Uni̇́ den e Mihó Caminda di Bida — BIBLIOTEKA ONLINE Watchtower

Uní den e Mihó Caminda di Bida

Si e poblacion di mundu sigui aumentá, pronto lo tin seis mil miyon hende riba tera. Aunke tur ta bini dje mésun antepasado, ta parce cu mayoria no ta reconocé cu nan ta miembro di un famia mundial i cu nan mester duna cuenta na un Creador sabí i amoroso. E desunion i conflictonan entre nacion, rasa i culturanan ta un testimonio desalentador dje situacion tristu aki.

EN BISTA dje condicionnan djawe, unidad mundial por parce di ta un meta inalcansabel. The Columbia History of the World ta declará: “Riba e pregunta importantísimo con pa biba huntu, e mundu contemporáneo no tin ni un solo idea nobo pa ofrecé, ni un.”

Sin embargo, pa logra unidad entre tur habitante di tera, no ta necesario pa bini cu un idea nobo. E Scritura Santu ta describí e caminda pa yega na unidad. Esei ta basá riba e adoracion di Esun cu a crea tera i tur bida riba dje. Berdadero unidad di pensamentu, propósito i moda di biba ta existí caba entre e pueblo di Dios. Nan ta mas cu cincu miyon i mei na cantidad den 233 pais, i ta uní den nan conviccion cu Dios su caminda di bida ta e mihó caminda. Mescos cu e salmista, nan ta pidi den oracion: “Instruí mi, o Jehova, tocante bo caminda. Lo mi cana den bo berdad. Unificá mi curason pa teme bo nomber.”—Salmo 86:11.

Hopi tempu pasá profeta Isaías a predicí e unimentu aki di hende den adoracion puru. El a skirbi: “Tin cu sosodé den e parti final dje dianan cu e ceru dje cas di Jehova lo bira firmemente establecí mas haltu cu e top dje cerunan, i siguramente lo e ser halsá mas haltu cu e ceritunan; i na dje tur e nacionnan tin cu basha bai. I hopi pueblo siguramente lo bai i bisa: ‘Boso ban, i laga nos subi na e ceru di Jehova, n’e cas di e Dios di Jacob; i lo e instruí nos tocante su camindanan, i nos lo cana den su bereanan.’”—Isaías 2:2, 3.

E unidad di Testigonan di Jehova ta único. Den mas cu 87.000 congregacion rond mundu, nan ta participá dje mésun alimento spiritual na nan reunionnan tur siman. (Mateo 24:45-47) Sin embargo, for di medio 1998 te na cuminsamentu di 1999, e Testigonan a desplegá nan unidad den un otro manera: rond mundu nan a bini huntu na nan Congresonan di tres dia, “Dios Su Caminda di Bida.” Na 13 pais, e reunionnan aki tabatin delegacionnan grandi cu a bini di vários tera, i ei a yama nan congresonan internacional. Otronan a ser designá como congreso di distrito. Pero tur e congresonan aki a presentá e mésun programa di bon cosnan spiritual.

Esta dushi tabata pa contemplá delegadonan contentu i bon bistí basha drenta auditorio i stadionnan pa Jehova siña nan! E expresion di un delegado n’e congreso internacional na Michigan, Merca, a reflehá bon e opinion general. El a bisa: “Tabata un goso grandi pa mira nos rumannan cu a bini for di tur parti di mundu—República Checo, Barbádos, Nigeria, Hungria, Inglatera, Hulanda, Etiopia, Kenya i hopi otro pais—brasa otro! Tabata bunita pa mira rumannan biba huntu den unidad, dramando lágrima di goso debí n’e amor cu nan tin pa otro i pa nan gran Dios, Jehova.” E siguiente artículo lo examiná e programa di congreso cu miyones di hende rond mundu a disfrutá di dje.

[Rekonosementu pa Potrèt na página 3]