Nos Búskeda pa un Bida Mas Largu

“Hende, nací di muher, tin un bida corticu i hartá cu molester. E ta sali manera flor i ta ser cortá, i ta core bai manera sombra i no ta sigui existí.” —Job 14:1, 2.

TE AWE poco hende lo contradicí e pensamentu aki di con corticu bida ta, aunke el a ser skirbí rond di 3.500 aña pasá. Semper hende a haña e idea di pasa brevemente dor dje flor di bida i despues bira bieu i muri, algu insatisfactorio. P’esei, atrabes di historia, a purba tur sorto di método pa prolongá bida.

Den tempu di Job, e egipcionan tabata come testículo di animal den un intento bano pa bira hóben atrobe. Un dje metanan principal di ciencia kímico di Edad Medio tabata pa producí un substancia cu lo por a yuda haci bida mas largu. Hopi kímico a kere cu oro artificial lo a duna hende bida inmortal i cu si hende come for di tayó di oro, esei lo a prolongá bida. E taoistanan chines di antigwedad a pensa cu nan lo por a cambia kímica dje curpa dor di usa técnicanan manera meditacion, ehercicio di hala rosea i dieta, i asina obtené inmortalidad.

E exploradó spañó, Juan Ponce de León, ta conocí pa su búskeda insaciabel p’e fuente di hubentud. Un dokter di siglo 18 a recomendá den su buki Hermippus Redivivus pa cera mucha muher bírgen den un kamber chikitu durante primavera i colectá e aire di nan rosea den botter i usa esei como un bebida pa alargá bida. No tin nodi bisa cu ningun dje métodonan aki tabatin éxito.

Awe, rond di 3.500 aña despues cu Moises a skirbi Job su declaracion, hende a cana riba luna, a inventá auto i computer i a investigá atom i cel. Tog, apesar di tur e adelantonan tecnológico ei, ainda nos “tin un bida corticu i hartá cu molester.” Ta berdad cu den paisnan desaroyá e speransa di bida a aumentá drásticamente durante e último siglo aki. Pero esaki ta principalmente e resultado di mihó cuido médico, medidanan di higiena mas eficas i mihó nutricion. Por ehempel, for di meimei di siglo 19 pa cuminsamentu di añanan ’90, e promedio di bida na Suecia a subi di 40 pa 75 aña pa hende homber, i di 44 pa 80 aña pa hende muher. Pero esei ta nificá cu hende a logra satisfacé su deseo pa biba mas largu?

No, pasobra maske den algun pais mas hende ta yega nan behes, e palabranan cu Moises a skirbi hopi aña pasá ta vigente ainda: “Riba nan mes e dianan di nos añanan ta setenta aña; i si debí na poder special nan ta ochenta aña . . . , pasobra e tin cu pasa bai lihé, i nos ta bula bai.” (Salmo 90:10) Nos lo mira un cambio den futuro cercano? Hende lo por biba hopi mas largu? E siguiente artículo lo contestá e preguntanan ei.