Cyril Lucaris​—Un Homber Cu Tabatin Balor di Bijbel

Tabata un dia den zomer di aña 1638. Piscadónan den laman di Marmara cerca di Constantinopla (awor Istanbul), e capital di Imperio Ottoman, a spanta ora nan a mira un cadaver ta drif den awa. Ora nan a bai inspeccion’é mas djacerca, nan a realisá cu horor cu e curpa strangulá tabata dje patriarca ecuménico di Constantinopla, cabes di Iglesia Ortodox. Esaki tabata e fin trágico di Cyril Lucaris, un figura religioso prominente di siglo 17.

LUCARIS no a biba suficiente largu pa mira su soño bira realidad, esta, publicacion di un traduccion dje Scritura Griego Cristian n’e idioma griego comun. Un otro soño di Lucaris cu nunca no a ser realisá ta di mira Iglesia Ortodox bolbe na “simplicidad di evangelio.” Ken e homber aki tabata? Ki obstáculonan el a encontrá den su intento pa logra e cosnan aki?

Falta di Educacion Ta Shok E

Cyril Lucaris a nace na 1572, na Candia cu tabata bou di control di Venecia (awor Iráklion), Creta. Dor cu e tabatin hopi talento, el a studia na Venecia i Padua, na Italia, i despues el a biaha rond e pais ei i tambe den otronan. Kisas el a bishitá Ginebra, cu e tempu ei tabata bou di influencia di calvinismo, ya cu e tabata amargá dor dje lucha entre secta den iglesia i movementunan di reformacion na Europa a atra’é.

Miéntras e tabata di bishita na Polonia, Lucaris a ripará cu einan e ortodoxnan, tantu pastor como laico, tabata den un condicion spiritual deplorabel debí na nan falta di educacion. Ora el a bolbe bek na Alehandria i Constantinopla, el a spanta ora el a ripará cu nan a saca asta preekstoel, caminda lesamentu dje Scritura tabata tuma lugá, for di algun misa!

Na 1602, Lucaris a bai Alehandria, unda el a bira sucesor di un famia di dje, patriarca Meletios, den e puesto di obispu. Anto el a cuminsá corespondé cu vários teólogo cu ideanan reformista na Europa. Den un di su cartanan, el a remarcá cu Iglesia Ortodox a sostené hopi práctica eróneo. Den otro cartanan, el a enfatisá cu iglesia mester remplasá supersticion pa “simplicidad di evangelio” i dependé riba autoridad dje Scritura so.

Lucaris tabata preocupá tambe pasobra hende tabata considerá e autoridad spiritual dje Tatanan di Iglesia di mésun balor cu e palabranan di Jesus i su apostelnan. “Mi no por sigui soportá pa tende hende bisa cu e splicacionnan di tradicion humano tin mésun peso cu e Scritura,” el a skirbi. (Mateo 15:6) El a agregá cu na su opinion, adoracion di imágen ta desastroso. El a remarcá cu inbocacion di “santu” ta un insulto contra e Mediador, Jesus.—1 Timoteo 2:5.

Puesto di Patriarca na Benta

E ideanan ei di Lucaris, huntu cu su disgustu den Iglesia Católico Romano, a pone cu e jesuitanan i miembronan di Iglesia Ortodox cu tabata na fabor di un union cu e católiconan, a cuminsá odi’é i persiguié. Apesar di e oposicion ei, Lucaris a ser elegí como patriarca di Constantinopla na 1620. N’e tempu ei, e funcion di patriarca di Iglesia Ortodox tabata cai bou di dominio dje Imperio Ottoman. E gobiernu ottoman tabata cla pa remové un patriarca i pone un nobo a cambio di placa.

Lucaris su adversarionan, principalmente e jesuitanan i e temibel i todopoderoso comité papal Congregatio de Propaganda Fide (Congregacion pa Propagá e Fe), a sigui gaña riba dje i conspirá contra dje. “Den nan afan pa cumpli cu esaki, e jesuitanan a usa tur medio: triki, calumnia, labiamentu i, mas cu tur cos, soborno. Esaki a sobresalí como e arma mas eficas pa gana fabor di e hombernan di estado [ottoman],” segun e obra Kyrillos Loukaris. Como resultado, na 1622 nan a hiba Lucaris den exilio n’e isla di Rodas i Gregorio di Amasya a cumpra e puesto pa 20.000 moneda di plata. Sin embargo, dor cu Gregorio no por a presentá cu e suma primintí, Anthimus di Adrianópolis a cumpra e puesto, i tog poco despues a entregá su retiro. Sorprendentemente, nan a bolbe restorá Lucaris riba e trono di patriarca.

Lucaris tabata decididu pa usa e oportunidad nobo aki pa educá clero i laiconan ortodox dor di publicá un traduccion di Bijbel i tratadonan teológico. Pa logra esaki, el a haci areglo pa nan trece un mashin di imprenta na Constantinopla, bou di proteccion dje embahador ingles. Sin embargo, ora e mashin a yega na juni 1627, Lucaris su enemigunan a acus’é di ta usa e mashin pa propósitonan político, i cu tempu nan a logra cu e mashin a ser destruí. Awor, Lucaris mester a usa e mashinnan di imprenta na Ginebra.

Un Traduccion dje Scritura Cristian

Lucaris su respet profundo pa Bijbel i esaki su poder pa educá hende, a stimulá su deseo pa haci Bijbel su palabranan mas accesibel pa hende comun. El a reconocé cu e idioma usá den e manuscritonan original dje Bijbel griego inspirá, no tabata comprendibel mas pa hende comun. P’esei, e promé buki cu Lucaris a encargá ta un traduccion dje Scritura Griego Cristian, n’e idioma griego di su tempu. Maximus Callipolites, un mónik erudito, a cuminsá traha riba dje na mart 1629. Sin importá cu di otro manera e texto lo ta hopi incomprendibel pa lector, hopi miembro dje Iglesia Ortodox a considerá traducí e Scritura algu escandaloso. Pa calma nan, Lucaris a laga druk e texto original i e traduccion moderno den columna banda di otro, i a agregá solamente algun comentario. Dor cu Callipolites a muri djis despues cu el a entregá e manuscrito, Lucaris mes a lesa e documento di coreccion. Nan a druk e traduccion aki djis despues cu Lucaris a muri na 1638.

Maske Lucaris a tuma precaucion, e traduccion a lanta un ola di desaprobacion di hopi obispu. Lucaris su amor p’e Palabra di Dios tabata mas cu bisto den e introduccion dje traduccion ei di Bijbel. El a skirbi cu e Scritura, presentá den e idioma cu pueblo ta papia, ta “un mensahe dushi, cu nos a haña for di shelu.” El a amonestá pueblo “pa nan conocé i familiarisá nan mes cu henter e contenido [di Bijbel]” i a bisa cu no tin otro manera pa siña tocante “e cosnan relacioná cu fe corectamente . . . sino ta mediante e Evangelio divino i sagrado.”—Filipensenan 1:9, 10.

Lucaris a denunciá esnan cu a prohibí studio di Bijbel i tambe esnan cu a rechasá e traduccion dje texto original severamente: “Si nos ta papia of lesa sin comprendé, ta como si fuera tira nos palabranan den bientu.” (Compará cu 1 Corintionan 14:7-9.) Na conclusion dje introduccion el a skirbi: “Miéntras boso tur ta lesa e Evangelio divino i santu aki den boso mes lenga, saca pleno probecho for dje lesamentu, . . . i cu Dios semper lusa boso caminda na loke ta bon.”—Proverbionan 4:18.

Un Confesion di Fe

Despues cu el a iniciá e traduccion ei di Bijbel, Lucaris a dal otro paso cu curashi. Na 1629, el a publicá na Ginebra un Confesion di Fe. Esaki tabata un declaracion personal di creencianan cu el a spera cu Iglesia Ortodox lo a adoptá. Segun e buki The Orthodox Church, (E Iglesia Ortodox), e Confesion ei “ta kita tur nificacion for dje doctrina ortodox di sacerdocio i órdennan santu. Tambe e ta lamentá cu veneracion di imágen i inbocacion di santu ta formanan di idolatria.”

E Confesion ta consistí di 18 artículo. Su di dos artículo ta declará cu e Scritura ta inspirá dor di Dios i cu e tin mas autoridad cu iglesia. E ta bisa: “Nos ta kere cu e Santu Scritura ta bini di Dios . . . Nos ta kere cu e autoridad dje Santu Scritura ta mas cu e autoridad di Iglesia. Ser siñá dor dje Spiritu Santu ta algu completamente diferente for di ser siñá dor di hende.”—2 Timoteo 3:16.

Artículonan ocho i dies ta sostené e idea cu Jesucristo ta e único Mediador, Sumo Sacerdote i Cabes dje congregacion. Lucaris a skirbi: “Nos ta kere cu nos Señor Jesucristo ta sinta na man drechi di Su Tata i einan E ta intercedé pa nos, i e so ta cumpli cu e puesto di un berdadero i legítimo sumo sacerdote i mediador.”—Mateo 23:10.

Artículo 12 ta declará cu iglesia por desviá i confundí falsedad pa berdad, pero e lus di spiritu santu lo por rescat’é mediante trabou di ministernan fiel. Den artículo 18, Lucaris ta sostené e idea di cu purgatorio ta nada mas cu un invento: “Ta bisto cu no mester permití e ficcion di Purgatorio.”

E apéndix dje Confesion ta contené un cantidad di pregunta i contesta. Einan Lucaris, na promé lugá ta enfatisá cu delaster un fiel mester lesa e Scritura i cu si un cristian keda sin lesa e Palabra di Dios, esei ta dañino p’e. Despues e ta agregá cu mester keda leu dje bukinan apócrifo.—Revelacion 22:18, 19.

E di cuater pregunta dje apéndix ta: “Con nos mester considerá Imágen?” Lucaris ta contestá: “E Santu Scritura Divino ta siña nos, i e ta bisa bon cla: ‘Bo no mag traha pa bo mes un ídolo, ni un forma parecido na cualkier cos cu ta den shelu ariba of cu ta riba tera abou; bo no mag venerá nan, ni tampoco adorá nan; [Exodo 20:4, 5]’ ya cu nos tin cu adorá, no e creacion, sino solamente e Creador i Trahador di shelu i tera, i adorá E so. . . . Dor cu adoracion i sirbishi na [imágen] ta ser prohibí . . . den e Sagrado Scritura, nos ta rechas’é pa nos no lubidá, i adorá color i arte i creacion en bes di e Creador i Hacidor.”—Echonan 17:29.

Aunke Lucaris no por a dicerní completamente tur e erornan den e era di scuridad spiritual den cua el a biba,a el a haci esfuersonan encomendabel pa laga Bijbel bira e autoridad den asuntunan di doctrina di iglesia i pa educá hende den su siñansanan.

Inmediatamente despues di publicacion di e Confesion aki, un ola di oposicion a bolbe lanta contra Lucaris. Na 1633, Cyril Contari, e obispu metropolitano di Berea (awor Aleppo), un enemigu personal di Lucaris cu tabatin apoyo dje jesuitanan, a purba negoshá e puesto di patriarca cu e ottomannan. Sin embargo, e plan a cai na awa ora Contari no por a paga e placa. Lucaris a keda cu e puesto. E siguiente aña Atanasio di Tesalónica a paga 60.000 moneda di plata p’e puesto. Atrobe nan a baha Lucaris for dje puesto. Pero denter di un luna nan a yam’é bek i bolbe instal’é como tal. P’e tempu ei, Cyril Contari a colectá 50.000 moneda di plata. E biaha aki nan a manda Lucaris den exilio na Rodas. Despues di seis luna su amigunan a logra pon’é na su puesto bek.

Sin embargo, na 1638 jesuitanan i nan colaboradónan ortodox a acusá Lucaris di a intentá alto traicion contra e Imperio Ottoman. E biaha aki e sultan a ordená su morto. Nan a arestá Lucaris, i dia 27 di juli 1638 nan a hib’é riba un boto chikitu como si fuera pa bai den exilio. Asina cu e boto tabata riba laman, nan a strangul’é. Nan a dera su curpa cant’i laman, i despues nan a sak’é i bent’é na awa. Piscadónan a hañ’é i despues su amigunan a der’é.

Les pa Nos

“Nos no mester lubidá cu un di [Lucaris su] metanan principal tabata pa lusa i elevá e nivel educacional di su clero i tou, cu den siglo dieseis i na principio di siglo dieshete a sink te abou,” un erudito ta declará. Un gran cantidad di obstáculo a stroba Lucaris di logra su doel. Nan a remov’é cincu biaha for dje puesto di patriarca. Trinticuater aña despues di su morto, un sinodo na Jerusalem a maldicioná su creencianan como herehia. Nan a declará cu “no ta cualkier hende mester lesa [e Scritura], sino solamente esnan cu ta coba cuidadosamente den e cosnan profundo di spiritu despues cu nan a haci investigacion adecuá,” esta, solamente e miembronan di clero kendenan tabata supuestamente educá.

Un biaha mas, e clase eclesiástico cu ta dominá, a suprimí esfuersonan pa haci e Palabra di Dios disponibel pa nan tou. Violentamente nan a silenciá un bos cu a señalá algun dje erornan di nan creencianan no-bíblico. Nan a duna prueba di ta e pió enemigunan di libertad religioso i berdad. Ta di lamentá cu e actitud aki ta unu cu den vários manera ta sobrebibí asta te den nos tempu. E ta un recordatorio serio di loke ta sosodé ora intriga cu clero ta instigá ta para den caminda di libertad di pensamentu i expresion.

[Nota]

[Komentario na página 29]

Lucaris a haci esfuersonan encomendabel pa laga Bijbel bira e autoridad den asuntunan di doctrina di iglesia i pa educá hende den su siñansanan

[Kuadro/Plachi na página 28]

Lucaris i e Codex Alexandrino

Un dje hoyanan di e Biblioteca Británico ta e Codex Alexandrino, un manuscrito bíblico di siglo cincu E.C. Di su blachinan original cu posiblemente tabata 820, nan a conserbá 773.

Tempu Lucaris tabata patriarca di Alehandria, Egipto, e tabatin un coleccion grandi di buki. Ora el a bira patriarca na Constantinopla, el a hiba e Codex Alexandrino huntu cuné. Na 1624, el a ofrec’é n’e embahador británico na Turkia como un regalo p’e rey ingles, James I. Tres aña despues, nan a dun’é na su sucesor, Charles I.

Na 1757, nan a duna e Biblioteca Real di Rey n’e nacion británico, i awor nan ta exhibí e excelente codex aki den e Galeria John Ritblat dje Biblioteca Británico nobo.

[Rekonosementu]

Gewerbehalle, Vol. 10

For di The Codex Alexandrinus in Reduced Photographic Facsimile, 1909

[Rekonosementu pa Potrèt na página 26]

Bib. Publ. Univ. de Genève