‘E Candela di Curiosidad den Mente i Curason’

“No tin palabra pa expresá e goso i excitacion cu ta sigui crece segun cu mi ta disfrutá sinfin dje buki ¿Existe un Creador que se interese por nosotros? (Ta Existí un Creador Cu Ta Interesá den Bo?) Gewoon e ta crea den bo un gana—no, un mester—pa sa mas. Danki pa e candela di curiosidad cu boso a cende den mi mente i curason.”

ASINA un Testigo di Jehova di Nort Carolina, Merca, a bisa dje buki cu Sociedad Watch Tower a saca na e Congresonan di Distrito “Dios Su Caminda di Bida” tené durante 1998/1999. Asta si bo no tin un ehemplar dje buki, wak con otro hende a reaccioná.

Un par di dia despues di a ricibí su ehemplar na un congreso na San Diego, California, un homber a skirbi: “Mi ta ripará cu e buki aki ta fortalecé mi fe mashá. E ta yena mi curason cu aprecio profundo pa Jehova su obranan di creacion. Mi ta te na página 98, i mi no kier p’e dia yega cu mi ta cab’é! Asina un goso satisfaciente e ta duna mi.”

Un señora asiático a skirbi: “E orador na congreso a usa e expresion ‘un buki único,’ i e expresion ei realmente ta pas p’e contenido. Un rasgo sobresaliente ta cu e buki no ta obligá e lector aceptá e existencia di Dios, sin embargo, e ta presentá e echonan.”

E echonan ta, entre otro, descubrimentunan científico fasinante tocante nos universo, bida i nos mes. Esaki a impresioná hopi hende. Un señora di California a skirbi: “Realmente mi no tin palabra pa expresá con profundo e buki aki a toca mi. Mi no por a pon’é abou, ya cu cada página a duna mas descubrimentu cu ta revelá cosnan tocante nos universo i tocante bida mes. Di berdad mi a siña masha hopi mes! E buki chikitu aki tin masha balor pa mi i lo mi compartié cu mas tantu hende posibel.”

Un rasgo cu a encantá hopi hende ta con e buki ta duna un resúmen breve di Bijbel, i ta destacá e personalidad dje Creador. Un comentario típico ta cu “e repaso general di Bijbel, presentá mas patras den e buki, ta un dje mihónan cu mi a lesa.” Djis despues di un dje promé congresonan na New York, un otro lector a skirbi: “E publicacion nobo mester ta e buki mas absorbente cu boso a yega di publicá. Mi a keda encantá cu e pruebanan científico di cu tin un Creador. E resúmen di Bijbel, breve i al caso, ta net suficiente pa splica e puntonan presentá i pa habri apetit pa lesa mas.”

Ciencia Comprendibel

E informacion científico den e promé capítulonan por parce difícil pa comprendé, pero ata aki un par di reaccion típico.

Un homber canades a skirbi: “Ki un contraste cu bukinan técnico, di cua e autornan ta purba impresioná nos cu palabra grandi. Boso nivel escolástico ta sobresalí den e manera cu e ta haci e tópiconan di física, kímica, DNA, cromosoma, etc., masha comprendibel pa nos. Mare ta boso a skirbi e bukinan di universidad cu mi a studia añanan pasá!”

Un profesor universitario di física a skirbi: “[E buki] ta presentá e cuestionnan enbolbí den un manera cla, sin bira enredá den hopi detaye técnico. E buki ta razoná cu e lector i ta cita hopi científico renombrá. Esaki ta un buki cu ken cu ta interesá den e orígen di universo i di bida mester lesa, sea bo ta científico of laico.”

Un mucha muher cu ta siguiendo un curso di verpleegster a comentá: “Mi no por a kere mi wowonan ora mi a habri capítulo 4 i a lesa un cita for dje buki cu nos ta usando den klas! Mi a duna nos maestro e buki i a bis’é cu mi sa cu lo e haña e informacion refrescante. Mi a mustr’é página 54 tocante celebro. El a les’é pa su mes i a bisa: ‘E ta interesante! Lo mi chek e.’”

Un parlamentario na Bélgica a skirbi: “Loke a fasiná mi i a impresioná mi tabata e descripcion científico cu ta subrayá e echo cu ciencia moderno no ta contra dje punto di bista monoteista di Bijbel sino, mas bien, ta na armonia cuné. Esaki ta un punto di bista digno di mencion.”

Ta Siña Conocé e Creador Mihó

E buki a yuda hende den hopi pais siña conocé Dios mihó i sinti nan muchu mas cerca di dje. Un lector na Ciudad Fukuoka, Hapon, a comentá: “Ta como si fuera cu pa promé bes e lens tabata enfocá precis riba Jehova. E buki ta maraviyosamente convincente. El a haci posibel pa mi siña conocé Jehova for di un punto di bista cu nunca mi no a pensa riba dje promé.” Un salvadoreño a skirbi: “Boso ta splica masha cla con misericordioso, yen di gracia, slow pa rabia i abundante den bondad amoroso Dios ta. Di berdad, esaki ta net loke nos mester pa ta mas cerca dje i su Yu. Ta e promé buki cu ta splica e sintimentunan di Jehova i e sintimentunan humano di su Yu, Jesus.” I un lector na Zambia a reaccioná bisa: “Awor Jehova tin un nificacion totalmente nobo pa mi.”

Ta di comprendé cu Testigonan di Jehova ta entusiasmá pa compartí e buki ¿Existe un Creador que se interese por nosotros? cu otro hende. Un di nan a bisa: “Ora mi a caba di lesa capítulo 10 [“Si e Creador Ta Interesá, di Con Tin Asina Tantu Sufrimentu?”], mi no por a keda sin sclama: ‘Esaki ta exactamente e buki cu nos tin mester na Hapon!’ Lo mi tin gana di siña e informacion den e capítulo aki bon i us’é den sirbishi di veld mas i mas.” Un otro Testigo cu ta studia Bijbel cu un mucha muher cu a lanta den un tempel budista caminda su tata ta e sacerdote, a bisa: “Ta duru p’e mucha muher aceptá e concepto di un Creador. Niun ora so e buki no ta obligá bo aceptá su splicacion, pero e ta presentá e echonan. Pues mi ta kere cu asta budistanan por les’é sin vacilacion. Tambe e buki ta laga nos sinti Jehova su amor mas.”

For di Inglatera a bini e evaluacion aki: “Mi a caba di lesa e buki Creador i mi ta na punto di bolbe les’é. Esta un buki maraviyoso! Bo no por haci nada otro sino stima Jehova ora bo les’é. Mi a duna mi bisiña unu. Despues di a lesa dos capítulo so, el a bisa: ‘Mi no por pon’é abou, e ta asina excitante.’ Mi tin sigur cu e buki aki lo yuda hende siña conocé i stima nos Magnífico Creador.”

Un homber na Maryland, Merca, a bisa: “Berdaderamente e buki aki a penetrá te na mi tuti i wesunan spiritual! Mi tin planeá di duna tur e hendenan cu mi ta traha p’e un ehemplar. Tin biaha mi ta haña cu ta difícil pa cuminsá un testimonio cu hende asina ocupá i educá. Cu e buki aki awor lo mi tin un manera atractivo i eficas pa cuminsá.”

Ta masha cla cu e buki ¿Existe un Creador que se interese por nosotros? lo tin un impacto positivo riba hende rond mundu.

[Rekonosementu pa Potrèt na página 25]

Potret di kaft ariba, Eagle Nebula: J. Hester i P. Scowen (AZ State Univ.), NASA