Bo Por Haña Pas Interno?

Na aña 1854, autor mericano Henry Thoreau a skirbi: “E masa di hende ta hiba un bida di desesperacion den silencio.”

Tur cos ta mustra cu den su tempu mayoria hende no tabata disfrutá di pas interno. Pero esei tabata casi 150 aña pasá. Cosnan a cambia awe? Of Thoreau su palabranan ta vigente ainda? Kico di abo personalmente? Bo ta contentu, na pas? Of bo falta confiansa, ta insigur tocante futuro, ‘silenciosamente desesperá,’ pa expresá Thoreau su palabranan un otro manera?

DESAFORTUNADAMENTE, tin hopi cos na mundu cu ta kita hende su pas interno. Laga nos mencioná djis un par. Den hopi pais, desempleo i entrada abou ta causa pobresa i, cuné ta bin desesperacion económico. Den otro paisnan, hopi hende ta dedicá mayoria di nan energia na core tras di rikesa i posesion material. Sin embargo, hopi bes e estilo di bida di competencia cu esei ta encerá, ta trece ansiedad, no pas. Enfermedad, guera, crímen, inhusticia i opresion tambe ta kita pas di hende.

Nan A Busca Pas Interno

Hopi hende no ta dispuesto pa tolerá e mundu manera e ta. Antônioa tabata un lider sindical den un fábrica grandísimo na São Paulo, Brazil. Cu e speransa pa mehorá condicionnan di bida, el a participá den protesta i demostracionnan, pero esaki no a dun’é pas mental.

Tin hende ta spera cu matrimonio lo trece un midí di trankilidad den nan bida, pero nan por keda desapuntá. Marcos tabata un comerciante exitoso. El a drenta política i a bira alcalde di un stad industrial. Sin embargo, su bida na cas tabata un fracaso completo. Ora su yunan a sali for di cas, e cu su casá a separá pa motibu di desacuerdonan ireconciliabel.

Gerson, un mucha di caya na Salvador, Brazil, tabata kier aventura. E tabata dualu di stad pa stad, biahando cu shofer di truck. No a tarda mashá cu el a bira un drogadicto, hortando hende pa paga pa su bicio. Vários bes polis a arest’é. Pero, apesar di su personalidad agresivo i violento, Gerson a anhelá pas interno. Lo e por a haña esei un dia?

Tempu cu Vania tabata yong ainda, su mama a muri, i Vania a bira responsabel p’e cas. Incluso, e mester a cuida su ruman muher malu. Vania tabata bai misa pero a sinti cu Dios a bandon’é. E sigur no tabatin pas mental.

Tabatin Marcelo tambe. Tur loke Marcelo tabata kier ta placer. E tabata gusta bai fiesta cu otro hóbennan—baila, bebe i usa droga. Un biaha el a bringa i heridá un otro hóben. Despues di esei, el a haña masha duele di loke el a haci i a resa pidi Dios yud’é. E tambe tabata kier pas mental.

E experencianan aki ta ilustrá algun situacion cu por caba cu pas mental. Tabatin un manera cu e lider sindical, e político, e mucha di caya, e yu muher agotá i e baidó di fiesta por a alcansá e pas interno cu nan tabata busca? Loke a sosodé cu nan ta siña nos algu? E contesta riba ámbos pregunta ta sí, manera nos lo mira den e siguiente artículo.

[Nota]

[Plachi na página 3]

Abo ta anhelá pas interno?