Un Herensia Ku Bo Por Konta Kuné
“SI BO risibí un notifikashon via pòst ku bo ta bini na remarke pa haña un herensia ku ningun otro hende no a reklamá, tene kuidou. Bo por ta víktima di un chatiger.”
Asina e Servisio di Inspekshon Postal di Merka ta spièrta riba su website. Dikon? Pasobra míles di hende a risibí un notifikashon via pòst di ku ‘un famia di bo a muri i a laga un herensia pa bo.’ Esei a pone ku hopi hende a manda un suma di 30 dòler òf mas pa nan por a haña kopia di un ‘akta’ ku supuestamente lo a indiká unda e herensia tabata situá i kon lo e por a ser reklamá. Nan a keda kompletamente desapuntá. Tur hende ku a respondé a risibí kopia di e mesun akta—i e chèns pa un hende heredá algu tabata práktikamente nulo.
E trikinan ei ta spesialmente diseñá pa probechá di hende su deseo natural pa haña un herensia. Sin embargo, Beibel ta papia faborablemente di hende ku ta laga un herensia atras, bisando: “Un bon hende ta laga un herensia pa yunan di su yunan.” (Proverbionan 13:22) De echo, Hesukristu mes ta esun ku a hasi e siguiente deklarashon bon konosí i tan gustá den su Sermon Riba Seru: “Bendishoná ta esnan humilde, pasobra nan lo heredá e tera.”—Mateo 5:5.
Hesus su palabranan ta pone nos pensa riba loke Rei David di Israel di antigwedat a skirbi bou di inspirashon siglonan mas promé: “E humildenan lo heredá e tera, i lo deleitá nan mes den pas abundante.”—Salmo 37:11.
“Heredá e tera”—ki un ekspektativa eksitante! Pero nos por ta sigur ku esaki no ta djis un otro trampa pa ranka kos for di hende? Sigur ku sí. Pensa riba esaki. Siendo ku tera ta parti di Yehova su kreashon maravioso, e komo e Kreadó i Doño tin e derecho legal pa lag’é komo herensia pa ken ku e ke. Pa medio di Rei David, Yehova a hasi e promesa profétiko aki na Su Yu stimá, Hesukristu: “Pidi mi, i siguramente lo mi duna bo e nashonnan komo bo herensia, i e finnan di tera komo bo poseshon.” (Salmo 2:8) P’e motibu aki, apòstel Pablo a deskribí Hesus komo esun “kende [Dios] a nombra komo heredero di tur kos.” (Hebreonan 1:2) P’esei, nos por tin pleno konfiansa ku ora Hesus a bisa ku e humildenan “lo heredá e tera,” el a hasi esei di buena fe, i e tin e debido outoridat tambe pa kumpli ku su promesa.—Mateo 28:18.
E pregunta krusial anto ta: Kon e promesa ei lo kumpli? Unda ku nos mira awe, ta parse ku ta nèt e hendenan agresivo i arogante ta mas eksitoso i ta bai ku tur loke nan ke. Kiko ta sobra p’e humildenan? Ademas, tera tin problema serio di polushon, i hende golos i esnan ku no tin kunes ku mañan ta hasiendo mal uso di su rikesa natural. Akaso lo tin un tera ku ta bale la pena heredá? Nos ta invitá bo pa lesa e siguiente artíkulo pa bo haña kontesta riba e preguntanan aki i otronan importante.
[Plachi na página 3]
Bo ta bini na remarke pa un berdadero herensia?