Di Adoracion di Emperador pa Adoracion Berdadero

MANERA ISAMU SUGIURA A RELATÁ

Aunke cu na 1945 ya tur cos a mustra cu Hapon tabata perdiendo Guera Mundial II, nos tabatin pleno confiansa di cu kamikaze (“bientu divino”) lo supla contra e enemigu i derotá nan. E palabra kamikaze ta referí na e tormentanan di aña 1274 i 1281 cu a destruí gran parti dje flotanan mongoles dilanti costa hapones, i obligá nan di bati retirada dos bes.

P’ESEI, ora Emperador Hirohito a anunciá n’e nacion, dia 15 di augustus 1945, cu Hapon a entregá n’e Forsanan Aliado, e speransa di shen miyon hende deboto na dje a keda desbaratá. E tempu ei mi tabata un mucha di scol, i e noticia a desbaratá mi speransanan tambe. Mi a puntra mi mes: ‘Si no ta Emperador ta e Dios bibu, ta ken anto? Den ken mi mester confia?’

Tog, Hapon su derota den Guera Mundial II a habri caminda pa ami mes i miles di otro hapones siña tocante e Dios berdadero, Jehova. Promé cu mi relatá e cambionan cu mi mester a haci, lagá mi contá bo di mi criansa religioso.

Promé Influencianan Religioso

Mi a nace den e ciudad di Nagoya, dia 16 di juni 1932, esun mas chikitu di cuater ruman homber. Tata tabata traha pa gobiernu como mididó di tereno. Mama tabata un creyente deboto di Tenrikyo, un secta sinto. Mi ruman mas grandi a ricibí educacion religioso pa bira maestro di Tenrikyo. Ami cu Mama tabata hopi cerá cu otro, i e tabata hibá mi cuné ora e bai caminda nan tabata reuní pa adorá.

Nan a siñá mi baha cabes i resa. Religion Tenrikyo a siña cu tin un creador cu yama Tenri O no Mikoto, i tambe dies otro dios menor. E miembronan tabata practicá sanacion di fe, i a considerá cu ta importante pa sirbi otronan i plama bo creencianan.

Como mucha mi tabata masha curioso. Luna i e streanan incontabel den shelu di anochi tabata intrigá mi, i mi tabata puntra mi mes te con leu espacio ta extendé bai mas ayá cu e shelu cu mi por a mira. Mi tabata fasiná di wak con berehein i konkomber salada cu mi tabata planta riba un pida tereno chikitu den curá patras, tabata crece. Observá naturalesa a fortalecé mi creencia den Dios.

E Añanan di Guera

Mi añanan di scol básico, di 1939 pa 1945, a cai pareu cu e periodo di Guera Mundial II. Adoracion di Emperador, un elemento central di sinto, a ricibí hopi énfasis den nos educacion escolar. Nan a siña nos shushin, loke a encerá educacion moral cu característicanan nacionalista i militarista. Ceremonia di hisa bandera, cantamentu di himno nacional, studia e decretonan di educacion imperial, i rindi homenahe na un potret dje emperador—tur esaki tabata forma parti di nos rutina escolar.

Nos tabata bai un tempel sinto local tambe, pa pidi Dios duna e ehército imperial victoria. Dos di mi rumannan carnal tabata den servicio militar. Dor di mi indoctrinacion nacionalista-religioso, mi tabata gosa mashá di tende dje victorianan dje ehército hapones.

Nagoya tabata un centro dje industria di aviacion hapones, loke a hacié bira un obhetivo principal pa atake aéreo masivo di Forsa Aéreo mericano. Den dia, bombarderonan B-29 Superfortress tabata bula pasa riba nos ciudad na un 9.000 meter di haltura i tabata basha cientos di tonelada di bom riba e distritonan industrial. Anochi, usando lus special nan tabata localisá e bombarderonan ta bula asta na 1.300 meter so di haltura. Un atake aéreo tras di otro cu bom di candela tabata keda causa candelanan grandi den e áreanan di bibienda. Nagoya so a ricibí 54 atake aéreo durante e último nuebe lunanan dje guera, loke a resultá den masha tantu sufrimentu i mas cu 7.700 morto.

Ya pa e tempu ei, barcunan di guera a cuminsá bombardiá dies ciudad na costa, i e hendenan tabata papia di un posibel aterisahe di forsanan mericano cerca di Tokio. Hende muher i mucha tabata entrená pa bringa cu lansa di bambu pa protehá nos pais. Nos lema tabata “Ichioku Sougyokusai,” cu kier men: “Ta preferibel pa e 100 miyonnan muri, cu nos entregá.”

Dia 7 di augustus 1945, un titular di korant a bisa: “Tipo Nobo di Bom Tirá Riba Hiroshima.” Dos dia despues nan a tira un otro mas riba Nagasaki. Bom nuclear nan tabata, i despues nos a tende cu, huntu, nan a exigí 300.000 bida. Anto dia 15 di augustus, despues cu nos a caba di train marcha cu scopet di palu, nos a tende e emperador su discurso caminda el a anunciá cu Hapon a entregá. Promé, nos tabata convencí cu nos lo a gana, pero e ora ei sí nos a keda completamente demoralisá!

Un Speransa Nobo Ta Lanta

Ora e trupanan mericano a cuminsá ocupá Hapon, poco-poco nos a bin aceptá cu ta Merca a gana e guera. A introducí democracia na Hapon, i tambe un constitucion nobo cu a garantisá libertad di religion. Situacion di bida tabata duru, cuminda tabata scars, anto na 1946 mi tata a muri di malnutricion.

Miéntras tantu, nan a cuminsá duna ingles na e scol caminda mi tabata bai, i e stacion di radio NHK a cuminsá cu un programa pa siña papia ingles. Cincu aña largu mi a sinta scucha e programa popular aki tur dia cu e buki di les den mi man. Esei a lanta un deseo den mi di bai Merca un dia. Dor cu religion sintoista i budista a desapuntá mi, mi a cuminsá pensa cu por ta lo mi por haña e berdad tocante Dios den religionnan occidental.

Na principio di april 1951, mi a conocé Grace Gregory, un misionero di Sociedad Watch Tower. E tabata pará dilanti e stacion di trein di Nagoya ta ofrecé un ehemplar di E Toren di Vigilancia na ingles i un foyeto na hapones tocante un cierto tema bíblico. Su humildad pa haci un trabou asina a impresioná mi. Mi a tuma tur dos publicacion cerca dje, i ora el a ofrecé mi un studio di Bijbel mi a aceptá mesora. Mi a primintié cu lo mi bai su cas despues di un par di dia pa studia Bijbel.

Ora mi a cai sinta den un trein i cuminsá lesa E Toren di Vigilancia, e promé palabra den e artículo di introduccion a hala mi atencion, “Jehova.” Mi no a yega di topa e nomber ei nunca promé. Mi no a spera di hañ’é den e diccionario chikitu ingles-hapones cu mi tabata cana cuné, pero e tabata den dje sí! “Jehova . . . , e Dios di Bijbel.” Awor mi a cuminsá siña tocante e Dios di cristianismo!

E promé biaha ei cu mi a bishitá e cas di misionero, mi a haña sa cu Nathan H. Knorr, presidente di Watch Tower Bible and Tract Society e tempu ei, tabata bai duna un discurso un par di siman despues. E tabata di bishita na Hapon huntu cu su secretario, Milton Henschel, i e tabata bai bishitá Nagoya. Aunke mi conocimentu di Bijbel tabata limitá, mi a disfrutá mashá di tantu e discurso como e asociacion cu e misioneronan i e otronan presente.

Den rond di dos luna, mi studio cu Grace a siñá mi e berdadnan básico tocante Jehova, Jesucristo, e rescate, Satanas e Diabel, Armagedon i e Paradijs terenal. E bon nobo di Reino tabata precis e sorto di mensahe cu mi tabata buscando. Pareu cu mi a cuminsá studia, mi a cuminsá asistí n’e reunionnan di congregacion tambe. Mi tabata encantá cu e ambiente amistoso na e reunionnan aki. E misioneronan tabata mescla libremente cu e haponesnan, i tabata sinta cu nos riba tatami (mat di riet di flegtu.

Na october di 1951, a tene e promé asamblea di circuito na Hapon, den Nakanoshima Public Hall, na e ciudad Osaka. Na henter Hapon no tabatin ni 300 Testigo, tog rond di 300 hende a asistí na e asamblea, incluyendo casi 50 misionero. Asta mi tabatin un parti chikitu den e programa. Loke mi a mira i tende a impresioná mi asina tantu cu mi a resolvé den mi curason pa sirbi Jehova henter mi bida. Su siguiente dia mi a bautisá den e awanan lou di un pisina público ei cerca.

Goso di Sirbishi di Pionero

Mi kier a bira pionero, manera ta yama e ministernan di tempu completo di Testigonan di Jehova, pero mi a sinti un obligacion pa yuda mantené mi famia tambe. Ora cu mi a reuní e curashi pa conta mi shef di mi deseo, mi a keda sorprendí di tend’é bisa: “Lo mi ta contentu di cooperá cu bo si esei lo hací bo felis.” El a lagá mi traha dos dia pa siman so, i tog mi tabata por a yuda mi mama cu su gastunan doméstico. Mi a sintí mi manera un para librá for di su kouchi.

Condicionnan a sigui mehorá, i na augustus di 1954 mi a cuminsá traha como pionero den un teritorio patras di e stacion di Nagoya, djis un par di minuut leu di cana for dje lugá caminda mi a conocé Grace. Despues di vários luna, mi a ricibí un asignacion pa sirbi como pionero special na Beppu, un ciudad na Kyushu, un isla den occidente. Tsutomu Miura tabata mi partner asigná.a E tempu ei no tabatin ni un solo congregacion di Testigonan di Jehova riba henter e isla, pero awor tin cientos, partí den 22 circuito!

Un Muestra dje Mundu Nobo

Dia ruman Knorr a bishitá Hapon atrobe na april di 1956, el a pidí mi lesa un par di paragraf for dje revista Toren di Vigilancia na ingles na bos haltu. E no a bisá mi di con, pero un par di luna despues mi a ricibí un carta di invitacion pa asistí na e di 29 klas dje scol di misionero di Galad. Pues, na november dje aña ei mi a cuminsá un biahe emocionante pa Merca, loke a cumpli cu un deseo cu mi tabatin pa hopi tempu caba. Biba i traha pa un par di luna cu e famia grandi di Betel na Brooklyn a fortalecé mi fe den Jehova su organisacion visibel.

Na februari 1957, Ruman Knorr a stuur hiba ami i dos otro studiante n’e campus di Scol di Galad na South Lansing, den e parti nort dje estado di New York. Segun cu mi a ricibí instruccion di Jehova su palabra i a biba rondoná di paisahe espléndido huntu cu e otro studiantenan durante e siguiente cincu lunanan na Scol di Galad, mi a haña un muestra di loke e Paradijs terenal lo bai ta. Dies dje 103 studiantenan, incluyendo mi mes, a keda asigná na Hapon.

Aprecio pa Mi Asignacionnan

Tabatin como 860 Testigo na Hapon ora mi a yega bek na october 1957. Nan a asigná mi pa biaha como superintendente di circuito, pero promé mi a ricibí un par di dia di entrenamentu p’e trabou ei for di Adrian Thompson na Nagoya. Mi circuito a cubri un área di Shimizu, cerca di Monte Fuji, te na Isla Shikoku. Den dje tabatin ciudadnan grandi manera Kyoto, Osaka, Kobe, i Hiroshima.

Na 1961 mi a keda asigná como superintendente di distrito. P’e trabou aki mi mester a biaha di e isla norteño, Hokkaido, tapá cu sneu, te na e isla sub-tropical, Okinawa, i te pasa e Islanan Ishigaki, banda di Taiwan. Un distancia di un 3.000 kilometer.

Despues, na 1963, nan a invitá mi pa un curso di dies luna di Scol di Galad na Betel di Brooklyn. Durante e curso ruman Knorr a enfatisá e importancia di tin un actitud corecto tocante asignacionnan di trabou. El a bisa cu haci baño limpi ta un asignacion mes importante cu traha den oficina. E di cu si e bañonan no ta limpi, esei lo afectá henter e famia di Betel i nan trabou. Mas despues, parti di mi trabou na Betel na Hapon tabata di haci baño limpi. Mi a tene su conseho na mente.

Despues di bolbe Hapon, mi a bolbe haña e trabou di biahero como asignacion. Poco aña despues, na 1966, mi a casa cu Junko Iwasaki, un pionero special cu tabata sirbi na e ciudad Matsue. Lloyd Barry, superintendente di Sucursal n’e tempu ei, a duna e discurso di matrimonio conmovedor. Dje momento ei padilanti, Junko a compañá mi den e trabou biahero.

Nos asignacion a cambia na 1968 ora cu nan a mandá mi bai traha den traduccion na e Sucursal na Tokio. Dor cu tabata falta kamber, mi tabata keda na Municipio Sumida, na Tokio, anto mi tabata bai Sucursal tur dia pa traha. Junko a sirbi como pionero special den e congregacion local. Na e halturanan aki, facilidadnan di Sucursal mas amplio a bira necesario. Asina ta cu na 1970 a cumpra tereno na Numazu, no muchu leu for di Monte Fuji. Ei nos a traha un fábrica di tres piso i un lugá pa biba. Promé cu e construccion a cuminsá, nos a usa vários dje casnan riba e tereno pa tene e Scol di Ministerio di Reino, cu ta suministrá entrenamentu pa superintendentenan di congregacion. Ami tabatin e privilegio di duna les na e scol, i Junko tabata prepará cuminda p’e studiantenan. Tabata emocionante pa mira cientos di homber cristian ricibí entrenamentu special p’e ministerio.

Riba un atardi mi a ricibí un telegram urgente. Mama a keda hospitalisá, sin masha speransa di bida. Mi a tuma e ‘bullet train’ (trein hapones di velocidad haltu) pa Nagoya, anto core bai hospital. E tabata fo’i tinu, pero mi a pasa anochi na su band’i cama. Mainta trempan mama a muri. Na caminda di regreso pa Numazu mi no por a controlá mi lágrimanan ora mi a corda e tempunan duru cu el a pasa aden durante su bida, i cuantu afecto e tabatin pa mi. Si ta Jehova su boluntad, lo mi mir’é bek n’e resureccion.

Den poco tempu nos a bira muchu hopi pa e compleho na Numazu. Pues, a cumpra shete hectar di tereno na Ciudad Ebina, anto a cuminsá construccion di un compleho di sucursal nobo na 1978. Awor, tur lugá disponibel riba e tereno aki ta yená cu edificio di fábrica i di bibienda, ademas di un Salon di Asamblea cu lugá pa mas cu 2.800 hende. E último ampliacion a keda cla e aña aki. E ta consistí di dos edificio di bibienda di diestres piso i un edificio pa parkeer i ‘service’ auto di cincu piso. Actualmente nos famia di Betel ta consistí di como 530 ruman, pero awor cu e facilidad a amplia, nos lo por acomodá rond di 900.

Hopi Motibu di Goso

Tabata emocionante pa mi mira con profecia di Bijbel a cumpli. Sí, mira ‘esun menor bira un nacion poderoso.’ (Isaías 60:22) Mi ta corda con, aya na 1951, un di mi rumannan a puntrá mi: “Cuantu Testigo tin na Hapon?”

Mi a contestá cu “como 260.”

“Esei so?” el a puntrá mi den un tono di menosprecio.

Mi ta corda con mi a pensa den mi mes: ‘Tempu lo mustra cuantu hende Jehova lo trece na su adoracion den e pais sinto-budista aki.’ I Jehova a duna e contesta! Awendia no tin teritorio mas na Hapon cu no ta asigná, i e cantidad di adoradó berdadero a multiplicá te na mas cu 222.000 ruman den 3.800 congregacion!

E último 44 añanan di mi bida den e ministerio di tempu completo, 32 di nan huntu cu mi amoroso esposa, tabata particularmente felis. Mi tin 25 dje añanan ei ta sirbi den e Departamento di Traduccion na Betel. Na september di 1979 mi a ricibí e invitacion pa bira miembro tambe dje comité di sucursal di Testigonan di Jehova na Hapon.

Mi ta privilegiá di por tabatin un parti chikitu den yuda hende sincero i stimadó di pas bini na Jehova su adoracion. Tin hopi otronan cu a haci mescos cu mi—bira di duna debocion n’e emperador pa adorá e único Dios berdadero, Jehova. Mi deseo sincero ta di yuda hopi otro hende mas cambia pa Jehova su banda victorioso i gana bida sin fin den e mundu nobo pacífico.—Revelacion 22:17.

[Nota]

[Plachi na página 29]

Educacion escolar tabata drei rond di adoracion di emperador

[Rekonosementu]

The Mainichi Newspapers

[Plachi na página 29]

Na New York cu Ruman Franz

[Plachi na página 29]

Huntu cu mi casá, Junko

[Plachi na página 31]

Trahando den e Departamento di Traduccion