Un Anuncio Special
NA CONCLUSION dje reunion anual di Watch Tower Bible and Tract Society of Pennsylvania dia 7 di october 2000, e presidente dje reunion John E. Barr, miembro dje Cuerpo Gobernante, a haci un anuncio special. E anuncio aki tabata basá riba e discursonan cu Theodore Jaracz i Daniel Sydlik a duna mas promé e dia ei.—Mira página 12-16 i 28-31 di e revista aki.
Treciendo un punto masha importante padilanti, ruman Barr a declará: “‘E esclabo fiel i discreto’ i su Cuerpo Gobernante a ser confiá cu interesnan cu ta mas elevá i hopi mas extenso cu esnan duná n’e corporacionnan legal. Statuto di cada un dje entidadnan aki ta stipulá asuntunan cu ta di alcanse limitá. Sin embargo, nos Doño, Jesucristo, a nombra e clase di esclabo fiel riba tur su ‘pertenencianan,’ esta, su interesnan di Reino aki riba tera.”—Mateo 24:45-47.
Relacioná cu e corporacion di Pennsylvania, ruman Barr a agregá: “Semper desde su incorporacion na aña 1884, Watch Tower Bible and Tract Society of Pennsylvania a hunga un papel importante den nos historia moderno. Sin embargo, e ta solamente un instrumento legal na disposicion di ‘e esclabo fiel i discreto’ p’e usa ora ta necesario.”
Den nan discursonan, ruman Sydlik i Jaracz a splica cu e echo cu “e esclabo fiel i discreto” a ser confiá cu tur e pertenencianan terenal di Señor no ta stroba e clase di esclabo di permití hombernan cualificá for di entre e “otro carnénan” pa percurá pa cierto responsabilidadnan administrativo rutinario. (Juan 10:16) Tampoco no tin ningun motibu bíblico pa insistí cu tur of cualkier dje directornan dje entidadnan legal cu Testigonan di Jehova ta usa, mester ta cristiannan ungí.
Ruman Barr a bisa e auditorio cu recientemente cierto miembronan dje Cuerpo Gobernante di Testigonan di Jehova cu tabata sirbi como director i funcionario, boluntariamente a baha como director for dje huntanan di tur e corporacionnan cu “e esclabo fiel i discreto” tabata usa na Merca. A elegí ruman hombernan responsabel dje clase di otro carné pa remplasá nan.
En berdad e decision aki ta unu beneficioso. E ta permití miembronan dje Cuerpo Gobernante dedicá mas tempu na preparacion di cuminda spiritual i na otro formanan di percurá pa necesidadnan spiritual dje hermandad mundial.
En conclusion e presidente a bisa su auditorio entusiasmá: “Maske vários responsabilidad legal i administrativo a ser asigná na superintendentenan experenciá, . . . nan tur ta sirbi bou di direccion spiritual dje Cuerpo Gobernante. . . . Nos tur ta acudí cu oracion na Jehova p’e bendicioná nos esfuersonan uní den haci su boluntad, pa onor i gloria di su gran nomber.”