Famianan Grandi Uní den Sirbishi di Dios

“Yunan ta un herencia for di Jehova,” e salmista a skirbi. “E fruta di barica ta un recompensa. Manera flechanan den man di un homber poderoso, asina e yunan di hubentud ta. Felis ta e homber fisicamente capacita cu a yena su baliña di flecha cu nan.”—Salmo 127:3-5.

SÍ, yu por ta un bendicion di Jehova. I mescos cu un tiradó di flecha ta haña satisfaccion di sa con pa dirigí e flechanan den su baliña, asina mayornan ta haña felicidad ora nan dirigí nan yunan riba e caminda cu ta hiba na bida eterno.—Mateo 7:14.

Hopi tempu pasá, tabata comun den e pueblo di Dios pa famianan tin baliña yen di yu. Pensa, por ehempel, riba nan añanan den cautiverio na Egipto: “E yunan di Israel a bira fructífero i a cuminsá plama bira hopi; i nan a sigui multiplicá i bira mas poderoso na un proporcion extraordinario, di manera cu e pais a yena cu nan.” (Exodo 1:7) Un comparacion dje cantidad di israelita cu a drenta Egipto, cu e cantidad cu a bandoná Egipto, ta indicá cu famianan cu dies yu tabata e tamaño promedio!

Mas despues, Jesus a lanta den un famia cu lo por parce grandi pa hopi hende awe. Jesus tabata e primogénito, pero José cu Maria a haña cuater otro yu homber i algun yu muher. (Mateo 13:54-56) E echo cu nan tabatin asina tantu yu probablemente ta splica con Maria cu José por a cuminsá un biahe di regreso for di Jerusalem sin realisá cu Jesus no tabata den nan grupo.—Lucas 2:42-46.

Famianan Grandi Awe

Awe, hopi cristian ta dicidí na limitá e tamaño di nan famia pa motibunan spiritual, económico, social i otro rasonnan. No obstante, famianan grandi ta sigui ta e norma den hopi sociedad. Segun The State of the World’s Children 1997, e region cu e proporcion mas haltu di fertilidad ta e paisnan africano cu ta keda sur di Sahara. Ei, e muher promedio ta duna lus na seis yu.

Pa mayornan cristian di famia grandi, no ta fácil pa lanta yu di manera cu nan ta stima Jehova, pero hopi ta haciendo esei cu éxito. Exito ta dependé di si e famia ta uní den adoracion puru. E palabranan di apostel Pablo n’e congregacion na Corinto ta aplicá mes fuerte na famianan cristian djawe. El a skirbi: “Awor mi ta exhortá boso, rumannan, . . . pa boso tur papia di acuerdo, i pa no tin division entre boso, sino pa boso ta aptamente uní den e mésun mente i den e mésun forma di pensa.” (1 Corintionan 1:10) Con nos lo por logra un unidad asina?

Mayornan Mester Ta Personanan Spiritual

Un factor clave ta cu mayornan mester ta henteramente dedicá na Dios. Considerá loke Moises a bisa e israelitanan: “Scucha, o Israel: Jehova nos Dios ta un solo Jehova. I bo tin cu stima Jehova bo Dios cu tur bo curason i cu tur bo alma i cu tur bo forsa vital. I e palabranan aki cu mi ta mandando bo awe mester resultá di ta riba bo curason; i bo tin cu inculcá nan den bo yu homber i papia di nan ora bo ta sinta den bo cas i ora bo ta cana riba caminda i ora bo ta bai drumi i ora bo ta lanta.”—Deuteronomio 6:4-7.

Ripará cu Moises a mustra cu e mandamentunan di Dios mester tabata ‘riba curason’ dje mayornan. Ta asina so e mayornan lo ta incliná pa impartí instruccion spiritual regular na nan yunan. Realmente, ora mayornan ta spiritualmente fuerte, nan ta ansioso pa instruí nan yunan den asuntunan spiritual.

Pa bira un persona spiritual i pa stima Jehova cu henter bo curason, ta vital pa lesa e Palabra di Dios, meditá riba dje i aplik’é regularmente. E salmista a skirbi cu esun cu tin deleite den e ley di Jehova i cu ta lesa den dje “dia i anochi” lo “yega di ta manera un palu plantá cantu di coriente di awa, cu ta duna su propio fruta den su temporada i di cua su blachinan no ta marchitá, i tur loke e haci lo tin éxito.”—Salmo 1:2, 3.

Mescos cu un palu ta duna bon fruta si bo muh’é consistentemente, asina tambe, famianan cu ta ser alimentá spiritualmente ta duna fruta di debocion na Dios, loke ta hiba na alabansa pa Jehova. Un famia típico ta esun di Uwadiegwu, cu ta biba na West Africa. Aunke Uwadiegwu i su esposa tin ocho yu, tur dos ta sirbi como pionero regular, of ministernan di tempu completo di Testigonan di Jehova. E ta bisa: “Nos famia a mantené un studio regular di Bijbel di famia pa mas cu 20 aña. Nos a siña e yunan e Palabra di Dios for di tempu nan tabata chikitu, no solamente durante nos studio di famia sino tambe den e ministerio i na otro ora. Tur nos yunan ta proclamadó dje bon nobo di Reino, i ta esun mas yong so, cu tin seis aña di edad, no ta bautisá ainda.”

Traha Como Tim

Bijbel ta bisa: “Cu sabiduria un famia di cas lo ser edificá.” (Proverbionan 24:3) Den e famia, un sabiduria asina ta pone cu nan ta bai traha como tim. E “capitan” dje tim di famia ta e tata; e ta e cabes dje famia, nombrá pa Dios. (1 Corintionan 11:3) Bou di inspiracion apostel Pablo a enfatisá e seriedad dje responsabilidad di hefatura ora el a skirbi: “Si un hende no ta percurá [den sentido material i spiritual] pa esnan cu ta di dje mes, i specialmente pa esnan cu ta miembro di su famia di cas, el a nenga e fe i ta pió cu un persona sin fe.”—1 Timoteo 5:8.

Na armonia cu e conseho aki for dje Palabra di Dios, esposo cristian tin cu percurá pa nan esposa ta spiritualmente bon. Si esposa tin demasiado trabou di cas, esei lo bai a costo di nan spiritualidad. Den un pais africano, un cristian recien bautisá a keha n’e ancianonan den su congregacion cu su esposa a parce di ta desinteresá den cosnan spiritual. E ancianonan a mustr’é cu su esposa tabatin mester di yudansa práctico. Di manera cu e esposo a cuminsá yud’é cu trabou di cas. Tambe el a dedicá tempu pa yud’é mehorá su lesamentu i su conocimentu di Bijbel. El a respondé bon, i awor henter e famia ta uní den sirbishi di Dios.

Tambe tatanan mester ocupá nan mes cu e spiritualidad di nan yunan. Pablo a skirbi: “Boso, tatanan, no iritá boso yunan, sino sigui cria nan den e disiplina i reglamentu mental di Jehova.” (Efesionan 6:4) Ora mayornan haci caso dje spiertamentu pa no iritá nan yunan, i tambe dje instruccion pa entrená nan, e yunan ta sinti cu nan ta parti di un tim di famia. Como resultado, probablemente yunan lo yuda otro i animá otro pa alcansá metanan spiritual.

Trabou den tim ta encerá duna yunan responsabilidadnan spiritual ora nan ta cla pa esei. Un tata, un anciano cristian cu 11 yu, ta lanta mainta trempan i ta conducí studio cu vários di nan promé cu e bai trabou. Despues di nan bautismo, esnan mas grandi ta yuda nan rumannan mas yong beurt pa beurt. Esei ta incluí yuda conducí studio di Bijbel cu nan. E tata ta supervisá nan i ta encomendá nan pa nan esfuersonan. Seis dje yunan ta bautisá, i e otronan ta sigui traha pa logra e meta ei.

Bon Comunicacion, Metanan Comun

Comunicacion amoroso i metanan spiritual comun ta vital pa famianan uní. Gordon, un anciano cristian cu ta biba na Nigeria, ta tata di shete yu cu edadnan cu ta varia di 11 pa 27 aña. Seis di nan ta pionero, mescos cu e mayornan. Esun di mas yong, recien bautisá, ta participá regularmente den e trabou di haci disipel cu e resto dje famia. E dos yu hombernan adulto ta sirbidó ministerial den e congregacion.

Gordon a conducí studio di Bijbel personalmente cu cada un di su yunan. Ademas di esei, e famia tin un programa extenso di educacion bíblico. Tur mainta nan ta bini huntu pa considerá un texto di Bijbel i despues ta prepará p’e reunionnan di congregacion.

Un dje metanan cu cada miembro di famia tin cu cumpli cuné ta lesa tur artículo den e revistanan Toren di Vigilancia i Spierta! Recientemente, nan a agregá lesamentu diario di Bijbel na nan rutina. Dor di papia tocante loke nan ta lesa, miembronan di famia ta animá otro pa sigui cu e custumber.

E studio semanal di famia ta asina consistente cu ningun miembro tin mester di un recordatorio; tur ta anhelá p’e. Den transcurso di aña, e contenido, structura i duracion dje studio di famia a cambia segun e edad i necesidadnan dje yunan. E famia su relacion cu otro fiel sirbidó di Dios a bira mas estrecho, i esaki tabatin un efecto beneficioso riba e yunan.

Como famia, nan ta haci cos huntu i ta apartá tempu pa recreo. Un biaha pa siman nan ta disfrutá di un “anochi di famia,” riba cua nan ta haci kwes, conta cuenta i chiste di bon gustu, toca piano, i ta haci otro cos pa relahá. De bes en cuando nan ta bai laman i otro lugánan di interes.

Dependé Riba Jehova

No ta e intencion dje experencianan mencioná ariba pa haci parce manera ta fácil pa lanta un famia grandi. Un cristian a bisa: “Ta un gran desafio pa ta un bon tata di ocho yu. Tin mester di hopi alimento material i spiritual pa sostené nan; mi tin cu traha duru pa gana suficiente placa pa percurá pa nan. E yunan mas grandi ta tiener caba, i tur ocho ta bai scol. Mi sa cu entrenamentu spiritual ta vital, pero tog algun di mi yunan ta terco i desobediente. Nan ta haci mi tristu, pero mi sa cu tin biaha mi tambe ta haci cosnan cu ta haci Jehova su curason tristu, i e ta pordoná mi. P’esei, mi tin cu sigui corigí mi yunan cu pacenshi te ora nan realisá cu nan ta robes.

Mi ta purba sigui Jehova su ehempel den e echo cu e tin pacenshi cu nos pasobra e ta deseá pa tur hende alcansá repentimentu. Mi ta studia cu mi famia, i algun di mi yunan ta traha pa alcansá e meta di bautismo. Mi no ta dependé riba mi mes forsa pa logra resultado; di mi mes mi no por logra mashá. Mi ta purba hala cada bes mas cerca Jehova den oracion i ta aplicá e proverbio cu ta bisa: ‘Confia den Jehova cu tur bo curason i no lèn riba bo mes comprendimentu. Den tur bo camindanan tuma nota di dje, i e mes lo haci bo camindanan stret.’ Jehova lo yuda mi cumpli cu e entrenamentu di mi yunan.”—Proverbionan 3:5, 6.

No Entregá Nunca!

Tin biaha entrenamentu di yu por parce di ta un tarea malagradecidu, pero hamas entregá! Perseverá! Si bo yunan no ta respondé positivamente ni apreciá bo esfuersonan awor, kisas nan ta haci esei despues. Tempu ta necesario pa un yu crece bira un cristian cu ta producí fruta di spiritu.—Galationan 5:22, 23.

Monica, cu ta biba na Kenya, ta bini di un famia di dies yu. E ta bisa: “Mi mayornan a siña nos e berdad di Bijbel for di nos infancia. Tata tabata studia e publicacionnan cristian cu nos tur siman. Debí na su trabou, e studio no tabata semper riba e mésun dia. Tin biaha, ora e tabata yegando cas for di trabou, e tabata mira nos hunga pafó i tabata bisa nos cu den cincu minuut nos tur mester ta paden pa nos studio di Bijbel. Despues di nos studio di Bijbel, e tabata animá nos pa haci pregunta of trata cualkier problema.

El a haci sigur cu nos a asociá cu mucha cu ta adorá Dios. Tata tabata bishitá scol regularmente pa puntra e maestronan tocante nos conducta. Na un bishita el a tende cu mi tres ruman hombernan mas grandi a bringa cu otro mucha i cu tin biaha nan tabata brutu. Tata a castigá nan pa mal comportacion, pero tambe el a tuma tempu pa splica for dje Scritura pakico nan mester a comportá nan mes manera adoradó di Dios.

Nos mayornan a mustra nos e beneficionan di bai reunion dor di prepará partinan di reunion cu nos. Nan a entrená nos pa bira minister dor di tene sesionnan di práctica na cas. For di infancia nos tabata compañá nos mayornan den sirbishi di veld.

Awe, dos ruman homber mas grandi ta pionero special, un ruman muher mas grandi ta pionero regular, i un otro ruman muher, cu ta casá i cu tin un famia, ta un Testigo celoso. Mi dos ruman muhernan mas yong, di 18 i 16 aña di edad, ta publicadónan bautisá. E dos mucha hombernan mas yong ta entrenando. Ami ta sirbiendo n’e oficina di sucursal di Kenya di Testigonan di Jehova pa tres aña caba. Mi ta stima mi mayornan i mi ta apreciá nan pasobra nan ta personanan spiritual; nan a pone un ehempel excelente pa nos.”

Sin importá cuantu yu bo tin, no entregá nunca den yuda nan riba e caminda cu ta hiba na bida eterno. Segun cu Jehova ta bendicioná bo esfuersonan, lo bo resoná e palabranan di apostel Juan tocante su yunan spiritual: “Mi no tin un motibu mas grandi pa duna gradicimentu cu e cosnan aki, pa mi tende cu mi yunan ta sigui cana den e berdad.”—3 Juan 4.