Pregunta di Lector

Con Testigonan di Jehova ta mira votamentu?

Den Bijbel tin principionan bon cla cu ta yuda sirbidónan di Dios tin e punto di bista corecto dje asuntu aki. Sin embargo, ta parce cu no tin ningun principio contra votamentu riba su mes. Por ehempel, no tin motibu pakico un hunta di directiva no por vota pa yega na decisionnan cu ta toca nan compania. Hopi bes, congregacionnan di Testigonan di Jehova pa dicidí tocante ora di reunion of uso di fondo di congregacion, ta vota dor di hisa man.

Pero, kico di vota den eleccion político? Claro cu den algun pais democrático, tin biaha te cu 50 porciento dje poblacion no ta bai vota riba dia di eleccion. Pa loke ta Testigonan di Jehova, nan no ta interferí cu e derecho di vota di otro hende, ni nan den ningun manera no ta haci campaña contra eleccionnan político. Nan ta respetá i cooperá cu e autoridadnan debidamente eligí den eleccionnan asina. (Romanonan 13:1-7) Pa loke ta si nan personalmente lo vota pa un hende cu ta riba lista di eleccion, esei ta un decision personal cu cada Testigo di Jehova ta tuma basá riba su concenshi bíblicamente entrená i basá riba loke e ta comprendé ta su responsabilidad pa cu Dios i pa cu Estado. (Mateo 22:21; 1 Pedro 3:16) Ora di tuma e decision personal aki, e Testigonan ta tuma vários factor na cuenta.

Na promé lugá, Jesucristo a bisa di su siguidónan: “Nan no ta parti di mundu, mescos cu ami no ta parti di mundu.” (Juan 17:14) Testigonan di Jehova ta tuma e principio aki na serio. Dor cu nan “no ta parti di mundu,” nan ta neutral den asuntunan político di mundu.—Juan 18:36.

Na di dos lugá, apostel Pablo a yama su mes un “embahador” cu a representá Cristo cerca e hendenan den su tempu. (Efesionan 6:20; 2 Corintionan 5:20) Testigonan di Jehova ta kere cu actualmente, Cristo Jesus ta e Rey entronisá di Dios su Reino celestial, i cu nan, mescos cu embahador, tin cu anunciá esaki n’e nacionnan. (Mateo 24:14; Revelacion 11:15) Hende ta verwagt di embahador cu nan ta neutral i no ta interferí den asuntunan interno dje pais caminda manda nan. Como representante di Dios su Reino celestial, Testigonan di Jehova ta sinti e mésun obligacion di no interferí den política dje pais caminda nan ta biba.

Un di tres factor pa considerá ta cu esnan cu vota pa un persona, por bira responsabel pa loke e haci. (Compará cu 1 Timoteo 5:22, The New English Bible.) Cristiannan tin cu evaluá cuidadosamente si nan kier carga e responsabilidad ei of no.

Di cuater, Testigonan di Jehova ta duna hopi balor na nan unidad cristian. (Colosensenan 3:14) Ora religion ta mete den política, hopi bes esei ta resultá den desunion entre su miembronan. Mescos cu Jesucristo, Testigonan di Jehova ta evitá di mete den política i dje manera ei nan ta mantené nan unidad cristian.—Mateo 12:25; Juan 6:15; 18:36, 37.

Di cincu i último, dor cu Testigonan di Jehova no ta mete den política nan tin frankesa di expresion pa acercá hende di tur credo político cu e mensahe importante dje Reino.—Hebreonan 10:35.

En bista dje principionan bíblico describí ariba, Testigonan di Jehova den hopi pais ta tuma e decision personal di no vota den eleccionnan político. Ley dje pais ta duna nan e libertad di tuma e decision ei. Pero, kico si ley ta exigí ciudadanonan pa bai vota? Den un caso asina, cada Testigo tin e responsabilidad pa tuma un decision segun su concenshi i basá riba Bijbel en cuanto con pa manehá e situacion. Si un hende dicidí cu e ta bai urna, esei ta su decision. Loke e ta haci den e urna electoral, ta entre e i su Creador.

E edicion na ingles di E Toren di Vigilancia di 15 di november 1950, na página 445 i 446, a bisa: “Caminda César ta exigí pa su ciudadanonan vota . . . [Testigonan] por bai urna i drenta den e hoki pa vota. Ta eiden ta rekerí di nan pa marca e papel di vota pa indicá na unda nan ta pará. E votadónan ta haci loke nan kier cu nan papel di vota. Pues ei, den presencia di Dios ta unda su testigonan tin cu actua na armonia cu su mandamentunan i di acuerdo cu nan fe. No ta nos responsabilidad pa instruí nan kico pa haci cu e papel di vota.”

Kico si un esposo incrédulo ta insistí pa su señora cristian bai urna pa vota? Wel, e ta sometí na su esposo, mescos cu cristiannan ta sometí na autoridadnan superior. (Efesionan 5:22; 1 Pedro 2:13-17) Si e obedecé su esposo i bai urna, esei ta su decision personal. Ningun hende no mag critik’é.—Compará cu Romanonan 14:4.

Kico di un pais caminda ley no ta exigí pa bo bai vota, pero e pueblo ta masha contra esnan cu no bai urna, kisas nan bida ta asta den peliger? Of kico si no tin obligacion legal pa bai vota pero sí bo ta ricibí un castigu severo den un of otro manera si bo no bai urna? Den e situacionnan aki i otronan similar, un cristian tin cu tuma su mes decision. “Cada un lo hiba su mes carga di responsabilidad.”—Galationan 6:5.

Podisé tin hende ta trompecá riba e echo cu ora tin eleccion den nan pais, nan ta mira algun Testigo di Jehova ta bai urna i otronan no. Tal bes nan ta bisa: ‘Testigonan di Jehova no ta consistente.’ Pero hende tin cu reconocé cu den asuntunan manera esaki, cu ta trata dje concenshi di cada persona, cada cristian tin cu tuma su mes decision dilanti Jehova Dios.—Romanonan 14:12.

Sea cual sea e decisionnan personal cu Testigonan di Jehova ta tuma ora nan haña nan confrontá cu diferente situacion, nan ta soru pa conserbá nan neutralidad cristian i frankesa di expresion. Den tur cos, nan ta dependé riba Jehova Dios pa fortalecé nan, pa duna nan sabiduria i yuda nan evitá di comprometé nan fe den un manera of otro. Asina nan ta mustra confiansa den e palabranan dje salmista: “Bo ta mi baranca steil i mi fortalesa; i pa causa di bo nomber lo bo guia mi i conducí mi.”—Salmo 31:3.