Palunan Resistente

Podisé un baranca steil no ta parce e lugá ideal pa traha bo cas, foral si e ta ubicá te na haltu den ceru. Sin embargo, apesar di e aparente desbentahanan, tin cierto palu di ceru cu ta tene masha duru na e barancanan ei i balentemente nan ta wanta e friu enorme di winter i e secura di zomer.

GENERALMENTE e palunan resistente aki no ta grandi manera otro especie den nan famia cu ta crece riba tera plat. Nan stam sa ta trocí i krom i nan no ta crece mashá. Tin di nan asta ta parce bonsai natural, formá i di snui dor dje clima severo i e poco tera cu nan ta crece aden.

Dor cu nan tin cu soportá un dje medio ambientenan di mas inhospitalario riba tera, kisas bo ta asumí cu e palunan ei no ta biba mashá. Pero lo contrario ta berdad. Tin hende ta bisa cu Metúsalem, e pino aristata cu ta crece na un haltura di 3.000 meter den White Mountains, na California, tin 4.700 aña. The Guinness Book of Records 1997 ta mencioná e palu aki como esun di mas bieu riba tera. Edmund Schulman, kende a studia e palunan bieu aki, a splica: ‘Ta parce cu ta adversidad ta pone cu pino aristata ta sobrebibí. Tur e individuonan [palunan di pino] mas bieu cu nan a haña den White Mountains ta ubicá na casi 3.000 meter haltu, den un mondi secu i yen di baranca.’ Tambe Schulman a descubrí cu e matanan mas bieu di otro tipo di pino tambe ta crece den condicionnan severo.

Maske nan tin cu vence adversidad, e ehempelnan aki di awante ta probechá di e dos bentahanan cu nan tin. Nan sitio solitario, caminda yerba ta scars, ta protehá nan contra candela di mondi cu ta un dje menasanan mas grandi pa palunan madurá. I nan rais ta asina firme ankrá n’e baranca cu ta un temblor so por move nan.

Bijbel ta compará sirbidónan fiel di Dios cu palu. (Salmo 1:1-3; Jeremías 17:7, 8) Nan tambe kisas ta enfrentá adversidad debí n’e circunstancianan cu nan ta haña nan aden. Persecucion, enfermedad of pobresa opresivo por pone nan fe severamente na prueba, foral si e pruebanan ta sigui aña tras aña. No obstante, nan Creador, Esun cu a diseñá e palunan cu ta wanta adversidad asina bon, ta sigurá su adoradónan cu lo e sostené nan. Bijbel ta primintí esnan cu ta mantené nan posicion: “Lo e haci boso firme, lo e haci boso fuerte.”—1 Pedro 5:9, 10.

E pensamentu tras di e verbo griego cu hopi bes Bijbel ta traducí como “wanta,” ta ‘mantené bo posicion, para firme of perseverá.’ Mescos cu ta e caso cu palu di ceru, raisnan bon ankrá ta e clave pa awante. Den caso di cristiannan, nan mester ta firmemente ankrá den Jesucristo pa nan por para firme. Pablo a skirbi: “Ya cu boso a aceptá Cristo Jesus e Señor, sigui cana den union cuné, cu rais den dje i siendo edificá den dje i siendo stabilisá den e fe, net manera boso a ser siñá, brotando over cu fe den gradicimentu.”—Colosensenan 2:6, 7.

Pablo a comprendé cu rais spiritual fuerte ta un mester. E mes a lucha cu “un sumpiña den carni,” i atrabes di su ministerio el a wanta persecucion severo. (2 Corintionan 11:23-27; 12:7) Pero el a descubrí cu den forsa di Dios e por a sigui padilanti. El a declará: “Pa tur cos mi tin e forsa den birtud di esun cu ta duna mi poder.”—Filipensenan 4:13.

Manera e ehempel di Pablo ta mustra, awante cristian exitoso no ta dependé di circunstancianan faborabel. Mescos cu e palunan di ceru cu pa siglonan ta pasa exitosamente dor di tormenta, nos por para firme den fe si nos tin rais den Cristo i ta dependé riba e poder cu Dios ta duna. Ademas, si nos wanta te na fin, nos lo tin e prospecto di experenciá pa nos mes e cumplimentu di un otro promesa divino: “E dianan di mi pueblo lo ta mescos cu e dianan di un palu.”—Isaías 65:22; Mateo 24:13.