666—No Djis un Misterio

“Ningun hende no por kumpra ni bende, ku eksepshon di esun ku tin e marka: e nòmber di e bestia òf e number di su nòmber. Ata sabiduria aki. Laga esun ku tin komprondementu kalkulá e number di e bestia, pasobra e number ta number di un hende; i su number ta 666.”—Revelashon 13:17, 18.

POKO tema di Beibel a yega di lanta asina tantu interes i preokupashon manera e profesia tokante e marka, òf nòmber, misterioso di “e bestia [“salbahe,” NW]”—e number 666. Na televishon, riba Internet, i tambe den pelíkula, buki i revista, tin masha hopi spekulashon rondó di e marka di e bestia.

Algun hende ta kere ku e number 666 ta e marka di e antikristu ku Beibel ta papia di dje. Otronan ta bisa ku e ta nifiká un forma di identifikashon obligatorio, manera un tatú òf un chip implantá den kurpa di un persona ku un kódigo digital ku ta identifiká e persona ei komo un sirbidó di e bestia. Un otro grupo di hende ta kere ku 666 ta e marka di e papa katóliko. Dor di supstituí e lèternan di un di e títulonan ofisial di papa, Vicarius Filii Dei (Vikario di e Yu di Dios), ku sifranan romano i bòltu nan un poko, nan ta yega na 666. Ademas, tin hende ta pretendé ku bo por yega na e mesun sifra aki dor di hunga ku e lèternan di e nòmber latin di Emperador Romano Diocleciano i tambe ku e vershon hebreo di e nòmber Nero Cesar.a

Sin embargo, e interpretashonnan aki, sea imaginá òf inventá, ta hopi diferente for di loke Beibel mes ta bisa tokante e marka di e bestia, manera nos lo mira den e siguiente artíkulo. Beibel en bèrdat ta revelá ku esnan ku tin e marka lo eksperensiá e rabia di Dios ora e pone fin n’e sistema di kosnan aki. (Revelashon 14:9-11; 19:20) P’esei ta muchu mas importante pa nos komprondé e nifikashon di 666 ku djis resolvé un misterio interesante. Nos ta kontentu ku Yehova Dios, e ehèmpel di mas grandi di amor i e Fuente di lus spiritual, no a laga e asuntu importante aki keda un misterio pa su sirbidónan.—2 Timoteo 3:16; 1 Juan 1:5; 4:8.

[Nota]