E Resureccion di Jesus Ta bou di Acusacion

“Mi por bisa bo francamente cu aunke nos por ta absolutamente sigur cu Jesus a biba . . . , nos no por bisa cu e mésun siguransa cu nos sa cu Dios a lant’É for di morto.” Esei ta declaracion di e arsobispu di Canterbury, prelado di alto rango den Iglesia di Inglatera.

APOSTEL cristian Pablo no tabatin duda en cuanto e resureccion. Den capítulo 15 di su promé carta inspirá na compañeronan cristian den antiguo Corinto, Pablo a skirbi: “Mi a pasa na boso, entre e promé cosnan, loke ami tambe a ricibí, cu Cristo a muri pa nos picánan segun e Scritura; i cu el a ser derá, sí, cu el a ser lantá e di tres dia segun e Scritura.”—1 Corintionan 15:3, 4.

Ta fe den e resureccion di Jesucristo a conmové su disipelnan pa predicá evangelio den henter e mundu griego-romano, “den tur creacion cu ta bou di shelu.” (Colosensenan 1:23) Realmente, e resureccion di Jesus ta e fundeshi mes dje fe cristian.

Sin embargo, desde comienso mes e resureccion di Jesus a parce algu increibel pa hopi hende. Pa e hudiunan en general, Jesus su siguidónan a blasfemá dor di bisa cu e homber aki clabá na staca tabata Mesías. I pa mayoria di griego educá, cu nan creencia den inmortalidad di alma, e idea mes di un resureccion tabata repugnante.—Echonan 17:32-34.

Hende Moderno Cu Ta Duda

Den añanan recien, algun erudito cu ta pretendé di ta cristian a publicá buki i artículonan den cua nan a considerá e resureccion di Jesus como fábula i a iniciá un debate fuerte riba e tópico aki. Den nan búskeda pa “e Jesus histórico,” vários erudito ta argumentá cu e relatonan di Evangelio tocante e graf bashí i Jesus su aparicion despues di su resureccion ta nada otro cu ficcion, inventá hopi tempu despues di su morto pa sostené e afirmacionnan di su poder celestial.

Tuma por ehempel e punto di bista di erudito aleman Gerd Lüdemann, profesor di Testament Nobo i autor di e buki What Really Happened to Jesus—A Historical Approach to the Resurrection (Loke Realmente A Sosodé cu Jesus—Un Ángulo Histórico di e Resureccion). E ta argumentá cu e resureccion di Jesus ta “un formulá bashí” cu tur hende cu tin “un punto di bista científico di mundu,” mester rechasá.

Profesor Lüdemann ta para ariba cu e Cristo resucitá cu a aparecé na apostel Pedro tabata un halucinacion cu Pedro a haña como resultado di e sintimentunan di tristesa i culpa aplastante cu e tabatin pa motibu cu el a nenga Jesus. I segun Lüdemann, Jesus su aparicion na mas cu 500 creyente na un ocasion tabata un caso di “éxtasis masal.” (1 Corintionan 15:5, 6) En corto, hopi erudito ta rebahá e relatonan bíblico tocante Jesus resucitá na un seri di experencia subhetivo cu a producí den e disipelnan un sintimentu renobá di confiansa spiritual propio i celo di misionero.

Naturalmente, hopi hende tin poco interes den controversia intelectual. Tog, nos tur mester ta interesá den papia tocante e resureccion di Jesus. Di con? Pasobra, si e no a resucitá, cristianismo ta basá riba un fundeshi falsu. Di otro banda, si e resureccion di Jesus realmente ta un echo histórico, cristianismo ta basá riba e berdad. Bou di tal circunstancia, no solamente Cristo su afirmacionnan ta corecto sino tambe su promesanan. Ademas, si tin un resureccion, morto no ta e gran victoria sino un enemigu cu por ser vencí.—1 Corintionan 15:55.

[Rekonosementu pa Potrèt na página 3]

For di Self-Pronouncing Edition of the Holy Bible, cu ta contené e versionnan King James i Revised