E Congregacion Cristian—Un Fuente di Fortalesa

POPI, un mucha muher di poco mas cu 20 aña, tabata frustrá debí n’e situacion desagradabel di falta di comunicacion liber cu su mayornan.a Despues cu el a deshogá su curason cu un anciano cristian i su casá, el a skirbi nan: “Masha danki mes cu boso a tuma tempu pa papia cu mi. Boso no sa cuantu boso interes ta nificá pa mi. Mi ta gradicí Jehova cu el a duna mi hende cu mi por confia i papia cuné.”

Toula, cu a bira biuda poco tempu pasá, i kende tin dos yu tiener, a hañ’é den un situacion ferfelu di dificultadnan emocional i financiero. Regularmente, e cu su yunan tabata haña bishita di un pareha cristian di e congregacion. Despues cu el logra manehá su situacion, el a manda un karchi pa nan bisando: “Semper mi ta corda boso den mi oracion. Mi ta corda e cantidad di biahanan cu boso a yuda mi i apoyá mi.”

Sa sosodé cu bo ta sinti bo “cargá” dor dje preshon aumentante dje mundu aki? (Mateo 11:28) “Tempu i suceso imprevisto” a causa experencianan doloroso den bo bida? (Eclesiástes 9:11) Anto bo no ta bo so. Pero mescos cu miles di persona afligí, bo tambe por haña yudansa práctico den e congregacion cristian di Testigonan di Jehova. Den e promé siglo E.C., apostel Pablo a haña cu cierto compañeronan creyente tabata un fuente di fortalesa special p’e. (Colosensenan 4:10, 11) Abo tambe por experenciá algu similar.

Apoyo i Yudansa

Den e Scritura Griego Cristian, e palabra “congregacion” ta traducí for dje palabra griego ek·kle·sí·a, cu ta nificá un grupo di hende convocá huntu. E esencia dje palabra ei ta duna e idea di solidaridad i apoyo mutuo.

E congregacion cristian ta apoyá e berdad dje Palabra di Dios i ta declará e bon nobo di su Reino. (1 Timoteo 3:15; 1 Pedro 2:9) Sin embargo, e congregacion ta percurá tambe apoyo i yudansa spiritual pa esnan cu ta asociá cuné. Einan, bo por haña un grupo di amigunan amoroso, bondadoso i cu tin interes den otro, cu ta cla i dispuesto pa yuda i consolá otro den tempunan difícil.—2 Corintionan 7:5-7.

Semper adoradónan di Jehova a haña siguridad den su congregacion. E salmista a indicá cu el a experenciá goso i un sintimentu di siguridad entre e pueblo congregá di Dios. (Salmo 27:4, 5; 55:14; 122:1) Mescos awe, e congregacion cristian ta un asociacion di compañeronan creyente cu ta edificá i animá otro.—Proverbionan 13:20; Romanonan 1:11, 12.

Ta siña miembronan dje congregacion pa “obra loke ta bon pa cu tur, pero specialmente pa cu esnan relacioná cu [nan] den e fe.” (Galationan 6:10) E educacion basá riba Bijbel cu nan ta ricibí ta impulsá nan pa manifestá amor fraternal i tierno cariño pa otro. (Romanonan 12:10; 1 Pedro 3:8) Rumannan spiritual den e congregacion ta ser impulsá pa ta amabel, pacífico i tiernamente compasivo. (Efesionan 4:3) En bes di ta simplemente adoradó pa formalidad, nan ta mustra interes amoroso den otro hende.—Santiago 1:27.

P’esei, esnan oprimí ta haña un ambiente caluroso i familiar den e congregacion. (Marco 10:29, 30) E sintimentu di cu nan ta pertenecé na un grupo uní i amoroso ta fortalecé nan. (Salmo 133:1-3) Mediante e congregacion, “e esclabo fiel i discreto” ta percurá alimento spiritual nutritivo “n’e debido tempu.”—Mateo 24:45.

Yudansa di Superintendentenan Amoroso

Miembronan dje congregacion cristian por verwagt cu einan wardadónan amoroso, comprensivo i cualificá, ta percurá apoyo spiritual i animacion. Wardadónan cu e cualidadnan ei ta manera “un lugá di sconde for di bientu i un lugá di sconde for dje tempestad di awaceru.” (Isaías 32:1, 2) Ancianonan nombrá pa spiritu, esta, superintendentenan, ta cuida Dios su pueblo semehante di carné, ta animá esnan enfermo i deprimí, i ta purba restorá esnan cu a faya.—Salmo 100:3; 1 Pedro 5:2, 3.

Naturalmente, e cuerpo di anciano dje congregacion no ta un staf di terapista profesional of dokter, cu por cura problemanan físico i mental cu compañeronan creyente ta haña nan confrontá cuné. Den e sistema di cosnan aki, ainda hende enfermo “tin mester di dokter.” (Lucas 5:31) Sin embargo, e wardadónan ei por yuda esnan cu ta den necesidad spiritual. (Santiago 5:14, 15) Tambe, ki ora cu ta posibel, e ancianonan ta haci areglo pa duna otro tipo di yudansa.—Santiago 2:15, 16.

Ken ta tras di un areglo amoroso asina? Jehova Dios mes! Segun profeta Ezekiel, Jehova ta declará: “Lo mi busca mi carnénan i cuida nan. . . . Lo mi libra nan for di tur e lugánan na unda a plama nan . . . Ami mes lo alimentá mi carnénan, i ami mes lo pone nan drumi.” Dios ta preocupá tambe pa su carnénan débil i swak.—Ezekiel 34:11, 12, 15, 16.

Berdadero Yudansa n’e Debido Tempu

Realmente tin berdadero yudansa disponibel den e congregacion cristian? Sí, i e siguiente ehempelnan ta ilustrá un variedad di circunstancia den cua e congregacion ta resultá di ta un yudansa.

◆ Pérdida di un ser kerí. Despues di a sufri di un malesa crónico, Anna su casá a muri. E ta bisa: “For dje tempu ei padilanti, mi ta ricibí amor caluroso for dje hermandad cristian. I en bes di keda tur deprimí, mi a ser animá mashá dor dje palabranan cariñoso di apoyo i animacion continuo for di mi compañeronan creyente, incluso nan abrasonan sincero. I mi ta gradicí Jehova p’esei. Nan amor a laga mi sinti cu mi tabatin gran apoyo, asta, edificá i cuidá tiernamente.” Kisas bo tambe tabatin e experencia traumático di a perde un ser kerí den morto. N’e momentonan ei, miembronan di congregacion por percurá e consuelo i apoyo emocional cu ta asina necesario.

◆ Malesa. Arthur, un superintendente biahero di Polonia, tabata bishitá e congregacionnan na Asia Central cu regularidad pa fortalecé nan spiritualmente. Durante un dje bishitanan aki, el a bira basta malu i durante su recuperacion el a hañ’é cu complicacionnan serio. “Mi kier conta boso con e rumannan den [un stad na Kazakstan] a cuida mi,” Arthur ta corda cu aprecio profundo. “Rumannan homber i muher, hopi cu mi no conocé mes—asta personanan interesá—a trece cen, cuminda i remedi. . . . I nan a hacié cu hopi goso.

Imaginá bo con mi a sinti ora mi a ricibí un envelop cu algun cen aden i un carta cu ta bisa: ‘Ruman stimá, ricibí mi caluroso saludo. Mami a duna mi cen pa mi cumpra ijscream, pero mi a dicidí di duna ruman e pa remedi. Por fabor, bira bon lihé. Jehova tin mester di nos pa hopi tempu mas. Tur cos bon. I conta nos mas cuenta bon i instructivo. Vova.’” Sí, mescos cu den e caso aki, hóben i bieu den e congregacion por percurá yudansa fortalecedor durante malesa.—Filipensenan 2:25-29.

◆ Depresion. Teri tabatin e deseo sincero pa sirbi como pionero, esta, un proclamadó di Reino di tempu completo. Pero pa motibu di problema e mester a stop di traha pionero. “Mi a sinti mi masha culpabel mes cu mi a purba sirbi den e aspecto di sirbishi aki i mi no a dura ni sikiera un aña completo,” e ta bisa. Teri tabatin e pensamentu robes di cu Jehova su aprobacion a dependé solamente di e cantidad di ora cu bo ta dedicá den sirbishi na dje. (Mira e contraste na Marco 12:41-44.) Bastante deprimí, el a isolá su mes. Pero e ora ei, el a ricibí yudansa refrescante for dje congregacion.

Teri ta corda: “Mesora un ruman muher pionero di mas edad a bin yuda mi i el a scucha miéntras mi a deshogá mi curason. Ora mi a sali di su cas, mi a sinti como si fuera un peso grandi a kita for di riba mi. Dje tempu ei padilanti, e ruman pionero aki cu su esposo, un anciano den e congregacion, a duna mi yudansa balioso. Tur dia nan tabata yama puntra con ta bai cu mi. . . . De bes en cuando, nan a permití mi participá na nan studio di famia, i esaki a imprimí den mi e importancia pa famianan keda huntu.”

No ta straño cu hopi hende, asta cristiannan dedicá, ta bira deprimí, desanimá i ta sinti nan so. Esta gradicidu nos por ta cu den e congregacion di Dios tin yudansa amoroso i inegoista disponibel!—1 Tesalonicensenan 5:14.

◆ Desaster i accidente. Pone bo mes den sapatu di un famia di cuater persona cu a perde tur nan pertenencianan ora nan cas a kima. No a tarda mashá cu nan tabatin loke nan a yama “un experencia animante cu semper lo keda conmové nos i cu a haci un impresion riba nos pa loke ta e amor berdadero cu tin entre e pueblo di Jehova.” Nan ta splica: “Casi mes ora nos a haña boshi yamada di apoyo sincero i di compasion for di nos rumannan spiritual. Telefon tabata ring constantemente. E interes i amor genuino di tur e rumannan tabata asina conmovedor cu lágrimanan di gradicimentu a basha for di nos wowo.”

Djis despues, e ancianonan dje congregacion a organisá un grupo grandi di ruman homber, i den un par di dia nan a construí un cas nobo pa e famia aki. Un bisiña a sclama: “Bo mester wak! Einan tin tur clase di hende ta traha: homber, muher, color scur i latino!” Esaki tabata un evidencia cla di amor fraternal.—Juan 13:35.

Tambe compañeronan cristian a duna e famia paña, cuminda i cen. E tata ta comentá: “Esaki a sosodé den temporada di Pascu ora cu tur hende ta duna regalo, pero nos por bisa onestamente cu ningun otro hende no a ricibí e clase di generosidad genuino i abundante manera nos a ricibí.” I nan ta agregá: “Tiki-tiki, recuerdonan dje candela ta disparcé i na nan lugá ta bini recuerdonan dushi di actonan di bondad i di bon amigunan. Nos ta gradicí nos amoroso Tata celestial, Jehova, p’e echo cu nos tin un famia uní di rumannan asina maraviyoso riba tera, i nos ta masha gradicidu mes cu nos ta forma parti di dje!”

Naturalmente, un intervencion asina no ta semper posibel i nos no ta verwagt e tampoco den tur tragedia manera esei. Pero e ehempel aki sigur ta ilustrá e apoyo cu un congregacion por duna.

Sabiduria di Ariba

Hopi hende a haña un otro fuente di yudansa i fortalesa den e congregacion cristian. Kico esei ta? Publicacionnan cu “e esclabo fiel i discreto” ta prepará. Esnan principal ta e revistanan E Toren di Vigilancia i Spierta! Pa nan por percurá instruccion práctico i conseho cu ta reflehá comprendimentu penetrante, e publicacionnan aki ta dependé principalmente riba e sabiduria divino cu tin den Bijbel. (Salmo 119:105) Nan ta suplementá informacion bíblico cu investigacion responsabel i confiabel riba temanan manera depresion mental, recuperacion for di abusu, vários problema social i económico, desafionan cu hóbennan ta enfrentá i problemanan típico di paisnan den desaroyo. Riba tur cos, e publicacionnan aki ta apoyá Dios su caminda como e mihó manera pa biba.—Isaías 30:20, 21.

Tur aña, Sociedad Watch Tower ta ricibí miles di carta di aprecio. Por ehempel, relacioná cu un artículo tocante suicidio cu a sali den Spierta!, un yoncuman na Rusia a skirbi: “Debí na mi caracter depresivo, . . . mi a pensa hopi bes di cometé suicidio. E artículo aki a fortalecé mi fe cu Dios lo yuda mi trata cu mi problemanan. E kier pa mi biba. Mi ta gradicié p’e apoyo cu el a duna mi mediante e artículo aki.”

Si e olanan brutu dje mundu aki ta parce demasiado violento pa trata cuné, bo por ta sigur cu e congregacion cristian ta un haf ‘safe.’ Realmente, si e desierto secu dje sistema sin amor aki ta cabando cu bo fortalesa, den e organisacion di Jehova bo por haña un oásis cu ta duna bo vigor atrobe. Despues di experenciá e apoyo ei, kisas bo tambe lo tin e mésun sintimentu cu un ruman muher cristian cu a trata exitosamente cu e malesa grave di su esposo, i a skirbi: “E amor i cuido cu nos a haña a pone mi sinti como si fuera Jehova a carga nos durante e crísis aki den su plant’i man. Esta gradicidu mi ta di por forma parti dje organisacion magnífico di Jehova!”

[Nota]

[Plachi na página 26]

Nos por duna yudansa i fortalesa na esnan enfermo, esnan di luto i otronan