‘Hasi Orashon Asin’aki’

BO SA kiko e Orashon di Nos Tata ta bisa? E ta un orashon modelo ku Hesukristu a siña hende. Ora Hesus tabata duna su famoso Sermon Riba Seru, el a bisa: “Hasi orashon anto asin’aki.” (Mateo 6:9) Siendo ku ta Hesus a introdusí e orashon aki, tin hende ta yam’é e Orashon di Nos Señor, pero e ta bon konosí komo e Orashon di Nos Tata.—Latin, Paternoster.

Miónes di hende rònt mundu a siña e Orashon di Nos Tata for di kabes i ta ripitié hopi bes, kisas tur dia. Hopi persona ta ripití e orashon aki na skolnan i na eventonan públiko. Dikon hende ta duna asina tantu balor na e Orashon di Nos Tata?

Sipriano, teólogo di siglo 3 a skirbi: “Kua otro orashon lo por tin un nifikashon spiritual mas profundo ku esun ku Kristu a duna nos . . . ? Kua otro orashon na e Tata por ta mas verídiko ku esun ku e Yu, kende ta e Bèrdat, mes a pasa over na hende?”—Juan 14:6.

Den su buki di katisashi, Iglesia Katóliko Romano ta konsiderá e Orashon di Nos Tata komo “e orashon kristian fundamental.” The World Book Encyclopedia ta rekonosé e lugá importante ku e orashon aki tin den tur religion di kristiandat i ta yam’é un di e “deklarashonnan básiko di e fe kristian.”

Sin embargo, nos mester rekonosé sí ku hopi hende ku ta ripití e Orashon di Nos Tata no ta komprond’é plenamente. “Si bo tin kualke background kristian probablemente lo bo por bisa e Orashon di Nos Tata lihé-lihé, sin pousa pa kohe rosea” e korant di Canada, Ottawa Citizen ta bisa, “pero por ta lo bo tin difikultat pa bis’é na un manera trankil i komprondé loke bo ta papiando.”

Ta realmente importante pa komprondé e orashonnan ku nos ta hasi na Dios? Dikon Hesus a duna nos e Orashon di Nos Tata? Kiko e ta nifiká pa bo? Laga nos ban konsiderá e preguntanan aki.