Pregunta di Lector

Con e baranan pa transportá e arca di pacto tabata posicioná, siendo cu 1 Reynan 8:8 ta indicá cu nan tabata visibel for di e Lugá Santu?

Ora Jehova a duna Moises e diseño pa traha e tabernáculo den desierto, un rasgo principal di dje tabata e arca di pacto. Den e caha rectangular cubrí cu oro aki tabatin e tablanan dje Ley i otro artículonan. E tabata wardá den e seccion di mas interior, esta, e Santísimo. Riba tapa dje Arca tabatin dos figura di oro cu ta representá kerubin cu ala di span. Na cada banda dje Arca tabatin renchi pa asina por a transportá e arca cu dos bara, trahá di palu di acacia furá cu oro. Ta lógico cu e baranan a pasa dor dje renchinan i a core den largura di e Arca. Pues, ora e Arca tabata na su lugá den e Santísimo dje tabernáculo cu tabata cara pa oost, e baranan tabata den direccion nort-zuid. Esei tabata e caso tambe despues ora cu e Arca tabata den e tempel cu Sálomon a construí.—Éxodo 25:10-22; 37:4-9; 40:17-21.a

Un cortina a separá e Santísimo for di e Lugá Santu (e kamber exterior). Sacerdotenan den e Lugá Santu no por a wak den e Santísimo i mira e Arca, riba cua Dios a presentá su mes. (Hebreonan 9:1-7) Pues, 1 Reynan 8:8 por parce di confundí hende un poco: “Pero e baranan di transporte a resultá largu, di manera cu punta di e baranan tabata visibel for di e Lugá Santu den e parti dilanti di e kamber mas interior, pero nan no tabata visibel pafó.” E mésun punto ta bini padilanti na 2 Crónicanan 5:9. Den ki manera e baranan tabata visibel pa hende den e Lugá Santu dje tempel?

Tin hende ta imaginá nan cu e baranan a mishi cu e cortina i forma asina un bol visibel den e cortina. Pero esei lo no tabata e caso si e baranan tabata den direccion nort-zuid, i e cortinanan paralelo cu e baranan. (Númeronan 3:38) Tin un splicacion mas razonabel. E baranan lo por tabata visibel si tabatin un habrí smal entre e cortina i e muraya di tempel, of ora e sumo sacerdote mester a drenta e Santísimo. E cortina a stroba hende di mira e Arca mes, pero e baranan mas largu na cada banda sí lo por tabata visibel dor di e habrí. Maske esaki por ta un posibel splicacion, nos no por ta dogmático riba e punto aki.

Ta bisto cu tin hopi detaye cu nos tin cu siña ainda. Apostel Pablo a mencioná un par di aspecto den su carta na e Hebreonan. Despues el a comentá: “Pero awor no ta e tempu pa papia den detaye tocante e cosnan aki.” (Hebreonan 9:5) E binidero resureccion di hende fiel lo mester duna nos oportunidadnan animante pa siña for di hombernan manera Moises, Aron, Bezalel i otronan cu a conocé e diseño i funcion di e tabernáculo personalmente.—Éxodo 36:1.

[Nota]