Un Buki di Sabiduria cu un Mensahe pa Nos Tempu

“UN SACU di sabiduria bal mas cu unu yen di perla.” Asina Job, e patriarca di antigwedad cu tabata indudablemente un dje hombernan mas ricu di su tempu, a remarcá. (Job 1:3; 28:18; 42:12) Berdad, den loke ta toca yuda hende logra éxito den bida, sabiduria bal hopi mas cu posesion material. Salomon, e rey sabí, a bisa: “Sabiduria ta pa un proteccion mescos cu placa ta pa un proteccion; pero e bentaha di conocimentu ta cu sabiduria mes ta conserbá su doñonan bibu.”—Eclesiástes 7:12.

Pero unda hende por haña sabiduria asina awendia? Hende ta acudí na seccion di conseho den revista, na sicólogo, sikiatra i asta na pelukera i taxista, cu nan problemanan personal. I tin un cantidad di experto cla pa ofrecé conseho riba casi cualkier tema—pa un bon prijs. Pero hopi bes tal palabranan di “sabiduria” a hiba na desilusion, i tin biaha asta na desaster. Con nos por haña berdadero sabiduria anto?

Jesucristo, cu tabatin perspicacia amplio den asuntunan humano, a yega di bisa: “Sabiduria ta ser probá hustu dor di su obranan.” (Mateo 11:19) Laga nos examiná algun problema comun den bida di hende pa mira cua conseho sabí a yuda nan di berdad, i a bal mas cu un ‘sacu di perla’ pa nan. Abo tambe lo por haña e “sacu di sabiduria” ei i beneficiá di dje.

Bo Ta Sufri di Depresion?

“Si siglo 20 a introducí e Era di Ansiedad, su fin ta testigo di yegada dje Era di Melancolia,” segun International Herald Tribune di Londen. E ta agregá cu “e promé estudio internacional riba depresion grave ta revelá un aumento constante den casonan dje trastorno aki rond mundu. Den nacionnan asina diferente for di otro manera Taiwan, Líbanon i Nueva Zelandia, cada siguiente generacion ta bira mas vulnerabel pa e malesa aki.” Ta ser bisá cu esnan cu a nace despues di 1955 tin tres bes mas chens di sufri di depresion grave cu nan welonan.

Ta esei a pasa cu Tomoe. E tabata sufri di depresion grave i tabata pasa gran parti di su dia na cama. Dor cu e no por a cuida su yu homber di dos aña, el a muda bek pa cas di su mayornan. Poco despues, un bisiña cu tabatin un yu muher di mes edad cu esun di Tomoe, a cera amistad cuné. Ora Tomoe a conta e bisiña con inútil e tabata sintié, e bisiña a mustr’é un texto for di un buki, cu tabata bisa: “E wowo no por bisa e man: ‘Mi no tin mester di bo’; of, atrobe, e cabes no por bisa e pia: ‘Mi no tin mester di bo.’ Pero, mas bien e caso ta cu e miembronan dje curpa cu ta parce di ta mas débil ta necesario.”a Tomoe su wowonan a yena cu awa ora el a realisá cu tur hende tin un lugá den e mundu aki, i tur ta necesario.

E bisiña a recomend’é examiná e buki cu tabata contené e palabranan ei. Tomoe a bisa sí cu su cabes, apesar cu te na e momentonan ei e no tabata capas di haci nada, ni sikiera comprometé su mes na un simpel promesa. Ademas e bisiña a yud’é haci compra, i el a yuda Tomoe cushiná tur dia. Un luna despues, Tomoe tabata lanta for di cama tur mainta, laba paña, haci cas limpi, haci compra i cushiná mescos cu cualkier ama di cas. E tabatin cu superá hopi dificultad, pero, manera e ta bisa: “Mi tabatin confiansa cu, basta mi actua di acuerdo cu e palabranan sabí cu mi a haña, cos lo bai bon.”

Dor di aplicá e sabiduria cu el a haña, Tomoe a logra laga e dianan scur di su depresion atras. Awor Tomoe ta traha tempu completo den yuda otronan aplicá e mésun consehonan cu a yuda e mes trata cu su problemanan. E palabranan sabí ei ta pará skirbí den un buki antiguo cu tin un mensahe pa tur hende awe.

Bo Ta Enfrentá Problema Doméstico?

Cifranan di divorcio ta escalá rond mundu. Problemanan doméstico ta aumentá asta den paisnan oriental, caminda un tempu e hendenan tabata orguyoso di nan famianan uní. Unda nos por haña guia matrimonial sabí cu ta duna bon resultado?

Considerá e caso di Shugo cu Mihoko, un pareha cu tabatin problema matrimonial sin fin. Nan tabata pleita pa delaster un cos. Shugo tabata rabia lihé, i Mihoko tabata pleita bek ki ora cu Shugo reclam’é algu. Mihoko a asta yega di pensa: ‘Nos no ta capas pa yega na un acuerdo tocante nada.’

Un dia un señora a bishitá Mihoko, anto el a lesa e palabranan aki p’e for di un buki: “P’esei, tur loke boso kier pa hende haci na boso, boso tambe di igual manera tin cu haci na nan.”b Maske e no tabatin interes den religion, Mihoko a bai di acuerdo pa studia e buki cu a contené e palabranan ei. Loke e tabata interesá den dje ta di mehorá su bida di famia. P’esei, ora cu nan a invit’é pa asistí na un reunion caminda nan tabata studia un publicacion titulá Logrando felicidad den bida di famía, Mihoko—i su casá—a aceptá mesora.c

Na e reunion, Shugo a nota cu esnan presente tabata ègt aplicá e cosnan cu nan a siña, i cu nan tabata parce masha felis. El a dicidí di investigá e buki cu su esposa tabata siña fo’i dje. Mesora un declaracion den dje a hala su atencion: “Esun cu ta tarda pa rabia ta abundante den dicernimentu, pero un hende cu ta impaciente ta halsa bobedad.”d Maske a tuma tempu pa el a aplicá e principio aki den su bida, e cambio gradual den dje tabata bisto pa esnan cu a rondon’é, entre otro su casá.

Ora cu el a mira e cambionan den su casá, Mihoko tambe a cuminsá aplicá loke e tabata siña. Un principio cu a yud’é specialmente tabata esaki: “Stop di husga pa boso no ser husgá; pasobra cu e huicio cu cua boso ta husga, boso lo ser husgá.”e Asina, na lugá di criticá otro, Mihoko cu su casá a dicidí di papia riba nan bon cualidadnan, i riba con nan por a mehorá. Kico tabata e resultado? Mihoko ta conta: “Mi a bira berdaderamente felis. Tur anochi ora di come nos ta haci asina. Asta nos yu di tres aña ta djoin e combersacion. Tabata un cambio berdaderamente refrescante!”

Ora e famia aki a pone e consehonan importante cu nan a ricibí na práctica, nan tabata den un mihó posicion pa vence e problemanan cu tabata pone preshon riba nan relacion, casi pa kibr’é. Esei no bal mas cu un sacu di perla?

Bo Kier Tin Exito den Bida?

Pa hopi hende awe, acumulá rikesa ta nan meta den bida. Tog, un comerciante ricu na Merca cu a duna cientos di miyones di dollar na obra di caridad a yega di bisa: “Placa tin un cierto atraccion pa algun hende, pero niun hende no por bisti dos par di sapatu pareu.” Ta masha poco hende ta reconocé e echo aki, i ménos hende ainda ta stop di core tras di rikesa.

Hitoshi a crece pober. Dor di esei e tabatin un deseo fuerte pa bira ricu. Despues di mira con fiadónan ta controlá nan debedónan manera nan haña ta bon, el a concluí: “Esun cu yega na mas placa ta esun cu a gana.” Hitoshi tabata kere asina fuerte den e poder di placa cu el a kere cu por a cumpra asta bida humano mes cuné. P’e acumulá rikesa, el a dedicá su mes na traha como loodgieter. E tabata traha henter aña sin tuma un dia liber. Maske con duru el a traha, Hitoshi a realisá cu como subcontratista, nunca lo e no bira mésun poderoso cu e contratistanan cu tabata dun’é trabou. Frustracion i miedu di bai bankrut tabata su pan di cada dia.

Un dia un homber a yega na Hitoshi su porta anto a puntr’é si e tabata sa cu Jesucristo a muri p’e. Hitoshi a pensa cu ningun hende lo no muri pa un hende manera e. P’esei su curiosidad a lanta i el a aceptá un otro bishita pa nan sigui papia. Su siman siguiente el a asistí na un discurso i el a keda sorprendí di tende nan animá pa ‘tene bo wowo simpel.’ E orador a splica cu un wowo ta “simpel” ora e tin vision di alcanse largu, i ta enfocá riba cos spiritual; di otro banda, un wowo “malbado,” of “envidioso,” ta enfocá riba deseonan carnal inmediato so; e no ta wak bon di leu. E conseho, “Caminda bo tesoro ta, ei bo curason tambe lo ta,” a dal e duru.f Tin algu cu ta mas importante cu yega na rikesa! Nunca el a yega di tende algu asina.

Impresioná, el a cuminsá aplicá loke el a siña. Na lugá di cansa su curpa pa rikesa, el a cuminsá duna balornan spiritual prioridad den su bida. El a dedicá tempu na e bienestar spiritual di su famia tambe. Naturalmente, esei a nificá ménos tempu pa su trabou. Tog su negoshi a tuma un mihó rumbo. Di con?

Su personalidad agresivo a cambia bira suave i amistoso segun cu el a aplicá e consehonan cu e tabata ricibí. Loke a impresion’é mas tantu tabata e conseho aki: “Realmente kita tur esei for di boso, rabia, furia, maldad, abla ofensivo, i papiamentu obseno di boso boca. No papia mentira cu otro. Kita e personalidad bieu cu su prácticanan, i bisti boso cu e personalidad nobo, cu mediante conocimentu exacto ta ser hací nobo segun e imágen di Esun cu a cre’é.”g E no a bira ricu dor di sigui e conseho aki, pero su “personalidad nobo” a causa un bon impresion sí riba su clientenan, i el a gana nan confiansa. Sí, e palabranan sabí cu el a haña a yud’é logra éxito den bida. P’e, nan a bal literalmente mas cu un sacu di perla of placa.

Abo Lo Habri e Sacu?

Bo por identificá e sacu di sabiduria cu a resultá asina balioso p’e hendenan dje ehempelnan anterior? Ta e sabiduria cu tin den Bijbel, e buki mas distribuí i mas fácil pa obtené na mundu. Casi sigur bo tin un copia of bo por haña unu fácil. Sin embargo, mescos cu djis poseé un sacu di perla balioso sin usa nan lo no yuda nan doño mashá, e simpel echo di tin un Bijbel tampoco no ta di mashá balor. Di con no habri e sacu, na moda di papia, i aplicá su consehonan sabí, anto mira con esei por yuda bo enfrentá problemanan di bida cu éxito.

Si un dia nan duna bo un sacu di perla, lo bo no keda gradicidu i purba haña sa ta ken ta bo benefactor pa bo gradicié? Bo sa ta ken ta e Dunadó den caso di Bijbel?

Bijbel ta revelá ken ta e Fuente dje sabiduria den dje dor di bisa: “Tur Scritura ta inspirá di Dios i ta probechoso.” (2 Timoteo 3:16) Ademas e ta bisa nos cu “e palabra di Dios ta bibu i ta ehercé poder.” (Hebreonan 4:12) Ta p’esei e palabranan sabí den Bijbel ta keda oportuno i eficas asta pa nos awe. Testigonan di Jehova lo ta felis pa yuda bo siña tocante e Dunadó generoso aki, Jehova Dios, di manera cu bo por ta den un posicion pa ricibí e “sacu di sabiduria” cu tin den Bijbel, e buki di sabiduria cu tin un mensahe pa hende awe.

[Nota]

[Kuadro/​Plachi na página 4]

Palabranan Sabí pa Mantené Balansa Emocional

“Si ta eror ta loke bo ta vigilá, o Jah, o Jehova, ken lo por keda pará? Pasobra cu bo tin e berdadero pordon, pa asina hende teme bo.”—Salmo 130:3, 4.

“Un curason gososo tin bon efecto riba e semblante, pero dor di dolor di curason tin un spiritu abatí.”—Proverbionan 15:13.

“No bira demasiado hustu, ni mustra bo mes excesivamente sabí. Pakico bo mester causa desolacion pa bo mes?”—Eclesiástes 7:16.

“Tin mas felicidad den duna cu tin den ricibí.”—Echonan 20:35.

“Rabia, i tog no peca; no laga solo baha cu boso den un estado provocá.”—Efesionan 4:26.

[Kuadro/​Plachi na página 5]

Palabranan Sabí pa un Bida di Famia Felis

“Plannan ta frustra ora no tin papiamentu confidencial, pero den e multitud di consehero tin logro.”—Proverbionan 15:22.

“Curason di esun cu comprendimentu ta adkerí conocimentu, i orea di esnan sabí ta busca pa haña conocimentu.”—Proverbionan 18:15.

“Manera apel di oro den obra grabá di plata, ta un palabra papiá n’e tempu apropiado p’e.”—Proverbionan 25:11.

“Sigui soportá otro i pordoná otro libremente si un hende tin un motibu pa keha contra un otro. Mescos cu Jehova a pordoná boso libremente, asina boso tambe haci mescos. Pero, ademas di tur e cosnan aki, bisti boso cu amor, pasobra e ta un laso perfecto di union.”—Colosensenan 3:13, 14.

“Sabi esaki, mi rumannan stimá. Tur hende mester ta lihé pa tende, slow pa papia, slow pa rabia.”—Santiago 1:19.

[Kuadro/​Plachi na página 6]

Palabranan Sabí pa Logra Exito den Bida

“Un balansa fraudulento ta algu detestabel pa Jehova, pero un peso di piedra completo ta un placer p’e.”—Proverbionan 11:1.

“Orguyo ta promé cu caida, i un spiritu halsá promé cu trompecamentu.”—Proverbionan 16:18.

“Manera un stad invadí, cu no tin muraya, asina ta e hende cu no tin freno pa su spiritu.”—Proverbionan 25:28.

“No sea lihé den bo spiritu pa sinti bo ofendí, pasobra tumamentu di ofensa ta loke ta descansá den scochi di esnan estúpido.”—Eclesiástes 7:9.

“Manda bo pan riba superficie di awa, pasobra despues di hopi dia lo bo hañ’é bek.”—Eclesiástes 11:1.

“No laga ningun dicho putrí sali for di boso boca, sino tur dicho cu ta bon pa edificacion segun cu tin necesidad, pa duna loke ta faborabel n’e oyentenan.”—Efesionan 4:29.

[Plachi na página 7]

Studia Bijbel ta e promé paso pa ricibí e “sacu di sabiduria”