Nos Tesoro den Weanan di Klei
“Nos tin e tesoro aki den weanan di klei, p’e poder mas ayá di loke ta normal sea di Dios i no loke ta bini di nos mes.”—2 CORINTIONAN 4:7.
1. Con e ehempel di Jesus mester animá nos?
MIENTRAS Jehova tabata molde’é aki riba tera, Jesus a mira e debilidadnan di humanidad personalmente. Cuantu su ehempel di integridad mester animá nos! Apostel Pedro ta bisa nos: “Realmente, p’e curso aki a yama boso, pasobra asta Cristo a sufri pa boso, lagando un modelo pa boso sigui su pasonan cu sumo cuidou i atencion.” (1 Pedro 2:21) Dor di someté n’e formacion ei, Jesus a triunfá riba mundu. Tambe el a hinca curashi den su apostelnan pa nan bira vencedó. (Echonan 4:13, 31; 9:27, 28; 14:3; 19:8) I esta un bunita animacion el a duna na conclusion di su discurso final na nan! El a declará: “Mi a bisa boso e cosnan aki cu pa medio di mi boso por tin pas. Den mundu boso tin tribulacion, pero tuma curashi! Ami a vence mundu.”—Juan 16:33.
2. Na contraste cu e cieguedad di mundu, ki iluminacion nos tin?
2 Di igual manera, despues di a mustra e contraste entre e cieguedad causá p’e “dios dje sistema di cosnan aki,” cu “e iluminacion dje glorioso bon nobo,” apostel Pablo a bisa di nos ministerio precioso: “Nos tin e tesoro aki den weanan di klei, p’e poder mas ayá di loke ta normal sea di Dios i no loke ta bini di nos mes. Nos ta ser oprimí den tur manera, pero no pertá di tal manera cu nos no por move; nos ta confundí, pero no absolutamente sin salida; nos ta ser persiguí, pero no lagá sin yudansa; nos ta ser tumbá, pero no destruí.” (2 Corintionan 4:4, 7-9) Aunke nos ta “weanan di klei” frágil, Dios a moldea nos di tal manera mediante su spiritu cu nos por ta completamente victorioso riba e mundu di Satanas.—Romanonan 8:35-39; 1 Corintionan 15:57.
Moldeando Israel di Antigwedad
3. Con Isaías a describí e manera cu e nacion hudiu a ser moldeá?
3 Jehova no ta moldea hende individual so, sino tambe nacionnan completo. Por ehempel, ora Israel di antigwedad a laga Jehova molde’é, el a prosperá. Pero finalmente el a haci su mes duru i a sigui un curso di desobedencia. Como resultado, e Formador di Israel a trece “ai” riba dje. (Isaías 45:9) Den siglo 8 P.E.C., Isaías a papia cu Jehova dje maldad flagrante di Israel, bisando: “O Jehova, abo ta nos Tata. Nos ta e klei, i abo ta nos Trahador di Klei; i nos tur ta obra di bo man. . . . Cada un di nos cosnan deseabel a bira un devastacion.” (Isaías 64:8-11) Israel a ser moldeá den un wea cu tabata sirbi solamente pa destruccion.
4. Kico Jeremías su accion a ilustrá?
4 Un siglo despues, segun cu e dia di duna cuenta tabata acercá, Jehova a bisa Jeremías pa coge un botter di klei i compañá algun dje ancianonan di Jerusalem bai n’e Vaye di Hínom, i el a instruyé: “Bo tin cu kibra e botter dilanti wowo dje hombernan cu ta bai cu bo. I bo tin cu bisa nan: ‘Esaki ta loke Jehova di ehércitonan a bisa: “Den e mésun manera lo mi kibra e pueblo aki i e stad aki, manera un hende ta kibra e wea dje trahadó di klei di un manera cu no por drech’é mas.”’”—Jeremías 19:10, 11.
5. Con extenso e huicio di Jehova riba Israel tabata?
5 Na aña 607 P.E.C., Nabucodonosor a destruí Jerusalem cu su tempel i a hiba e hudiunan cu a sobrebibí prezu na Babilonia. Pero despues di 70 aña den exilio, hudiunan repentí por a regresá pa reconstruí Jerusalem i su tempel. (Jeremías 25:11) Sin embargo, yegando promé siglo E.C., atrobe e nacion a bandoná e Gran Trahador di Klei, i finalmente a cometé e crímen di mas baho, esta, mata e propio Yu di Dios. Na 70 E.C., Dios a usa e Potencia Mundial Romano como su ehecutor pa bari e sistema di cosnan hudiu, haciendo Jerusalem cu su tempel pareu cu suela. Nunca mas e man di Jehova lo moldea e nacion di Israel como algu cu tin “santidad i bunitesa.”a
Moldeando un Nacion Spiritual
6, 7. (a) Con Pablo ta describí e manera cu a moldea Israel spiritual? (b) Cuantu ta e cantidad completo dje “weanan di misericordia,” i di ken el a consistí?
6 E hudiunan cu a aceptá Jesus a ser moldeá como fundeshi pa un nacion nobo, e ‘Israel spiritual di Dios.’ (Galationan 6:16) P’esei e palabranan di Pablo ta apropiado: “Kico? E trahadó di klei no tin autoridad riba e klei pa traha for dje mésun klompi un wea pa un uso onorabel, i e otro pa un uso desonrabel? . . . Dios, aunke e tin e boluntad pa demostrá su rabia i pa duna di conocé su poder, a tolerá cu masha gran pacenshi weanan di rabia trahá p’e propósito di destruccion, p’e por a duna di conocé e rikesanan di su gloria riba weanan di misericordia, cu el a prepará di antemano pa gloria.”—Romanonan 9:21-23.
7 Mas despues, Jesus resucitá a duna di conocé cu e “weanan di misericordia” aki lo a totalisá 144.000. (Revelacion 7:4; 14:1) Siendo cu Israel natural no a suministrá e cantidad ei, Jehova a extendé su misericordia na hende dje nacionnan. (Romanonan 11:25, 26) E congregacion cristian nobo a expandé rápidamente. Den 30 aña nan tabata predicá e bon nobo “den tur creacion cu ta bou di shelu.” (Colosensenan 1:23) Debí na esaki mester a trece un gran cantidad di congregacion local plamá, bou di supervision apropiado.
8. Di ken e promé cuerpo gobernante a consistí, i con e cuerpo aki a desaroyá?
8 Jesus a prepará 12 apostel pa bira e promé cuerpo gobernante, i a entrená nan i tambe otro hende p’e ministerio. (Lucas 8:1; 9:1, 2; 10:1, 2) Na Pentecoste 33 E.C., e congregacion cristian a ser establecí, i den transcurso di tempu a expandé su cuerpo gobernante pa incluí “e apostel i ancianonan den Jerusalem.” Ta parce cu pa un periodo largu, Santiago, mitar ruman di Jesus, a sirbi como presidente aunke e no tabata un apostel. (Echonan 12:17; 15:2, 6, 13; 21:18) Segun historiadó Eusebio, e apostelnan a bira e blanco special di persecucion i a plama nan pa otro teritorionan. Consecuentemente, a ahustá e composicion dje cuerpo gobernante.
9. Ki desaroyo lamentabel Jesus a predicí cu lo a tuma lugá?
9 Yegando na fin dje promé siglo, ‘Diabel, e enemigu,’ a cuminsá “sembra mal yerba” entre e herederonan semehante na trigu di “e reino di shelu.” Jesus a profetisá cu lo a permití e desaroyo lamentabel aki te n’e tempu di cosecha na “conclusion dje sistema di cosnan.” E ora ei, atrobe ‘e hustunan lo a briya mes briyante cu solo den e reino di nan Tata.’ (Mateo 13:24, 25, 37-43) Na ki tempu esei lo a sosodé?
Moldeando e Israel di Dios Awe
10, 11. (a) Con a cuminsá moldea e Israel di Dios dje tempu actual? (b) Ki contraste tabatin entre e siñansanan di cristiandad i esnan dje Studiantenan sincero di Bijbel?
10 Na 1870, Charles Taze Russell a forma un grupo di studiante di Bijbel na Pittsburgh, Pennsylvania, Merca. Na 1879 el a cuminsá publicá tur luna e revista conocí awe como E Toren di Vigilancia. No a tarda mashá cu e Studiantenan di Bijbel, manera nan tabata yama e tempu ei, a percibí cu cristiandad a adoptá siñansanan no-bíblico pagano, manera inmortalidad di alma, fiernu di candela, purgatorio, un dios trinitario i bautismo di baby.
11 Pero, mas importante, e stimadónan aki di berdad bíblico a restorá siñansanan fundamental di Bijbel, manera liberacion di picá mediante Jesus su sacrificio di rescate i resureccion pa bida eterno riba un tera paradísico di pas bou dje Reino di Dios. Riba tur cos, nan a pone énfasis riba e binidero vindicacion di Jehova Dios como Señor Soberano di universo. E Studiantenan di Bijbel a comprendé cu e Oracion di Nos Tata tabata cerca di haña contesta: “Nos Tata cu ta den shelu, laga bo nomber sea santificá. Laga bo reino bini. Laga bo boluntad sosodé, mescos cu den shelu, tambe riba tera.” (Mateo 6:9, 10) E spiritu santu di Dios tabata moldeando nan pa bira un sociedad mundial di cristiannan amante di pas.
12. Di ki manera e Studiantenan di Bijbel a bin cai riba un fecha importante?
12 Un estudio profundo di Daniel capítulo 4 i otro profecianan a convencé e Studiantenan di Bijbel cu Jesus su presencia como Rey Mesiánico mester tabata cerca. Nan a percibí cu 1914 lo tabata e fecha pa “e tempu señalá dje nacionnan” terminá. (Lucas 21:24; Ezekiel 21:26, 27) E Studiantenan di Bijbel a extendé nan actividad rápidamente i a forma klasnan di Bijbel (cu despues nan a yama congregacion) rond Merca. Pa cambio di siglo, nan trabou di educacion bíblico a expandé drenta Europa, Australia i Asia. Bon organisacion a bira necesario.
13. Ki státus legal e Studiantenan di Bijbel a obtené, i ki sirbishi sobresaliente e promé presidente di Sociedad a rindi?
13 Pa duna e Studiantenan di Bijbel un státus legal, na 1884 a registrá Zion’s Watch Tower Tract Society na Merca, cu sede na Pittsburgh, Pennsylvania. Su directornan a sirbi como un Cuerpo Gobernante central cu a supervisá e predicacion mundial dje Reino di Dios. E promé presidente di Sociedad, Charles T. Russell, a skirbi seis volúmen di Studies in the Scriptures i a haci giranan extenso di predicacion. Tambe el a duna henter su fortuna cu el a acumulá promé cu el a cuminsá su studio di Bijbel, n’e trabou mundial di Reino. Na 1916, segun cu e Guera Grandi tabata den su furia na Europa, un Ruman Russell tur agotá, a muri durante un biahe di predicacion. El a duna tur loke e tabatin pa yuda expandé e trabou di duna testimonio tocante e Reino di Dios.
14. Con J. F. Rutherford “a lucha e lucha excelente”? (2 Timoteo 4:7)
14 Joseph F. Rutherford, kende un tempu a traha como hues na Missouri, a bira e siguiente presidente. Como resultado di su defensa intrépido dje berdad di Bijbel, clero di cristiandad a uni forsa cu políticonan pa “forma problema mediante decreto.” Dia 21 di juni 1918, autoridadnan a encarcelá Ruman Rutherford huntu cu shete otro Studiante di Bijbel prominente, cu vários sentencia simultáneo di 10 of 20 aña. E Studiantenan di Bijbel a bringa bek. (Salmo 94:20; Filipensenan 1:7) Ora nan a apelá e sentencia, a laga nan liber dia 26 di mart 1919, i despues a exonerá nan completamente dje acusacion falsu di actonan subversivo.b E experencia aki a sirbi pa moldea nan pa bira defensornan fiel dje berdad. Cu yudansa di Jehova, nan a purba di tur manera posibel pa sali victorioso den e lucha spiritual pa proclamá e bon nobo apesar di oposicion di Babilonia e Grandi. E lucha ei ta sigui te cu awe na aña 1999.—Compará cu Mateo, capítulo 23; Juan 8:38-47.
15. Pakico aña 1931 tabata históricamente importante?
15 Durante añanan ’20 i ’30, e Gran Trahador di Klei a sigui moldea e Israel ungí di Dios. Lus profético for dje Scritura a manda su rayonan, dunando onor na Jehova i enfocando riba Jesus su Reino Mesiánico. Na 1931, cu alegria e Studiantenan di Bijbel a aceptá e nomber nobo: Testigo di Jehova.—Isaías 43:10-12; Mateo 6:9, 10; Mateo 24:14.
16 i cuadro na página 19. Na ki tempu e cantidad di 144.000 a ser completá, i ki evidencia tin di esaki?
16 Aparentemente, den añanan ’30, e cantidad di “esnan yamá i scogí i fiel,” e 144.000, a keda completá. (Revelacion 17:14; mira cuadro na página 19.) Nos no sa cuantu dje ungínan a ser recogé den e promé siglo ni for di entre e “mal yerba” durante e siglonan scur di cristiandad su gran apostasia. Pero na 1935 tabatin un total di 52.465 publicadó rond mundu, for di un máximo di 56.153, cu a indicá cu nan tin e speransa celestial dor di participá dje emblemanan di Memorial. Kico lo ta destino dje hopi hendenan cu mester a recogé ainda?
“Mira! un Multitud Grandi”
17. Ki desaroyo histórico a tuma lugá na 1935?
17 Na un congreso tené for di 30 di mei pa 3 di juni 1935, na Washington, D.C., Merca, Ruman Rutherford a duna un discurso memorabel titulá “E Multitud Grandi.” E grupo aki, “cu ningun hende no por a conta,” lo a presentá segun cu a completá e seyamentu final dje 144.000 israelitanan spiritual. Nan tambe lo a ehercé fe den e poder rescatador di “e sanger dje Lamchi,” Jesus, i rindi sirbishi sagrado den e areglo di Jehova su tempel pa adoracion. Como grupo, nan lo “sali for dje tribulacion grandi” na bida, pa heredá e Paradijs terenal caminda “lo no tin morto mas.” Pa vários aña promé cu e congreso ei, e rumannan a papia dje grupo aki como e jonadabnan.—Revelacion 7:9-17; 21:4; Jeremías 35:10.
18. Den ki maneranan e aña 1938 tabata crucial?
18 Aña 1938 tabata crucial den identificá e dos clasenan claramente. E edicionnan di E Toren di Vigilancia [na ingles] di 15 di mart i 1 di april 1938, a presentá e studio “Su Tou” den dos parti, i a clarificá e lugánan relativo dje resto ungí i nan compañeronan, e multitud grandi. Despues, e edicionnan di 1 i 15 di juni tabatin artículonan di studio tocante “Organisacion,” basá riba Isaías 60:17. A pidi tur congregacion pa haci un peticion n’e Cuerpo Gobernante pa nombra sirbidónan local, introduciendo asina un mihó areglo teocrático ordená pa Dios. E congregacionnan a haci precis asina.
19 i nota na pia di página. Ki echonan ta confirmá cu e yamada general p’e “otro carnénan” ta na vigor awor pa mas cu 60 aña?
19 E raport den e Anuario de los testigos de Jehová di 1939 a declará: “E siguidónan ungí di Cristo Jesus awor riba tera ta poco na cantidad, i nan cantidad lo no aumentá nunca mas. Esakinan ta designá den e Scritura como ‘e resto’ dje desendencia di Síon, e organisacion di Dios. (Rev. 12:17) Awor e Señor ta recogiendo su ‘otro carnénan,’ cu lo forma e ‘multitud grandi.’ (Juan 10:16) Esnan cu ta ser recogé awor ta compañeronan dje resto, cu ta traha huntu cu e resto. For di awor aki padilanti esnan cu ta forma e ‘otro carnénan’ lo aumentá na cantidad te ora e ‘multitud grandi’ ser recogé.” A moldea e resto ungí pa recogé e multitud grandi. Esakinan tambe tin cu ser moldeá awor.c
20. Ki cambionan organisacional a desaroyá desde 1942?
20 Na januari 1942, ora Guera Mundial II tabata den tur su furia, Joseph Rutherford a muri i Nathan Knorr a siguié como presidente. E rumannan tin grato recuerdo dje di tres presidente di Sociedad, pasobra ta e a establecé scol teocrático den e congregacionnan i e Scol di Galad pa entrená misionero. N’e reunion anual di Sociedad na 1944, el a anunciá cu a revisá e statutonan di Sociedad di manera cu lo a basa membresia, no riba contribucion material, sino riba spiritualidad. Durante e siguiente 30 añanan, e cantidad di trahadó den campo a aumentá for di 156.299 pa 2.179.256 rond mundu. Durante 1971-75 mas cambio organisacional tabata necesario. Un solo homber cu a sirbi como presidente no por a supervisá e trabou mundial di Reino cabalmente mas. A extendé e Cuerpo Gobernante, cu un presidente rotativo, na 18 miembro ungí, di cua awor casi mitar a terminá nan curso riba tera.
21. Kico a cualificá miembronan dje trupa chikitu p’e Reino?
21 Atrabes di hopi década di prueba a moldea e resto di miembro dje trupa chikitu. Nan tin bon ánimo despues di a ricibí inekibocablemente ‘e testimonio dje spiritu.’ Jesus a bisa nan: “Boso ta esnan cu a permanecé cu mi henter ora durante mi pruebanan; i mi ta cera un pacto cu boso, mescos cu mi Tata a cera un pacto cu mi, pa un reino, pa boso por come i bebe na mi mesa den mi reino, i sinta riba trono pa husga e diesdos tribunan di Israel.”—Romanonan 8:16, 17; Lucas 12:32; 22:28-30.
22, 23. Con e trupa chikitu i e otro carnénan ta ser moldeá?
22 Segun cu e cantidad dje resto ungí pa spiritu riba tera a mengua, a duna rumannan maduro dje multitud grandi supervision spiritual den casi tur congregacion rond mundu. I pa ora e último testigonan ungí di edad finalisá nan curso terenal, e sa·rím, of prinsnan, dje otro carnénan lo ta bon entrená pa cumpli cu e tareanan administrativo como e clase di cabesante riba tera.—Ezekiel 44:3; Isaías 32:1.
23 Tantu e trupa chikitu como e otro carnénan ta sigui ser moldeá den weanan pa uso onorabel. (Juan 10:14-16) Sea nos speransa ta den e “shelu nobo” of riba “un tera nobo,” laga nos respondé di henter curason n’e invitacion di Jehova: “Boso hubilá i sea gososo pa semper den loke mi ta creando. Pasobra ata mi ta creando Jerusalem [celestial] un causa pa goso i su pueblo un causa pa alegria.” (Isaías 65:17, 18) Laga nos como ser humano frágil semper sirbi humildemente, siendo moldeá pa “e poder mas ayá di loke ta normal,” esta, Dios su poder di spiritu santu!—2 Corintionan 4:7; Juan 16:13.
[Nota]
a Laga esaki ta un spiertamentu di un huicio similar di parti di Jehova pa cristiandad apóstata, prefigurá dor di Israel di antigwedad.—1 Pedro 4:17, 18.
b Hues Manton mes, un católico romano cu a nenga di laga e Studiantenan di Bijbel liber riba fiansa, a bai cerá despues debí cu el a ser condená pa a aceptá soborno.
c Na 1938, e asistencia mundial na Memorial tabata 73.420 persona, di cua 39.225—53 porciento di esnan presente—a participá dje emblemanan. Pa 1998, e asistencia a crece bira 13.896.312 persona, di cua solamente 8.756 a participá, un promedio di ménos cu 1 participante pa cada 10 congregacion.
Bo Ta Corda?
◻ P’e echo cu Jesus a laga su Tata molde’é, den ki manera e tabata un ehempel pa nos?
◻ Con Israel di antigwedad a ser moldeá?
◻ Con “e Israel di Dios” a ser moldeá te awor?
◻ Pa ki propósito e “otro carnénan” a ser moldeá?
[Kuadro na página 18]
Cristiandad Ta Sigui Ser Moldeá
Un comunicado di Associated Press di Aténas, Grecia, a informá lo siguiente riba e hefe recien nombrá di Iglesia Griego Ortodox: “Supuestamente e mester ta un mensahero di pas. Pero e lider di Iglesia Griego Ortodox ta zona mas manera un general cu ta preparando pa bataya.
‘Si mester, nos ta cla pa drama sanger i haci sacrificio. Como iglesia, nos ta resa pa pas . . . Pero nos ta bendicioná e armanan sagrado ora e momento exigí esei,’ arsobispu Christodoulos a bisa recientemente riba dia di Asuncion di La Bírgen, cu ta ser celebrá tambe como Grecia su dia di forsanan armá.”
[Kuadro na página 19]
“No Tin Mas pa Bini Acerca!”
Na un graduacion di Galad na 1970, Frederick Franz, e tempu ei vicepresidente di Sociedad Watch Tower, a bisa e studiantenan dje posibilidad cu nan, kende tur tabata dje otro carnénan cu speransa terenal, lo por haña nan ta bautisá un persona cu por profesá di ta dje resto ungí. Esei por a sosodé? Wel, el a splica cu Juan Bautista tabata dje otro carnénan, i el a bautisá Jesus i algun dje apostelnan. Despues el a puntra si ainda tabatin un yamada pa recogé mas persona dje resto. “No, no tin mas pa bini acerca!” el a bisa. “E yamada ei a terminá leu ayá entre 1931 pa 1935! No tin mas pa bini acerca. Ken anto, ta e poconan recien asociá cu ta participando dje emblemanan di Memorial? Si nan ta dje resto, nan ta reemplasá otronan! Nan no ta personanan cu ta bini acerca n’e fila dje ungínan, sino ta reemplasá esnan cu lo por a cai for dje berdad.”
[Plachi na página 15]
Cuantu nos ta balorá nos tesoro di sirbishi!
[Plachi na página 16]
Israel di antigwedad a bira un wea cu a sirbi solamente pa destruccion