Kico Orguyo Por Costa Bo?

BO A yega di trata cu un persona cu a purba rebahá bo pa malu? Tal bes un manager, hefe, supervisor of asta un pariente cu a menospreciá bo i trata bo cu desprecio total? Con bo a sinti bo pa cu e persona ei? Su personalidad a atraé bo? Sigur cu no! Pakico? Pasobra orguyo ta crea barera i ta stroba comunicacion.

Orguyo ta pone un persona rebahá tur otro hende, di manera cu semper e sí ta parce superior. E persona cu tin un actitud asina rara bes tin bon cos di bisa di otro hende. Semper e tin un cos negativo di agregá, manera: “Sí, esei por ta berdad, pero e hende ei tin e problema aki of e fayo ei.”

E buki Thoughts of Gold in Words of Silver (Pensamentu di Oro Expresá den Palabranan di Plata) ta describí orguyo como un “bicio cu semper ta perhudicá. E ta caba cu bo, sin laga casi nada pa admirá.” Ta algu straño anto cu niun hende ta sinti nan confortabel den compania di un persona orguyoso? De facto, e prijs di orguyo ta falta di berdadero amigu. “Na contraste,” e mésun buki ta sigui bisa, “mundu ta stima hende humilde—no e humildenan cu ta orguyoso cu nan ta humilde, sino esnan cu ta berdaderamente humilde.” Bijbel ta declará apropiadamente: “Orguyo di un hende ta umiy’é, ma esun ku ta di spiritu umilde, ta haña onor.”—Proverbionan 29:23, Editorial Evangélica.

Pero, mas importante cu e efecto riba amistad of onor di parti di hende, con orguyo ta afectá bo relacion cu Dios? Con Dios ta mira hende orguyoso, halsá i presumido? Orguyo of humildad ta haci un diferencia cerca Dios?

Un Les den Humildad

E escritor inspirá di Proverbionan ta declará: “Orguyo ta promé cu caida; i un spiritu halsá promé cu trompecamentu. Mihó ser humilde di spiritu huntu cu e mansunan, cu dividí botin huntu cu esnan cu ta halsa nan mes.” (Proverbionan 16:18, 19) E caso dje general sirio Naman, cu a biba den tempu dje profeta israelita Eliseo, ta confirmá e sabiduria dje palabranan ei.

Naman tabata un leproso. Den su búskeda pa un cura, el a biaha pa Samaria pensando cu lo el a haña audiencia personal cerca Eliseo. En bes di esei, e profeta a manda su criá cu instruccion pa Naman bai baña shete biaha den Riu Jordan. Naman a sintié ofendí cu e trato i conseho. Pakico e profeta no por a sali bin papia personalmente cuné en bes di manda un criá? I sin duda, cualkier riu sirio tabata mes bon cu Jordan! Su problema tabata orguyo. Kico tabata e resultado? Afortunadamente, Naman a sigui conseho mas sabí. “Cu esei el a baha i a cuminsá sambuyá den Jordan shete bes, conforme cu e palabra dje homber di e Dios berdadero; despues di cua su carni a bolbe bek manera e carni di un mucha homber chikitu, i el a bira limpi.”—2 Reynan 5:14.

Tin bes nos ta haña hopi beneficio for di djis un tiki humildad.

E Prijs di Arogancia

Sin embargo, loke orguyo ta costa nos por ta hopi mas cu djis perde un of otro beneficio of ganashi. Tin un otro grado di orguyo cu e palabra griego hybris ta implicá. Segun Barclay, erudito di idioma griego, “hybris ta orguyo mesclá cu crueldad . . . , e desprecio arogante cu ta pone [un hende] trapa riba curason di su próhimo.”

Den Bijbel nos ta haña un ehempel clásico dje clase di orguyo exagerá aki. Esei ta e caso di Hanun, rey di Amon. Perspicacia para comprender las Escrituras ta splica: “Debí cu Nahas a manifestá bondad amoroso na David, esaki a manda mensahero pa consolá Hanun pa e pérdida di su tata. Pero e prinsnan di Hanun a convenc’é cu e accion aki tabata djis un pretexto di parti di David pa spioná e stad, di manera cu el a desonrá e sirbidónan di David dor di feita mitar di nan barba i corta nan paña na mitar te na haltura di nan atras i a manda nan bai.”a Relacioná cu e incidente aki, Barclay ta comentá: “E trato ei tabata [hybris]. Esei tabata un combinacion di insulto, rabia i humiyacion público.”—2 Samuel 10:1-5.

Sí, e persona orguyoso ta capas pa desplegá hybris, esta, di insultá i humiyá otro hende. E tin deleite den ofendé hende na un manera sin heful i impersonal, i despues ta gosa dje otro persona su incomodidad i bergwensa. Pero ora hende ta mina of ruiná dignidad di otro hende, e por cost’é dòbel. E ta perde un amigu i, muy probablemente, crea un enemigu.

Con un cristian berdadero por desplegá orguyo perhudicial asina, ya cu su Doño a mand’é ‘stima su próhimo mescos cu su mes’? (Mateo 7:12; 22:39) Esei ta contradicí tur loke Dios i Cristo ta representá. P’esei Barclay ta haci e remarke importante aki: “[Hybris] ta e orguyo cu ta pone un hende desafiá Dios.” Ta e orguyo cu ta bisa: “No tin Jehova.” (Salmo 14:1) Of manera Salmo 10:4 ta expres’é: “E malbado, conforme su arogancia, no ta haci investigacion; tur su ideanan ta: ‘No tin Dios.’” Un orguyo, of arogancia asina, ta alehá hende no solamente for di amigu i pariente, sino tambe for di Dios. Ki un prijs haltu!

No Laga Orguyo Corumpí Bo

Orguyo por tin hopi cara: orguyo cu ta bini di nacionalismo, di racismo, di distincion di clase social, di educacion, rikesa, prestigio i poder. Den un of otro manera, orguyo por haci su entrada fácilmente i corumpí bo personalidad.

Hopi hende ta parce di ta humilde ora di trata cu nan superiornan of asta cu nan pareunan. Pero kico ta pasa ora e persona aparentemente humilde aki haña su mes den un posicion di autoridad? Di ripiente, e ta bira un tirano cu ta haci bida miserabel pa su supuesto inferiornan! Esaki por sosodé cu algun hende ora nan tin un uniform bistí of ora nan tin un karnet cu ta indicá autoridad. Asta trahadónan di gobiernu por bira orguyoso den nan trato cu e público, pensando cu e público t’ei pa sirbi nan i no vise versa. Orguyo por haci bo cruel, sin heful; humildad por haci bo amabel.

Si Jesus tabata kier, e por tabata orguyoso i streng cu su disipelnan. E tabata un homber perfecto, Yu di Dios, cu a trata cu siguidónan impulsivo i imperfecto. Tog, ki invitacion el a duna esnan cu a scuch’é? “Bini cerca mi, boso tur cu ta afaná i cargá, i lo mi refrescá boso. Tuma mi yugo riba boso i siña di mi, pasobra mi ta di genio suave i humilde di curason, i boso lo haña refrescamentu pa boso alma. Pasobra mi yugo ta suave i mi carga ta leve.”—Mateo 11:28-30.

Nos ta haci esfuerso pa semper sigui Jesus su ehempel? Of nos ta cruel, inflexibel, tiránico, sin misericordia i orguyoso? Mescos cu Jesus, trata na refrescá i no oprimí otro hende. Resistí e efecto destructivo di orguyo.

En bista di lo anterior, tur orguyo ta malu?

Respet Propio Versus Arogancia

Orguyo ta encerá tambe un respet propio cu ta razonabel of hustificabel. Respet propio ta nificá tene respet pa bo mes. Esei ta nificá cu loke otro hende ta pensa di bo, ta interesá bo. Bo ta interesá den bo aparencia i bo reputacion. Loke e proverbio spañó ta bisa ta berdad: “Bisa mi cu ken bo ta cana i ami lo bisa bo ken bo ta.” Si bo ta preferá di asociá cu hende cu ta slòns, floho, sin manera i boca sushi, e ora ei lo bo bira mescos cu nan. Nan lo pega bo cu nan actitud, i mescos cu nan, lo bo no tin respet propio.

Claro cu tin e otro extremo tambe, esta orguyo cu ta hiba na arogancia of banidad. E escriba i fariseonan den tempu di Jesus tabata orguyoso di nan tradicionnan i nan aparencia super-religioso. Jesus a spierta tocante nan: “Tur e obranan cu nan ta haci, nan ta haci pa hende mira; pasobra nan ta hancha e cahitanan cu ta contené scritura cu nan ta bisti como proteccion, i nan ta haci e frañanan di nan bistí mas grandi [pa parce mas religioso]. Nan ta gusta e lugá mas prominente na cenanan i e promé asientonan den snoa, i e saludonan den plasa i pa hende yama nan Rabi.”—Mateo 23:5-7.

Orguyo corecto anto, ta un actitud balansá. Corda tambe cu Jehova ta mira curason, no djis aparencia externo. (1 Samuel 16:7; Jeremías 17:10) Husticia di hende no ta husticia di Dios. Pero awor e pregunta ta: Con nos por cultivá berdadero humildad i evitá di paga e prijs caru di orguyo?

[Nota]

[Plachi na página 4]

Un tiki humildad a trece gran beneficio pa Naman