Unda Bo Por Haña Berdadero Balornan Religioso?
“SI BO kier sigui un religion djis pa no kibra ku tradishon di famia, pakiko no skohe e religion selta ku nos antepasadonan a praktiká 2.000 aña pasá?” Rodolphe ta puntra ku un tono di mofa. E idea ta pone e hóben ku ta skuch’é smail.
“Mi relashon ku Dios ta masha importante pa mi,” Rodolphe ta bisa. “Mi ta totalmente kontra e idea ku pa tradishon mi ta obligá pa sigui sierto konvikshon religioso djis pasobra mi famianan ku a biba desena òf asta sentenáres di aña pasá a praktiká un sierto religion.” Rodolphe a evaluá kosnan bon; e no a trata e asuntu importante aki djis komo algu ku el a heredá.
Ounke awendia no ta manera ántes mas ku religion ta pasa di un generashon pa otro, ainda mayoria hende ta pertenesé n’e religion di nan famia. Pero ta semper korekto pa pega n’e balornan religioso di bo mayornan? Kiko Beibel ta bisa?
Despues di a pasa 40 aña den desierto, Josué, susesor di Moisés, a pone e israelitanan dilanti un eskoho: “Si ta desagradabel den boso bista pa sirbi SEÑOR, skohe pa boso mes awe kende boso lo sirbi: sea e diosnan ku boso tatanan tabata sirbi, kualnan tabata na e otro banda di Riu Eufrates, òf e diosnan di e amoreonan, den kende nan tera boso ta biba; ma pa loke ta ami i mi kas, nos lo sirbi SEÑOR.”—Josué 24:15.
Un di e tatanan òf antepasadonan ku Josué a referí na dje tabata Taré, tata di Abraham, kende a biba den e stat di Ur, den e tempu ei situá na ost di Riu Eufrates. Beibel no ta papia muchu di Taré. Sí e ta bisa ku e tabata adorá otro diosnan. (Josué 24:2) Su yu Abraham, ounke e no tabatin un komprondementu kompleto di e propósito di Dios, tabata dispuesto pa bandoná su stat natal ora Yehova a mand’é hasi esei. Sí, Abraham a skohe un religion diferente for di esun di su tata. Dor ku el a hasi esei, Abraham a risibí e bendishonnan ku Dios a primintié, i el a bira e persona ku hopi religion ta rekonosé komo “tata di tur ku ta kere den Dios.”—Romanonan 4:11, Today’s English Version.
Tambe Beibel ta papia bon di Ruth, antepasado di Hesukristu. Ruth, un muhé moabita kende tabata kasá ku un israelita, a bira biuda i a hañ’é ta tuma un desishon: keda den su pais òf bai Israel bèk huntu ku su suegra. Rekonosiendo e balor superior di Yehova su adorashon kompará ku e adorashon di dios falsu ku su mayornan a praktiká, Ruth a deklará na su suegra: “Bo pueblo lo ta mi pueblo, i bo Dios, mi Dios.”—Ruth 1:16, 17.
Komentando riba e importansia di e relato aki den e historia di Beibel, Dictionnaire de la Bible ta splika ku e relato aki ta mustra “kon un muhé di un pais stranhero, ku a nase den un pueblo pagano, enemigu di Israel, i odiá pa Israel, . . . tabatin e oportunidat úniko di bira antepasado di santu Rei David pa motibu di su amor pa Yehova su nashon i adorashon.” Ruth no a duda pa skohe un religion ku tabata diferente for di esun di su mayornan, i komo resultado di e desishon ei, el a risibí e bendishon di Dios.
E relato ku ta konta kon kristianismo a kuminsá ta splika mas kla ainda pakiko Hesus su disipelnan a bandoná e religion di nan antepasadonan. Den un diskurso masha konvinsente apòstel Pedro a invitá su ouditorio pa “skapa for di e generashon pèrvèrso aki” dor di repentí di nan pikánan i batisá den e nòmber di Hesukristu. (Echonan 2:37-41) Un di e ehèmpelnan mas remarkabel tabata esun di Saulo, un hudiu ku a persiguí kristiannan. Ora e tabata riba kaminda pa Damasko, el a mira un vishon di Kristu, despues di kua el a bira kristian. El a bira konosí komo apòstel Pablo.—Echonan 9:1-9.
Mayoria di e promé kristiannan no a pasa den un eksperensia espektakular asina. No opstante, nan tur mester a bandoná sea hudaismo òf e adorashon di vários dios pagano. Esnan ku a aseptá kristianismo tabata bon na haltura di e echonan, hopi bes despues ku nan tabatin kòmbersashonnan largu tokante e papel di Hesus komo e Mesias. (Echonan 8:26-40; 13:16-43; 17:22-34) Klaramente, e promé kristiannan ei tabata bon konsiente ku nan mester a hasi kambio den nan bida. Tantu hudiu komo hende no-hudiu a haña e invitashon, pero e mensahe a keda meskos. Pa agradá Dios, tabata nesesario pa sigui un forma nobo di adorashon, esun di kristianismo.
Un Opshon Relevante pa Nos
No tin duda ku e hendenan den promé siglo mester tabatin kurashi pa rechasá tradishon religioso di famia—manera hudaismo, adorashon di emperador, adorashon di diosnan paganu—i pa djòin un movementu ku tantu hudiu komo romano a ridikulisá. Den poko tempu e eskoho aki a hiba na persekushon kruel. Awe, bo mester tin un kurashi similar pa bo no “laga e ambiente reinante di konformá bo ku loke bo ta, traga bo i tene bo den su gara,” manera Hippolyte Simon, obispu katóliko di Clermont-Ferrand ta bisa den su buki Vers une France païenne? (Rumbo pa un Fransia Pagano?) Bo mester tin kurashi pa asosiá ku un movementu religioso minoritario ku sa ser kritiká: Testigunan di Yehova.
Paul, un yònkuman di Bastia, Corsica, kende a lanta den religion katóliko, tabata partisipá de bes en kuando den aktividatnan di iglesia, manera bendementu di bolo pa krea fondo pa un organisashon katóliko di karidat. E kier a komprondé Beibel mihó, p’esei el a bai di akuerdo pa kombersá regularmente ku Testigunan di Yehova. Ku tempu el a realisá ku loke e tabata siñando lo a resultá den benefisionan duradero. P’e motibu ei, Paul a aseptá e balornan di Beibel den nan totalidat i a bira un Testigu di Yehova. Su mayornan a respetá su desishon, lokual no a afektá nan lasonan estrecho di famia.
Amélia ta biba den sur di Fransia. Kuater generashon di su famia ta Testigu di Yehova. Pakiko el a opta pa aseptá e balornan religioso di su mayornan? E ta bisa: “Bo no ta bira Testigu di Yehova pa motibu ku bo mayornan òf welanan ta òf tabata Testigu di Yehova. Pero un dia, bo ta bisa bo mes, ‘Ta mi religion pasobra esakinan ta mi konvikshonnan.’” Meskos ku hopi otro hóben Testigu di Yehova, Amélie sa ku su konvikshonnan religioso sólido ta dun’é un propósito den bida i ku nan ta un fuente di felisidat duradero.
Pakiko Aseptá Balornan di Dios
E buki di Proverbionan, kapítulo 6, versíkulo 20, ta animá personanan ku kier agradá Dios: “Mi yu, warda e mandamentu di bo tata, i no bandoná e siñansa di bo mama.” En bes di rekomendá hóbennan pa sigui otronan siegamente, e konseho ei ta animá nan pa aseptá normanan di Dios dor di profundisá nan fe i dor di tuma nan posishon na e banda di Dios. Apòstel Pablo a invitá su kompañeronan pa “saminá tur kos,” averiguá si loke nan tabata siña tabata na armonia ku e Palabra di Dios i Su boluntat, i pa aktua di akuerdo ku esei.—1 Tesalonisensenan 5:21.
Sea ku e mas ku seis mion Testigunan di Yehova a lanta den un kas kristian òf nò, hóben i bieu a tuma e desishon ei. Atraves di un estudio profundo di Beibel, nan a haña kontesta konfiabel riba nan preguntanan tokante e propósito di bida i a haña un komprondementu kla di Dios su boluntat pa humanidat. Despues di a haña e konosementu aki, nan a aseptá e balornan di Dios i ta hasi nan bèst pa kumpli ku e boluntat di Dios.
Sea ku bo ta un lektor regular di e revista aki òf nò, pakiko no aseptá e oferta di Testigunan di Yehova pa yuda bo analisá e balornan spiritual di Beibel. Den e manera aki, lo bo por “purba i mira ku SEÑOR ta bon” i haña e konosementu ku, ora bo pon’é na práktika, ta hiba na bida eterno.—Salmo 34:8; Juan 17:3.
[Plachi na página 5]
Kuater generashon di un famia Testigu di Yehova na Fransia
[Plachi na página 7]
Ruth a skohe pa sirbi Yehova en bes di e diosnan di su antepasadonan