Pablo Su Colaboradónan Ken Nan Tabata?

E BUKI bíblico di Echonan i e cartanan di Pablo ta mencioná rond di shen individuo cu tabata miembro dje congregacion cristian di promé siglo i cu tabatin trato personal cu e “apostel dje nacionnan.” (Romanonan 11:13) Tocante vários di nan, tin hopi informacion. Casi sigur bo sa dje actividadnan di Apólos, Barnabas i Sílas. Di otro banda, lo ta mas difícil pa bo bisa masha cos tocante Arkipo, Claudia, Dámaris, Lino, Pérsis, Pudente i Sópater.

Durante diferente periodo i bou di vários circunstancia, hopi individuo a hunga un papel activo den apoyá e ministerio di Pablo. Algun di nan, manera Aristarco, Lucas i Timoteo, a sirbi na lado dje apostel pa hopi aña. Tin di nan tabata huntu cuné tempu cu e tabata den prizon of miéntras e tabata biaha, sea como su compañero di biahe, anfitrion of anfitriona. Lamentablemente, otronan, manera Alehandro, Démas, Hermógenes i Figelo no a perseverá den e fe cristian.

Relacioná cu diferente otro amigu di Pablo, manera Asíncrito, Hermas, Julia of Filólogo, djis pa mencioná un par, nos sa masha poco di nan fuera di nan nomber. Den caso dje ruman muher di Nereo i e mama di Rufo of esnan di cas di Clöe, nos no sa ni sikiera nan nomber. (Romanonan 16:13-15; 1 Corintionan 1:11) Sin embargo, un examinacion dje poco informacion cu nos tin dje rond di shen individuonan aki ta tira lus riba e manera cu apostel Pablo a traha. Tambe e ta siña nos algu tocante e beneficionan di ta rondoná pa un cantidad grandi di compañero creyente i di traha estrechamente cu nan.

Compañero di Biahe, Anfitrion i Anfitriona

Apostel Pablo su ministerio a encerá hopi biahamentu. Un escritor ta calculá cu e distancia cu el a biaha riba tera i laman, segun e buki di Echonan so, a alcansá un 16.000 kilometer. E tempu ei, biahamentu no tabata fatigante so, sino peligroso tambe. Entre e vários peligernan cu el a enfrentá tabatin naufragio, peliger di riu i di salteadó, peliger den mondi i peliger riba laman. (2 Corintionan 11:25, 26) Apropiadamente, masha poco bes Pablo tabata su so durante su biahenan di un lugá pa otro.

Esnan cu a compañá Pablo lo tabata un fuente di compañerismo, animacion i yudansa práctico p’e den e ministerio. Tabatin biaha cu Pablo a laga nan atras pa nan por a percurá p’e necesidadnan spiritual di creyentenan nobo. (Echonan 17:14; Tito 1:5) Pero probablemente e presencia di su compañeronan tabata di importancia pa su siguridad i pa yud’é trata cu e partinan difícil di su biahe. Pues individuonan manera Sópater, Segundo, Gayo i Trófimo, di kendenan nos sa cu nan tabata entre e compañeronan di biahe di Pablo, probablemente a hunga un papel importante den e éxito di su ministerio.—Echonan 20:4.

E yudansa cu anfitrion i anfitrionanan a ofrecé, tambe tabata bon biní. Ora Pablo a yega na un stad unda e tabatin intencion di dirigí un campaña di predicacion of djis pasa anochi, haña un lugá pa keda lo tabata un prioridad. Ken cu a biaha asina tantu manera Pablo, lo mester a hañ’é ta drumi literalmente riba masha hopi cama diferente. Semper tabatin posibilidad p’e keda na un posada. Pero segun historiadónan, eseinan tabata “lugánan peligroso i repugnante,” i p’esei, probablemente, ki ora cu tabatin oportunidad, Pablo a keda cerca compañeronan creyente.

Nomber di algun di su anfitrion i anfitrionanan cu nos sa di dje ta: Akila cu Prisila, Gayo, Jason, Lidia, Mnason, Filemon i Felipe. (Echonan 16:14, 15; 17:7; 18:2, 3; 21:8, 16; Romanonan 16:23; Filemon 1, 22) Na Filípos, Tesalónica i Corinto, acomodacionnan asina a sirbi como punto di salida for di cua Pablo por a organisá su actividadnan di misionero. Na Corinto, Ticio Hustu tambe a habri su cas p’e apostel por a haña un lugá for di cua e por a cumpli cu su trabou di predicá.—Echonan 18:7.

Un Multitud di Amigu

Manera nos por spera, Pablo a recordá su conocínan den diferente manera, pasobra el a conocé nan tambe bou di diferente circunstancia. Por ehempel, Maria, Pérsis, Febe, Trifena i Trifosa, tabata compañeranan creyente cu el a encomendá pa motibu di nan trabou i p’e echo cu nan a traha duru. (Romanonan 16:1, 2, 6, 12) Pablo a bautisá Crispo, Gayo i e famia di cas di Stefánas. Na Aténas, Dionisio i Dámaris a aceptá e mensahe di berdad for di dje. (Echonan 17:34; 1 Corintionan 1:14, 16) Pablo a yama Andrónico cu Junias, kendenan tabata creyente promé cuné, “hombernan distinguí entre e apostelnan,” i tambe su “compañeronan den prizon.” Kisas a sosodé cu na un ocasion nan tabata den prizon huntu cuné. Tambe Pablo a papia di e dosnan aki como su “parientenan,” manera el bisa di Herodion, Jason, Lucio i Sosípatro. (Romanonan 16:7, 11, 21) Aunke e palabra griego usá aki por nificá “paisano,” su nificacion principal ta “parientenan carnal dje mésun generacion.”

Hopi amigu di Pablo a biaha pa causa dje bon nobo. Ademas di su compañeronan cu tabata mas conocí, tabatin tambe Acaico, Fortunato i Stefánas, kendenan a biaha for di Corinto bai Efeso pa consultá cu Pablo tocante e condicion spiritual di nan congregacion. Ártemas cu Tíkico tabata cla pa biaha bai djoin Tito, kende tabata sirbi n’e isla di Creta, i Zenas tabata bai haci un biahe huntu cu Apólos.—1 Corintionan 16:17; Tito 3:12, 13.

Tin tambe esnan di ken Pablo a duna detayenan chikitu i fasinante. E ta informá nos, por ehempel, cu Epéneto tabata “un promé fruta di Asia,” cu Erasto tabata “mayordomo dje stad” na Corinto, cu Lucas tabata dokter, cu Lidia tabata un bendedó di púrpura i cu Tercio tabata esun cu Pablo a usa pa skirbi e carta n’e romanonan. (Romanonan 16:5, 22, 23; Echonan 16:14; Colosensenan 4:14) Pa cualkier persona cu tin gana di sa algu mas dje individuonan aki, e detayenan chikitu i breve aki ta fasinante.

Otro compañeronan di Pablo a haña mensahenan personal, cu awor ta registrá den Bijbel. Por ehempel, den su carta n’e colosensenan, Pablo a spierta Arkipo: “Sigui vigilá e ministerio cu bo a aceptá den Señor, pa bo cumpli cuné.” (Colosensenan 4:17) Evidentemente, Evodia cu Síntike tabatin cu resolvé un conflicto personal. P’esei, mediante un “compañero di yugo” na Filípos, kende su nomber no ta conocí, Pablo a exhortá nan pa nan “ta dje mésun mente den Señor.” (Filipensenan 4:2, 3) Esaki sigur-sigur ta un bon conseho pa nos tur.

Apoyo Leal Durante Encarcelacion

Pablo tabata cerá den prizon vários biaha. (2 Corintionan 11:23) Durante e ocasionnan ei, si tabatin algun cristian local, nan lo mester a haci tur loke nan tabata por pa haci su experencia mas soportabel. Durante su promé encarcelacion na Roma, nan a permití Pablo huur su mes cas pa dos aña i su amigunan tabatin mag di bishit’é. (Echonan 28:30) Den e periodo ei, el a skirbi carta p’e congregacionnan di Efeso, Filípos i Colósas i tambe pa Filemon. E cartanan aki ta conta nos hopi cos di esnan cu tabata hopi cerá cu Pablo durante su detencion.

Por ehempel, nos ta haña sa cu Onésimo, un esclabo cu a hui for di Filemon, a topa Pablo na Roma, i tambe Tíkico kende mester a compañá Onésimo bai bek cerca su doño. (Colosensenan 4:7-9) Tambe tabatin Epafrodito, kende a biaha e distancia largu for di Filípos cu un regalo for di su congregacion, i cu despues a bira malu. (Filipensenan 2:25; 4:18) Esnan cu a traha estrechamente huntu cu Pablo na Roma tabata Aristarco, Marco i Jesus cu nan tabata yama Hustu, i di nan Pablo a bisa: “Esakinan so ta mi colaboradónan p’e reino di Dios, i ta nan a bira un yudansa fortalecedor pa mi.” (Colosensenan 4:10, 11) Huntu cu tur esnan fiel aki tabatin tambe esnan mas conocí, manera Timoteo i Lucas, i tambe Démas, kende despues, debí na su amor pa mundu, a bandoná Pablo.—Colosensenan 1:1; 4:14; 2 Timoteo 4:10; Filemon 24.

Nan tabata na lado di Pablo, aunke aparentemente ningun di nan no tabata di Roma. Kisas algun di nan a bai specialmente pa yuda Pablo durante su encarcelacion. Sin duda algun di nan tabata bai haci rospondi p’e, otronan el a duna misionnan pa bai mas leu i tambe el a dicta su cartanan na algun di nan. Esta un testimonio elocuente dje apego i lealtad fuerte cu e personanan aki tabatin na Pablo i n’e obra di Dios!

For dje conclusion di algun di Pablo su cartanan, nos ta comprendé cu probablemente e tabata rondoná pa un gran cantidad di ruman cristian cu tabata mas cu e poco nombernan cu nos conocé. Na diferente ocasion el a skirbi: “Tur e santunan ta manda nan cumindamentu pa boso” i tambe: “Tur esnan cu ta cu mi ta manda nan cumindamentu pa bo.”—2 Corintionan 13:13; Tito 3:15; Filipensenan 4:22.

Durante Pablo su segundo encarcelacion decisivo na Roma, ora cu su morto como martir a parce di ta cerca, e tabata pensa hopi riba su colaboradónan. Ainda e tabata activo den supervisá i coordiná actividad di por lo ménos algun di nan. El a manda Tito i Tíkico riba un mision, Crescente a bai Galacia, Erasto a keda Corinto, el a laga Trófimo malu na Mileto, pero Marco cu Timoteo mester a bini cerca dje. Lucas tabata na lado di Pablo, i ora e apostel a skirbi su segundo carta na Timoteo, diferente otro creyente, incluso Eubulo, Pudente, Lino i Claudia tabata presente pa manda nan saludonan. Sin duda nan tabata haci loke nan tabata por pa yuda Pablo. N’e mes momento, Pablo mes tambe a manda cumindamentu pa Prisila cu Akila i p’e famia di cas di Onesíforo. Sin embargo, ta di lamentá cu den e tempu difícil ei, Démas a bandon’é i Alehandro a hacié hopi daño.—2 Timoteo 4:9-21.

“Nos Ta Colaboradónan di Dios”

Masha poco bes Pablo tabata su so durante su actividadnan di predicá. Segun e comentarista E. Earle Ellis: “E imágen cu ta sobresalí, ta di un misionero cu un gran cantidad di socio. Sí, rara bes bo por a topa Pablo sin compaño.” Bou di guia dje spiritu santu di Dios, Pablo por a mobilisá hopi hende i organisá campañanan eficas di misionero. E tabata rondoná dor di partnernan hopi yegá, asistentenan temporal, algun persona enérgico i un cantidad grandi di sirbidó humilde. Tog esakinan no tabata simplemente colega. Sin importá cuantu nan a traha of asociá cu Pablo, e banchi di amor cristian i amistad personal ta claramente bisto.

Apostel Pablo tabatin loke nan a yama “un don pa amistad.” El a haci hopi pa hiba e bon nobo n’e nacionnan, pero e no a purba hacié su so. El a cooperá cu e congregacion cristian organisá i a haci pleno uso di dje. Pablo no a duna ningun mérito na su mes persona p’e resultadonan obtené, pero el a reconocé humildemente cu e tabata un esclabo i cu tur onor mester a bai na Dios como esun responsabel p’e crecementu.—1 Corintionan 3:5-7; 9:16; Filipensenan 1:1.

Aunke Pablo su tempu tabata diferente for di esun di nos, ningun hende den e congregacion cristian awe mester pensa cu e por, of mester, ta independiente. En bes di esei, semper nos mester traha huntu cu Dios su organisacion, cu nos congregacion local i cu nos compañeronan creyente. Nos tin mester di nan yudansa, apoyo i consuelo den tempu bon i tempu malu. Nos tin e privilegio precioso di ta parti di ‘henter un asociacion di ruman den mundu.’ (1 Pedro 5:9) Si nos traha scouder cu scouder den fieldad i amor i den cooperacion cu nan tur, e ora ei, nos tambe por bisa mescos cu Pablo cu “nos ta colaboradónan di Dios.”—1 Corintionan 3:9.

[Plachinan na página 31]

APOLO

ARISTARCO

BARNABAS

LIDIA

ONESIFORO

TERCIO

TIKICO