Jehova Tabata Mi Baranca

MANERA EMMANUEL LIONOUDAKIS A RELATA

Mi mama su cara a cera ora el a bisa mi: “Si esei ta bo decision, anto lo bo tin cu bai for di e cas aki.” Mi a dicidí di bai predicá e Reino di Dios pa tempu completo. Sin embargo, mi famia no por a soportá e humiyacion di cu cada bes nan tabata arestá mi.

MI MAYORNAN tabata hende humilde i temeroso di Dios. Nan tabata biba den e pueblo Douliana, n’e parti west dje isla griego, Creta, unda mi a nace na aña 1908. Desde mi hubentud padilanti, nan a siña mi teme Dios i respet’é. Aunke nunca mi no a mira un Bijbel den man di maestronan of pastornan griego ortodox, mi tabata stima e Palabra di Dios.

Despues cu un bisiña a lesa e seis volúmennan di Studio dje Scritura (na ingles), cu C. T. Russell a skirbi, i e buki E Harpa di Dios (na ingles), yen di entusiasmo el compartí nan contenido bíblico revelador cu mi. Studiantenan di Bijbel, manera tabata yama Testigonan di Jehova e tempu ei, a publicá e bukinan aki. Mi tabata mashá contentu di ricibí un Bijbel i buki for dje oficina di Sociedad Watch Tower na Aténas. Ainda mi ta corda con ami cu e bisiña ei tabata keda te anochi lat cu lus di bela, haciendo oracion na Jehova i absorbando alimento spiritual for dje Scritura cu yudansa dje publicacionnan aki.

Ora mi a cuminsá compartí e conocimentu di Bijbel cu mi a caba di haña cu otronan, mi tabatin 20 aña di edad i mi tabata traha como maestro di scol den un pueblo den cercania. Djis despues, nos tabata cuater persona na Douliana cu tabata tene reunionnan regular pa studia Bijbel. Tambe nos tabata distribuí tratado, foyeto, buki i Bijbel pa yuda otro hende siña tocante e único speransa pa humanidad, esta, e Reino di Dios.

Na 1931, nos tabata entre e miles di rumannan rond mundu cu a adoptá e nomber bíblico, Testigonan di Jehova. (Isaías 43:10) Durante e siguiente aña, nos a participá den un campaña di informacion den cua a duna splicacion di nos nomber nobo i su nificacion na autoridadnan. Esaki a encerá ofrecé un foyeto apropiado na cada pastor, hues, oficial di polis i comerciante den nos teritorio.

Manera tabata di spera, clero a instigá un ola di persecucion. E promé bes cu nan a arestá mi, mi haña un sentencia di 20 dia di prizon. Poco despues cu mi a sali liber, nan a bolbe arestá mi i sentenciá mi na un luna di prizon. Ora un hues a exigí pa nos stop di predicá, nos a contestá cu e palabranan di Echonan 5:29: “Nos tin cu obedecé Dios como gobernante mas bien cu hende.” Despues, na 1932, un representante di Sociedad Watch Tower a bishitá nos grupo chikitu na Douliana, i nos tur cuater a bautisá.

Mi Ta Haña un Famia Spiritual

Dor cu mi kier a haci mas den e trabou di predicá, mi a tuma retiro for di mi trabou como maestro. Esei tabata demasiado pa mi mama. El a exigí pa mi bai for di cas. Cu aprobacion dje oficina di sucursal di Watch Tower na Aténas, un ruman homber cristian generoso den e stad Iráklion, Creta, a aceptá mi gustosamente den su cas. Pues, na augustus 1933, e rumannan di mi pueblo natal, huntu cu algun persona interesá, a bini na parada di bus pa yama mi ayó. Esaki tabata un momento masha tristu mes, i nos tur a yora ya cu nos no tabata sigur si nos lo a mira otro atrobe.

Na Iráklion, mi a forma parti di un famia spiritual amoroso. Einan tabatin tres otro ruman homber cristian i un ruman muher cu ken nos tabata reuní regularmente pa studio i adoracion. Personalmente ami por a experenciá e cumplimentu di Jesus su promesa: “Ningun hende a laga cas of ruman homber of ruman muher of mama of tata of yu of cunucu pa mi causa i pa causa dje bon nobo cu lo no haña shen biaha mas tantu awor den e periodo di tempu aki, cas i ruman homber i ruman muher i mama.” (Marco 10:29, 30) Mi asignacion tabata pa predicá den e stad ei i den pueblonan den cercania. Despues cu mi a cubri e stad, mi a bai traha e área unda oficinanan administrativo di Iráklion i Lasithion tabata situá.

Un Pionero Solitario

Mi a cana oranan largu di pueblo pa pueblo. Huntu cu esei, mi tabatin cu carga vários kilo di literatura, ya cu transporte di literatura tabata iregular. Dor cu mi no tabatin ningun caminda pa pasa anochi, mi tabata bai den un cafetaria den e pueblo i warda te ora e último cliente bai—hopi bes te despues di mei anochi—i mi tabata drumi riba un sofá. Su manisé mi tabata lanta hopi trempan, promé cu e doño cuminsá sirbi cos di bebe. Mi a compartí e sofánan ei cu un gran cantidad di pruga.

Aunke generalmente e hendenan tabata reaccioná friu, mi tabata contentu cu mi por a ofrecé Jehova mi vigor hubenil. Ora mi a topa cu un persona interesá den e berdad bíblico, esaki tabata renobá mi determinacion pa sigui cu e ministerio salbador di bida aki. Asociacion cu mi rumannan spiritual tambe tabata refrescante. Mi tabata bishitá nan despues di un ausencia di 20 pa 50 dia, dependiendo di con leu mi tabata predicando for dje stad Iráklion.

Ainda mi ta corda cla-cla con so mi tabata sinti mi un atardi, foral ora mi a pensa cu e anochi ei mi rumannan cristian na Iráklion lo tabatin nan reunion di custumber. Mi deseo pa mira nan tabata asina fuerte cu mi a dicidí di cana e mas cu 25 kilometer cu a separá mi for di nan. Nunca mi no a cana asina purá. Esta consolador tabata pa disfrutá dje dushi compania di mi rumannan e anochi ei. Tabata como si fuera mi a yena mi tanki spiritual di nobo!

No a pasa muchu tempu cu mi esfuersonan intenso pa predicá a cuminsá duna fruta. Mescos cu den tempu dje apostelnan, ‘Jehova a sigui uni esnan cu tabata ser salbá na nos.’ (Echonan 2:47) E cantidad di adoradónan di Jehova na Creta a cuminsá aumentá. Awor cu otronan tabata uni cu mi den e ministerio, mi no tabata sinti mi so mas. Nos a soportá abusu físico i oposicion severo. Nos cuminda di tur dia tabata pan, i nos tabata pone acerca e webu, olijfi of berdura cu esnan cu nos tabata predicá na dje tabata duna nos como pago pa literatura.

Den e stad Ierápetra, den e parti zuidoost di Creta, mi a duna testimonio na Minos Kokkinakis, un bendedó di tela. Aunke mi a haci esfuerso persistente pa cuminsá un studio di Bijbel cuné, e tabatin poco tempu debí na su bida druk. Sin embargo, ora cu por fin el a dicidí pa tuma su studio na serio, el a haci cambionan drástico den su bida. Tambe el a bira un proclamadó di Reino celoso i activo. E cambionan ei a impresioná Emmanuel Paterakis, un empleado di Kokkinakis cu tabatin 18 aña di edad, i djis despues el a pidi literatura bíblico. Esta contentu mi tabata pa mir’é haci progreso spiritual continuo i finalmente bira un misionero!a

Miéntras tantu, e congregacion aya den mi pueblo a sigui crece i awor tabatin 14 publicadó. Hamas lo mi lubidá e dia cu mi a lesa e carta cu mi a ricibí di mi ruman muher carnal, Despina, cu a bisa cu e i mi mayornan a aceptá e berdad, i cu awor nan ta adoradónan bautisá di Jehova!

Persecucion i Exilio

Iglesia Griego Ortodox a cuminsá considerá nos actividad di predicá manera un plaga di dalakochi devastador, i nan tabata decididu pa caba cu nos predicacion. Na mart 1938, nan a hiba mi dilanti un fiscal cu a exigí pa mi bandoná e área inmediatamente. Mi a contestá cu nos actividad di predicá eigenlijk tabata beneficioso i cu ta un autoridad mas haltu, esta, nos Rey Jesucristo, a manda nos hacié.—Mateo 28:19, 20; Echonan 1:8.

E siguiente dia, nan a manda yama mi na warda di polis. Ei a informá mi cu nan a considerá mi un menasa público, i a sentenciá mi na un aña di exilio n’e isla di Egeo, Amorgos. Despues di un par di dia nan a transportá mi cu boto, cu mi mannan di bui, p’e isla ei. Mi tabata e único Testigo di Jehova na Amorgos. Imaginá bo mi sorpresa ora cu, despues di seis luna, mi a haña sa cu nan a deportá un otro Testigo n’e isla! Ta ken lo e por tabata? Minos Kokkinakis, mi studiante di Bijbel aya na Creta. Esta contentu mi tabata di tin un compañero spiritual! Algun tempu despues, mi tabatin e privilegio di bautis’é den e awanan di Amorgos.b

Djis despues cu mi a regresá Creta, nan a arestá mi atrobe, i e biaha aki nan a manda mi den exilio pa seis luna n’e stad chikitu Neapolis riba e isla ei. Despues cu mi exilio di seis luna a terminá, nan a bolbe arestá mi, i a hinca mi dies dia den prizon, i despues nan a manda mi cuater luna riba un isla cu tabata reservá pa comunistanan deportá. Mi a realisá ki cierto e palabranan di apostel Pablo tabata: “Tur esnan cu ta deseá di biba deboto na Dios den asociacion cu Cristo Jesus lo ser persiguí tambe.”—2 Timoteo 3:12.

Aumento Apesar di Persecucion

Ora Alemania a ocupá Grecia durante e añanan 1940 pa 1944, nos actividad di predicá a casi para. Sin embargo, e pueblo di Jehova na Grecia a reorganisá lihé, i nos a cuminsá di nobo cu nos actividad di predicá. Purbando di recuperá e tempu perdí, nos a sigui padilanti activamente i celosamente cu e trabou di Reino.

Manera nos a spera, oposicion religioso a bolbe lanta cabes. Tabatin vários biaha cu pastornan griego ortodox tabata tuma ley den nan mes man. Den un dje pueblonan, un pastor a instigá un multitud desordená contra nos. E pastor mes a cuminsá bati mi miéntras cu su yu tabata haci mescos di patras. Mi a core drenta un cas ei banda pa proteccion, miéntras cu nan a lastra e ruman cu ken mi tabata predicá hiba riba e plasa público dje pueblo. Einan e multitud desordená a kibra su literatura, i un muher a para den su balcon grita: “Mat’é!” Finalmente, un dokter i un polis cu tabata pasa ei banda a bin rescatá nos.

Despues na 1952, nan a arestá mi atrobe i sentenciá mi na cuater luna di exilio na Kastelli Kissamos, Creta. Poco dia despues, mi a haña entrenamentu pa bishitá e congregacionnan i fortalecé nan spiritualmente. Despues di a traha e trabou biahero aki pa dos aña, mi a casa cu un ruman muher fiel cu tabata yama Despina, mescos cu mi ruman muher carnal. Semper el a demostrá di ta un adoradó leal di Jehova. Despues cu nos a casa mi a haña asignacion pa bai traha pionero special den e pueblo Hania, Creta, unda ainda mi ta sirbi.

Durante casi 70 aña di sirbishi di tempu completo, mi a cubri mayoria parti di Creta, un isla di 8.300 kilometer cuadrá i cu un largura di mas of ménos 250 kilometer. Loke a duna mi e felicidad di mas grandi ta di mira un man yen di Testigo riba e isla aki den añanan ’30 crece bira mas cu 1.100 proclamadó activo di e Reino di Dios awe. Mi ta gradicí Jehova cu el a duna mi e oportunidad di participá den yuda hopi di e personanan aki gana conocimentu for di Bijbel i un speransa maraviyoso pa futuro.

Jehova, “e Percurador di Escape”

Di experencia mi por bisa cu pa bo yuda hende siña conocé e Dios berdadero, bo mester di perseverancia i pacenshi. Jehova ta percurá e cualidadnan hopi necesario aki generosamente. Durante mi 67 añanan di sirbishi di tempu completo, hopi bes mi a refleccioná riba e palabranan di apostel Pablo: “Di tur manera nos ta recomendá nos mes como ministernan di Dios, dor di wanta hopi, dor di tribulacion, dor di casonan di necesidad, dor di dificultad, dor di golpi, dor di prizon, dor di desordu, dor di trabou pisá, dor di anochinan sin drumi, dor di tempu sin cuminda.” (2 Corintionan 6:4, 5) Foral durante mi promé añanan di sirbishi, mi situacion financiero tabata hopi malu. Sin embargo, nunca Jehova no a bandoná ami ni mi famia. El a demostrá di ta un Yudante poderoso cu t’ei semper. (Hebreonan 13:5, 6) Semper nos a mira su man amoroso den reuní su carnénan i tambe den percurá pa nos necesidadnan.

Ora mi wak atras i mi mira cu, den sentido spiritual, e desierto a florecé, mi ta sigur cu mi trabou no tabata pornada. Mi a usa mi vigor hubenil den e manera mas beneficioso. Mi carera den e ministerio di tempu completo tabata mas significativo cu cualkier otro meta. Awor cu mi ta di edad avansá, cu tur sinceridad mi por animá esnan mas hóben pa ‘corda riba nan Magnífico Creador den e dianan di nan hubentud.’—Eclesiástes 12:1.

Maske mi tin 91 aña di edad, ainda mi por dedicá mas cu 120 ora tur luna den e trabou di predicá. Tur dia mi ta lanta 7:30 a.m. i mi ta duna testimonio na hende riba caya, den pacus of den parke. Mi ta laga un promedio di 150 revista pa luna. Awor, problemanan cu oido i memoria ta haci mi bida difícil, pero mi rumannan spiritual amoroso, mi famia spiritual grandi, i tambe e famianan di mi dos yu muhernan a resultá di ta un berdadero apoyo.

Riba tur cos, mi a siña pone mi confiansa den Jehova. For di principio el a proba cu e ta “mi baranca i mi fortalesa i e Percurador di escape pa mi.”—Salmo 18:2.

[Nota]

[Plachinan na página 26, 27]

Abou: Huntu cu mi casá; man robes: na 1927; página opuesto: huntu cu Minos Kokkinakis (man robes) i un otro Testigo na Acropolis, 1939, djis despues di a regresá for di exilio