Con Bo Por Mustra Berdadero Humildad?

BERDADERO humildad tin gran balor den bista di Dios. Santiago a skirbi: “Dios ta oponé esnan halsá, pero ta duna bondad inmerecí na esnan humilde.” (Santiago 4:6) Aki Santiago por tabata referí na vários pensamentu expresá den e Scritura Hebreo. “Jehova ta haltu, i no obstante, e ta mira esun humilde; pero esun halsá e conocé solamente di un distancia.” “Mester rebahá wowonan halsá di hende terenal, i e halsamentu di hende tin cu buig; i mester pone Jehova so na haltu.” “Si ta trata di mofadó, [Dios] mes lo haci bofon; pero n’e mansunan lo e mustra fabor.”—Salmo 138:6; Isaías 2:11; Proverbionan 3:34.

Apostel Pedro tambe a animá hende pa mustra humildad. El a skirbi: “Boso tur faha boso mes cu humildad di mente un pa cu otro, pasobra Dios ta oponé esnan halsá, pero e ta duna bondad inmerecí na esnan humilde.”—1 Pedro 5:5.

Cristo Su Ehempel di Humildad

Tal bes bo ta puntra: Ki birtud of beneficio tin den ser humilde? Pa e persona cu ta haci esfuerso pa ta un cristian berdadero, e contesta ta fundamental: ser humilde ta nificá ser manera Cristo. Jesus a mustra su humildad dor di aceptá e asignacion único di bini na tera for dje region celestial i bira un ser humano humilde, inferior cu angel. (Hebreonan 2:7) Aunke e tabata e Yu di Dios, el a soportá un cantidad di humiyacion na man di su enemigunan. El a keda calmu durante su pruebanan, maske e por a pidi yudansa di legion di angel.—Mateo 26:53.

Finalmente, Jesus a pasa e bergwensa di ta cologá n’e staca di tormento, pero tog a keda fiel na su Tata. Di manera cu Pablo por a skirbi tocante dje: “Mantené den boso e actitud mental aki cu tabatin den Cristo Jesus tambe, kende, aunke tabata existí den e forma di Dios, no a duna consideracion na un tumamentu di poder, esta, cu e mester ta igual cu Dios. No, sino a rebahá su mes i a tuma forma di un esclabo i a yega di ta den e semehansa di hende. Mas cu esei, ora el a haña su mes manera hende, el a humiyá su mes i a bira obediente te na morto, sí, morto na un staca di tormento.”—Filipensenan 2:5-8.

Pues, con nos por manifestá berdadero humildad? Den situacionnan práctico, con nos por reaccioná na un manera humilde en bes di orguyoso?

E Manera cu un Persona Humilde Ta Reaccioná

Laga nos considerá humildad den e contexto di trabou, sea na trabou seglar of den e sirbishi cristian. Pa trabou por ta bon hací, tin mester di superintendente, manager i supervisor. Un hende tin cu tuma decision. Con bo ta reaccioná? Bo ta razoná: “Ken e ta kere cu e ta p’e bisa mi kico pa haci? Mi tin mas aña cuné ta traha aki.” Sí, si bo ta orguyoso, lo bo iritá ora bo ta traha bou di hende. Di otro banda, un persona humilde ta purba pa no ‘haci nada motivá pa gana di pleita of motivá pa egoismo, sino ta considerá cu humildad di mente cu e otronan ta superior cuné.’—Filipensenan 2:3.

Con bo ta reaccioná ora un sugerencia ta bini di un persona mas hóben of di un hende muher? Si bo ta humilde, por lo ménos lo bo tum’é na consideracion. Si bo ta orguyoso, lo bo sinti bo ofendí of rechas’é mesora. Bo ta preferá di haña elogio i labiamentu cu ta hiba na bo ruina, of conseho constructivo pa edificá bo?—Proverbionan 27:9; 29:5.

Bo por cu contratempu? Humildad lo permití bo enfrentá i wanta circunstancia difícil, mescos cu Job a haci. Si bo ta orguyoso, lo bo tin tendencia di frustra i kisas rebelá ora bo haña bo cu circunstancianan penoso i supuesto ofensanan.—Job 1:22; 2:10; 27:2-5.

Humildad Ta Amoroso i Pordonador

Algun hende tin problema pa bisa: “Despensá mi. Mi tabata fout. Bo tabatin rason.” Pakico? Muchu orguyo! Tog, cuantu biaha un despensa sincero fácilmente por a pone fin na un discusion entre dos casá.

Bo ta dispuesto pa pordoná ora un hende ofendé bo? Of, den bo orguyo, bo ta carga rencor, kisas pa dia i lunanan largu, nengando di papia cu esun cu supuestamente a ofendé bo? Bo ta asta hiba un guera vengativo contra e persona den un esfuerso pa saca sla? Algun guera vengativo asina a hiba na morto. Den otronan, e método tabata di caba cu e hende su reputacion. Na contraste, un persona humilde ta amoroso i pordonador. Pakico? Pasobra amor no ta tene cuenta di daño. Jehova tabata dispuesto pa pordoná e israelitanan si nan a legumai nan orguyo. E siguidó humilde di Jesus ta dispuesto pa pordoná, asta bes tras bes!—Joël 2:12-14; Mateo 18:21, 22; 1 Corintionan 13:5.

Un persona humilde ‘ta hiba delantera den mustra onor na otro.’ (Romanonan 12:10) New International Version ta bisa: “Onra otro mas cu boso mes.” Bo ta elogiá otro hende i ta apreciá nan abilidad i talentonan? Of semper bo tin cu haña un defecto pa mancha nan reputacion? Sí, bo ta capas pa duna otro hende berdadero elogio? Si ta difícil pa bo haci esaki, kisas ta insiguridad personal i orguyo ta bo problema.

Un persona orguyoso no tin pacenshi. Un persona humilde tin gran pacenshi. Kico di abo? Cualkier trato cu segun abo ta desfaborabel ta ofendé bo? Un reaccion asina ta net contrario di mustra gran pacenshi. Si bo ta humilde, lo bo no pensa cu bo ta masha cos. Corda kico a pasa ora Jesus su disipelnan a pensa cu nan tabata masha cos: nan a cuminsá pleita pisá riba ken tabata mas importante. Nan a lubidá cu nan tur tabata “esclabo cu no ta sirbi pa nada”!—Lucas 17:10; 22:24; Marco 10:35-37, 41.

E escritor frances Voltaire a describí humildad como “modestia di alma . . . e remedi contra orguyo.” Sí, un persona humilde no ta kere cu e ta masha cos. E tin un actitud modesto i no orguyoso. E ta profundamente respetuoso i cortes.

Pues, pakico haci esfuerso pa ta humilde? Pasobra humildad tin e aprobacion di Dios i ta yuda nos obtené guia divino. Entre otro, debí na Daniel su humildad, Jehova a considerá e profeta como un hende “masha deseabel” i a manda un angel p’e cu un vision! (Daniel 9:23; 10:11, 19) Humildad ta trece hopi recompensa. E ta trece berdadero amigu cu ta stima bo. Mas cu esei, e ta trece Jehova su bendicion. “E resultado di humildad i e temor di Jehova ta rikesa i gloria i bida.”—Proverbionan 22:4.

[Plachi na página 7]

Un humilde despensa por haci bida mas agradabel