Tur Hende Kier Ta Liber

“Hende a nace liber, i tur caminda e ta na cadena,” e filósofo frances Jean-Jacques Rousseau a skirbi na 1762. E idea di nace liber ta algu maraviyoso! Pero manera Rousseau a remarcá, atrabes di historia miyones di hende nunca no a experenciá libertad. En bes di esei, nan a pasa nan bida “na cadena,” encarcelá den un sistema cu a horta nan di cualkier felicidad duradero i satisfaccion den bida.

AWE ainda miyones di hende ta haña cu “hende a dominá hende pa su perhuicio.” (Eclesiástes 8:9) Den nan búskeda pa poder, homber i muher ambicioso no ta ril mes ora nan ta trapa libertad di otro hende. “Escuadron di morto ta mata 21 hende,” segun un informe típico. Un otro ta papia di “carniceria,” caminda forsanan di siguridad ‘ta mata muher, mucha i hende bieu indefenso cu no ta ni resistí, dor di corta nan garganta, tira prezu civil den cabes, i ta sigui un sistema di destruccion total di pueblo i bombardeo pa loco.’

Nada straño cu hende ta deseá libertad for di represion profundamente i, sí, ta lucha p’e! Pero e berdad tristu ta cu e lucha pa bo libertad hopi biaha ta encerá trapa otro hende su derecho i libertad. Den esei homber, muher i mucha inocente ta ser sacrificá casi inevitablemente, i dor di declará e causa como digno i hustu, nan morto ta ser considerá “legítimo.” Aña pasá, na Irlanda por ehempel, “luchadónan pa libertad” a pone bom den un auto den e pueblo chikitu di Omagh i a mata 29 persona inocente cu tabata ei banda i a heridá cientos mas.

“Na Cadena” Ainda

Ora e lucha pasa, kico hende a gana? Ora e “luchadónan pa libertad” gana nan batayanan, kisas nan ta gana un libertad limitá. Pero, nan ta realmente liber e ora ei? No ta berdad cu asta den e sociedadnan mas liberá den e asina yamá mundu liber, ainda hende ta “na cadena” di shonnan brutal manera pobresa, imperfeccion, enfermedad i morto? Con un hende por bisa cu e ta ègt liber tanten cu e cosnan ei ta sigui sclabis’é?

Moises, antiguo escritor di Bijbel, a describí bida exactamente manera e tabata pa masha hopi hende atrabes di historia, i manera e ta ainda. Nos por biba 70 of 80 aña, el a bisa, “sin embargo nan insistencia ta den afan penoso i cosnan perhudicial.” (Salmo 90:10) Esaki lo cambia un dia? Lo ta posibel un dia pa nos tur hiba un bida completamente satisfaciente, liber dje dolor i teror cu asina tantu hende ta sufri di dje awe?

Bijbel ta bisa cu sí! E ta papia di “e glorioso libertad dje yunan di Dios.” (Romanonan 8:21) Laga nos examiná cu atencion e libertad ei cu apostel Pablo a papia di dje den un carta cu el a skirbi e cristiannan na Roma den e promé siglo. Den e carta aki Pablo ta splica claramente con cada un di nos por gana e “glorioso libertad” cu ta berdadero i duradero.

[Rekonosementu pa Potrèt na página 3]

For dje buki Beacon Lights of History, Vol. XIII