Cu Goso Nos A Aceptá Jehova Su Guia
MANERA ULYSSES V. GLASS A RELATA
Tabata un ocasion extraordinario. E klas cu tabata gradua tabatin solamente 127 studiante. Pero den auditorio tabatin 126.387 persona entusiasmá presente, kendenan a bini for di un cantidad di pais. Tabata e graduacion dje di 21 klas dje Scol Bíblico di Galad di Watchtower, tené na Yankee Stadium na New York City, dia 19 di juli 1953. Di con esaki tabata un suceso asina significante den mi bida? Laga mi duna un poco detaye di mi pasado.
MI A nace na Vincennes, Indiana, Merca, dia 17 di februari 1912, un dos aña promé cu e Reino Mesiánico, describí na Revelacion 12:1-5, tabata establecí. E aña promé, mi mayornan a cuminsá studia Bijbel huntu cu e volúmennan Studies in the Scriptures. Tur diadomingo mainta, Tata tabata lesa for di un dje bukinan aki pa nos famia, i despues nos tabata papia tocante e informacion.
Loke Mama tabata siña, e tabata usa pa forma e manera di pensa di su yunan. E tabata masha dushi hende—hopi bondadoso i semper cla pa yuda. Nos tabata cuater ruman, pero Mama su amor tabata asina grandi cu e tabatin pa duna otro muchanan di nos bario tambe. E tabata dedicá tempu na nos. E tabata gusta conta nos historia di Bijbel i canta cu nos.
Tambe el a invitá na nos cas vários ruman cu tabata sirbi den e ministerio di tempu completo. Nan tabata keda un of dos dia so, i hopi bes nan a tene reunion of duna discurso na nos cas. Nos tabata gusta foral e rumannan cu tabata usa ilustracion i conta nos cuenta. Na un ocasion na 1919, rond di un aña despues cu e promé guera mundial a terminá, e ruman cu tabata di bishita a dirigí su comentario specialmente na nos, esta, e muchanan. El a trata e tema consagracion—pa cual nos tin un palabra mas exacto awor pa referí na dje, esta, dedicacion—i el a yuda nos comprendé con esaki a toca nos bida. E anochi ei, ora mi tabata riba mi cama, mi a haci oracion na mi Tata celestial i a bis’é cu mi kier a sirbié pa semper.
Sin embargo, despues di 1922 otro interesnan di bida a pusha e resolucion ei na di dos lugá. Nos tabata muda di un lugá pa otro i nos no tabata asociá cu un congregacion dje pueblo di Jehova. Tata tabata ausente debí na su trabou riba trein. Nos studio di Bijbel tabata iregular. I mi a sigui lesnan di scol cu e meta pa bira un artista comercial i mi tabata planea pa bai un universidad prominente.
Mi Ta Ahustá Mi Enfoke di Bida
Meimei di añanan ’30, mundu a cuminsá move atrobe den direccion di guera mundial. Nos tabata biba na Cleveland, Ohio, ora un Testigo di Jehova a yama na nos porta. Nos a cuminsá pensa seriamente riba loke nos a siña como mucha. Foral mi ruman homber mas grandi, Russell, a tuma e asuntu hopi na serio, i a bautisá promé. Ami sí no tabata dje serio ei, pero dia 3 di februari 1936, mi tambe a bautisá. Mi comprendimentu di loke dedicacion na Jehova ta nificá a crece, i mi a siña aceptá Jehova su guia. E mésun aña ei, mi dos ruman muhernan, Kathryn cu Gertrude, tambe a bautisá. Nos tur a cuminsá den e sirbishi di tempu completo como pionero.
Sin embargo, esei no a nificá cu nunca nos no a pensa riba otro cos. Mi oreanan a lanta para ora mi cuñá a conta mi tocante un mucha muher masha leuk cu yama Ann, cu a keda masha encantá cu e berdad for di dia cu el a tend’é, i cu e tabata bai bini n’e reunionnan na nos cas. N’e tempu ei Ann tabata traha como secretaria na un oficina di abogado, i denter di un aña el a bautisá. Mi no a planea pa casa, pero tabata bisto cu Ann tabata shen porciento na banda dje berdad. E kier tabata completamente enbolbí den e sirbishi di Jehova. Nunca e no tabata un persona cu ta puntra: “Mi por hacié?” En bes di esei, e tabata puntra: “Cua ta e mihó manera pa mi hacié?” I e tabata dicididu pa sigui padilanti. E manera positivo ei di mira cosnan a atraé mi. Ademas di esei, e tabata bunita, i e ta te ainda. El a bira mi esposa, i djis despues mi compañera den sirbishi di pionero.
Entrenamentu Balioso Como Pionero
Como pionero nos a siña e secreto pa keda contentu tantu ora nos tabatin tiki cuminda como ora nos tabatin abundancia. (Filipensenan 4:11-13) Un dia nos no tabatin nada di come, i anochi tabata cera. Nos tabatin dos placa so. Nos a bai un carniceria, i mi a pidi: “Nos por haña cincu cen di bolonia?” E carnicero a wak nos, anto el a corta cuater slais. Mi tin sigur cu nan tabata bal mas cu cincu cen. I esei a alimentá nos un poco.
Den nos ministerio, no tabata straño pa topa cu oposicion severo. Nos tabata parti pamfleta i cana cu poster riba caya den un stad cerca di Syracuse, New York, pa hala atencion na un reunion público special. Dos homber grueso a gara mi i a maltratá mi. Un di nan tabata polis, pero e no tabatin uniform bistí, i el a ignorá mi peticion pa wak su badge. Net n’e momento ei, Grant Suiter di Betel na Brooklyn a pasa ei banda i a bisa cu nos ta bai warda di polis pa resolvé e asuntu. Anto el a bel e oficina di Sociedad na Brooklyn, i ami cu Ann a haña instruccion pa bolbe sali atrobe e mésun dia ei cu poster i pamfleta pa haña base pa entamá un caso pa asina crea un precedente. Manera nos a verwagt, nan a arestá nos. Sin embargo, ora nos a bisa e polisnan cu nos lo demandá nan pa aresto sin base, nan a laga nos bai.
E siguiente dia, bou di instigacion di un pastor, diferente tiener bochinchero a invadí nos lugá di asamblea, i no tabatin polis niun caminda. E mucha baldadinan a bati riba e flur di palu cu bate di baseball, pusha algun persona den e auditorio for di tribuna, i a subi riba plataforma unda nan a tene un bandera mericano na haltu i a grita: “Salud’é! Salud’é!” Anto nan a cuminsá canta un cantica popular dje tempu ei, “Beer Barrel Polka.” Nan a para e reunion completo. Nos a experenciá personalmente loke Jesus tabata kier men ora el a bisa: “Dor cu boso no ta parti di mundu, sino mi a scoge boso for di mundu, pa causa di esaki mundu ta odia boso.”—Juan 15:19.
E discurso público tabata eigenlijk un disco cu un discurso di J. F. Rutherford, e tempu ei presidente di Sociedad Watch Tower. Ami cu Ann a keda den e stad ei un par di dia i nos a bishitá e hendenan i ofrecé nan e chens pa scucha e discurso den nan cas. Un par a aceptá e oferta.
Nos Ta Ofrecé Nos Mes pa Sirbi den Estranheria
Cu tempu, fronteranan nobo pa sirbishi a habri. Mi ruman homber, Russell, i su casá Dorothy, a haña invitacion como pareha pa asistí n’e promé klas di Scol di Galad, na 1943, i despues a manda nan Cuba como misionero. Mi ruman muher Kathryn, tabata den e di cuater klas. E tambe a haña asignacion pa bai Cuba. Despues el a haña un otro asignacion pa bai República Dominicana i despues Puerto Rico. Kico di ami cu Ann?
Ora nos a tende dje Scol di Galad i cu Sociedad kier a manda misionero pa otro pais, nos a sinti cu nos kier a pone nos mes disponibel pa bai sirbi den estranheria. Na promé instante, nos a pensa di bai riba nos mes, kisas México. Pero despues nos a dicidí cu lo tabata mihó warda te cu Sociedad mes asigná nos, despues cu nos asistí n’e Scol di Galad. Nos a realisá cu esaki tabata un areglo cu Jehova tabata usa.
Nos a haña invitacion p’e di cuater klas dje Scol di Galad. Pero djis promé cu e klas tabata bai cuminsá, N. H. Knorr, presidente di Sociedad Watch Tower e tempu ei, a ripará mas mihó cierto limitacionnan cu Ann tabatin debí cu el a haña polio na mucha. El a papia cu mi tocante e asuntu i a dicidí cu lo no ta sabí pa manda nos bai sirbi den otro pais.
Rond di dos aña despues, ora mi tabata haci preparacion pa congreso, ruman Knorr a topa mi atrobe i el a puntra si ainda nos ta interesá pa bai Scol di Galad. El a bisa mi cu nos lo no haña un asignacion den estranheria; e tabatin algu otro na mente. Pues ora e di nuebe klas a raportá dia 26 di februari 1947, nos tabata entre e studiantenan.
E dianan ei na Galad tabata dianan inolvidabel. E lesnan tabata spiritualmente ricu. Nos a cera amistadnan duradero. Pero mi enbolbimentu cu e scol a bai muchu mas leu cu esei.
Entre Washington cu Galad
Ainda Scol di Galad tabata relativamente nobo. Dor cu e gobiernu di Merca no tabata bon familiarisá cu e obhetivonan dje scol, nan tabata haci hopi pregunta. Sociedad tabata kier un representante na Washington, D.C. Un par di luna despues cu nos a gradua na Galad, nan a manda nos einan. Mi mester a yuda den obtené visa p’e rumannan di otro pais cu haña invitacion pa bini Galad, i tambe obtené e papelnan legal pa por a manda e graduadonan afó p’e trabou di misionero. Algun dje funcionarionan tabata imparcial i cla pa yuda. Otronan tabatin sintimentu fuerte contra Testigonan. Algun di nan cu tabatin opinion político fuerte tabata pretendé cu nos tin coneccion cu otro gruponan cu nan tabata considerá indeseabel.
Un biaha mi a drenta e oficina di un homber cu tabatin crítica fuerte contra nos debí cu nos no ta saludá bandera ni bai guera. Finalmente, despues cu el a ras riba e cos ei pa basta ratu, mi a bisa: “Mi kier pa bo sa, i bo sa masha bon, cu Testigonan di Jehova no ta den guera cu ningun hende na mundu. Nos no ta mete den cosnan di mundu. Nos no ta mete den nan guera ni política. Nos ta completamente neutral. E problemanan cu boso ta enfrentá, ya nos a vence nan caba; den nos organisacion tin union. . . . Awor, kico bo kier pa nos haci? Bo kier pa nos bai bek na boso manera di haci cosnan i benta esnan di nos un banda?” Despues di esei, e no a bisa nada mas.
Mi tabata apartá dos dia completo p’e trabou na oficinanan di gobiernu. Ademas di esei, nos tabata sirbi como pionero special. N’e tempu ei, esaki a nificá dedicá 175 ora (despues el a bira 140 ora) pa luna den e ministerio di veld, p’esei hopi bes nos tabata keda den sirbishi te anochi lat. Nos a pasa bon. Nos a conducí hopi studio excelente cu famianan completo i nan a progresá bon. Mi cu Ann a dicidí cu nos lo no haña yu, pero den sentido spiritual, nos no tabatin yu so, sino tambe nietu i bisanietu. Esta un goso nan ta pa nos curason!
Na fin di 1948, mi a ricibí un asignacion mas acerca. Ruman Knorr a splica cu ruman Schroeder, secretario i un dje instructornan na Scol di Galad, tabata bai bira muchu ocupá cu otro trabounan importante, i p’esei nan a pidi mi pa duna les n’e studiantenan di Galad ora ta necesario. Dia 18 di december, cu mi curason ta bati den mi boca, huntu cu Ann mi a yega Galad atrobe, na South Lansing, New York. Na principio, cada bes, nos tabata keda un par di siman so na Galad, i despues bai Washington bek. Sin embargo, cu tempu mi tabata mas na Galad cu na Washington.
Tabata durante e periodo ei cu, manera mi a mencioná na principio, e di 21 klas di Galad a gradua na Yankee Stadium na New York. Pues como un dje instructornan, mi tabatin e privilegio di participá den e programa di graduacion.
Sirbishi n’e Sede Mundial
Dia 12 di februari 1955, nos a cuminsá cu un otro asignacion di sirbishi. Nos a bira miembro dje famia di Betel n’e sede mundial dje organisacion visibel di Jehova. Pero kico esaki lo a encerá? Básicamente, ser dispuesto pa cumpli cu cualkier asignacion cu nos a haña, i participá den proyectonan cu a rekerí cooperacion cu otronan. Naturalmente nos a yega di haci esei caba, pero awor nos lo tabata parti di un grupo muchu mas grandi—e famia di Betel n’e sede mundial. Cu goso, nos a aceptá nos asignacion nobo como un evidencia di Jehova su guia.
Gran parti di mi trabou tabata en coneccion cu medionan di comunicacion. Dor di nan sed pa noticianan sensacional i pa motibu cu nan a haña informacion for di fuentenan cu tabatin prehuicio, prensa a skirbi poco cos mahos tocante Testigonan di Jehova. Nos a purba drecha e asuntu.
Ruman Knorr kier a haci sigur cu nos tur tabatin hopi di haci, p’esei mi tabatin mas asignacion. Pa cumpli cu algun, mi mester a haci uso di abilidadnan cu mi a adkerí durante mi entrenamentu como artista comercial. Otro trabou a enbolbé e radio emisora di Sociedad, WBBR. Tabatin trabou pa haci relacioná cu películanan cu Sociedad a producí. Naturalmente, historia teocrático tabata parti dje curso na Galad, pero awor a cuminsá vários proyecto pa familiarisá mas miembro dje pueblo di Jehova cu detayenan dje historia dje organisacion teocrático moderno, i tambe pa haci esaki disponibel pa público. Un otro aspecto di entrenamentu na Galad a encerá papiamentu den público, i mester a percurá pa mas dje elementonan básico di papiamentu den público bira disponibel p’e rumannan den congregacion. Pues tabatin hopi trabou di haci.
Na Galad Riba un Base Regular
Na 1961, cu bista riba e entrenamentu di superintendentenan biahero i personal di sucursal, Scol di Galad a muda bai Brooklyn, unda Sociedad Watch Tower tin su oficinanan principal. Atrobe mi tabata dilanti klas—e biaha aki no como instructor substituto, sino como un miembro vast dje scol. Ki un privilegio! Mi ta firmemente convencí cu Scol di Galad ta un regalo for di Jehova, un regalo cu a beneficiá henter e organisacion visibel.
Na Brooklyn, e klasnan di Galad tabatin oportunidadnan cu esnan promé no a conocé. Tabatin mas orador bishitante i tabatin un asociacion estrecho cu e Cuerpo Gobernante i un compañerismo extenso cu e famia di Betel n’e sede mundial. Tabatin posibilidad tambe pa e studiantenan haña entrenamentu den proceduranan di oficina, den funcionnan cu tin den cas di Betel i den vários aspecto di trabou cu ta sosodé den un fábrica.
Atrabes di añanan e cantidad di studiante i tambe di instructor a varia. E sitio dje scol tambe a cambia vários biaha. Awor e ta situá den su bunita ambiente na Patterson, New York.
Traha cu Studiante
Tabata asina un goso pa duna les n’e klasnan ei! Aki bo ta haña hende yong cu no ta interesá pa haci cosnan den e sistema bieu. Nan a laga atras nan famia, nan amigunan, nan hogar i hende cu ta papia nan idioma. E clima, cuminda, tur cos, ta bai ta diferente. Nan no sa ni sikiera na cua pais nan lo tin cu bai, pero nan meta ta, bira misionero. Bo no tin nodi motivá hende asina.
Ora mi drenta un klas, semper mi meta tabata pa laga e studiantenan sinti nan na cas. Niun hende no por siña bon ora e ta tenso of preocupá. Sí, ta ami tabata e instructor, pero mi tabata sa tambe kico kier men ser studiante. Un tempu mi tambe a sinta riba e stulnan ei. Claro cu nan mester a studia pisá i a siña hopi cos na Galad, pero mi tabata kier pa nan a pasa bon tambe.
Mi tabata sa cu ora nan a bai nan asignacionnan, nan lo tabatin mester di cierto cosnan pa logra éxito. Nan tabatin mester di fe fuerte. Nan tabatin mester di humildad—masha hopi mes. Nan tabatin cu siña bai bon cu hende, aceptá situacionnan i pordoná libremente. Nan tabatin cu sigui cultivá fruta di spiritu. Tambe nan mester a stima hende i stima e trabou cu a manda nan pa haci. Esakinan tabata cosnan cu constantemente mi a purba enfatisá p’e studiantenan, miéntras nan tabata Galad.
Egt mi no sa cuantu studiante mi a duna les. Pero mi sa sí kico mi ta sinti pa nan. Despues di pasa cincu luna huntu cu nan den klas, mi no por keda sin pega mi curason na nan. Anto ora mi mira nan cana riba e plataforma i ricibí nan diploma riba dia di graduacion, mi tabata sa cu nan a pasa nan curso cu éxito i cu pronto nan lo bai. Tabata manera un parti di mi famia ta bai. Con bo por keda sin stima hende cu ta dispuesto pa duna nan mes i haci e trabou cu e hendenan hóben aki ta haci?
Añanan despues, ora nan bini bek pa haci bishita, i mi tende nan conta di nan goso den sirbishi, mi ta haña sa cu ainda nan ta den nan asignacion, cumpliendo cu loke a entrená nan p’e. Con esei ta laga mi sinti? Laga mi bisa bo, e ta un dushi sintimentu.
Mirando Padilanti
Awor mi wowonan a bira scur, i mi ta experenciá e frustracionnan cu esaki ta trece cuné. Mi no por duna les mas den klas na Galad. Na promé instante, tabata duru pa mi adaptá mi mes, pero durante henter mi bida mi a siña aceptá situacionnan i biba cu nan. Hopi bes mi ta pensa riba apostel Pablo i su “sumpiña den carni.” Tres bes Pablo a haci oracion pidi alivio, pero Señor a bis’é: “Mi bondad inmerecí ta suficiente pa bo; pasobra mi poder ta ser hací perfecto den debilidad.” (2 Corintionan 12:7-10) Pablo a sigui biba cuné. Si e tabata por, ami tin cu purba. Aunke mi no ta duna les mas, mi ta contentu cu ainda mi por mira e studiantenan drenta i sali tur dia. Tin biaha mi ta haña chens di papia cu nan, i ora mi pensa riba e spiritu excelente cu nan ta desplegá, e ta trece goso na mi curason.
Ta maraviyoso pa contemplá loke futuro ta encerá. Un fundeshi ta ser poné awor. E scol di Galad tabatin un parti prominente den dje. Despues dje tribulacion grandi, ora habri e rolnan cu Revelacion 20:12 ta referí na dje, lo tin un mil aña mas di educacion intensivo den e camindanan di Jehova. (Isaías 11:9) Pero ni esei no ta e fin. Eigenlijk esei ta solamente e cuminsamentu. Atrabes di eternidad, lo tin mas pa siña tocante Jehova i mas pa haci segun cu nos ta mira su propósitonan ta desaroyá. Mi ta plenamente convencí cu Jehova lo cumpli cu tur e gran promesanan cu el a haci, i e tempu ei lo mi kier ta presente entre esnan cu ta aceptá Jehova su guia pa nos.
[Plachi na página 26]
Graduacion di Galad na 1953 na Yankee Stadium, New York
[Plachi na página 26]
Gertrude, ami, Kathryn i Russell
[Plachi na página 26]
Trahando huntu cu N. H. Knorr (te na man robes) i M. G. Henschel den organisá congreso
[Plachi na página 26]
Den studio di transmision di WBBR
[Plachi na página 29]
Den klas di Galad
[Plachi na página 31]
Huntu cu Ann, no muchu tempu pasá