Hesus Su Famia—Ken Nan Tabata?

NA vários parti di mundu durante e luna di desèmber bo ta mira esenanan di pesebre ku e beibi Hesus bou di kuido amoroso di su mama, Maria, i su tata di kriansa ku ta Hosé. E esenanan aki por hala atenshon di asta hende ku no ta yama nan mes kristian. Siendo ku e figura prinsipal den e esenanan aki ta Hesus, kiko e Skritura ta konta nos di Hesus su famia humano?

Hesus tabatin un background masha interesante. E persona ku a duna lus na dje tabata un bírgen ku yama Maria, i asina el a bira miembro dje famia humano. Segun Beibel, Dios a usa spiritu santu pa transferí Hesus su bida for di shelu pa e matris di Maria. (Lukas 1:30-35) Promé ku Hesus su konsepshon milagroso a ser anunsiá, Maria tabata komprometí ku un hòmber ku yama Hosé. P’esei, e a bira e tata di kriansa di Hesus.

Despues ku Hesus a nase, Hosé ku Maria a haña otro yunan, Hesus su mitar rumannan. Esaki ta bisto for dje pregunta ku e habitantenan di Názarèt a hasi tokante Hesus despues: “No ta yu di e karpinté esaki ta? No ta Maria su mama yama, i su rumannan: Santiago, Hosé, Simon i Hudas? I su ruman muhénan tur no ta aki serka nos?” (Mateo 1:25; 13:55, 56; Marko 6:3) For di esaki nos por konkluí ku Hesus su famia di kas a konsistí di su mayornan, kuater ruman hòmber i por lo ménos dos ruman muhé.

Sin embargo, awendia tin hende ku no ta kere ku e rumannan di Hesus tabata yunan di Maria ku Hosé. Dikon? Segun New Catholic Encyclopedia: “Desde su prinsipio, iglesia a siña su hendenan ku Maria semper tabata bírgen. En bista di esaki, hende a kere sigur ku Maria no tabatin otro yu.” E mesun obra di referensia ta bisa ku e palabranan griego pa ruman muhé i pa ruman hòmber por referí na “un persona òf personanan ku tin e mesun religion òf ku tin otro relashon komun ku otro” òf na famia, kisas primu.

Esei ta bèrdat? Asta algun teólogo katóliko ku no ta di akuerdo ku e doktrina tradishonal, ta apoyá e pensamentu ku Hesus tabatin ruman hòmber i ruman muhé karnal. John P. Meier, eks-presidente di e Asosiashon Katóliko di Beibel na Merka, a skirbi: “Ora e T[èstamènt] N[obo] usa e palabra adelphos [ruman] den un sentido ku no ta esun figurativo, ma pa indiká un tipo di relashon karnal òf legal, e ta nifiká solamente un ruman di e mesun tata i mama òf un mitar ruman i nada otro.”a Sí, e skritura ta indiká ku Hesus tabatin ruman hòmber i ruman muhé, kendenan a nase di e matrimonio di Hosé ku Maria.

E evangelionan ta menshoná otro famianan di Hesus tambe, pero laga nos konsentrá aworakí riba Hesus su famia di kas i wak kiko nos por siña for di nan.

[Nota]