mará na cadena—awor tabata cana cu un rey!—Génesis 41:14, 39-43; Salmo 105:17, 18.

² Awe, hende tin e oportunidad pa drenta den servicio di un persona muchu mas grandi cu fárao di Egipto. E Ser Supremo di universo ta invitá nos tur pa sirbié. Ta ki un privilegio asombroso pa haci esei i pa cultivá un relacion íntimo cu Jehova, e Dios todopoderoso! E Scritura ta asoci’é cu poder mahestuoso i splendor, i tambe cu serenidad, bunitesa i agradabilidad. (Ezekiel 1:26-28; Revelacion 4:1-3) Amor ta dominá tur su tratonan. (1 Juan 4:8) E no ta gaña nunca. (Númeronan 23:19) I nunca Jehova ta desapuntá esnan leal na dje. (Salmo 18:25) Dor di cumpli cu su rekisitonan hustu, nos por tin un bida felis i significativo awor, cu mira riba bida eterno. (Juan 17:3) Ningun gobernante humano ta ofrecé nada cu por ta compará cu e bendicion i privilegionan ei.

3. Den ki sentido Noe a “cana cu e Dios berdadero”?

³ Hopi tempu pasá, e patriarca Noe a determiná pa biba na armonia cu e boluntad i propósito di Dios. Bijbel ta bisa tocante dje: “Noe tabata un homber hustu. El a resultá di ta sin culpa entre su contemporáneonan. Noe a cana cu e Dios berdadero.” (Génesis 6:9) Ta claro cu Noe no a cana literalmente cu Jehova, ya cu ningun hende ‘no a ni mira Dios nunca.’ (Juan 1:18) Mas bien, Noe a cana cu Dios den e sentido cu el a haci loke Dios a bis’é haci. Pa motibu cu Noe a dedicá su bida na haci e boluntad di Jehova, e tabatin un relacion caluroso i íntimo cu Dios Todopoderoso. Mescos cu Noe, miyones di hende awe ta ‘canando cu Dios’ dor di biba na armonia cu Jehova su conseho i instruccion. Con un persona ta cuminsá un curso asina?

Conocimentu Exacto Ta Esencial

4. Con Jehova ta instruí su pueblo?

⁴ Pa cana cu Jehova, nos tin cu conoc’é promé. Profeta Isaías a predicí: “Mester sosodé den e parti final dje dianan cu e ceru dje cas di Jehova lo bira firmemente establecí mas haltu cu e top dje cerunan, i siguramente lo e ser halsá mas haltu cu e ceritunan; i na dje tur e nacionnan tin cu basha bai. I hopi pueblo siguramente lo bai i bisa: ‘Boso ban, i laga nos subi na e ceru di Jehova, n’e cas di e Dios di Jacob; i lo e instruí nos tocante su camindanan, i nos lo cana den su bereanan.’ Pasobra di Síon ley lo sali, i e palabra di Jehova for di Jerusalem.” (Isaías 2:2, 3) Sí, nos por tin confiansa cu Jehova lo instruí tur esnan cu ta busca pa cana den su camindanan. Jehova a percurá su Palabra, Bijbel, i e ta yuda nos comprend’é. Un manera cu e ta haci esaki ta mediante “e esclabo fiel i discreto.” (Mateo 24:45-47) Jehova ta usa “e esclabo fiel” pa percurá instruccion spiritual pa medio di publicacionnan basá riba Bijbel, reunionnan cristian i e areglo grátis di un studio di Bijbel. Tambe Dios ta yuda su pueblo comprendé su Palabra mediante su spiritu santu.—1 Corintionan 2:10-16.

5. Pakico e berdad di Bijbel ta asina precioso?

⁵ Aunke nos no ta paga p’e berdad di Bijbel, e ta precioso si. Segun cu nos ta studia e Palabra di Dios, nos ta siña tocante Dios mes—su nomber, su personalidad, su propósito i su manera di trata cu hende. Tambe nos ta haña contesta libertador riba preguntanan fundamental di bida: Pakico nos ta aki? Pakico Dios ta permití sufrimentu? Kico futuro ta encerá? Pakico nos ta bira bieu i muri? Tin bida despues di morto? Ademas, nos ta siña loke ta e boluntad di Dios pa nos, esta, con nos mester cana afin di agrad’é plenamente. Nos ta siña cu su rekisitonan ta razonabel i maraviyosamente beneficioso ora nos cumpli cu nan. Sin instruccion di Dios, hamas nos lo por a comprendé e cosnan ei.

6. Ki curso conocimentu exacto di Bijbel ta permití nos sigui?

⁶ E berdad di Bijbel ta poderoso i ta impulsá nos pa haci cambio den nos bida. (Hebreonan 4:12) Promé cu nos a gana conocimentu dje Scritura, kisas nos a cana solamente “conforme cu e sistema di cosnan dje mundu aki.” (Efesionan 2:2) Pero conocimentu exacto dje Palabra di Dios ta detayá un curso diferente pa nos, pa nos por “cana di un manera digno di Jehova afin di agrad’é plenamente.” (Colosensenan 1:10) Ta ki un goso pa dal nos promé stapnan den cana cu Jehova, e Persona mas magnífico di henter universo!—Lucas 11:28.

Dos Paso Importante—Dedicacion i Bautismo

7. Segun cu nos ta studia e Palabra di Dios, ki berdad tocante liderato humano ta bira bisto?

⁷ Ora nos crece den nos comprendimentu di Bijbel, nos ta cuminsá examiná asuntunan humano i nos mes bida den e lus spiritual dje Palabra di Dios. Dje manera ei un berdad importante ta bira bisto. Hopi tempu pasá profeta Jeremías a expresá e berdad ei ora el a skirbi: “Mi sa masha bon, o Jehova, cu na hende terenal no ta pertenecé su caminda. No ta pertenecé na hende cu ta canando pa ni sikiera dirigí su paso.” (Jeremías 10:23) Hende—nos tur—mester di Dios su guia.

8. (a) Kico ta impulsá hende pa haci un dedicacion na Dios? (b) Kico ta dedicacion cristian?

⁸ Ora nos comprendé e echo vital aki, e ta motivá nos pa busca Jehova su guia. I amor pa Dios ta impulsá nos pa dedicá nos bida na dje. Haci un dedicacion na Dios ta nificá acerk’é den oracion i primintié solemnemente di usa nos bida pa sirbié i cana den su camindanan fielmente. Ora nos haci esaki, nos ta sigui e ehempel di Jesus, kende a presentá su mes na Jehova cu e determinacion firme pa cumpli cu e boluntad divino.—Hebreonan 10:7.

9. Pakico hende ta dedicá nan bida na Jehova?

⁹ Hamas Jehova Dios ta pone presion riba ningun hende ni forsa nan haci un dedicacion na dje. (Compará cu 2 Corintionan 9:7.) Ademas, Dios no ta spera pa ningun hende dedicá su bida na Dje bou di un emocion momentáneo. Promé cu un persona bautisá, e mester ta un disipel caba, i esei ta rekerí esfuerso diligente pa gana conocimentu. (Mateo 28:19, 20) Pablo a suplicá esnan cu tabata bautisá caba pa ‘presentá nan curpa como un sacrificio bibu, santu, aceptabel na Dios, un sirbishi sagrado cu nan facultad di razoná.’ (Romanonan 12:1) Ta dor di usa nos facultad di razoná na un manera similar, nos ta haci un dedicacion na Jehova Dios. Despues cu nos siña kico ta enbolbí i razoná cuidadosamente riba e asuntu, di buena gana i cu goso nos ta dedicá nos bida na Dios.—Salmo 110:3.

10. Con dedicacion ta relacioná cu bautismo?

¹⁰ Despues di a acercá Dios mediante oracion den privá pa expresá nos determinacion pa cana den su camindanan, nos ta dal e siguiente paso. Nos ta haci nos dedicacion públicamente conocí pa medio di nos bautismo bou di awa. Esaki ta un declaracion público cu nos a haci un voto pa haci e boluntad di Dios. Na cuminsamentu di Jesus su ministerio terenal, Juan a bautis’é, poniendo asina un ehempel pa nos. (Mateo 3:13-17) Mas despues, Jesus a comisioná su siguidónan pa haci disipel di hende i bautisá nan. P’esei, dedicacion i bautismo ta pasonan esencial pa ken cu ta deseá di cana cu Jehova.

11, 12. (a) Di ki manera nos por compará bautismo cu casamentu? (b) Ki paralelo nos por establecé entre nos relacion cu Jehova i esun cu ta existí entre esposo i esposa?

¹¹ Bira un disipel dedicá i bautisá di Jesucristo ta algu similar na casa. Den hopi pais, tin vários paso cu ta bini promé cu e dia di casamentu. Un homber i un muher ta topa, nan ta siña conocé otro i ta gusta otro. Despues ta bini e compromiso. E casamentu ta haci público loke nan a dicidí den privá, esta, pa drenta matrimonio i despues biba huntu como esposo i esposa. Ta e casamentu ta marca públicamente e cuminsamentu dje relacion special ei. E fecha ei ta marca e cuminsamentu dje matrimonio. Na comparacion, bautismo ta marca e cuminsamentu di un bida comprometé pa cana den un relacion dedicá cu Jehova.

¹² Considerá un otro paralelo. Despues dje dia di casamentu, e amor entre esposo i esposa mester bira mas profundo i mas maduro. Pa hala cada bes mas cerca otro, ámbos partner mester haci un esfuerso inegoista pa mantené i fortalecé nan relacion matrimonial. Aunke nos no ta drenta un matrimonio cu Dios, despues di nos bautismo nos tin cu traha pa mantené un relacion íntimo cu Jehova. E ta observá i ta apreciá nos esfuersonan pa haci su boluntad i ta hala cerca nos. “Hala cerca Dios,” disipel Santiago a skirbi, “i lo e hala cerca boso.”—Santiago 4:8.

Cana den Jesus Su Pasonan

13. Ken su ehempel nos mester sigui ora di cana cu Dios?

¹³ Pa cana cu Jehova, nos tin cu sigui e ehempel cu Jesucristo a pone. Apostel Pedro a skirbi: “P’e curso aki a yama boso, pasobra asta Cristo a sufri pa boso, lagando un modelo pa boso sigui su pasonan cu sumo cuidou i atencion.” (1 Pedro 2:21) Siendo cu Jesus tabata perfecto i nos ta imperfecto, nos no por sigui su ehempel sin cometé fayo. No obstante, Jehova ta spera pa nos haci lo mihó cu nos por. Laga nos considerá cincu rasgo di Jesus su bida i ministerio cu cristiannan dedicá mester haci esfuerso pa imitá.

14. Kico conocé e Palabra di Dios ta encerá?

¹⁴ Jesus tabatin un conocimentu exacto i cabal dje Palabra di Dios. Durante Jesus su ministerio, bes tras bes el a cita for dje Scritura Hebreo. (Lucas 4:4, 8) Claro cu e lidernan religioso malbado dje tempu ei tambe tabata cita for dje Scritura. (Mateo 22:23, 24) E diferencia tabata cu Jesus a comprendé e nificacion dje Scritura, i el a aplik’é den su bida. E tabata sa no solamente e letter dje Ley, sino tambe e spiritu dje Ley. Segun cu nos ta sigui e ehempel di Cristo, nos tambe mester haci esfuerso pa comprendé e Palabra di Dios, capta e sentido, of spiritu, di dje. Dor di haci esei, nos por bira trahadónan aprobá pa Dios cu ta capas pa ‘manehá e palabra dje berdad corectamente.’—2 Timoteo 2:15.

15. Ki ehempel Jesus a pone den papia tocante Dios?

¹⁵ Cristo Jesus a papia cu otronan tocante su Tata celestial. Jesus no a tene su conocimentu dje Palabra di Dios pa su mes. Asta su enemigunan a yam’é “Maestro,” pasobra tur caminda cu el a bai el a papia cu otronan tocante Jehova i Su propósitonan. (Mateo 12:38) Jesus a predicá públicamente den e área dje tempel, den snoa, den stad i den cunucu. (Marco 1:39; Lucas 8:1; Juan 18:20) El a siña otro hende cu compasion i cu bondad, mustrando amor pa esnan cu el a yuda. (Mateo 4:23) Esnan cu ta sigui Jesus su ehempel tambe ta haña hopi lugá i manera pa siña otronan tocante Jehova Dios i su propósitonan maraviyoso.

16. Con estrecho Jesus su laso cu co-adoradónan di Jehova tabata?

¹⁶ Jesus tabatin un laso estrecho cu hende cu a adorá Jehova. Ora Jesus tabata papia cu e multitudnan na un ocasion, su mama i su rumannan incrédulo a bin pa papia cuné. E relato di Bijbel ta bisa: “Un hende a bis’é: ‘Mira! Bo mama i bo rumannan ta pará pafó, buscando pa papia cu bo.’ Como contesta e di cu esun cu a bin bis’é: ‘Ken ta mi mama, i ken ta mi rumannan?’ I sacando su man den direccion di su disipelnan, el a bisa: ‘Mira! Mi mama i mi rumannan! Pasobra ken cu haci e boluntad di mi Tata cu ta den shelu, esun ei ta mi ruman homber i ruman muher i mama.’” (Mateo 12:47-50) Esaki no ta nificá cu Jesus a rechasá su famia, pasobra sucesonan cu a sigui despues ta proba cu e no a haci esei. (Juan 19:25-27) Pero, e relato aki ta enfatisá e amor cu Jesus tabatin pa compañeronan creyente. Di manera similar awe, esnan cu ta cana cu Dios ta busca e compañerismo di otro sirbidónan di Jehova i ta bin stima nan tiernamente.—1 Pedro 4:8.

17. Con Jesus a sinti tocante hacimentu dje boluntad di su Tata celestial, i ki efecto esaki mester tin riba nos?

¹⁷ Dor di haci e boluntad divino, Jesus a mustra amor pa su Tata celestial. Jesus a obedecé Jehova den tur cos. El a bisa: “Mi cuminda ta pa mi haci e boluntad di esun cu a mandá mi i terminá su trabou.” (Juan 4:34) Tambe Cristo a bisa: “Semper mi ta haci e cosnan cu ta agradá [Dios].” (Juan 8:29) Jesus a stima su Tata celestial asina tantu cu el “a humiyá su mes i a bira obediente te na morto, sí, morto riba un staca di tormento.” (Filipensenan 2:8) Na su turno, Jehova a bendicioná Jesus, halsand’e na un posicion di autoridad i onor direct bou di Jehova mes. (Filipensenan 2:9-11) Mescos cu Jesus, nos ta mustra nos amor pa Dios dor di warda su mandamentunan i dor di haci su boluntad.—1 Juan 5:3.

18. Ki ehempel Jesus a pone den e asuntu di oracion?

¹⁸ Jesus tabata un homber di oracion. El a haci oracion na su bautismo. (Lucas 3:21) Promé cu el a scoge su 12 apostelnan, el a dedicá henter e anochi na oracion. (Lucas 6:12, 13) Jesus a siña su disipelnan con pa haci oracion. (Lucas 11:1-4) Riba e anochi promé cu su morto, el a haci oracion pa nan, i huntu cu nan. (Juan 17:1-26) Oracion tabata un parti importante di Jesus su bida, mescos cu e mester ta den di nos, ya cu nos ta su siguidónan. Ta ki un onor pa papia cu e Soberano di Universo den oracion! Ademas, Jehova ta contestá oracion, pasobra Juan a skirbi: “Esaki ta e confiansa cu nos tin en cuanto dje, cu, no ta importá kico nos pidi conforme cu su boluntad, e ta tende nos. Ademas, si nos sa cu e ta tende nos tocante cualkier cos cu nos pidi, nos sa cu nos lo haña e cosnan pidí pasobra nos a pidi nan di dje.”—1 Juan 5:14, 15.

19. (a) Ki cualidadnan di Jesus nos mester imitá? (b) Den ki maneranan nos ta saca beneficio di studia Jesus su bida i ministerio?

¹⁹ Tin asina hopi cos cu nos por siña dor di examiná cu sumo cuidou i atencion Jesucristo su bida i ministerio terenal! Refleccioná riba e cualidadnan cu el a manifestá: amor, compasion, bondad, fortalesa, ekilibrio, razonabilidad, humildad, curashi i inegoismo. Mas nos siña tocante Jesus, mas grandi nos deseo ta pa ser su fiel siguidónan. Conocimentu di Jesus tambe ta hala nos mas cerca Jehova. Al fin i al cabo, Jesus tabata un refleho perfecto di su Tata celestial. E tabatin un relacion asina íntimo cu Jehova cu e por a bisa: “Ken cu a mirá mi a mira e Tata tambe.”—Juan 14:9.

Confia den Dios p’e Sostené Bo

20. Con nos por gana confiansa den cana cu Jehova?

²⁰ Ora mucha cuminsá siña cana, nan stapnan ta insigur. Con nan ta siña cana cu confiansa? Solamente cu práctica i perseverancia. Wel, esnan cu ta cana cu Jehova ta haci esfuerso pa cana cu un paso sigur i stabil. Esaki tambe ta rekerí tempu i perseverancia. Pablo a mustra e importancia di perseverancia den cana cu Dios ora el a skirbi: “Finalmente, rumannan, nos ta pidi boso i ta urgi boso mediante Señor Jesus, mescos cu boso a ricibí e instruccion for di nos en cuanto con boso mester anda i agradá Dios, manera boso realmente ta anda, pa boso sigui haci esei mas plenamente.”—1 Tesalonicensenan 4:1.

21. Segun cu nos ta cana cu Jehova, ki bendicionnan nos por haña?

²¹ Si nos ta totalmente dedicá na Dios, lo e yuda nos sigui cana cuné. (Isaías 40:29-31) Nada cu e mundu aki tin di ofrecé por ta compará cu e bendicionnan cu e ta drama riba esnan cu ta cana den su camindanan. E ta ‘Esun cu ta siña nos beneficiá nos mes, Esun cu ta haci nos stap den e caminda den cua nos mester cana. I, si nos realmente presta atencion na su mandamentunan, nos pas lo yega di ta mescos cu un riu, i nos husticia manera e olanan di laman.’ (Isaías 48:17, 18) Dor di aceptá e invitacion pa cana cu Dios i haci esei fielmente, nos por tin pas cuné pa semper.

Con Lo Bo Respondé?

◻ Pakico ta un onor pa cana cu e Dios berdadero?

◻ Pakico studio, dedicacion i bautismo ta e promé pasonan den cana cu Jehova?

◻ Con nos lo por sigui den e pasonan di Jesus?

◻ Con nos sa cu Jehova lo sostené nos segun cu nos ta cana cuné?

[Plachinan na página 13]

Studio, dedicacion i bautismo ta e promé pasonan den cana cu Dios